Inyipicikeu Ju

Qâ së qaathei Iehova la troa “hnine la ihnim.” (Mika 6:8) Nge nyipi ewekë la thiina celë e hnine la faipoipo, wanga patre pi thei lue trefën la inyipicikeu. Nge e pëkö inyipicikeu, thatreine kö troa kökötr la ihnim e hnine la faipoipo.

Ame enehila, jole catre troa cile huti la ihnim e hnine la faipoipo. Celë hi kepine matre lue ewekë nyine tro epuni a kuca, matre troa thupëne la faipoipo i epun.

1 LOI E TROA TRU KOI EPUNI LA FAIPOIPO

ÖNI TUSI HMITRÖTR: “The tune kö la ite hmo, ngo tune ju la ite ka inamacan.” (Efeso 5:15, 16) Ame la atr ka inamacan, tre ka tru koi angeic la faipoipo. Celë hi lai ewekë hnei angeice hna amë panëne ngöne la mele i angeic.

Iehova a ajane tro epuni a wang atrune la föi epun, me “mele madine” me angeic. (Ate Cainöj 9:9) Ase hë Nyidrëti qaja hnyawane ka hape, tha tro kö epuni a wang acone la föi epun, ngo tro pala hi epuni a thele jëne troa amadrinë angeic. (1 Korinito 10:24) Kuca jë la itre ewekë ka amamane koi angeice ka hape, madrine epuni troa ce mele me angeic, nge ka nyipi ewekë fe la ixatua i angeice koi epun.

NYINE KUCA:

• Loi e tro pala hi a hetre ijine i epuni troa ce memine la föi epun, me amamane koi angeice la ihnimi epuni ka pexej

• Mekune ju hë koi epon, ngo tha koi ala casi hmaca kö

2 NYIPI THUPËNE JU LA HNI

ÖNI TUSI HMITRÖTR: “Ame la ate goeëne la fö’ i ket’ ate me meciu nyido, ase hë angeice kuci ngazo me nyido e kuhu hni.” (Mataio 5:28) Maine tro pala hi ketre a lapaa mekune la itre ewekë ka sis, kösë lo angeice hi lai a nyixetë trij la föi angeic.

Öni Iehova: “Nyipi thupëne hnyawa ju la hni ’ö.” (Ite Edomë 4:23; Ieremia 17:9) Ngo ame la hnapan, tre ene la troa thupëne la itre ewekë hnei epuni hna goeën. (Mataio 5:29, 30) Mekune ju lo tulu i Iobu; hnei nyidrëti hna sisiny memine la lue meke i nyidrë, matre tha tro kö nyidrëti a piine menun la ketre föe. (Iobu 31:1) The tro pi kö a tupath troa goeëne la itre iatr ka sis. Nge trije pi la nöjei mekune ka ngazo ka troa uku epun, troa piine menune la ketre föe maine ketre trahmany.

NYINE KUCA:

• Amamane jë koi itre xan ka hape, ka pexeje la ihnim i epuni koi föi epun

• Maine tha madrine kö föi epuni la epuni a lapaa nango epe koi ketre atr kö, canga hmaca ju