Kötrene La Joxu Ka Ngazo

Iosefa a ahlë Maria me canga qaja la ketre ewekë. Hna mama koi angeic la angela i Iehova ngöne pu, me hape: “Cile jë, xome jë la nekönatre me thine i nyën, nge kötre jë Aigupito eë, me lapa e cili uti hë la tro ni a thuemacanyi eö, ke tro Herodra a thele troa humuthe la nekönatr.”—Mataio 2:13.

Matre ngöne ju kö la heji cili, hnei Iosefa, me Maria me nekö i nyidro hna kötr. Nge eloine hi, ke atre hë Herodra laka, ase hë elo angeic hnei itre magoi. Hnei angeic lo hna upi angatr troa bëeke hmaca, me thuemacanyi angeic la hnalapa i Iesu, ngo tha kuca kö angatr, ke koilo hë angatr. Ame hna elëhni hnei Herodra. Nge pine laka, aja i angeice pala hi troa humuthi Iesu, hnei angeic hna amekötin troa humuth asë la nöjei nekönatr trahmanyi e Bethelema me e trön, qaane ju hi la ka lue macatre a utipië. Hnei angeic hna amekötine lai, thenge la itre ithuemacanyi hna hamën hnei itre magoi ka traqa qa Koië.

Tha fene ngazo kö la troa humuthe la itre nekönatr! Eje hi, thatre kö së la etrune la itre nekönatr hna humuth, ngo ame la itre sue me itre treije ne la itre thin, tre hna eatrëne la ketre hna perofetan hnei Tusi Hmitrötr jëne Ieremia, perofeta i Akötresie.—Ieremia 31:15.

Eloine hi, kötre hë Iosefa me fami angeic e Aigupito, nge angatr hë a mel e cili. Ngöne la ketre hej, hnene la angela i Iehova hna mama koi Iosefa ngöne pu me hape: “Mejë jë, xome jë la nekönatr me thine i nyën, nge tro jë kowe la nöje Isaraela, ke meci hë la itre ka thele troa xome la mele ne la nekönatr.” (Mataio 2:20) Haawe, xecie hë koi Iosefa laka, ijiji angeice hë me fami angeic troa bëeke hmaca kowe la zi angatr. Celë hi ka eatrën la ketre hna perofetan hnei Tusi Hmitrötr—Hna hëne la nekö i Akötresie qa Aigupito.—Hosea 11:1.

Aja i Iosefa troa mel e Iudra me fami angeic, nge tha nanyi kö qa Bethelema, traon hnei angatr hna mele ngön qëmekene troa kötr a tro Aigupito. Ngo dreng ju hi angeic ka hape, ase hë acili joxu Arekelao nekö i Herodra, ketre joxu ka ngazo. Matre ngöne pu, hnei Akötresie hna canga hmekë Iosefa. Angeic me fami angeic a tro ju e kolopi e Nazareta, ketre traon ne Galilaia ka nanyi qa Ierusalema, lo zi ne la hmi angetre Iudra. Matre hnei Iesu hna tru e Nazareta, nge celë hi ka eatrëne lo hna perofetan ka hape: “Troa hë nyidrë ka hape, atre Nazareta.”—Mataio 2:23.