Hnëqa Ne Atre Dreng

Itre ini ka tru la hna hamën hnei Iesu hnine la hnalapa ne la tane la itre Faresaio. Iesu hë a tro Ierusalema, nge kola xötrethenge nyidrë hnene la ka ala nyim. Hnauën? Tro kö angatre a nu asë matre xötrethenge Iesu?

Nyipin la gojenyi ne tro Ierusalema, Iesu a qaja jë la ketre ewekë ka asesëkötrë itre xan, öni nyidrë: “Maine tro la ketre atr a xötrethenge ni, nge tha pane methinëne kö la kem, me thin, me ifëkuku, me ha nekön, me trejin, me xa, me sipu mele i angeic, tha ijiji angeice kö troa ketre atre drei ni.” (Luka 14:26) Nemene la alien?

Tha Iesu kö e celë a qaja ka hape, tro sa methinëne la itre sinee së, e aja së troa xötrethenge nyidrë. Ngo ame la aliene la imethinë celë, tre ene la troa hnime catrë Iesu hui angatr. Ngo tha tro kö a tune lo ka xötrei faipoipo ka thipëne la ihë Iesu. (Luka 14:20) Hna qaja fe laka, hnei Iakobo, qaaqaa i angatr, hna “xele” Lea me hnimi Rakela. Kolo lai a hape, tru catre kö la ihnimi angeic koi Rakela hui Lea.—Genese 29:31.

Ketre, öni Iesu ka hape, tro la atre dreng a methinëne la “sipu mele i angeic.” Kolo lai a hape, tro angeic a hnime catrë Iesu hune la sipu mele i angeic, nge uti fe hë la troa meci pi nyidrë. Haawe, ketre hnëqa ka tru la troa atre drei Iesu. Tha ewekë nyine tro kö a wangacon.

Ketre, tro fe a traqa la itre itupath me iaxösisi kowe la atre dreng, ke öni Iesu: “Maine tha tro kö la ketre a ajöne la sinöe ne iaxösisi i angeic me xötrethenge ni fë, tha ijiji angeice kö troa ketre atre drei ni.” (Luka 14:27) Eje hi, loi e tro la atre dreng a hnëkë troa akötr, tune la aqane akötre Iesu. Nge öni nyidrëti fe ka hape, tro nyidrëti a mec ngöne la ime ne la itre ithupëjia.

Haawe, nyipiewekë tro la ka ala nyimu a pane mekune hnyawa la hnëqa ne la atre dreng. Iesu a acatrene la mekune cili me hamëne la ketre ceitun, öni nyidrë: “Drei e nyipunie la ka pi xupi uma nge tha tro kö angeic a pane lapa, me mekune hnyawa la thupen me wang ka hape, ijiji angeice kö troa afenesine la uma? Maine jë, tro angeic a ami trepen, ngo thatreine hë afenesin.” (Luka 14:28, 29) Matre qëmekene troa ketre atre drei Iesu, loi e tro la ka ala nyim a pane mekune hnyawa, me axeciën troa xome maine thipën, la hnëqa ne atre dreng. Iesu a qaja hmaca jë la ketre ceitun nyine acatrene la mekune cili. Öni nyidrë:

“Maine tro la ketre joxu a tro troa isi me ketre joxu, hapeu tha tro kö nyidrëti lai a pane lapa me hnyinge kowe la itre atresi ka hape, ijiji nyidrëti kö memine la ala 10 000 lao sooc troa ngaane lo ketre joxu ka 20 000 lao sooc? Nge e tha ijiji nyidrëti kö, nge nanyi petre kö la ketre joxu, haawe, tro pë hë nyidrëti lai a upe la itre qeneqaja i nyidrë troa thele tingeting.” Iesu a nyipune jë me hape: “Ketre tune mina fe, loi e xecie hnyawa koi nyipunie laka, maine tha hnei ketre kö hna inu memine la itre ewekë i angeic, thatreine kö angeice lai troa ketre atre drei ni.”—Luka 14:31-33.

Ngo eje hi laka, tha Iesu kö a ithanata 0hmekuje hi kowe la ka ala nyimu ka xötrethenge nyidrë. Ngo nyidrëti fe a ithanata kowe la nöjei atr ka pi atrepengöi nyidrë. Loi e tro angatr a atreine nu asë, nge uti fe hë la mele i angatr, matre xome la hnëqa ne atre dreng. Ewekë lai nyine troa mekune hnyawa, me thithi fë.

Enehila, Iesu a qaja hmaca la ketre ini hna ithanatane hë ngöne lo Cainöj Hune La Wetr, lo öni nyidrë ka hape, itretre drei nyidrë “la sootre ne la fen.” (Mataio 5:13) Maine jë, nyidrëti a qaja ka hape, tune la sootr ka thupëne la xen matre tha tro kö a pui hmëz, tro la itretre dreng a thupëne la itre atr. Tro angatr a xatuane la itre atr troa imelekeu hnyawa me Akötresie, me hetre mekun ka wië. Nge pine laka, easenyi hë matre afenesine jë nyidrë la huliwa ne cainöj, öni nyidrë: “Lolo la sootr, ngo maine troa patre la mene ne ej, tro lai a pui loi tune kaa?” (Luka 14:34) Atre hi la itre ka dreng ka hape, ame la sootr hna salemën, tre hna nyinyikön hnei dro, matre pëhë ecatren.

Iesu hi lai a amamane laka, loi e tro fe la itre ka pane xötrethenge nyidrë a thupën, wanga ae pi la trenge aja i angatr. Nge e tro lai a traqa, tro hë angatr a ceitu memine la sootr ka pë ecatren. Nge tro hë la fen a hnyimasai angatr. Nge ame la engazon, tre tro ha xele angatr hnei Akötresie, nge tro fe angatr a adrone la ëje i nyidrë. Celë hi matre öni Iesu: “Haawe, ame la atr trene hnangenyë troa dreng, drenge ju.”—Luka 14:35.