Inamacan e Troa Hnëkë

Jëne la ceitun ne la nekönatr ka patr, ma trotrohnine hë itretre hle mani, me itretre cinyihan me itre Faresaio laka, aja i Akötresie troa nue la ngazo ne la itre ka ietra. (Luka 15:1-7, 11) Enehila, Iesu a ithanata koi itretre drei nyidrë. Nyidrëti a hamë angatr la ketre ceitun. Kola qaja la atre ka trene mani, nge ka acil hune la hnalapa i angeic la ketre hlu ka tha huliwa hnyawa kö.

Iesu a qaja ka hape, hnene la hlu hna aluzine la itre ewekë ne la maseta, matre maseta a canga thuemacanyi angeic ka hape, tro ha upi angeic. Öni angeice jë hi: “Ka tro pë hë ni a ue la, ke ase hë ami ni hnei maseta qa ngöne la huliwa ne thupë hnalapa? Ketre, tha ijijinge kö troa trohneny, nge hmahma fe ni ma hane sipo.” Ame hnei angeic hna mekun me hape: “Atre hi ni la nyine tro ni a kuca, matre, e upi ni jë qa la, tro pë hë la itre xan a hane kepe ni ngöne itre hnalapa i angatr.” Angeic a canga hëne jë la itre ka trene gufa me hnying ka hape: “Ijetre la gufa i eö kowe la masetang?”—Luka 16:3-5.

Sa jë hi la hnaapan ka hape: “Ca hadredre lao tulu ne oel ne oliv.” Kola easenyi koi 2 200 litë oel. Ma ame la atre ce, angeic a eënyi oliv, maine atre ka salemë oel pena. Matre önine la hlu ka hape: “Xome hmaca jë la tusi ne gufa i eö, nge lapa ju, nge canga cinyianyine ju ka hape, 50 [maine 1 100 l].”—Luka 16:6.

Matre önine la hlu kowe la ketre ka hape: “Nge ame eö ke, ijetre la gufa i eö?” Sa jë hi angeic ka hape: “Ca hadredre lao tulu ne qitr,” ene 22 000 l. Önine la hlu ka hape: “Xome hmaca jë la tusi ne gufa i eö, nge cinyianyine ju ka hape, 80.” Matre hnene la hlu hna acone catrëne la gufa ne lai atr.—Luka 16:7.

Angeice pala kö la ka thupëne la itre ewekë i maseta, matre ijiji angeice hi troa huliwane la itre mo i maseta. Nge ame la angeic a ujë tun, tre göi troa nyi sineene la itre atre cili, matre e traqa jë upi angeic, tro hë angatr a hnimi angeic.

Ame hna drei mejen hnei maseta. Matre, ngacama luzi hë la itre xa mani i nyidrë, ngo nyidrëti a haine la hlu, me qaja aloinyi angeic, ke “ngacama ka ngazo angeic,” ngo “hnei angeic hna huliwa inamacan.” Öni Iesu jë hi: “Ame la itre atr ne la fene celë, tre itre ka huliwa inamacane kö angatre göi mani, hune la itre nekö ne la lai.”—Luka 16:8.

Tha Iesu kö a kapa la aqane ujë ne la hlu, maine iuku troa huliwa qenatrekënö. Nemene la ini? Öni nyidrë koi itretre dreng: “Thele sinee i nyipunieti jë jëne la itre trengamo ne fen, ke e traqa ju itre eje patr, tro pë hë la itre sinee cili a hane kepe nyipunie ngöne la itre hnë mel ka epine palua.” (Luka 16:9) Hetre ini, Iesu a inine troa canga hnëkë me huliwa inamacan. Ame koi itre hlue i Akötresie, lo “itre nekö ne la lai,” nyipiewekë tro angatr a huliwan inamacanëne la itre mo i angatr, me mekun la mel ka pë pun elany.

Iehova Akötresie me Nekö i nyidrë la ka ijije troa kapa la ketre atr ngöne la Baselaia ne hnengödrai, maine ngöne la paradraiso e celë fen hna musinën hnene la Baselaia. Haawe, loi e tro sa huliwane la itre ewekë së, matre tro fe sa hane nyi sinee i nyidro, ene la troa sajuëne la itre huliwa ne la Baselaia. Matre elany, e traqa jë patre la gool me sileva, me itre xa mo, tro kö së a kapa la mel ka pë pun.

Öni Iesu fe ka hape, ame la itre ka nyipici göi aqane troa huliwane la mani, maine mo, tro fe angatre a hane nyipici göi itre huliwa ka nyipiewekë catr. Ngo öni Iesu: “Ketre tune mina fe, maine tha hnei nyipunieti kö hna hane nyipici göi aqane huliwane la itre trengamo ne fen, nga tro drei a mejiune koi nyipunie, me nue koi nyipunie la itre nyipi mo?”—Luka 16:11.

Iesu a amaman koi itretre dreng ka hape, maine aja i angatr troa kepe angatr hnine la itre “hnë mel ka epine palua,” hetre ewekë nyine troa pane kuca. Thatreine kö tro la ketre atr a ce nyihlue i Akötresie me itre mo ne fen. Iesu a nyipune jë me hape: “Pëkö hlue ka atreine troa nyihluene la lue maseta, ke tro angeice lai a xelene la ketre, me hnime la ketre, maine fedre koi ketre, me methinëne la ketre. Thatreine kö nyipunie troa ce nyihlue i Akötresie me Mani.”—Luka 16:9, 13.