Mele Hmaca Ha Lazaro

Thupene la Iesu a iöhnyi me Maretha me Maria e Bethania, angatr a tro ju kowe la hua i Lazaro. Ketre ngönemenyi hna thing hnei etë ka tru. Matre öni Iesu, “Ukune pi lai ietë.” Tha trotrohnine kö Maretha la hnei Iesu hna pi kuca, matre öni angeic: “Joxu ma punepune hë angeic, ke foa ha lao drai la.” Ngo öni Iesu: “Tha hnenge kö lo hna qaja koi eö ka hape, maine tro eö a mejiun, tro hë eö a öhne la lolo i Akötresie?”—Ioane 11:39, 40.

Matre angatr a ukune pi lai etë. Iesu a gala jë draië me hape: “Kakati fe, oleti la hnei nyipëti pala hi hna drei ni. Nyipici, nyipëti pala hi a drei ni; ngo eni a ithanata tun pine la itre atr ka icileny, matre tro fe angatr a hane atre laka, nyipëti la atre upi ni.” Ame la Iesu a thith qëmeke i angatr asë, tre nyine amamane laka, Akötresie la atrekë ewekëne la men troa kuci iamamanyikeu. Thupene lai, nyidrëti a sue jë ka hape: “Lazaro, lö pi!” Nge Lazaro a lö pi, nge hna peleth la lue im me lu ca i angeic, nge hna thunge la alameke i angeic hnei sine imano. Matre öni Iesu: “Sei angeice pi, matre atreine angeice tro.”—Ioane 11:41-44.

Ala nyimu thene lo itre ka fetra koi Maria me Maretha ka öhne la iamamanyikeu celë, me lapaune koi Iesu. Ngo hnei itre xan hna tro koi itre Faresaio troa qejeqeje Iesu. Matre hnei itre Faresaio me itre tane i angetre huuj, hna acasine la Hnakootr Ka Tru i Angetre Iudra. Nge Kaiafa la atre huuj ka sisitria. Matre öni itre xan: “Nemene la nyine tro sa kuca, ke nyimu iamamanyikeu hna kuca hnene la atre ce? Ke maine pëkö hne së hna kuca, tro hë la itre atr asë a lapaune koi angeic, nge tro la itretre Roma a traqa me thapa la itre ewekë së, me nöje së.” (Ioane 11:47, 48) Ngacama hetre ka anyipicine la “itre iamamanyikeu” i Iesu, ngo tha madrine kö angatr la huliwa i Akötresie hna eatrën jëne Iesu. Angatre pe a wangatrune la götrane qa i angatr, me musi angatr.

Maca ka ngazo koi itre Sadukaio la hna amele Lazaro hmaca, ke tha mejiune kö angatr kowe la mele hmaca. Ngo öni Kaiafa, ketre Sadukaio, ka hape: “Pëkö ca hnei nyipunieti hna atre, nge goi tha trotrohnine fe nyipunie laka, nyine loi koi nyipunie e troa mec hnene la ala cas thatraqane la nöj, hune la troa apatrene la nöj asë.”—Ioane 11:49, 50; Itre Huliwa 5:17; 23:8.

Pine la hnëqa i Kaiafa, Akötresie a upi angeic troa qaja lai—ngo “tha qaathei angeice kö.” Ame koi angeic, loi e troa humuthi Iesu, wanga pë pi ecatrene la mus me men i itre hene ne hmi. Ngo ngöne la hnei angeic hna perofetan, kola mama laka, jëne la mec i Iesu, tro ha të la thupene mel koi angetre Iudra, me kowe “la nöjei nekö i Akötresie ka isa ije.”—Ioane 11:51, 52.

Haawe, kapa jë hi la Hnakootr Ka Tru troa humuthi Iesu. Nge ma hnei Nikodremo, ketre atrene la Hnakootr Ka Tru, hna canga thuemacanyi Iesu la ewekë hna axeciën. Matre Iesu a canga kötre pi qa Ierusalema, wanga humuthi nyidrëti pi qëmekene la drai hna sa hnei Akötresie.