Organizasio Ka Kuca La Aja i Iehova

AME e cailo fen, nyimutre catre la itre organizasio i hmi, me politik, me itre ka salem, me itre xa organizasio ju kö ka isa pengön, nge ka isa sajuëne la itre sipu aja i angatr. Tru ju hë la etrune la itre atrene itre ej maine co pena, ngo hna eköthe la aqane huliwa i angatre thenge la itre mekune i atr. Ngo hetrenyi la ketre organizasio ka isa pengöne kö memine la itre organizasio cili. Tusi Hmitrötr a aijijë së troa atrehmekune la organizasio cili, kolo hi lo Itretre Anyipici Iehova. Isapengöi angatre kö me itre xane ke angatr a melëne la itre trepene meköti ne la Tusi Hmitrötr ngöne la nöjei götrane la mele i angatr.

² Pine laka, ketre Atre Anyipici Iehova ha epun ka sa xepu koi Nyidrë nge ka bapataiso hë, haawe, epuni fe hë a hane madrine troa sine la organizasio i Iehova. Nge thupene la hna atrepengöne hnyawa la aja i Akötresie, epuni hë enehila a trongëne ej. (Sal. 143:10; Rom. 12:2) Epuni la ketre atre cainöj ka catre ce huliwa memine la lapa ne la itre trejine ka ihnim e cailo fen. (2 Kor. 6:4; 1 Pet. 2:17; 5:9) Tune lo hnei Iesu hna thingehnaean, celë hi la ka troa thue manathithi ka tru koi epuni ngöne la hneijine celë. (Ite edomë 10:22; Mar. 10:30) Maine tro epuni a nyipici me casi troa kuca la aja i Iehova, epuni hi lai a hnëkë epuni kö kowe la mele ka loi elany, nge ka epine palua.—1 Tim. 6:18, 19; 1 Ioane 2:17.

³ Hetrenyi Iehova, Atre Xupi së, la ketre organizasio e cailo fen laka, pëkö ka ceitu memin. Hna eköthe me amekötin ej, thenge la aja i Akötresie. Ka pexeje hnyawa la mejiune së koi Nyidrë, Atre Ameköti së, me Atre Ithue Wathebo së, me Joxu së ka epine palua. (Is. 33:22) Pine laka ka kuca amekötine Akötresie la itre huliwa, haawe, hnei Nyidrëti hna acile la itre hna amekötine ka troa xatua së troa “ce huliwa me nyidë,” matre troa aejëne la aja i Nyidrë.—2 Kor. 6:1, 2.

⁴ Pine laka calemi catre hë la pune la fene celë ka ngazo, easa catre troa mele nyipici me drengethenge Iesu Keriso, Joxu hna acile hnei Akötresie, nge atre elemekene me musinë së. (Is. 55:4; Hna ama. 6:2; 11:15) Iesu hi lo atre thingehnaeane ka hape, tro la itretre drei nyidrë a kuca la ketre huliwa ka tru kö hune lo huliwa hnei nyidrëti hna kuca ha e celë fen, ngöne la kola cainöjëne la Baselaia me inine la itre atr. (Ioane 14:12) Tro ha eatre lai, pine laka tro ha tru la etrune la itretre drei nyidrë, me qea catre fe la ijine tro angatr a cainöj, nge ketre, atraqatre catre kö la teritoare hnei angatre hna troa trongën. Tro hë angatr a cainöjëne la maca ka loi ne la Baselaia e cailo fen me inine la itre atre ne la nöjei nöj.—Mat. 24:14; 28:19, 20; Ite Hu. 1:8.

⁵ Hnene la itre hna melëne hna amë e hnine la itus, Annuaire des Témoins de Jéhovah, hna anyipicine laka, eatre hë la hna qaja amë hë hnei Iesu. Ngo tune lo hna qaja ha hnei Iesu, tro ha nyipune la huliwa ne cainöjëne la maca ka loi ngöne la ijine hna sa hnei Iehova. Kola anyipicine hnene la itre hna perofetane asë ngöne la Wesi Ula i Akötresie ka hape, calemi catre hë la drai atraqatre i Iehova, lo hna xouen.—Ioela 2:31; Zef. 1:14-18; 2:2, 3; 1 Pet. 4:7.

⁶ Pine laka, wangatrehmekune hi la itre atrene la organizasio i Iehova laka, calemi catre hë la ijine cili, haawe, angatr a catre hmek. Nyipiewekë tro sa huliwa thenge la aqane ameköti ewekë i Iehova. Kolo lai a hape, loi e tro sa atre hnyawa la aqane eköthe la organizasio i Nyidrë, me catre ce huliwa hnyawa memine ej. Hna nyitrepene la organizasio cili hnene la Wesi Ula i Akötresie, ene la itre trepene meköt, me itre wathebo, me itre hna amekötin, me itre hnei Akötresie hna upi së troa kuca, me itre ini hna hamëne hnene la Wesi Ula i Nyidrë.—Sal. 19:7-9.

⁷ Maine tro sa kapa me trongëne la itre hna amekötine qa hnine la Tusi Hmitrötr, haawe, tro hë la nöje i Iehova asë a ce huliwa ngöne la casi me tingeting. (Sal. 133:1; Is. 60:17; Rom. 14:19) Nemene la ka acatrene hnyawa la aqane imelekeu ne la itre trejin e cailo fen? Ihnimi hi. Qa ngöne laka, easa melëne la thiina cili, haawe, kola mama la ihnimi cili ngöne la aqane ujë së kowe la itre trejin me easë. (Ioane 13:34, 35; Kol. 3:14) Maine tro sa ujë thenge la aja i Iehova tro palahi sa ce trootro hnyawa memine la götrane ka tha mama kö ne la organizasio i Iehova.

GÖTRANE KA THA MAMA KÖ NE LA ORGANIZASIO I IEHOVA

⁸ Hnene la itre perofeta, ene Isaia me Ezekiela, me Daniela hna hane meköle goeëne la götrane ka tha mama kö ne la organizasio i Iehova. (Is. mek. 6; Ezek. mek. 1; Dan. 7:9, 10) Ioane mina fe la ketre ka öhne lai, nge hnei nyidrëti hna aijijë së troa hane atrepengöne la hnei nyidrëti hna öhn, jëne la tusi Hna Amamane. Hnei nyidrëti hna öhnyi Iehova ngöne la ketre therone ka draië, nge ce Nyidrë memine la itre angela ka qaja ka hape: “Hmitrötr, hmitrötr, hmitrötr, Joxu Akötresieti Kapucatinasë ene lo ka hekö, ka ej, nge ka epine palua.” (Hna ama. 4:8, MN) Hnei Ioane mina fe hna öhne e “nyipine la theron . . . la Arenio.” Iesu Keriso hi lai Arenio i Akötresie.—Hna ama. 5:6, 13, 14; Ioane 1:29.

⁹ Kola mama ngöne la hna meköle goeëne hnei Ioane laka, Iehova a lapa hune la therone i Nyidrë, nge Nyidrëti a elemekene la götrane cili ne la organizasio. Kola qaja hnene la tusi 1 Aqane lapa ite Joxu 29:11, 12 göi Akötresie memine la göhnë ka sisitria i Nyidrë, ka hape: “Iehova fe, enëtilai la ka sisitia, me ka men, me ka lolo, me cat, me nyine atrun; ke nöjei ewekë i cilieti la nöjei ewekë asë e koho hnengödrai me e celë fen; Iehova fe, enëtilai la baselaia, nge atre atrunyi [enëtilai kö hune] la nöjei ewekë asëjëihë. Nge qa thei enëtilai la nöjei mo, memine la lolo, nge enëtilai a musinën’ it’ ej’ asë; nge thei enëtilai la mene me cat, nge qâ i enëti kö lai troa atrune me thue tenge caten’ asë.”

¹⁰ Pine laka Iesu Keriso a ce huliwa me Iehova e koho hnengödrai, haawe, ketre göhnë ka draië fe la hnei Iesu hna cilën. Hna hamë nyidrëti mina fe la musi ka tru. Eje hi, hnei Akötresie hna amë “la nöjei ewekë asë fene la lue [ca i Iesu], nge hna hamë nyidë nyine he ne la nöjei ewekë asë thatraqane la ekalesia.” (Efe. 1:22) Hnei Paulo aposetolo hna qaja göi Iesu ka hape: “Ase hë Akötesie nyipi atrunyi nyidëti jë draië, me hamë nyidëti la atesieti ka sisitia hune la nöjei ëjen’ asëjëihë; mate troa sa watingöneca asëjëihë kowe la atesi Iesu hnei angete hnengödrai, me fene hnengödrai, me fene la fene hnengödrai; nge mate amamanepi hnene la nöjei sesepeneqë asëjëihë, laka Iesu Keriso la Joxu, nyine atrunyi Akötesie Tetetro.” (Fil. 2: 9-11) Qa ngöne lai, ijije hi tro sa mejiune hnyawa laka, tro Iesu Keriso a eatrongë së hnyawa ngöne la meköt.

¹¹ Hnei Daniela perofeta hna meköle goeëne la Qatr Ka Hekö a lapa hune la therone i Nyidrë, nge itre angela ka “ca thausane la o thausan’ a nyi hlue i nyidë, nge ca miriade la o miriad’ a cile xajawa i nyidë.” (Dan. 7:10) Kola aceitunëne hnene la Tusi Hmitrötr la itre angela cili me ‘ite hlue hna upe troa nyihluene la nöjei matrane ka tro ha mel.’ (Heb. 1:14) Ame ngöne la organizasio i Iehova, hna isa acile la itre angela asë thenge la itre göhnë me hnëqa i angatr.—Kol. 1:16.

¹² Ame la easa pane mekune la itre ka nyi atrene la götrane ka tha mama kö ne la organizasio i Iehova, tre, easë hi lai a trotrohnine la aqane ujë i Isaia, ngöne la kola meköle goeë Iehova a të “hune la therone ka draië me sisitia,” nge “ite serafi a icilenyi thei [Nyidrë].” Öni Isaia ka hape: “Ekölö hi ni! ke meci hë ni; ke ate ngazo ineqë ni, nge ini a lapa thene la nöje ka ngazo la ite ukeineqë; ke hnei lue mekenge hna öhne la Joxu Iehova ne sabaoth.” Hna pane traqa e cili la xou atraqatr koi Isaia me pane ipië, ke trotrohnine hë angeice la aqane eköthe la organizasio i Iehova. Celë hi lai ka ketri angeice hnyawa. Matre, ame hë la kola hnying qa hnengödrai ka hape, “Tro ni a upi dei?” canga öni Isaia jë hi ka hape, ‘Eni hi la, upi ni jë.’ Ame lai huliwa ka tru nyine tro angeic a kuca tre, ene la troa qaja la iameköti Iehova.—Is. 6:1-5, 8.

¹³ Hnene laka, trotrohnine hnyawa ha la itre hlue i Iehova la pengöne la organizasio i Nyidrë, nge hetre hni ne ole i angatre kowe ej, haawe, angatr a ujë tui Isaia. Kolo palahi a tro la organizasio i Iehova, nge easë palahi a isine troa xötrethenge ej. Haawe, catre pi së mejiune kowe la organizasio i Iehova!

KA TRO PALAHI LA ORGANIZASIO I IEHOVA

¹⁴ Kola qeje Iehova hnene la hna perofetane ngöne la tusi Ezekiela mekene 1, ka hape, Nyidrëti a të ngöne la ketre ikariota ka tru e hnengödrai. Ame lai ikariota cili ka draië, tre, ej a nyi hatrene la götrane ka tha mama kö ne la organizasio i Iehova. Ame la Iehova a xomiujine la ikariota, kolo hi lai a hape, Nyidrëti a elemekene ej, me musinëne ej thenge la aja i Nyidrë.—Sal. 103:20.

¹⁵ Ame lai ca wiile ne lai ikariota, tre, hetrenyi fe la ketre iwiil e hnin, nge ceitune hi la lue eisaisane lue ej. Ame la aqane acatrene la itre wiil, tre, celë hi lai ka aijijë itre ej troa “trongëne la eke götran’ it’ ej.” (Ezek. 1:17) Hmaloi kowe lai ikariota troa canga saze gojeny, ke, ka qëmeke la itre iwiil kowe la nöjei götran. Ngo tha ka nyiape menu kö lai ikariota cili, ke, hetre ka inamacane ka xomiujine ej. Tha Iehova kö a nue lai organizasio i Nyidrë troa ketre sipu ië gojeny. Ezekiela 1:20 a qaja ka hape: “Ame la hnei [ua] hna troa tro kow’ angate fe a tro kow.” Haawe, uati hmitrötr la ka xatuane la organizasio troa xome la ketre gojeny, matre trotrohnine hi së ka hape, Iehova hi lai la atrekë mekunan. Haawe, nyipiewekë tro sa isa hnying, ka hape, ‘Hapeu, eni fe kö a hane ce tro hnyawa memine ej?’

¹⁶ Ame la aqane tro sa ce tro hnyawa memine ej, tre, tha ene hmekuje kö la troa sine la itre icasikeu me kuca pena la huliwa ne cainöj. Ngo ame la pane ewekë nyine troa goeën, tre, ene la troa akökötrene la lapaune së me thele troa atrepengöi Iehova hnyawa. Kolo lai a hape, tro sa ‘atrehmekune la nöjei ewekë ka tru alien,’ me xome palahi la göxeni qaathei Akötresie. (Fil. 1:10; 4:8, 9; Ioane 17:3) Ketre tha tro kö sa thëthëhmine laka, e hetre organizasio tre, kolo lai a hape, lolo la aqane eköthe nge kola ce huliwa hnyawa hnene la itre atren. Haawe, nyipiewekë tro sa atrehmekune laka, ka sisitria catr troa huliwane la traeme së, me trengecatre së, me itre talane së, me itre mo hne së hna kapa qaathei Iehova, matre troa eatrëne la huliwa i Nyidrë. Maine tro sa ce trootro memine la ikariota i Iehova e hnengödrai, haawe, tro ha mama laka, easa melëne la maca hne së hna tro fë.

¹⁷ Hnene la ixatua qaathene la organizasio i Iehova, matre hetre aja së troa kuca la aja i Nyidrë. Atre hi së lo laka, Iehova hi la Atre Xomiujine la ikariota e hnengödrai. Haawe, ame la easë a ce tro memine lai ikariota, tre, easë hi lai a amamane la hni ne ipië së kowe la musi Nyidrë memine la mejiune së koi Nyidrë, lo “giti” së. (Sal. 18:31) Tusi Hmitrötr a thingehnaeane ka hape: “Tro Iehova a hamëne la cate kowe la nöje i anganyidë; tro Iehova a amanathithine la nöje i nyidë hnene la tingeting.” (Sal. 29:11) Pine laka easë fe la ketre atrene la organizasio i Iehova enehila, haawe, easë a hane kapa la trengecatr me tingetinge qaathei Nyidrë. Nyipici, ka xecie hnyawa e kuhu hni së laka, tro palahi Iehova a amanathithi së, e tro sa trongëne la aja i Nyidrë enehila nge uti hë epine palua.