Itre Aqane Troa Akökötrene La Huliwa Ne Cainöj

TRAQA ha la ijine troa upe la itretre dreng troa cainöjëne la Baselaia, nge tru la huliwa. Öni Iesu: “Atraqate la meledrai, nge xalaithe hi la angete troa menue ; celë hi mate xëwejë nyipunie kowe la Joxu ne la meledrai, mate upepi la angete troa menue kowe la meledrai i anganyidë.” (Mat. 9:37, 38) Hnei nyidrëti mina fe hna amamane kowe la itretre dreng la aqane troa eatrën la huliwa ne cainöj, memine la enyipiewekëne lai. Öni nyidrë: “Tha tro kö nyipunie a waja asë la nöjei lapa e Isaraela, uti hë e traqa la Nekö i ate.”—Mat. 10:23.

² Ame enehila, tru catre fe la nyine troa kuca ngöne la huliwa ne cainöj. Easenyi catre hë matre nyipune pi la fen, celë hi matre nyipiewekë troa cainöjëne la maca ka loi ne la Baselaia. (Mar. 13:10) Ame la hlapa tre, fen, matre ceitune hi la pengö së me Iesu memine lo itretre drei nyidrë; ngo, ame enehila, atraqatre catre kö la aqane troa haöthe la fen hnene la maca ka loi. Ala xalaithe hi së, nge itre miliare la itre atr ka mele e celë fen. Ngo tha tro pi kö sa luelu, pëkö hna thatreine kuca hnei Iehova. Tro ha cainöjëne la maca ka loi ne la Baselaia e cailo fen. Nge tro ha traqa la pun elanyi ngöne la ijine hna sa hnei Iehova. Ngo tune kaa së, tro kö së a amë panëne la Baselaia matre tro sa eatrën hnyawa la hnëqa së, ene la troa cainöje trootro? Nemene la itre ewekë hne së hna ajane troa eatrën ngöne la götrane cili?

³ Hetre ewekë hnei Iehova hna thele thene la itre ka nue la mele i angatr troa nyihlue i Nyidrë. Öni Iesu: “Qa i ’ö troa [hnimi] joxu Akötresi ’ö hnene la hni ’ö ka pexej, me u i ’ö ka pexej, me mekune i ’ö ka pexej, me tenge cate i ’ö ka pexej.” (Mar. 12:30) Eje hi laka, qa së troa nyihlue i Akötresie hnene la u së ka pexej. Kola hape, tro sa isine troa kuca la hne së hna atrein ngöne la huliwa i Akötresie. Aqane tro së lai a amamane laka, easa qale catre koi Nyidrë, nge ase hnyawa ha së nue apexenyi së koi Nyidrë. (2 Tim. 2:15) Nyimutre la itre ewekë hna aijiji së troa kuca thenge la isa talane së, me thenge fe la itre hne së hna atreine kuca. Haawe, loi e tro epuni a wang la itre xa ewekë ka ijij koi epun troa kuca. Tro hë epun e cili a axeciëne la itre mekun hnei epuni hna ajan troa eatrën göne la huliwa ne cainöj.

TROA HANE KETRE ATRE CAINÖJ

⁴ Ame la atr ka kapa la nyipici, hnëqa i angeic troa tro fë la maca ka loi. Celë hi huliwa ka tru hnei Iesu hna ahnith kowe la itretre drei nyidrë. (Mat. 24:14; 28:19, 20) Eje hi laka, ame la atre drei Iesu, hnei angeic hna canga ithanatane la maca ka loi kowe la itre atr la angeic a xötrei dreng ej. Celë hi hna kuca hnei Anederea me Filipo me Konelio me itre xane ju kö. (Ioane 1:40, 41, 43-45; Ite hu. 10:1, 2, 24; 16:14, 15, 25-34) Hapeu, kolo lai a hape, ijije hi tro la atr a qaja la maca ka loi kowe la itre atr qëmekene troa xome la bapataiso? Eje hi. E trongëne hë angeic la itre hna amekötine thatraqane la atre cainöj hna tha bapataisone petre kö haawe, ijije hi tro angeic a hane cainöj ngöne itre hnalapa trootro. Nge, ijije fe tro angeic a hane xome la itre xa götran ne la huliwa ne cainöj thenge la hnei angeic hna atrein, me mele i angeic.

⁵ Thupene la hna xome la bapataiso hnene la atre cainöj, tro angeice lai a thele troa xatuane la itre atr troa atre la nyipici. Ketre hnëqa lai ka tru kowe la itre trahmany me föe la troa cainöje trootro. Nge, ketre madrine ka tru koi së la troa hane sajuëne la itre huliwa ne la Baselaia i Akötresie, ngacama co ju hë la hne së hna kuca. Tro lai a hetre madrinen la atr ka akökötrene la huliwa i angeic koi Akötresie me ka xome la itre xa aqane troa huliwa i Nyidrë.

TROA CAINÖJ NGÖNE LA GÖTRANE GAA AJA IXATUA

⁶ Maine jë, hna kuca lapane la teritoar ne la ekalesia i epun, nge lolo catre la thangane la hna cainöj e cili. Ame e cili, epuni a mekune troa akökötrene la aqane cainöje i epun, ene la troa tro kowe la ketre götran gaa aja ixatua. (Ite hu. 16:9) Maine ketre qatre thup epun, maine ketre drikona pena, tro la atre thupëne la sirkoskripsio a hamëne la itre xa ixatua göi aqane tro epuni a sajuëne la ketre ekalesia ne la sirkoskripsio ka aja ixatua. Maine epuni a ajan troa hane cainöj ngöne la kete götran ne la nöje i epun, tro la filial a hamëne la itre xa ithuemacanyi nyine xatua epun.

⁷ Hetre aja i epuni kö troa fek kowe la nöje trenyiwa? Nga, waipengöne hnyawa ju la mekune cili. Tro lai a hetre thangane koi epun memine fe la itre ka ce tro me epun. (Luka 14:28) Ce ithanatane jë memine la itre qatre thup ne la ekalesia. Nge, e tha mekune kö epun troa lapa aqeany e cili, thele jë troa ixatua ngöne la ketre götrane la nöje i epun.

⁸ Ame la itre trejin trahmany ngöne la itre xa nöj, angatr a xome la itre hnëqa matre thupën la ekalesia, ngo tha ka hekö catre kö angatr ngöne la nyipici. Matre, angatr a nue la itre hnëqa kowe la itre qatre thup ka maca, nge ka xötrei traqa ngöne la ekalesia. Ngo, e qatre thup epun, nge epuni a mekune troa fek kowe la ketre nöj, the thëthëhmine kö laka, ame la hnei epuni hna troa thel, tre, ene la troa ce huliwa me angatr, ngo tha ene kö la troa xome la göhne ne la itre trejin e cili. Xatua angatre jë troa ajane la itre hnëqa e hnine la ekalesia, me kapa itre ej. (1 Tim. 3:1) Maine hetre itre ewekë tha hna kuca kö tune la hna kuca ngöne la nöje i epun, xomihni ju me treqen. Xatuane jë la itre trejin jëne la itre hnei epuni hna melën ngöne la epuni a qatre thup. Ame hë e thupen, e mekune hë epuni troa bëek kowe la nöje i epun, maca ha la itre qatre thup ne lai nöj troa thupën hnyawane la ekalesia.

⁹ Tro la Komite Göi Huliwa ne la ekalesia i epun a iupi fë kowe la filial la tus göi epun, matre tro pë hë la filial a iupi fë koi epun la ëje ne la itre ekalesia ka ijij koi epun. Ka qatre thupe ju hë epun, maine drikona maine pionie, maine ketre atre cainöj, ngo ka nypiewekë catr la tusi cili. Tro la Komite Göi Huliwa a iupi fë mekötine la tusi cili memine la sipo i epun kowe la filial ne la nöj hnei epuni hna ajan troa huliwa ngön.

TROA CAINÖJE NGÖNE LA KETRE QENE HLAPA KÖ

¹⁰ Maine jë, epuni a ajan troa inine la ketre qene hlapa, tune la qene hum matre troa akökötrene la aqane cainöje i epun. Maine aja i epuni troa cainöje ngöne la ketre qene hlapa kö, ce ithanatane jë me itre qatre thup, memine la atre thupëne la sirkoskripsio. Tro angatre lai a hamëne la itre eamo me ixatua. Jëne la itre hna amekötin hnene la filial, hnene la itre xa sirkoskripsio hna kuca la itre ini thatraqane la itretre cainöj ka maca me itre pionie matre troa cainöje ngöne la ketre qene hlapa.

HULIWA NE PIONIE

¹¹ Loi e tro la itretre cainöj a atre la itre hna amekötin thatraqane la itre pionie ka ixatua, itre pionie lapa me itre pionie hut, memine lo itre xa aqane huliwa i Akötresie o drai. Ame la ka pionie, hna bapataiso angeice hë, nge ka amamai tulu ka loi. Hnene la aqane mele i angeic hna aijijë angeic troa eatrëne la etrune la itre hawa nyine tro angeic a kuca e nöjei treu ngöne la hna cainöje trootro. Komite Göi Huliwa ne la ekalesia la ka kapa la itre sipo ne la itre ka ajane troa pionie ka ixatua me pionie lapa. Ngo ame koi itre pionie hut tre, filial la ka acili angatr.

¹² Ijije hi troa pionie ka ixatua ngöne la ca treu maine nyimu treu pena hna xome ithöeën maine tha hna sa tulune pena kö, thenge la isa aqane melene la itre trejin ka pionie. Nyimutre la itretre cainöjëne la Baselaia ka xome la huliwa ne pionie ka ixatua ngöne la itre ijin ka tru, tune la hneijin ne Drai Ne Amekunën, maine ngöne pena lo ijine kola wange la ekalesia hnene lo atre thupëne la sirkoskripsio. Ame itre xan, angatr a mekune troa pionie ngöne la itre ijine mano. Maine jë, tro la itre ka cainöj hna bapataisone hë, nge ka ini petre kö, a ajan troa pionie ka ixatua ngöne la itre ijine mano. Tro la itretre cainöj a mekune troa pionie ka ixatua ngöne la treu Maac me Eiperem, me ngöne la treu ne iwai hnene la atre thupëne la sirkoskripsio. Itre treu lai laka, hna acone la itre hawa nyine troa eatrën. Ijije hi troa pionie ka ixatua thenge la hne së hna atrein. Maine ka lolo la aqane mele i epun, nge pëkö ewekë ka sis hnei epuni hna kuca, nge epuni a mekune troa eatrëne la itre hawa hna amekötin, me hane pionie ka ixatua ngöne la cas maine nyimu treu pena, haawe, tro ha madrine la itre qatre thup troa pane wange hnyawa la sipo i epuni göi troa pionie.

¹³ Maine epuni a ajan troa hane pionie lapa, nyipiewekë tro epuni a atreine eatrëne lo itre hawa hna amekötin ngöne la macatre. Loi e tro palahi la itre pionie lapa a ce huliwa hnyawa memine la ekalesia i angatr. Ketre manathithi la itre pionie e hnine la ekalesia, pine laka angatr a aciane la ajan thene la itre trejine troa cainöj, me ithuecatre fe kowe la itre xan troa hane xome la huliwa ne pionie. Ngo eje hi laka, qëmekene troa nyialiene la pepa ne sipo troa pionie lapa, nyipiewekë troa sikisi lao treu ne bapataiso epuni hë, me amamai tulu ka loi.

¹⁴ Hna iëne la itre pionie hut thene la itre pionie lapa ke, ase hë angatr amamane la hnei angatr hna atrein ngöne la huliwa ne cainöj. Matre tha jole kö koi angatr troa huliwa ngöne la götran hnei filial hna upi angatre kow. Maine jë troa upi angatr kowe la götran gaa nany, nge gaa hetre atr ka ajan troa atre la nyipici. Nge ame e cili, tro angatr a acile la itre ekalesia. Ame itre xa ijin, kola upe la itre pionie hut kowe la itre ekalesia ka aja ixatua, matre troa ketr asë la teritoar. Ame itre xa trejine ka nyimu macatre ne pionie hë, nge ka qatre thup, hna upi angatr kowe la itre ekalesia ka co matre troa ixatua. Nge ame e cili, tha kolo kö a aja ka cainöj. Kola kapa hnene la itre pionie hut la ketre neköi ixatua göi manie thatraqane la mele i angatr. Ame itre xa pionie hut, hna acili angatr koi itre hnepe ijine hi.

HULIWA NE MESINARE

¹⁵ Komite Ne La Huliwa Ne Cainöje i Lapa Ne Xomi Meköt la ka acil la itre mesinare. Nge, Komite Ne Filial ne la nöje pë hë la ka upi angatre kowe la itre götrane gaa tru atr. Tru pi hë la thangane la huliwa i angatre matre tro palahi a eatrëne me sajuëne la huliwa ne cainöj memine la itre huliwa ne la ekalesia. Hnei angatr hna sine la Ini Koi Itre Ka Cainöj maine Ini Ne Gileada. Hetre uma hna hnëkëne hë koi angatr, nge hetre neköi ixatua göi manie hnei angatr hna kapa thatraqane la mele i angatr.

HULIWA NE SIRKOSKRIPSIO

¹⁶ Ame la itre hna acil hnene la Lapa Ne Xomi Meköt troa thupëne la sirkoskripsio, hetre ini hnei angatre hna kapa, nge angatr a maca trootro hnene la hna inyihnai ngöne la huliwa ne sirkoskripsio. Ka tru koi angatr la huliwa ne cainöj, nge hnime catre angatre la itre trejin. Itre pionie angatr ka catre cainöj, me catre ini Tusi Hmitrötr, me itre ka maca troa cile fë cainöj, me hamë ini. Mama hnyawa thei angatr la wene ne la ua, nge itre ka atreine tulu ewekë angatr, me ka atreine waiewekë, me ka hetre wangatrehmekun. Maine ka faipoipo angeic, ka amamai tulu ka loi la föi angeic ka pionie ngöne la thiina i nyiidro, me aqane ce mele nyiidro me itre xa trejin. Ka maca nyiidro troa cainöj. Ketre, trotrohnine hnyawa hi nyiidro la hnëqa i nyiidro, ene la troa idrengethenge me ipië. Nge, tha ka xome kö la qa i trahmanyi troa ithanata, maine ka hune fë mekun. Ka tru huliwane catre la atre thupëne la sirkoskripsio me föi angeic, matre nyipiewekë troa egöcatr hnene la itre ka ajane troa xome la hnëqa cili. Tha itre pionie kö a nyialiene la pepa ne sipo troa huliwa ngöne la sirkoskripsio. Ngo, tro angatr a qaja la aja i angatr göne lai kowe la atre thupëne la sirkoskripsio. Tro pë hë nyidrëti lai a hamëne la itre ixatua koi angeic.

INI QAATHEI IEHOVA

¹⁷ Ini Koi Itre Ka Cainöj: Kolo palahi a aja itre ka cainöj matre troa huliwane la itre götrane hna tha kuca lapan, me acatrene la lapaune ne la itre trejin ne la ekalesia. Matre, loi e tro la itre trejin trahmanyi maine föe ka tha faipoipo kö, memine fe la itre trefën a nyialiene la pepa ne sipo troa hane sine la Ini Koi Itre Ka Cainöj. Ame hë la kola fenes la ini, kola upi angatr troa pionie lapa ngöne la götrane gaa aja ixatua ne la nöje i angatr. Ngo, ame koi itre ka ajan, troa athipi xa hnëqa i angatr ngöne la ketre götrane la nöje i angatr, maine ngöne la ketre nöje pena. Ame itre xan, hna acili angatr troa pionie hut maine koi itre hnepe ijine hi. Ame la itre pionie ka ajane troa hane sine la ini cili, loi e tro angatr a atre la itre hna amekötin thatraqai angatr ngöne la icasikeu hna hnëkën thatraqane lai ngöne la ijine asabele ka tru.

¹⁸ Ini Ne Gileada: Hna iëne la itre trejine trahmany, me föe ka tha faipoipo kö, me itre trefën troa hane sine la ini cili ka qene Papale, nge ka pionie hut, maine ka mesinare, maine itretre thupëne la sirkoskripsio, maine ka huliwa ngöne la Bethela. Ka maca hnyawa ha angatr troa sajuëne me acatrene la huliwa ne cainöj maine e hnine la Bethela. Hnei angatre hë hna amamane la aja i angatr troa ce huliwa memine la itre trejin. Nge hnei angatre fe hna xatuane la itre atr cememine la menyik troa atre la itre hna amekötin qa hnine la Tusi Hmitrötr, me qaathene la organizasio i Iehova. Filial ne la nöj la ka sipone la itre ka ijij troa nyialiene la pepa ne sipo. Troa upe la itre ka sine la ini cili troa huliwa ngöne la ketre nöje kö, ngo hna thupëne hnene la filial, maine ngöne la sipu nöje i angatre kö.

HULIWA HNINE LA BETHELA

¹⁹ Ketre manathith ka tru la troa huliwa e hnine la Bethela. Ame la Bethela, tre, kola hape “Uma i Akötresie,” nge ka ihmeku hnyawa la ëje cili memine la itre huliwa hna kuca e cili. Ka nyipiewekë catr la itre huliwa hna kuca hnene la itre trejin trahmanyi me föe e hnine la Bethela. Angatr a hnëkën, me ujën, me thawa la itre itus ka qejepengöne la Tusi Hmitrötr. Ka tru la huliwa i angatr kowe la Lapa Ne Xomi Meköt, lo ka thupën me elemekene la itre ekalesia ngöne la fene hnengödrai asë. Alanyimu la itre ka huliwa ngöne la Bethela, itre ka ujë qene hlapa. Angatr a mel me huliwa ngöne la itre teritoare ne la filial ka ithanatan la qene hlapa hnei angatre hna ujë itus ngön. Celë hi ka aijijë angatr troa drenge la qene hlapa i angatr e nöjei drai. Ketre, tro fe a canga mama koi angatr ka hape, trotrohnine hi la itre atr la aqane ujën angatr la itre itus.

²⁰ Ka nango catre pi hë la huliwa hna kuca hnine la Bethela. Celë hi matre, ame la itre hna hëne troa hane huliwa hnine la Bethela, tre, itre thöth hna bapataisone hë; pëkö sine meci angatr, nge ka egöcatre angatr. Maine kola aja ka huliwa ngöne la filial ka thupëne la nöje i epun, nge hetre aja i epun troa hane huliwa e cili, loi e tro epuni a sine la icasikeu thatraqane la itre ka ajane troa huliwa ngöne la Bethela ngöne lo ijine asabele ka tru, matre troa atre la itre hna amekötin thatraqane lai. Loi e tro fe epuni a thele ixatua thene la atre thupëne la sirkoskripsio göne la huliwa hnine la Bethela.

HULIWA NE XUPI UMA

²¹ Ame la xupi uma thatraqane la hmi, tre, ketre aqane huliwa i Akötresieti lai, ceitune hi lai memine lo kola xupe lo ēnē i Solomona ekö. (1 Ite jo. 8:13-18) Alanyimu la itre trejine trahmany, me föe, ka catr nue la traeme me mo i angatr matre troa hane ixatua ngöne la huliwa cili.

²² Hapeu, ijiji epuni kö troa hane ixatua? Maine hna bapataiso epuni hë, nge hetre aja i epuni troa hane ixatua ngöne la huliwa ne xupi uma, troa kapa madrin la ixatua i epun hnene la itre trejin ka elemeken la huliwa ne xupi uma ngöne la götrane nöje i epun. Nge hetre madrine i angatre fe troa ini epun e thatre kö epun la huliwa. Qaja jë la aja i epun troa ixatua kowe la itre qatre thup. Hnene la itre xa trejin ka eatrëne la itre hna amekötin hna hane saen troa hane ixatua xupi uma ngöne la itre xa nöj.

²³ Nyimu ijine ka ijij koi së troa hane ixatua xupi uma. Loi e tro la itretre cainöje hna bapataisone hë, nge ka amamai tulu ka loi, nge ka trene metie, a hane sajuëne la itre huliwa ne xupi uma hna kuca ezine la hnalapa i angatr, ene la troa saen troa xupi uma (volontaires locaux développement/construction). Ame itre xan, angatr a sajuëne la itre huliwa ngöne la itre götran ga nany, nge koi itre hnepe ijine hi, nge hna athipi hnëqa i angatr hnene la filial matre troa huliwa ceitu me itre ka saen troa xupi uma koi 2 lao wiik uti hë 3 lao treu. Ame la itre hna acil troa huliwa aqeany, tre hna hën ka hape, itre ka xupi uma. Ame la atre xupi uma ka kapa la hnëqa ne troa tro kowe la ketre nöj, tre angeice hë a huliwa ceitu me atre xupi uma ka mele trenyiwa. Ame ngöne la gurup ne xupi uma, tre hetrenyi la itre ka xupi uma me itre ka saen troa xupi uma. Angatr la ka hnëkën me amekötin la nöjei huliwa ne xupi uma, nge hna xatua angatr hnene la itre trejin ka saen (volontaires locaux développement/construction) me itre ka ixatua qa ngöne la itre ekalesia cili. Kola feke trootro la itre gurup ne xupi uma ngöne la itre götran ne la teritoare ne la filial.

NEMENE LA ITRE HNEI EPUNI HNA THEL TROA EATRËN?

²⁴ Maine ase hë epuni nue la mele i epun troa nyihlue i Iehova, eje hi lai laka, ame la aja i epun, tre, troa nyihlue i Nyidrë epine palua. Ngo nemene la itre hnei epuni hna thel troa eatrëne trongën? E hetre hnei epuni hna thele troa eatrën ngöne la huliwa i Akötresie, tro epuni lai a huliwane hnyawane la trengecatre i epun, me itre hnei epuni hna hetreny. (1 Kor. 9:26) Nge tro lai a acatrene la aqane imelekeu i epun me Iehova, me wangatrune catrën la itre ewekë ka tru.—Fil. 1:10; 1 Tim. 4:15, 16.

²⁵ Hnei Paulo aposetolo hna hamëne la tulu koi së göi aqane tro sa kuca la huliwa i Akötresie. (1 Kor. 11:1) Hnei angeic hna catre huliwa i Iehova. Mama hnyawa hi koi angeic, laka, nyimu huliwa hnei Iehova hna aijiji angeic troa kuca. Öni Paulo kowe la itre trejine ne Korinito: “Ase hë thawa koi ni la qëhnelö ka ishaisha, [“nyine fe gojenyi kowe la huliwa,” MN].” Eje hi laka, mekuna së fe hi lai. Nyimutre catre la itre xa aqane tro sa huliwa i Iehova cememine la ekalesia, tune la troa cainöjëne la maca ka loi ne la Baselaia. Ngo hnene laka “ala nyimu la itre ithupëjia,” haawe, loi e tro sa catre troa lö kowe “la qëhnelö ka ishaisha.” (1 Kor. 16:9) Hnei Paulo hna xomacone la mele i angeic, öni angeic: “Ini a xom’ acon la ngöneteing, me tha hluen’ ej.” (1 Kor. 9:24-27) Hapeu, ceitune kö la aqane mekune së me Paulo?

²⁶ Hna ithuecatre koi së asë hi isa ala cas troa thele troa eatrën la itre aja së ngöne la huliwa i Akötresie thenge la hne së hna atrein. Alanyimu la itre trejine ka xome la itre aqane huliwa i Akötresie o drai enehila, ke hnei angatr hna canga hnëkën amë, e co petre kö angatr, la itre mekune nyine tro angatr a eatrëne ngöne la huliwa i Akötresie. Hnei keme me thin maine itre xane ju kö hna xatua angatre troa ujë tune lai. Matre, tru la madrine i angatr ngöne la huliwa i Iehova; tha qeje ejolene kö angatr. (Ite edomë 10:22) Ame la itre xa nyine troa eatrën, tre, ene la troa cainöje trootro e nöjei wiik, me nyiqane inine la Tusi Hmitrötr kowe la itre atr, me ami ijin troa hnëkëne la itre icasikeu ne la ekalesia. Ame la ka nyipiewekë tre, ene la troa cile catr, me eatrëne palahi la huliwa së koi Akötresie. Maine tro sa ujë tune lai, tro së lai a atrunyi Iehova me eatrëne la aja së, ene la troa nyihlue i Nyidrë epine palua.—Luka 13:24; 1 Tim. 4:7b, 8.