“Kuca Asë Jë Nyine Atrunyi Akötesie”

NYIPIEWEKË troa mama la lolo i Iehova ngöne la itre hna qaja me hna kuca hnene la itre hlue i Iehova. Hetre trepene meköt hna qaja hnei Paulo nyine xatua së, öni angeic: “E tro nyipunie a xen, me ij, me kuca kete ewekë kö, kuca asë jë nyine atrunyi Akötesie.” (1 Kor. 10:31) Matre nyipiewekë tro sa trongëne hnyawa la itre trepene meköti Iehova, ke itre ewekë lai ka qajaqaja la thiina ka pexeje i Nyidrë. (Kol. 3:10) Loi e tro sa nyitipu Akötresie me hane nyiatrene la nöje i Nyidrë ka hmitrötr.—Efe. 5:1, 2.

² Hnei aposetolo Peteru hna amamane hnyawa kowe la itre keresiano la enyipiewekëne la troa ujë tune lai, öni nyidrë: “Loi e cei tui nyipunie memine la ite ka idei, nge the cei tune kö memine la aja ka hekö i nyipunie, lo jidi pete kö; ngo tro nyipunie a hmitöte ngöne la nöjei thina i nyipunie asë, tune la aqane hmitöte nyidëti ate hë nyipunie ; ke ase hë cinyihan, ka hape, “Hmitöteju nyipunie ; ke hmitöte ni.” (1 Pet. 1:14-16) Tune lo itretre Isaraela ekö, qane la itre atrene la ekalesia troa isa thupëne matre tro palahi angatr a hmitrötr. Kolo lai a hape, nyipiewekë tro angatre palahi a pë ethan, nge tha tro kö a adronyi angatr hnene la ngazo maine hnene pena la itre aja ne la fen. Celë hi aqane aisa angatre kö troa nyihlue i Iehova.—Eso. 20:5.

³ Ka hmitrötre palahi së, e hne së hna trongëne hnyawa palahi la itre wathebo memine la itre trepene meköti Iehova ka mama e hnine la Tusi Hmitrötr. (2 Tim. 3:16) Jëne la hna inine la Tusi Hmitrötr, easa atre Iehova memine la itre jë i Nyidrë, matre kola aeasenyi së catre koi Nyidrë. Jëne la ini Tusi së, xecie hnyawa koi së laka, loi e troa tro pa la Baselaia i Akötresie ngöne la mele së, memine fe la troa kuca la aja i Nyidrë. (Mat. 6:33; Rom. 12:2) Eje hi laka, easa eatrëne lai, ke, hne së hna thele troa xetrëne la thiina ka hnyipixe.—Efe. 4:22-24.

TROA PË ETHAN LA AQANE TROA ATRUNYI IEHOVA ME AQANE MELE SË

⁴ Tha hmaloi kö tro sa trongëne palahi la itre trepene meköti Iehova. Kola thele hnei Satana lo Diabolo, ithupëjia me easë, troa ajeanyi së qa ngöne la nyipici. Tha ka hmaloi kö e itre xa ijin, ke, kola huli së hnene la fen memine la itre aja së ka ngazo. Haawe, loi e tro sa isi memine la itre aja cili, matre tro palahi sa mele thenge la hne së hna sa xepu koi Iehova. Ketre, kolo fe a mama ngöne la Tusi Hmitrötr laka, tha tro kö sa sesëkötr la kola traqa koi së la itre icilekeu, maine itre itupath. Eje hi laka, tro së lai a akötr pine la meköt. (2 Tim. 3:12) Tro pe sa madrine la kola traqa koi së la itre itupath, ke, kolo hi lai a anyipicine laka, easë a kuca la aja i Akötresie.—1 Pet. 3:14-16; 4:12, 14-16.

⁵ Ngacama ka pexeje Iesu, ngo hnei nyidrëti hna inine troa drengethenge jëne la itre akötr hnei nyidrëti hna melën. Tha hnei nyidrëti pi kö hna kei kowe la itre itupathi Satana, maine kei thenge pena la itre aja ne la fene celë. (Mat. 4:1-11; Ioane 6:15) Tha hna traqa kö koi nyidrëti la mekune troa lue hna hnim. Ngacama kola methinë nyidrëti hnene la fen pine la aqane mele nyipici nyidrë, ngo hnei nyidrëti palahi hna trongëne hnyawa la itre trepene meköti Iehova. Qëmekene tro nyidrëti a mec, hnei nyidrëti hna thuemacane la itretre drei nyidrë, ka hape, tro fe a methinë angatr hnene la fen. Qaane ju hi lai, kola qëmeke hnene la itretre drei Iesu Keriso kowe la itre icilekeu, ngo hnei angatr hna catr, me lapa atre ka hape, hnene la Hupuna i Akötresie hna ngaane la fen.—Ioane 15:19; 16:33; 17:16.

⁶ Maine easa ajane troa ngaane la fen, loi e tro sa trongëne hnyawa la itre trepene meköti Iehova, tune la hna kuca hnei Iesu, Maseta së. Tro sa thupëne matre tha tro kö sa lö hnine la kuci politik, maine thele nyin la itre jole ka traqa kowe la itre atr. Ngo nyipiewekë fe tro sa hmekëne la thiina ka sis ka lapane la fene enehila. Matre, loi e tro sa wangatrune la eamo celë ngöne Iakobo 1:21: “Tijepi la sisi asëjëihë, memine la iangazo ka mana, nge kapaju hnene la hni ka menyike la wesi ula hna san, lo ka ateine troa amelene la ite u i nyipunie.” Jëne la hna inine la Tusi Hmitrötr, me itre icasikeu, tro ha lapa hut la “wesi ula,” ene la nyipici ngöne la itre mekun, me itre hni së. Ame e cili, tha tro kö a cia the së la itre aja ne fen. Öni Iakobo, ketre atre dreng: “Tha ’te kö nyipunie laka ithupëjia me Akötesie la kola nyi sine ne la fene hnengödrai ? qa ngöne lai ame la ate pi troa nyi sine ne la fen, te, ithupëjia ha me Akötesie.” (Iako. 4:4) Celë hi kepine matre, Tusi Hmitrötr a ithuecatre së troa trongëne hnyawa la itre trepene meköti Iehova me lapa ananyine la fen.

⁷ Tusi Hmitrötr a hmekë së matre tha tro kö sa kei kowe la itre aqane ujë ka sis me nyine hmahman. Ej a qaja, ka hape: “Ame la kuci ngazo, me ite thina ka sisi asë, me meciun, te, the qaja hmaca thei nyipunie, ke tha ijije kowe la ange ka hmitöt.” (Efe. 5:3) Haawe, tha tro pi kö sa nue la itre mekune ka sis me nyine hmahman troa lapane la mekuna së. Nge tha tro pi kö sa porotrikëne ihnyimane la itre ewekë cili. Easë hi lai a amamane ka hape, hetre aja së troa trongëne hnyawa la itre trepene meköti Iehova ka pë ethan.

TROA POROP

⁸ Loi e tro fe la keresiano a trotrohnine la enyipiewekëne la troa porop. Ame ngöne lo ijine i Isaraela ekö, hnene la Akötresie ka hmitrötr hna amekötine laka troa porope la hna hunuma hnene la nöje i Nyidrë. Loi e tro fe sa majemine troa porop, ‘matre tha tro kö Nyidëti a öhne la ketre ewekë ka ngazo’ the së. (Deu. 23:14).

⁹ Lue ewekë ka ce tro e hnine la Tusi Hmitrötre, ene la troa hmitrötr maine pë ethan, memine la troa porop. Öni Paulo: “Ange hnimina fe . . . loi e tro sha nyihnyawa shë kö qa ngöne la nöjei ka sisi asë ne la ngönetei memine la u, kola apexejene la thina ka hmitöte ngöne la qoue Akötesie.” (2 Kor. 7:1) Loi e tro la itre keresiano a porop palahi, ene la troa sie me wasine la itre iheetre i angatr. Maine nyipici laka, isapengöne kö la mele ne la itre atr thenge la itre nöj, ngo ijiji së hi troa hetre soop me tim matre tro palahi sa porop memine fe la itre nekö së.

¹⁰ Jëne la huliwa ne cainöj, kola atre së hnene la itre atr ne la nöje së. Ame la uma ka porop nge hna nyidrawane hnyawan, e koho hnin maine ekuhu trön, tre, ketre jëne lai troa mama la nyipici kowe la itre atr. Loi e troa ce huliwa la hnepe lapa asë ngöne la götrane cili. Tro la itre trejine trahmany a thupëne hnyawa e hnine me xötreithe la uma i angatr, me lapa atre laka, tro lai a ketr la itre atr e hna nyidrawane palahi la hnalapa. E tro angatr a ujë tune lai, me hamë tulu ngöne la huliwa i Akötresie, hatrene hi lai laka, angatr a thupëne hnyawa la hnepe lapa i angatr. (1 Tim. 3:4, 12) Hetre hnëqa i föe fe troa nyidrawa hnalapa, ene mina fe e hnine la uma. (Tito 2:4, 5) Tro fe la itre nekönatr hna inin a hane ixatua, ene la troa porop, me nyidrawane la hnahage i angatr. Aqane tro hi la itre atrene la hnepe lapa a ce huliwa matre troa majemi porop. Celë hi aqane mele elanyi ngöne la fene ka hnyipixe hna musinën hnene la Baselaia i Akötresie.

¹¹ Nyimutre la itre hlue i Iehova ka xomi loto enehila göi troa icasikeu maine troa cainöje trootro pena. Ame ngöne la itre xa götran, nyipiewekë troa hetre loto göi troa cainöje trootro. Haawe, loi e troa thupëne matre tro palahi a porop la loto së, nge ka pë engazon. Loi e tro la uma së me loto së a amamane hnyawa, ka hape, itre atrene së la nöje i Iehova ka pë ethan me ka hmitrötr. Tro fe a tro tune lai kowe la itre watreng, me Tusi Hmitrötre së.

¹² Loi e tro la hnaheetr, me aqane iseji së a ihmeku hnyawa memine la itre trepene meköti Akötresie. Tha tro pi kö së lai a traqa fë iheetre ka isosony qëmekene la ketre atr ka tru ne la nöj. Haawe, the qeje Iehova ha lai, ke easa nyitrengewekë i Nyidrë ngöne la hna cainöje trootro, maine qa hune la ita ne cainöj pena. Troa mama kowe la itre atr la hmi Iehova jëne la aqane iseji së me aqane heetre së. Loi e troa imeku me metrötrëne la itre atr. (Mika 6:8; 1 Kor. 10:31-33; 1 Tim. 2:9, 10) Haawe, ame la easa hnëkë ne tro koi hna cainöje trootro maine hna icasikeu pena, me hna asabele ne sirkoskripsio, maine itre xa asabele ka tru pena, loi e tro palahi sa mekune hnyawa la hna qaja hnei Tusi Hmitrötr, ene la troa porop me hetre metrötr ngöne la aqane heetr. Hetre aja së palahi troa atrunyi Iehova.

¹³ Troa trongëne mina fe la itre trepene meköti cili ngöne la easa ihamë ngöne la Hnalapa Ne Xomi Meköt, maine ketre filial Ne La Itretre Anyipici Iehova. Tha tro kö sa thëthëhmine laka, ame la Bethela, tre, kola hape, “Uma i Akötresie.” Haawe, loi e tro sa heetre me isej me ujë ceitune memine lo easa sine la itre icasikeu ngöne la Uma Ne Baselaia.

¹⁴ Ketre, ame la easa kuca la itre nyine iamadrinë, loi e tro sa wangatrune la aqane heetre me iseji së. Tro sa isa waipengö së me hape, ‘Tro kö ni hmahma troa cainöje kowe la ketre atr hnene la aqane heetreng?’

ITRE NYINE IAMADRINË KA PË ETHAN

¹⁵ Nyipiewekë catr troa mano, me kuca la itre nyine iamadrinë matre tro palahi sa egöcatr. Ame la ketre ijin, hnei Iesu hna hëne la itretre drei nyidrë kowe la ketre götrane gaa pë atr matre troa “pane mano.” (Mar. 6:31) Nyipici laka, itre ijine ka lolo koi së la itre ijine mano, memine la itre ijin kuci madrin ka pë ethan. Kola aegöcatrenyi së matre troa sisedrëne la itre huliwa hne së hna majemine kuca.

¹⁶ Nyimu pengöne kuci madrine ka eje enehila, matre nyipiewekë kowe la keresiano troa hetrenyi la inamacane qaathei Iehova, matre troa iëne hnyawa itre ej. Maine nyipici laka, nyine loi koi së la itre nyine iamadrinë, ngo ame pe, tha celë kö la ka nyipiewekë catre kowe la mele së. Hna hmekë së hë hnei Tusi Hmitrötr, ka hape, ame ngöne la “ite drai hnapin,” tro la itre atr a “ajane la nyine amadine ngo tha ajane kö koi Akötresie.” (2 Tim. 3:1, 4) Nyimutre la itre nyine iamadrinë enehila, ka tha loi kö kowe la itre atr ka ajane troa trongëne hnyawa la itre wathebo i Iehova.

¹⁷ Hnene la itre pane keresiano ekö hna cile kowe la ihuline la fen ka mel göi kuci madrin. Ame ngöne la itre hna elo ekö thei angetre Roma, tre, kola goeëne me madrine hnene la itre atr la kola akötrëne la itre xan. Ame la itre ewekë ka amadrinëne la itre atr, tre, ene la iakötrë, me neni la madra, me kuci ngazo. Ngo ame la itre pane keresiano, angatr a ananyine la itre nyine iamadrinë cili. Nyimutre mina fe la itre nyine iamadrinë enehila ka tune lai, nge kola aejën la itre aja ka ngazo ne la itre atr. Matre, loi e tro sa ‘thupëne hnyawa la aqane tro sa tro’ me thipetrije la nöjei kuci madrine ka iathixötrë. (Efe. 5:15, 16; Sal. 11:5) Nge, e pë engazone ju hë la ketre nyine iamadrinë, ngo ka hetre aqane ujë ka ngazo e cili, eje hi lai laka, tha nyine tro kö a kapa.—1 Pet. 4:1-4.

¹⁸ Hetrenyi la itre nyine iamadrinë ka loi kowe la keresiano. Nyimutre la itre ka öhnyi eloine qa ngöne la hna trongëne la itre eamo ne la Tusi Hmitrötr, memine la itre ixatua qahnine la itre itusi së.

¹⁹ Ame itre xa ijin, nyimu hnepe lapa hna hën hnei ketre trejin matre ce madrin. Maine pena kola könëne la itre trejine trahmanyi me föe kowe la ijine faipoipo maine kowe pena la ketre ijine ce madrine ka tune lai. (Ioane 2:2) Ame koi ka ikönë, angeic la atrekë hnëqane la itre hna kuca ngöne la ijine cili. Eje hi laka, e tru hnei atr, loi e troa hmeke hnyawa. Hnene laka, nango nuenue menu palaha la aqane ujë ne la itre ka sine lai itre ca lapa cili, haawe, itre xane ha iji menu me sasaithi tulu la aqane xen, me kuca la itre ewekë ka sis. Celë hi kepine matre, hnene la itre xa keresiano hna tuluthe la etrune la itre hna troa könën, me sa la hawa ne nyipun la itre ca lapa cili. Maine hetre kahaitr hna nu, haawe, tro sa ij ngöne la tulu. (Fil. 4:5) Maine hna kuca asë matre troa ketre ijine ka lolo me jëne ithuecatr la itre ijine cili, ngo eje hi laka, ame la xeni me nyine ij, tha itre ewekë kö lai nyine troa wangatrune menune palaha.

²⁰ Ketre thiina ka lolo la troa ikep. (1 Pet. 4:9) Ame la easa könëne ngöne la hnalapa së la itre atr matre troa ce xen, maine troa pane iji ka lepany, maine ce madrin, tha tro kö sa thëthëhmine la itre ka pë ewekë. (Luka 14:12-14) Maine hna hane könë së fe, haawe, loi e tro sa tro thenge la eamo hna hamëne ngöne Mareko 12:31. Loi e tro palahi sa amamane la hni ne ole së kowe la hna hane meku së hnene la itre xan.

²¹ Kola madrine hnene la itre keresiano la itre ahnahna i Akötresie ka nyimutre. Nge, atre hi angatr laka, ijiji angatre hi troa ‘xen me ij, me öhne la eloine la hnei angatr hna catre huliwa.’ (Ate cai. 3:12,13) Maine easa ‘kuca asë nyine atrunyi Akötesie,’ tha tro pi kö la itre ka ihë me itre hna könën a thëthëhmin la itre ijine cili, ke itre ijine lai ka ithuecatr me hamë madrin.

NGÖNE HNA INI

²² Hetrenyi la itre thangane ka loi hna kapa hnene la itre neköne la Itretre Anyipici Iehova qa ngöne la hna ini. Ame e cili, angatr a inine e me cinyanyi hnyawa. Hetrenyi la itre xa hna inin e cili, nge ka troa hetre thangane catre kowe la itre thöth göi troa eatrën la itre aja i angatr ngöne la huliwa i Akötresie. Ame ngöne la itre macatre ne angatr a ini, loi e tro angatr a catre ‘mekune la Atre Xupi angatr,’ ene la troa amë panëne la huliwa i Akötresie ngöne la mele i angatr.—Ate cai. 12:1.

²³ Maine eö la ketre trejine thöth ka ini, thupëne kö ke, ce sinee jë eö memine la itre xa thöth ka tha hmi kö. (2 Tim. 3:1,2) Pine laka, Iehova a hamëne la ixatua ka ijij, haawe, ijiji eö hi troa neëne la ihuline la fen. (Sal. 23:4; 91:1,2) Matre, e hetre aja i eö troa ananyine lai, loi e tro eö a kapa hnyawa la itre hna hnëkën hnei Iehova thatraqai së.—Sal. 23:5.

²⁴ Alanyimu la itre thöth Itretre Anyipici Iehova ka tha sine kö lo itre elo hna kuca e tröne la hna ini, ke, angatr a ajane troa lapa ananyine la fen. Tha tro kö lai a trotrohnine hnene la itre ka ce ini me eö memine la itre ka hamë ini. Ngo ame la ka nyipiewekë, tre, ene la troa amadrinë Akötresie. Matre, nyipiewekë troa drengethenge la mekuthethewe i eö hna inine hnene la Tusi Hmitrötr. Nge, tro fe a xeci e kuhu hni eö laka, tha tro kö a hetrenyi thei eö la pi hun, maine pi mama fë nöj. (Gal. 5:19, 26) Maine tro eö a drengethenge la itre eamo ne la Tusi Hmitrötr hna hamën hnene la keme me thine i eö, me nyisineene la itre trejin ne la ekalesia, tro ha hmaloi koi eö troa trongëne hnyawa la itre hna amekötine hnei Iehova.

HULIWA I MASETA ME AQANE THELE MANI

²⁵ Hnëqa ne la he ne la hnepe lapa troa thele la itre ka nyipiewekë kowe la itre atrene la hnepe lapa. (1 Tim. 5:8) Ngo atre hnyawa hi angeic laka, troa tro pan la itre huliwa ne la Baselaia, nge pine pë hë la huliwa i maseta. (Mat. 6:33; Rom. 11:13) Maine tro sa catr kuca la ite huliwa i Akötresie, me mejihnine la xeni me iheetr, haawe, tha tro kö së lai a hnehengazo menu. Ketre, tha tro kö sa kei kowe la hnö, ene la pi aja mo.—1 Tim. 6:6-10.

²⁶ Loi e tro asë hi la itre keresiano ka huliwa i maseta a lapa mekune hnyawa la itre trepene meköti ne la Tusi Hmitrötr. Ame la troa huliwa nyipici, tre kola hape, troa thipetrije la itre huliwa ka tha ihmeku kö memine la itre wathebo i Akötresie, memine la itre wathebo i nöj. (Rom. 13:1, 2; 1 Kor. 6:9,10) Loi e tro mina fe sa hmekën la itre atr nyine tha tro kö sa ce mel memin. Pine laka, ‘itretre isi’ Keriso së, tha easë kö a lö hnine la itre huliwa ne thele mani ka isazikeu memine la itre trepene meköti Iehova, nge ka uku së troa hane sine la fen, nge ka troa angazone la aqane imelekeu së me Iehova. (Is. 2:4; 2 Tim. 2:3, 4) Easë mina fe a thupëne matre, tha tro kö a hetre ewekë ka troa ieakeu së me “Babulona Atraqat,” lo itre hmi ka ithupëjia me Akötresie.—Hna ama. 18:2, 4; 2 Kor. 6:14-17.

²⁷ Maine tro sa trongëne hnyawa la itre hna amekötine hnei Akötresie, tha tro kö sa xome la itre hna icasikeu nyine hnë thele mani maine eatrëne pena la itre sipu aja së. Ame la easa itronyi memine la itre trejine me easë ngöne la itre ijine icasikeu, maine asabele pena, tre, göi tro hmekuje hi a atrunyi Iehova. Easë e cili a xen ngöne la laulau i Nyidrë, nge easa ithuecatrekeu. (Rom. 1:11,12; Heb. 10:24, 25) Loi e troa thupën matre tro palahi a kuca la itre huliwa i Akötresie ngöne la itre ijine cili.

LOI E TROA CAS

²⁸ Hetrenyi fe la itre hna amekötine hnei Iehova kowe la itre hlue i Nyidrë, göne matre tro angatr a “xölehuje la ce hni qa thene la [u]a ngöne la hna otene la iloi.” (Efe. 4:1-3) Easë a isa thele troa kuca la loi kowe la itre xan, ngo tha easë kö a thele troa sipu amadrinë së kö. (1 Thes. 5:15) Eje hi laka, celë hi aqane ujë lai hne së hna öhne e hnine la ekalesia. Ngacama isa hane ngönetrei së kö, me isa nöje së maine isa aqane mele së, me isa pengöne mele së maine etrune la hne së hna ini, ngo ame pe, easë asë hi a ce trongëne la itre hna amekötine hnei Iehova. Celë fe hi ka mama kowe la itre atr e tröne la ekalesia.—1 Pet. 2:12.

²⁹ Hnei Paulo hna qaja la trepene la casi së ka hape: “Casi la ngönetei, nge casi la [u]a, tune la hna hë nyipunie ngöne la mejiune ka casi lo hna hë nyipunieti kow ; casi la Joxu nge casi la lapaun, nge casi la bapataiso, casi Akötesie nge Tetetroti ne asë nyidëti e hun’ asë, me nyipin’ asë, me hnin’ asë.” (Efe. 4:4-6) Jëne la trengewekë celë, hetre aja së troa cas ngöne la aqane troa trotrohnine la itre nyipici ne la Tusi Hmitrötr, memine la itre ini ka jui e hnine ej. Nge, easë e cili a amamane laka, easa wangatrune la musi cile i Iehova. Eje hi laka, Iehova a hamëne kowe la nöje i Nyidrë la qene hlapa ka wië, ene la nyipici, nge celë hi ka aijiji angatr troa ce nyihlue i Nyidrë.—Zef.3:9.

³⁰ Kola akeukawan asë la itre hlue i Iehova hnene la cas me tingeting ka ej e hnine la ekalesia. Easa melëne la kola eatre la hnei Iehova hna thingehnaean, kola hape: “Tro ni a cengöne ami angate tune la ite mamoe e Bozera, tune la hnënge öni hnine la hnahage i angat.” (Mika 2:12) Maine aja së troa hetrenyi palahi la cas memine la tingeting, loi e tro sa trongëne hnyawa la itre trepene meköti Iehova.

³¹ Hetre madrinene la itre hna kapa e hnine la ekalesia i Iehova ka pë ethan! Isine jë së tro palahi a xom la ëje i Iehova. Acatrene jë së la aqane imelekeu së me Iehova, nge isine jë së troa trongëne palahi la itre trepene meköti Nyidrë, nge troa ce thawa me itre xan.—2 Kor. 3:18.