Qale Catre Jë Kowe La Organizasio i Iehova

ÖNI Iakobo: “Eashenyijë koi Akötesie, nge tro nyidëti a eashenyi koi nyipunie.” (Iako. 4:8) Maine eje hi laka, itre atr ka ngazo së, ngo tha ka draië menu kö Iehova maine nanyi pena matre troa dreng la itre hne së hna qaja koi Nyidrë. (Ite hu. 17:27) Nemene la nyine tro sa kuca matre troa easenyi koi Iehova? Tro la ejuine la itre thithi së a acatrene la aqane imelekeu së me Nyidrë. (Sal. 39:12) Loi e tro mina fe sa catre inine la Wesi Ula i Nyidrë, ene la Tusi Hmitrötr matre troa easenyi koi Iehova. Aqane tro hi së lai a atre Iehova Akötresie, memine la itre mekuna i Nyidrë, me aja i Nyidrë göi së. (2 Tim. 3:16, 17) Easë e cili a inine troa hnimi Iehova me troa hetre xou me metrötr. Celë hi ka hmekë së matre tha tro kö sa kuca la ketre ewekë ka troa akötrë Nyidrë.—Sal. 25:14.

² Ngo eje hi lai laka, easa atreine easenyi koi Iehova, jëne Iesu hmekuje hi, lo Hupuna i Nyidrë. (Ioane 17:3; Rom. 5:10) Pëkö ketre, ngo Iesu hmekuje hi la ka atreine troa amamane hnyawa koi së la itre mekuna i Iehova. Pine laka atre hnyawa hi nyidrëti la Keme i nyidrë, öni nyidrë: “Pëkö ate wangate hmekune la [Nekön], ngo [Keme] hi ; nge pëkö ate wangate hmekune la [Kem], ngo [Neköne] hi, memine la hnei [Nekön] hna ajane troa amamane kow.” (Luka 10:22) Kola mama ngöne la itre tus ne la Tusi Hmitrötr ka qejepengöne la mele i Iesu e celë fen, la aqane waiewekë i Iesu me mekuna ne la hni nyidrë. Kolo fe a mama koi së e cili la aqane waiewekë i Iehova me mekuna ne la hni Nyidrë. Itre ithuemacanyi lai ka aijiji së troa easenyi koi Akötresie.

³ Tune la hna ahnithe hë ngöne Mataio 24:45-47, hnei Iesu Keriso, Joxu së hna acile la “hlue ka nyipici me ka inamacan,” matre troa thewe “xen ngöne la nyipi ijin” kowe la lapa ka lapaun. Pine laka easa lapa fene la musi Iesu, haawe, tro sa lapa qale catr kowe la götrane ka mama ne la organizasio i Iehova matre troa acatrene la aqane imelekeu së me Nyidrë. Eje a amamane koi së la aqane troa kuca la aja i Iehova. Ame enehila, kola hamëne koi së hnene la “hlue” la xeni ka mana, jëne la itre itus ka qejepengöne la Tusi Hmitrötr, me jëne la itre porogaram ne asabele. Jëne la hlue cili, Iehova a upi së troa e la Wesi Ula i Nyidrë o drai, me sine palahi la itre icasikeu, me cainöjëne la “maca ka loi ne la Baselaia.” (Mat. 24:14; 28:19, 20; Ios. 1:8; Sal. 1:1-3) Tha tro pi kö sa goeëne la hlue cili ceitune me aqane waiewekë i atr. Loi e tro pe sa qale catre kowe la götrane ka mama ne la organizasio i Iehova, me xötrethenge la itre hna amekötin hnene ej. Tro lai a aeasenyi së catr koi Iehova Akötresie, me xatua së troa cile hut ngöne la lapaune së, ngacama easa qëmeke kowe la itre itupath.

KEPIN MATRE KOLA ELË LA ETRUNE LA ITRE ITUPATH

⁴ Nyimu macatre ne nyihlue i Iehova ha epuni enehila. Matre, atrepengöne hnyawa hi epun la pengöne la troa xomihnine la itre itupath. Maine tha ekö catre kö epuni atre la nyipici, me hane sine la nöje i Iehova, ngo atre hnyawa hi epun laka, Satana Diabolo a thelejën matre tha tro kö epun a lapa fene la musi Iehova. (2 Tim. 3:12) Haawe, ka co ju hë maine ka tru la itre itupath hnei epun hna cile kow, ngo the xou kö me kucakuca! Iehova a qaja xeciëne ka hape, tro Nyidrëti a xatua epuni me amanathithi epun, ene la troa apatrene la itre akötr, me hamë epun la nyipi mel elany.—Heb. 13:5, 6; Hna ama. 2:10.

⁵ Easë asë hi a qëmeke kowe la itre itupathi ngöne la itre drai tixenuë ne la fene i Satana. Qaane lo kola acile la Baselaia i Akötresie ngöne lo macatre 1914, tha hna nue Satana hmaca kö troa tro koho hnengödrai thei Akötresie. Hna ukapië angeic kowe la fen, nge göhne i angeice pë hë lai memine lo itre angela i angeic. Ame la thangane la elëhni angeic, tre, kola elë la itre akötr e celë fen, tune la aqane akötrëne la itre hlue i Iehova. Ketre hatrene lai laka, easa melëne hnyawa la itre drai tixenuë ne la musi angeic e celë fen.—Hna ama. 12:1-12.

⁶ Tru la trenge elëhni Satana, ke, hna e pe hi la itre drai angeic, nge hna thaipië angeic. Matre, angeic me itre dremoni a isine troa apën la huliwa ne cainöj, me thë la cas ne la itre hlue i Iehova. Celë hi matre itre hlue i Iehova a isi me Satana me itre dremoni, kösë kola “ikuië me ate, ngo ite joxu pe, me itete mus, me ite tane la jidi e celë fen, me ite u ka ngazo ngöne la ite hnë e hnengödrai.” Maine easa ajane troa hun cememine la itre ka ce xöle me Iehova, tha tro pi kö sa kucakuca ngöne la isi, ngo loi pe tro sa catre xetrëne hnyawa lo “ixete ne ishi ka pexeje i Akötesie.” Loi e tro sa cile catre ngöne la itre nyinyithiina i Satana. (Efe. 6:10-17) Matre nyipiewekë tro sa xomihnine la itre itupath.

XOMIHNINE JU!

⁷ Ame la troa xomihnine la itupath tre, kola hape troa “atreine troa cile kowe la kucakuca ne la ngönetrei maine mekun, me akötr.” Ame la thiina cili e hnine la Tusi Hmitrötr, kola qaja la troa catre fë la mekune troa kuca la meköt ngacama kola qëmeke kowe la itre jol, me icilekeu, me iakötrë, maine itre xa ewekë ju kö ka sewe së troa mele nyipici koi Akötresie. Tro lai a nango qea la ijine matre atreine jë së xomihnin la itupath. Nge easa palahi a acatrene la lapaune së, nge ketre easë fe a atreine xomihnine la itre itupath. Maine hne së hna cilehut ngöne la itre itupath ka co ngöne la easa xötrei nyihlue i Iehova, tro lai a acatrene la lapaune së, me aijiji së troa cilehut ngöne la itre itupath ka tru ka troa traqa elanyi koi së. (Luka 16:10) Tha tro kö a treqene elanyi troa traqa la itre itupathi ka tru matre troa mekune troa cile catre ngöne la lapaun. Loi e tro sa canga mekun qëmekene troa traqa la itre itupath. Hnei Peteru aposetolo hna amamane laka, loi e troa ce melëne la xomihni memine la itre xa thiina i Akötresie. Öni angeic: “Nyi thina ka loi xane la lapaune i nyipunie, nge nyi inamacane xane la thina ka loi ; nge nyi xom’ acone xane la inamacan ; nge nyi xomi hni xane la xom’ acon ; nge nyi thina ka ijiji Akötresie xane la xomi hni ; nge nyi ihnimi tejine xane la thina ka ijiji Akötesie ; nge nyi ihnimi xane la ihnimi tejin.”—2 Pet. 1:5-7; 1 Tim. 6:11.

⁸ Hnei Iakobo hna amamane la enyipiewekëne troa xomihnine la itupath. Öni angeic: “Ange tejine me ini fe, loi e tro nyipunie a mekune, laka nyine amadin’ atraqat’ e traqa koi nyipunie la nöjei itupathi ka nyimu pengön ; ke ate hë nyipunie, laka ate aciane la xomi hni la kola tupathe la lapaune i nyipunie. Loi e huliwa apexejene la xomi hni, mate pexeje me meköti nyipunie, nge pëkö ewekë ka pat.” (Iako. 1:2-4) Öni Iakobo, loi e tro la itre keresiano a kapa la itre itupath me madrin, ke, itre ej a aijiji angatr troa atreine cilehut. Hapeu, celë kö aqane goeëne epun la itre itupath? Thupene lai, Iakobo a amamane la thangane la troa cilehut ngöne la itre itupath. Kola qaja la troa apexejene la thiina së, matre nyipi lolo xajawa i Akötresie. Ame la easa qëmeke me elë hune la itre itupath e nöjei drai, ka co ju hë maine ka tru, easë fe lai a cilehuti catr. Nge ketre, e tro sa xomihnine la itupath, tro lai a aciane la itre xa thiina ka lolo, nge ka nyipiewekë kowe la mele së.

⁹ Atraqatre la madrine i Iehova la easa cilehut ngöne la itre itupath; tro lai a upi Nyidrë troa amanathithi së hnene la mel ka tha ase palua kö. Öni Iakobo: “Manathithi la ate xomi hnine la itupath, ke e ase hë tupath, tro angeic’ a hetenyi la korona ne mel, lo hnei Joxu hna thinge hnaeane koi angete hni nyidë.” (Iako. 1:12) Easa xomihnine la itre itupath, ke mel la hne së hna goeën catrën. Maine tha xomihnine kö së la itupath, thatreine kö së troa lapa huti ngöne la nyipici. Maine tro sa kei thenge la iajojezi ne la fene celë, tro së lai a canga bëeke hmaca kowe ej. Maine tha cilehuti kö së, tro ha patr the së la uati hmitrötre i Iehova, nge thatreine hmaca kö troa hetrenyi la wene ne ej ngöne la mele së.

¹⁰ Maine easa ajane troa xomihnine la itre itupath ngöne la itre ijine jole celë, loi e troa meköt la aqane goeëne së la itre akötr hne së, itre keresiano, hna cile kow. Öni Iakobo lo, ka hape: “Loi e tro nyipunie a mekune, laka nyine madrin atraqatr.” Tha ka hmaloi kö troa madrin ngöne la itupath, ke ka hetre ethan ej kowe la ngönetrei memine la mekun. Ngo, the thëthëhmine kö laka, jëne mele i epuni hi lai. Tro la hna melën hnene la ange aposetolo a xatua së troa trotrohnine la kepin matre tro sa madrin ngöne la itre akötr. Kola qejepengöne lai ngöne la tusi Ite Huliwa, kola hape: “Nge ase hë angate hëne la nöjei aposetolo, me thaucë angat, angate pë hë a ahnithe koi angatr ka hape, The ewekë kö ngöne le ëje i Iesu, ame hna nue angate pi. Nge angat’ a tropi qa ngöne la qëmeke ne la angete ieman, me madine ngöne laka hna meku angate laka ijije troa xomi hmahma pine la atesiwa.” (Ite hu. 5:40, 41) Hna trotrohnine hnene la itre aposetolo laka, ame la itre akötre i angatr, tre, hatrene hi laka, hnei angatr hna drengethenge la hna amekötine hnei Iesu nge angatr a amadrinë Iehova. Ame hë lo itre macatre thupen, hnei Peteru hna cinyihane la pane tusi angeic, me amamane la enyipiewekëne la itre akötre cili; kola akötr pine la thiina ka meköt.—1 Pet. 4:12-16.

¹¹ Hanawange la ketre ewekë hna melëne hnei Paulo me Sila. Ame la nyidroti a cainöj e Filipi, hna othi nyidro, ke hna upe koi nyidro la kola gomegome la traon, me qaja amamane la itre huliwa ka sis hna majemine kuca. Ame e cili, hna lepi nyidro me akalabusi nyidro. Öni Tusi Hmitrötr, ame la nyidroti e hnine la kalabus memine la itre eatre i nyidro, “e hnenyipa jid, [hnei] Paulo me Sila [hna] thith, me nyima koi Akötesie ; nge kola qatixenyë nyidoti hnei ange hna oth.” (Ite hu. 16:16-25) Hnei Paulo me Sila hna goeën la itre akötre i nyidro pi Keriso ceitu me hatrene la nyipici nyidro xajawa i Akötresie me itre atr. Ketre jëne tro fe nyidroti lai a cainöjëne la maca ka loi kowe la itre ka hetre hni ne ajan. Ka hetre thangane lai kowe la mele ne la itre xan. Ame la jidri cili, hnene la ate thupë kalabusi me hnepe lapa i angeic hna hane kapa la nyipici me nyihlue i Iehova. (Ite hu. 16:26-34) Ka mejiune hnyawa Paulo me Sila kowe la mene i Iehova, me kowe la trenge aja i Nyidrë troa xatua nyidro ngöne la itre akötre i nyidro. Eje hi laka, tha tria kö la mekuna i nyidro.

¹² Ame mina fe enehila, Iehova a hamëne la ka nyipiewekë koi së matre tro sa cile catre ngöne la itre ijine itupath. Ame la aja i Nyidrë, tre, tro sa cilehut ngöne la itre itupathi cili. Hnei Nyidrëti hna hamëne koi së la Wesi Ula i Nyidrë matre tro sa atrepengöne hnyawa la aja i Nyidrë. Celë hi ka acatrene la lapaune së. Nge easa fe a cas me itre sine hmi së me hane kuca la huliwa i Akötresie. Easë mina fe a thith matre troa acatrene la aqane imelekeu së me Iehova. Iehova a drenge la easa atrunyi Nyidrë memine la itre sipo së göi troa pë ethane palahi xajawa i Nyidrë. (Fil. 4:13) Nge, the wangacone pi kö së la trengecatr hna kapa qa ngöne la hna lapa mekune la mejiune hna amë qëmeke së.—Mat. 24:13; Heb. 6:18; Hna ama. 21:1-4.

AQANE TROA XOMIHNINE LA ITRE ITUPATHI KA NYIMU PENGÖN

¹³ Ame la itre itupath hne së hna cile kow enehila, tre, ceitune hi memine la itre hna cile kow hnene la itretre drei Iesu ekö. Ame enehila, hetrenyi la itre atr ka icilekeu memine la Itretre Anyipici Iehova ke, thatre pengöi angatre hnyawa kö matre kola qaqane me akötrë angatr. Tune lo ijine i ange aposetolo, ame la qaane la icilekeu tre, kolo itre atr ka hmi catr. Ame la itre ini memine la itre huliwa ka ngazo hnei angatre hna kuca, tre, hna qaja amamane e hnine la Tusi Hmitrötr. (Ite hu. 17:5-9, 13) Ame itre xa ijin, hetre ixatua hna kapa hnene la itre trejin ke, hnei angatr hna qaja amamane la meköti angatr hna sajuëne hnene la itre mus. (Ite hu. 22:25; 25:11). Ngo ame fe itre xa ijin, kola wathebo së troa cainöj hnene la itre ka mus, matre troa apën la huliwa së. (Sal. 2:1-3) Ame ngöne la itre ijine cili, easa catre xötrethenge hnyawa la tulu ne la itre aposetolo ka mele nyipici. Öni angatr, ‘Akötresie la hne huni hna drengethenge hune la atr.’—Ite hu. 5:29.

¹⁴ Pine laka kola kökötre catre palahi la isi pi nöj e cailo fen, haawe, itre atr a musinëne la itre trejin troa ujë tui angatr. Nge tro lai a sawa la itre trejin troa cainöje trootro, ngo huliwa pe hna upi angatr troa kuca hnei Akötresie. Atre asë hi së la ithuemacanyi hna hamëne ngöne Hna Amamane 14:9-12 (MN) göne la troa “thili kowe la öni ka sheshe, me hnaijin’ ej.” Matre trotrohnine hnyawa hi së la aliene la hna qaja hnei Ioane, kola hape: “Celë hi kepine matre troa xomihnine hnene la nöjei atre ka hmitrötr, ene la angetre drengethenge la itre wathebo i Akötresie, me xötrethenge la lapaune i Iesu.”

¹⁵ Eje hi laka, tro lai a ajolë epun troa eatrëne hnyawa la itre huliwa i Akötresie hnene la itre itupath ka traqa koi epun. Kola qaja la itre isi, maine ithepe mus, maine icilekeu pena, maine hna wathebone la huliwa së hnei mus. Matre tha ijiji epuni hë troa icasikeu. Ketre, pëhë jëne ithuemacanyi me filial. Nge pëhë iwai ne la itre qatre thup ka wange trongëne la itre ekalesia. Nge, pë fe hë itus ka traqa. Matre nemene la nyine tro epuni a kuca e cili?

¹⁶ Isine jë troa huliwa i Iehova ngöne la itre ijine cili. Tro lai a hetre ijine së troa inine casine la Tusi Hmitrötr. Nge, loi e tro fe a icasikeu hnene la ala xalaith ngöne la ketre hnalapa göi troa ce inine la Tusi Hmitrötr. Nge, troa xome la Tusi Hmitrötr, memine la itre itus hna ce wange hë ekö, matre troa ce ithanatan ngöne la itre icasikeu cili. The xou kö me hnehengazo menu. Canga tro hi la Lapa Ne Xomi Meköt a thele la ketre jëne ithuemacanyi memine la itre trejin ka elemekene la huliwa.

¹⁷ Nge maine jole catre koi epuni troa iöhnyi memine la itre trejin, ngo the thëthëhmine kö laka, tha nanyi kö Iehova, me Iesu Keriso qaathei epun. Tro kö lai a cilehut la mejiune i epun. Ka drenge palahi Iehova la itre thithi epun, nge tro palahi Nyidrëti a acatrene la lapaune i epun jëne la uati hmitrötre i Nyidrë. Thele jë la ixatua i Nyidrë. Nge, mekune kö laka, ketre hlue i Iehova epun, me atre drei Iesu Keriso. Haawe, thele jë troa cainöjëne la maca ka loi. Tro Iehova lai a amanathithine la trengecatre i epun. Nge, tro fe hë a hane lö hnei itre xan matre troa ce nyihlue i Iehova me epun.—Itre hu. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Ngo, e epuni a qëmeke kowe la mec tune lo ange aposetolo memine lo itre xa keresiano ekö, mejiune ju kowe la “Akötesie ate amelene hmaca la ite ka mec.” (2 Kor. 1:8-10) Tro la lapaune i epuni kowe la melehmaca a xatua epuni troa xomihnine la itre iaxösisi. (Luka 21:19) Hnei Iesu Keriso hna amamane la tulu; atre hi nyidrë ka hape, tro la aqane mele nyipici nyidrë ngöne la itupath a hamë trengecatre kowe la itre xan troa hane cilehuti fe. Aqane tro fe epuni lai a hane thuecatrene la itre trejin.—Ioane 16:33; Heb. 12:2, 3; 1 Pet. 2:21.

¹⁹ Eje hi laka, hetre itre xa itupath hnei epuni hna cile kow. Kola pë madrin hnene la itre trejin ke, pëkö ka drei angatr ngöne la teritoar. Itre xan e angatr a xomihnine la itre sine mec i angatr, maine itre xa akötr ka ej e kuhu hni angatr. Kolo fe a qaja la itre xa kucakuca ne la ngönetrei ka ajolëne la mele i angatr. Hnei Paulo aposetolo mina fe hna xomihnine la ketre itupath ka sewe angeic troa huliwa i Iehova, maine ajolë angeic pena. (2 Kor. 12:7) Epaferodito la ketre keresiano ekö, atre Filipi, nge ka “hace hnine” ke, hnene la itre sinee i angeic hna denge laka, ka wezipo angeic. (Fil. 2:25-27) Ketre, hnene laka, itre atr ka tha pexeje kö së, haawe, tro fe lai a aciane la itre xa jol nyine troa xomihnin. Tro lai a hetre ihmönyinyi thene la itre keresiano maine e hnine la hnepe lapa. Ngo tro epuni lai a atreine xomihnine itre ej, e hnei epuni hna trongëne hnyawa la itre eamo ne la Wesi Ula i Iehova.—Ezek. 2:3-5; 1 Kor. 9:27; 13:8; Kol. 3:12-14; 1 Pet. 4:8.

CATRE PI MELE NYIPICI!

²⁰ Nyipiewekë tro palahi sa nyipici koi Iesu Keriso, tane la ekalesia hnei Iehova hna acil. (Kol. 2:18, 19) Nyipiewekë fe tro sa ce huliwa memine la “hlue ka nyipici me ka inamacan” memine la itre hna acile troa itretre thup. (Heb. 13:7, 17) Maine tro sa trongëne hnyawa la itre hna amekötine hnei organizasio, me ce huliwa memine la itre ka elemeken, haawe, tro së lai a atreine kuca la aja i Iehova. Ketre, nyipiewekë fe tro sa catre thith. Mekune hnyawa kö laka, thatreine kö la kalabus, maine ketre götrane hna umë së cas, troa sewe së troa ithanata memine la Keme së e koho hnengödrai. Nge ketre, thatreine kö troa thë la casi së memine la itre trejin.

²¹ Isine jë së troa eatrëne la huliwa hna ahnith koi së, ene la troa cainöje trootro, huliwa hna athipe koi së hnei Iesu Keriso lo hna amelene hmaca. Öni nyidrë kowe la itretre drei nyidrë ka hape: “Qa ngöne lai, tro jë nyipunie a inine la itre atr asë ne la nöjei nöj asëjëihë, me bapataiso angatre kowe la ëje i Tretretro, me Hupuna, me uati hmitrötr; ini angatre jë troa trongëne la nöjei ewekë asëjëihë lo hnenge hna ahnithe koi nyipunie; nge hanawang ini a ce me nyipunie ngöne la nöjei drai asëjëihë uti hë la pune la fen.” (Mat. 28:19, 20, MN) Catre pi së tui Iesu, ene la troa xomihnine la itre itupath. Hnine jë së la hna troa kuca elanyi hnene la Baselaia, memine fe la mele ka tha ase palua kö. (Heb. 12:2) Pine laka itretre drei Keriso së hna bapataison, atraqatre la madrine së troa eatrëne lo hna perofetane göne la pune la fen. Öni nyidrë: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” (Mat. 24:3, 14) Maine tro sa eatrëne hnyawa la huliwa celë enehila, tro hë sa mele madrin epine palua ngöne la fene ka hnyipixe, me ka meköt hna acil hnei Iehova!