Nemene La Aqane Tro Sa Ce Sinee Me Akötresie?

1, 2. Drei la ëjene la itre xa atr hnei Iehova ekö hna nyi sineen?

DREI la atr hnei epuni hna pi nyi sineen? Maine jë ketre atr hnei epuni hna wangatrun. Ketre atr ka tru ihnimin nge ka lolo thiina.

² Hnei Iehova hna iëne ekö la itre xa atr troa nyi sinee i Nyidrë. Tui Aberahama, angeice ekö la ketre sinee i Iehova. (Isaia 41:8; Iakobo 2:23) Davita fe la ketre, öni Iehova, ketre atr “ka tune la hning.” (Itre Huliwa 13:22) Ketre tui Daniela fe, öni Iehova, hneng ‘hna hnimi ö.’—Daniela 9:23.

3. Nemene la kepine matre hnei Iehova hna nyi sinee Aberahama, Davita me Daniela?

³ Hna nyi sinee i Iehova tune ka hnei Aberahama, Davita me Daniela? Öni Iehova koi Aberahama ka hape: “Qa ngöne la hnei ’ö hna denge thenge la tenge ewekëng.” (Genese 22:18) Iehova a nyi sineen la itre atr ka hni ka ipië nge ka drengethenge Nyidrë. Hnei Nyidrëti fe hna nyi sineen la ketre nöj. Öni Nyidrëti kowe la angetre Isaraela ka hape: “Dengeju nyipunie la aqane ewekëng, nge tro ni a Akötesi nyipunie, nge tro nyipunie a nöjeng.” (Ieremia 7:23) E ajane së troa ce sinee me Iehova, loi e tro sa drengethenge Nyidrë.

IEHOVA A THUPËNE LA ITRE SINEE I NYIDRË

4, 5. Nemene la aqane xatuane Iehova la itre sinee i Nyidrë?

⁴ Tusi Hmitrötr a qaja ka hape, Iehova a thele jëne “troa xomexatuane la ite ka meköti hni koi nyidë.” (2 Aqane lapa ite joxu 16:9) Ame ngöne la tusi Salamo 32:8, hnei Iehova hna thingehnaeane kowe la itre hnei Nyidrëti hna hnime ka hape: “Tro ni a ini ’ö me köjane koi ’ö la jëne qâ i ’ö troa trongën; tro ni a haji ’ö me alamekë eö.”

⁵ Hetre ithupëjia ka catr, ka xele matre tro sa ce sinee me Akötresie. Ngo Iehova a ceme easë. (E jë la Salamo 55:22.) Pine laka itre sinee i Nyidrëti së, easa nyi hlue i Nyidrëti cememine la hni së ka pexej. Ngacama jole ju hë, ngo easa mele nyipici koi Nyidrë. Nge, ka xecie koi së laka tro Nyidrëti a xatua së, tune la hnei Davita hna qaja ka hape: “Hnenge pala hi hna ami Iehova qëmekeng ; tha tro kö ni a uk, ke nyidëti hë ngöne la götrane macang.” (Salamo 16:8; 63:8) Nemene la aqane kuca i Satana matre troa sewe së troa ce sinee me Akötresie?

AQANE IUPEZÖ I SATANA

6. Nemene la aqane sili ithanata ne la itre atr hnei Satana?

⁶ Ame ngöne lo Mekene 11, hne së hna ce wang laka, hnei Satana hna jele thoi Iehova. Hnei angeic hna qaja ka hape, tha ka meköti kö Akötresie, ke hnei Nyidrëti hna sewe Adamu me Eva troa sipu iëne la loi qa ngöne la ngazo. Tusi Iobu fe a qaja ka hape, hnei Satana hna sili ithanata ne la itre ka ajane troa ce sinee me Akötresie. Hna qaja hnei Satana ka hape, angatr a nyihlue i Iehova göi itre eloin, ngo tha qa ngöne ihnimi kö. Goi qaja fe angeice ka hape, atreine hi angeic kuca matre tro la nöjei atr a icilekeu me Akötresie. Tro sa wang la aqane thupë Iobu hnei Iehova, nge nemene la ini hne së hna xome qa ngön?

7, 8. (a) Nemene la pengöi Iobu koi Iehova? (b) Nemene la hna qaja hnei Satana göi Iobu?

⁷ Drei lae Iobu? Ketre thupëtresij ka mele nyipici ekö, 3 600 hë lao macatre. Ame ngöne la ijine cili, hnei Iehova hna qaja ka hape, pëkö atr ka tui angeic e celë fen. Tru la metrötre Iobu koi Iehova, nge atre sisine angeic la ngazo. (Iobu 1:8) Angeice hi la ketre sinee i Akötresie ka mele nyipici, ngöne la ijine cili.

⁸ Hnei Satana hna jele ngazone la aqane nyihlue i Akötresie hnei Iobu, öni angeic: “Hapeu, tha hnei cilieti hna ekö hage xöteithi angeic, me xöteithe la hnalapa i angeic, me xöteithe la nöjei ewekë i angeic’ asë? nge hnei cilieti hna amanathithine la huliwa i angeic, me amanane la ite si angeice ngöne la nöj. Ngo loi pe xejëjë enehila la ime i cilie, me lepe la nöjei ewekë asë i angeic, nge tro angeic’ a jele ngazo cilie xajawa i cilie.”—Iobu 1:10, 11.

9. Nemene la hnei Iehova hna nue koi Satana troa kuca?

⁹ Satana a qaja ka hape, Iobu a nyihlue i Akötresie, hnene laka Nyidrëti a amanathithi Iobu. Öni Satana fe, atreine hi angeic kuca matre tha tro hmaca kö Iobu a nyihlue i Akötresie. Ngo tha celë kö la mekune i Iehova. Celë hi kepine matre Nyidrëti a pane nue Satana troa tupathi Iobu. Nyine tro hi a amamane ka hape, ka nyipici maine ka thoi la ihnimi Iobu koi Iehova.

SATANA A AKÖTRË IOBU

10. Nemene la aqane akötrë Iobu hnei Satana? Nge tune ka la aqane ujë i Iobu?

¹⁰ Hnei Satana hna pane kuca laka, troa atrekënö me humuthe la itre öni Iobu. Thupene lai, troa humuthe fe la itre xa hlue i Iobu, uti hë la troa pë hnei angeic hna hetreny. Hnei Satana fe hna kuca matre troa humuthe asë la treene lao neköi Iobu, hnene la ketre enyi atraqatr. Ngacama tru la itre akötre i angeic, ngo “Tha thina ka ngazo kö Iobu ngöne la nöjei ewekë asë cili, nge tha hna jele menu Akötesie hnei angeic.”—Iobu 1:12-19, 22.

11. (a) Nemene hmaca la aqane tupathi Iobu hnei Satana? (b) Nge nemene la aqane ujë i Iobu?

¹¹ Tha cile kö Satana troa akötrë Iobu, ke angeice a pi tru koi Iehova me hape, pane “lepe la ite june me ijö i angeic, nge tro angeic’ a jele ngazo cilie xajawa i cilie.” Hnei Satana fe hna kuca matre troa tithi Iobu hnene la ketre meci ka akötre catr. (Iobu 2:5, 7) Tru ju hë la akötre i angeic, ngo tha hnei angeice pi kö hna nue triji Iehova. Öni angeic: “tha tro kö ni a tije qaja la thinange ka pë ethan, uti hë meci hë ni.”—Iobu 27:5.

12. Nemene la aqane amamane Iobu laka, ka thoi Satana?

¹² Thatre kö Iobu la pengöne la itre itupathi Satana, ketre, thatre kö angeic la kepine matre angeic a akötr. Angeice pe kö a mekune ka hape qaathei Iehova la itre akötre i angeic. (Iobu 6:4; 16:11-14) Ngo hnei Iobu palahi hna nyipici koi Iehova. Haawe, mama pi hi e cili ka hape, tha hna mele hnihni Iehova kö hnei Iobu. Angeic a ce sinee me Iehova ke, tru la ihnimi angeice koi Nyidrë. Matre itre trengathoi asë hi lo hna sile hnei Satana.

13. Nemene la thangane la hna mele nyipici hnei Iobu?

¹³ Thatre kö Iobu la itre ewekë ka traqa e koho hnengödrai, ngo hnei angeice palahi hna mele nyipici. Celë hi ka amamane ka hape, ka ngazo Satana. Hnei Iehova hna amanathithi Iobu, hnene la aqane mele nyipici angeic.—Iobu 42:12-17.

SATANA A SILI ITHANATA EPUNI FE

14, 15. Nemene la aqane sili ithanata së itre atr hnei Satana?

¹⁴ Hetre ini hne së hna xome qa ngöne la hna melëne hnei Iobu. Hna qaja hnei Satana ka hape, ame la kepine la easa nyihlue i Iehova, ke göne hi la itre eloin. Ame ngöne la ijine i Iobu, hnei Satana hna qaja ka hape: “Nge ite ewekë asë hna hetenyi hnene la ate tro angeic’ a hamëne hnane la mele i angeic.” Ame ngöne Iobu 2:4, ke tha Satana kö a sili ithanata Iobu hmekuj, ngo nöjei atr asë, laka angatr a nyi hlue hnihni Iehova. Itre hadredr lao macatre thupene la hna meci hnei Iobu, Satana palahi a akötrë Iehova me sili ithanata ne la itre ka nyihlue i Nyidrë. Hna anyipicin ngöne Ite Edomë 27:11, öni Iehova: “Neköng, inamacanepi, mate madinejë la hning, mate hete nyine sa koi angeic’ ate qaja angazo ni.”

¹⁵ Isa qanyi së iëne troa nyihlue i Iehova, me ce sinee me Nyidrë, me mele nyipici koi Nyidrë. Aqane tro hi së lai a amamane laka, ka thoi Satana. Ngacama tru la itre nyine tro sa saze ngöne la mele së, ngo aqane ië ewekë hi lai ka lolo. Celë hi ketre mekune lai ka tru. Satana a qaja ka hape, maine troa traqa la itre jol, ke tro hë së lai a nue triji Akötresie. Angeic a thele troa angazone la aqane mele nyipici së koi Akötresie. Ngo nemene la aqane kuca i angeic?

16. (a) Nemene la itre aqane amenu së hnei Satana matre troa thë la aqane imelekeu së me Iehova? (b) Nemene la aqane thele jëne i Satana matre tha tro kö sa nyihlue i Iehova?

¹⁶ Satana a thele la nöjei aqane troa thë la aqane imelekeu së me Akötresie. Angeic a axouenyi së “kösë liona a ho”, kola pi heji së. (1 Peteru 5:8) Matre tha tro kö epuni a sesëkötr, e tro la itre sinee i epun me itre xaa atr, a sewe epuni troa ini Tusi Hmitrötr. Maine jë tro epuni a mekune ka hape kola akötrë epun.a (Ioane 15:19, 20) Ketre, atreine hi Satana “sipu ujë nyëne kö nyine angela ka lai.” Angeice hi lai a amenu së matre tro sa nuetriji Iehova. (2 Korinito 11:14) Satana a thele jëne matre tha tro hmaca kö sa nyihlue i Iehova. Angeic a kuca matre tro sa mekune ka hape, tha hna wang aloinyi së fe kö hnei Iehova.—Ite Edomë 24:10.

DRENGETHENGE IEHOVA JË

17. Nemene la ka xatua së troa drengethenge Iehova?

¹⁷ Ame la easa drengethenge Iehova, easë hi lai a amamane laka ka thoi Satana. Nemene la ka troa xatua së troa drengethenge Nyidrë? Tusi Hmitrötr a qaja ka hape: “Nge qâ i ’ö troa hni Iehova Akötesi ’ö hnene la hni ’ö ka pexej, me u i ’ö ka pexej, me tenge cate i ’ö ka pexej.” (Deuteronomi 6:5) Easa drengethenge Iehova ke, tru la ihnimi së koi Nyidrë. E tru la ihnimi së, ke tru fe hë la aja së troa kuca la nöjei hnei Nyidrëti hna qaja. Hna cinyihane hnei Ioane aposetolo ka hape: “Ke dei lola aja koi Akötesie, laka eësha denge thenge la ite wathebo i nyidë; nge tha hace kö la ite wathebo i nyidë.”—1 Ioane 5:3.

18, 19. (a) Nemene la itre ewekë hnei Iehova hna qaja ka hape ka ngazo? (b) Pine nemene matre tha tro jë kö Iehova a upi së troa kuca la ketre ewekë hne së hna thatrein?

¹⁸ Hetre itre ewekë hnei Iehova hna qaja ka hape ka ngazo. Itre nemene lai? Wange ju la hna ekö hagene hna hape, “Sisine jë la itre hnei Iehova hna sisin.” Maine jë tro epuni a mekun ngöne la qaan ka hape, ame la itre xaa ewekë ke, tha ka ngazo kö. Ngo pane e jë la itre xötr ngöne la Tusi Hmitrötr nge, mekune hnyawa jë. Tro hë epuni lai a trotrohnin laka, ka nyipiewekë troa xötrethenge hnyawa la itre wathebo i Iehova. Nge ketre, maine jë tro fe hë epuni lai a trotrohnin laka, hetre itre ewekë nyine tro epuni a saze ngöne la mele i epun. Maine tro epuni a trongën, ke tro hë epuni a hetrenyi la tingeting me madrine tune lo hna melëne hnene la itre ka ce sinee me Akötresie. (Isaia 48:17, 18) Tha ka hmaloi kö, ngo ijiji epuni fe hi. Nemene la ka anyipicine lai?

¹⁹ Tha tro jë kö Iehova a upi së troa kuca la ketre ewekë hne së hna thatrein. (Deuteronomi 30:11-14) Ka ihnimi nyipici Nyidrë, nge atre pengö së hnyawa hi hnei Nyidrë. Atre hnyawa hi Nyidrëti la itre thina së ka loi me ka ngazo. (Salamo 103:14) Paulo aposetolo a thue catre koi së ka hape: “Ngo nyipici Akötesie, ate tha nue nyipunie kowe la itupathi hune la hnei nyipunie hna atein ; ngo loi pe tro nyidëti a nyi jëne köte e kola tupath, mate ateine nyipunie xomi hnin.” (1 Korinito 10:13) Ka xecie koi së laka tro palahi Iehova a hamë së la atreine troa kuca la loi. Tro Nyidrëti a hamëne “la etrune la men ngo tha qa the huni kö”, kola hape, men ka ketre pengöne kö, nyine troa xatua së troa cile catr ngöne la itre itupath. (2 Korinito 4:7) Tune la ixatua hna melën hnei Paulo ngöne la itre itupath, öni angeic: “Ateine ni troa kuca la nöjei ewekë asëjëihë hnei nyidëti ate aegöcatenyi ni.”—Filipi 4:13.

ININEJË TROA HNIME LA ITRE HNEI IEHOVA HNA HNIM

20. Nemene la itre thina nyine tro sa xötrethenge, nge pine nemen?

²⁰ E ajane së troa ce sinee me Iehova, ke tro sa thipetrije la itre ewekë hnei Nyidrëti hna sisin. Ngo tha eje hmekuje kö lai. (Roma 12:9) Ame la itre sinee i Akötresie ke, angatr fe a hnime la itre hnei Nyidrëti hna hnim. Tune la hna qaja ngöne Salamo 15:1-5. (E jë.) Angatr a thele troa xötrethenge la itre thina i Iehova tune la ihnim, me madin, me tingeting, me xomi hni ahoeany, me metöt, me thina ka loi, me nyipici, me thina ka menyik, me xome hnöth.”—Galatia 5:22, 23.

21. Nemene la ka xatua së troa hetrenyi la itre thiina ka amadrinë Akötresie?

²¹ Nemene la ka troa xatua së troa hetrenyi la itre thina cili? Tro sa inine me e lapane la Tusi Hmitrötr, matre tro sa atre la itre hnei Iehova hna hnim. (Isaia 30:20, 21) E cili, tro ha tru la ihnimi së koi Iehova, nge tro fe hë lai a xatua së troa drengethenge Nyidrë.

22. Nemene la thangane koi së e tro sa drengethenge Iehova?

²² Ame la easa saze la aqane mele së, ke ka ceitune memine lo easa una la ihetre ka he ekö, matre troa hetrëne la ka hnyipixe. Tusi Hmitrötr a qaja ka hape: tro sa “una tije la ate ka hekö” nge troa “xetëne la ate ka hnyipixe.” (Kolose 3:9, 10) Tha ka hmaloi kö, ngo e tro sa thele troa saze me drengethenge Iehova, ke “atraqate la june” tro Nyidrëti a hamë së. (Salamo 19:11) Celë hi hnei Nyidrëti hna thingehnaean. Iëne jë troa drengethenge Iehova, nge amamane jë ka hape ka thoi Satana. Nyihlue i Iehova jë, tha göi tro kö a kepe manathith, ngo hnene la ihnimi së koi Nyidrë. Ame e cili, itre sinee i Akötresieti fe hë së.