GÖTRANE 5

Bëeke Jë Kowe La “Atre Thupë Mamoeë Nyipunie Me Atre Thupëne La Itre u i Nyipunie”

Maine epuni hi enehila a hane melëne la itre jole hna ithanatane e hnine la boroshüre celë, the seseu kö! Ceitune hi la itre jole ka traqa kowe la itre hlue i Akötresie ekö hna qaja hnine la Tusi Hmitrötr, me itre hlue i Nyidrë enehila. Pine laka, hnei angatre hna atreine elë hune la itre jole cili jëne la ixatua i Iehova, haawe, ijiji epuni fe hi!

“Öhne jë hi ni ka hape, tha ase kö Iehova nuetriji ni, ngo loi e tro hmaca ni a atre la aqane troa bëeke koi Nyidrë”

LOI e xecie koi epun laka, ce Iehova me epun la epuni a bëeke koi Nyidrë. Tro Nyidrëti a xatua epuni troa elë hune la itre hnei epuni hna seseun, me axapone la itre hni epuni hna akötrën, me atingetingëne la hni epun me mekun, ke hetrenyi hë la mekuthetheu ka wië. Ame hë e cili, tro hmaca ha hetre aja i epuni troa ce nyihlue i Iehova memine la itre hlue i Nyidrë. Ceitune hi la pengöi epun memine lo itre xa pane Keresiano ekö. Öni Peteru aposetolo koi angatr: “Hna tui nyipunieti la itre mamoe hna menune la gojeny, ngo enehila hmacahmaca ha nyipunie kowe la atre thupë mamoeë nyipunie me atre thupëne la itre u i nyipunie.”—1 Peteru 2:25, MN.

Ame la ka sisitria koi epun, tre ene la troa bëeke koi Iehova. Pine nemen? Tro epuni lai a amadrinëne la hni Nyidrë. (Ite Edomë 27:11) Ke ame Iehova lo, tre Akötresieti ka hane fe madrin, nge ka hane fe hleuhleu. Celë hi matre tro lai a hetre thangane koi Nyidrë la itre huliwa së. Ame pe, tha hnei Iehova kö hna musinë së troa hnimi Nyidrë me nyihlue i Nyidrë. (Deuteronomi 30:19, 20) Celë hi hna qaja hnene la ketre atre ithanatane la Tusi Hmitrötr kola hape: “Pëkö ketre atr ka atreine troa fe la hni së; easë hmekuje kö.” Maine ihnimi la ka upi së troa nyihlue i Iehova, tro hë së lai a fe la hni së. Maine celë hi hne së hna kuca, easë hi lai a hamë Nyidrë la ahnahna ka sisitria, ene la hni së ka nyipici. Ketre tro fe hë Nyidrëti lai a madrine catr. Eje hi laka, pëkö ka ceitu memine la madrine hne së hna kapa qa ngöne la hne së hna nyihlue i Iehova.—Ite Huliwa 20:35; Hna Amamane 4:11.

Hna kapa hnyawa la trejine föe hnene la ekalesia

Ketre, e tro hmaca epuni a xejë la huliwa i Iehova, tro ha amejine la itre hni epuni hnene la itre ewekë ne la u. (Mataio 5:3) Hna xupi së matre tro sa öhnyi madrine qa ngöne la easa nyihlue i Iehova. Celë hi matre, kola isa hnyingëne thele hnene la itre atr e cailo fen ka hape, ‘Pine nemene matre easë pi e celë fen?’ Angatr a pi atre la itre mekune ka sa la itre hnyinge ka tru göi aliene mel. Angatre a pi atre, ke hnei Iehova hna xupi angatre cememine la aja cili. Pëkö ketre ewekë ka amadrinë së hune la tro sa atre ka hape, easa nyihlue i Iehova qa kuhu hni së.—Salamo 63:1-5.

Aja i Iehova tro epuni a bëeke hmaca koi Nyidrë. Nemene la enyipicin? Wange ju hi la aqane hnëkëne hnyawane la boroshüre celë; hna kuca cememine la itre thithi ka nyimutre. Maine jë, hna amamane koi epuni la boroshüre celë hnene la ketre qatre thup, maine ketre trejine pena. Ma celë hi lai ka upi epuni troa e me kapa la itre ithuemacanyi qa hnin. Itre ewekë lai ka anyipicine laka, tha hna nuetriji epuni kö hnei Iehova. Nyidrëti pe a ee epuni hmaca koi Nyidrë.—Ioane 6:44.

Kola keukawa la hni së la easa atre ka hape, tha ase kö Iehova nuetrije la itre hlue i Nyidrë ka nanyi hë qaathei Nyidrë. Celë hi hna melën hnei Donna. Öni angeic: “Ngacama nanyi trootro hë ni qa ngöne la nyipici, ngo hnenge pala hi hna mekune ajuine lo hna qaja ngöne Salamo 139:23, 24, kola hape: ‘Xajawatineju, maine ej’ e kuhu hninge la jëne akötr, nge e ni jë ngöne la gojenyi ka epine palua.’ Drenge hi ni laka, tha göhnenge fe kö la fene celë, ngo ame la sipu göhneng, tre, e hnine la organizasio i Iehova. Öhne jë hi ni ka hape, tha ase kö Iehova nuetriji ni, ngo loi e tro hmaca ni a atre la aqane troa bëeke koi Nyidrë. Atraqatre la madrineng enehila laka, bëeke hmaca ha ni koi Nyidrë!”

Loi e xecie koi epun laka, ce Iehova me epun la epuni a bëeke koi Nyidrë

Eahuni a thithi sai epuni matre öhne hmaca jë epuni “la madine qa thei Iehova.” (Nehemia 8:10) Tha tro jë kö epuni lai a ietrane la hnei epuni hna bëeke koi Iehova.

Kola Sa La Itre Hnyinge Ne La Itre Ka Pi Bëeke Koi Iehova

NEMENE LA NYINE TRO NI A PANE KUCA?

Thatreine kö la ka wezipo troa aca tro loi ju hi. Ketre tui epuni fe, e aja i epuni troa loi hmaca ngöne la götrane u, loi e tro epuni a xome la göxeni ne la u ka ijij e nöjei drai. The mekune pi kö ka hape, ijiji epuni hi troa aca tro kuca la itre huliwa i Akötresie tun ekö lo. Xome jë pe la hnepe ijine ka ijij troa e, maine drenge pena la kola e la itre mekene tus. Maine pena tro epuni a inine la ketre itusi së, maine tro kowe la sit jw.org. Ketre, loi e tro fe epuni a thele jëne troa canga sine hmaca la itre icasikeu. Ngo e hune la nöjei ewekë cili, nyipi ewekë catre hmaca kö tro epuni a thithi koi Iehova me sipo ixatua thei Nyidrë. Tusi Hmitrötr a thuecatre koi epuni me hape: “Nuepi koi nyidëti la kuke hnine asëjëihë i nyipunie, ke nyidëti a meku nyipunie.”—1 Peteru 5:7.

“Ame hë lo eni a nanazij, hmahma fe hë ni troa hane thithi koi Iehova. Ngo ame hmaca la eni a hetre trenge catre troa thith, traqa pi hi koi ni la ketre qatre thup. Xatua ni jë hi hnei angeice troa trotrohnine ka hape, tha ase kö Iehova nuetriji ni. Hnei angeice fe hna upi ni troa nyiqaane e la Tusi Hmitrötr o drai. Haawe, ame ju hi la eni a trongëne la hnei angeice hna qaja, hetre trenge catrenge jë hi troa sine hmaca la itre icasikeu. Tha qea ju kö e thupen nge eni hmaca ha cainöje trootro. Eje hi, atraqatre la madrineng ke tha ase kö Iehova nuetriji ni.”—Eeva.

TRO JË A KEPE NI TUNE KAA HNENE LA EKALESIA?

Loi e xecie hnyawa e kuhu hni epuni laka, troa kepe epuni hnyawa hnene la ekalesia. Tha tro jë kö angatre lai a qaja angazo epun, ngo tro pe lai a mama la etrune la ihnimi angatre koi epun, nge tro fe angatre lai a ithuecatre koi epun.—Heberu 10:24, 25.

“Hmahma catre ni lo eni a bëeke hmaca kowe la Uma Ne Baselaia. Eni a ngazohnine la aqane tro la itre sineng a kepe ni. Ngo xapo ju hi la hninge la kola ithanata koi ni hnene la ketre qatre föe ka 30 hë lao macatre ne sine eahlo la ekalesia. Öni eahlo: ‘Neköng, hane hi la hnalapa i hmunë!’ Ketri ni ju hi hnene la ithanata i eahlo, ke nyipici, hnalapange hi lai!”—Javier.

“Ame lo eni a xötrei sine hmaca la itre icasikeu, hnenge hna pane lapa acony matre tha tro kö a öhnyi ni hnei ketre. Ngazo pe, ala nyimu la itre ka wangatrehmekunyi ni, ke itre ka atre ni hnyawa qaane lo eni a co. Ame e cili, hnei angatre hna nyipi ni me dremi ni, ame hna tingetinge pi hi la hning. Kösë eni hmaca ha ngöne la hnalapang.”—Marco.

NEMENE LA AQANE TROA XATUA NI HNEI ITRE QATRE THUP?

Tro la itre qatre thup a hamën amenyiken la ixatua koi epun. Angatre lai a hamë ithuecatre ke öhne hi angatre la aja i epuni troa hetrenyi hmaca lo ‘ihnim i epuni hnapan’ koi Iehova. (Hna Amamane 2:4) Ketre, atraqatre la madrine i angatre troa xatua epuni ce memine pala hi “la hni ka menyik,” troa wenë amekötine la itre thiina i epun ka ngazo. (Galatia 6:1; Ite Edomë 28:13) Tro hë angatre lai a sipone kowe la ketre trejin matre tro epon a ce wange la ca itusi ka tune la itus, Approchez-vous de Jéhovah maine “Thupë Nyipunieti Ju Kö Ngöne La Ihnimi Akötesie”. Loi e xecie mina fe koi epuni laka, tro la itre qatre thup a akeukawanyi epuni me sajuë epuni ngöne la epuni a kuca la itre nyine kuca göi troa bëeke hmaca koi Iehova.—Isaia 32:1, 2.

Önine la ketre trejine trahmany, “ame ngöne lo 8 lao macatre ne eni a nanazij, hnene pala hi la itre qatre thup hna wai ni. Ame ju hi la ketre drai, hnene la ketre qatre thup hna amamane koi ni la itre ifoto i nyiho ekö. Mekune hmaca jë hi ni lo itre drai ne madrine ni ekö, ngöne lo eni a huliwa i Iehova. Hnene la itre qatre thup hna xatua ni troa xejë hmaca la huliwa i Akötresie.”—Victor.

“Tro Nyidrëti a Aegöcatrenyi Së”

Ame ngöne la sine tusi së, Nyima Koi Iehova, Hetrenyi la itre nyima ka troa akeukawan me thuecatre i epun ngöne la epuni a xejë hmaca la itre huliwa i Iehova. Pane e hnyawa ju la itre trenge ewekë ne la nyima 60. Hna nyitrepene hnene la itre hna cinyihane ngöne 1 Peteru 5:10, hane hi la tan: “Tro Nyidrëti a Aegöcatrenyi Së.”

Qa ngöne melöhlem ase hë thepe së

Hnei Iehova kowe la nyipici.

Mama ha koi Nyidrë aliene hni së:

Meköt, aja troa thele Nyidrë.

Ngöne la thith hne së hna sa xepu;

Nyidrë la hnapo së palua kö.
Hnei Iehova hna up la Hupuna hna hnim;

Ajai Nyidrë tro sa mele ka loi.

Mejiune jë së, the luelue kö

Troa kapa la uati Nyidrë.

Thaa tro kö Nyidrëti a thëthëhmin

La ka hnimi Nyidrë me lapaun.

(KORES)

Iehova la giti së epine palua,

Atre ixatua, me hamë trenge catr.

Jëne madrai Iesu hnei Nyidrë hna itö së,

Atre ixatua me hamë trenge catr.

Ame koi troa drenge la miuzik ne lai, me itre xa nyima, scanner ju la code celë maine tro jë kowe la sit www.jw.org/fr. Tro jë kowe lo hna hape PUBLICATIONS > MUSIQUE. [Tro jë kowe la sit qene Wiwi]