MEKENE 14
Nemene La Aqane Tro Sa Hmi Koi Akötresie?
Tune lo hne së hna ce wang ngöne lo Mekene 13, tha Akötresieti kö a kapa la nöjei pengöne hmi. Ngo, ijije hi tro sa hmi koi Akötresie thenge la aqane amekötine Nyidrë. Nemene la aqane tro sa “hmi” koi Akötresie? (Iakobo 1:27) Tro sa ce wang la hna qaja hnei Tusi Hmitrötr göne lai.
1. Nemene la ka troa nyitrepene la hmi së?
Tusi Hmitrötr la ka troa nyitrepene la hmi së. Öni Iesu ngöne la nyidrëti a thith koi Iehova: “Trengewekë i nyipë la nyipici.” (Ioane 17:17) Tha hna nyitrepene kö hnei Tusi Hmitrötr la itre ini ne la itre xaa hmi, ngo hna nyihnan hnene la ini me aqane waiewekë i atr. Ngo, tha Iehova kö a kapa la itre ka ‘thahe la wathebo i Nyidrë.’ (E jë la Mareko 7:9.) Ngo, e tro pe sa e la Tusi Hmitrötr, me trongëne la itre eamo i Nyidrë, tro hë sa amadrinëne la hni Nyidrë.
2. Tro sa hmi tune kaa koi Iehova?
Pine laka, Iehova la Atre Xup asë, Nyidrëti hmekuje hi la hne së hna troa atrun. (Hna Amaman 4:11) Kolo lai a hape, Nyidrëti hi la nyine tro sa hnim, me thili kow. Nge tha tro kö sa thili koi Nyidrë jëne la itre iatr, me itre hnasaatr.—E jë la Isaia 42:8.
Tro Iehova a kapa la hmi së, e tro ej a “hmitrötr.” (Roma 12:1) Kolo lai a hape, tro sa trongëne la itre hnei Nyidrëti hna amekötin ngöne la mele së. Tune la easa metrötrëne la mekuna i Nyidrë göi faipoipo, memine fe la easa nuetrij la itre hna majemine ka ngazo, tune la ufi sixa, ufi dorog, maine troa hmo hnei kahaitr.a
3. Pine nemene matre tro sa atrunyi Iehova memine la itre xaa keresiano?
Ame la itre icasikeu hne së hna kuca e nöjei wiik, ke, itre ijine lai tro sa ce ‘atrunyi Iehova.’ (Salamo 111:1, 2) E cili, easa atrunyi Nyidrë jëne la itre nyima. (E jë la Salamo 104:33.) Iehova a ajan tro sa sine la itre icasikeu pine laka, tru la ihnimi Nyidrëti koi së, nge aja i Nyidrë tro sa mel utihë epine palua. Atre hi Nyidrë ka hape, ka nyipiewekë la itre icasikeu koi së. Ame la easa sine la itre icasikeu, ke, easa ithuecatr kowe la itre xan, nge kolo mina fe a aegöcatrenyi së.
TROA CE ITHANATAN
Tro sa ce wang la itre kepin matre tha aja i Akötresie kö tro sa thili kowe la itre iatr, me itre hnasaatr. Nge, tro fe sa ce wang la lue aqane tro sa atrunyi Nyidrë.
4. Tha tro kö sa thili koi Akötresie, jëne la itre iatr maine itre hnasaatr
Tro sa atre tune kaa ka hape, tha aja i Akötresieti kö? Goeëne jë la VIDEO, nge ce ithanatane jë cahu hnying:
Ame ekö, nemene la itre ewekë ka traqa kowe la itre hlue i Akötresie la angatr a thil kowe la ketre hnasaatr?
Itre xan a mekun ka hape, jëne la itre iatr me itre hnasaatr, tro angatr a easenyi catr koi Akötresie. Ka nyipici kö la aqane mekun celë? E jë la Esodro 20:4-6 me Salamo 106:35, 36, nge ce ithanatane jë cahu itre hnying:
Nemene la itre ewekë hnei angatr hna majemine thili kow?
Nemene la mekuna i Iehova göne la itre ewekë cili?
Nemene fe la mekuna i epun?
5. Ame la troa thil koi Iehova hmekuj, ke, celë hi ka troa thepe së qa ngöne la itre trengathoi
Ngo troa thepe së tune kaa? Goeëne jë la VIDEO.
E jë la Salamo 91:14, nge ce ithanatane jë cahu hnying:
Nemene la ewekë hnei Iehova hna thingehnaean koi së, e tro sa thili koi Nyidrë hmekuj?
6. Easa atrunyi Iehova jëne la itre icasikeu ne la ekalesia
Ame la easa hamë mekun ngöne la itre icasikeu, easë hi lai a atrunyi Iehova. Nge easë fe a itö ithuecatrekeu. E jë la Salamo 22:22, nge ce ithanatane jë cahu itre hnying:
Ka ithuecatre kö la itre mekun hnei eö hna dreng ngöne la itre icasikeu?
Ajane kö eö troa hane hnëkëne la ca mekun?
7. Aja i Iehova tro sa qaja la itre hne së hna inin
Hne së mina fe hna hane qaja koi itre xan, la itre nyipici qa hnine la Tusi Hmitrötr. E jë la Salamo 9:1 me 34:1, nge ce ithanatane jë cahu hnying:
Nemene la ketre trenge nyipici hnei epuni hna inin qa hnine la Tusi Hmitrötr, hnei epuni hna pi ce thawa me itre xan?
HNE SË HNA MAJEMINE DRENG: “Ka loi asë hi la hnënge hmi.”
Nemene fe la mekuna i epun?
HANE HI LA HNE SË HNA CE WANG
Tro Akötresieti a kapa la hmi së, e tro sa hmi koi Nyidrë hmekuj, tro sa atrunyi Nyidrë ngöne la itre icasikeu ne la ekalesia, nge tro sa qaja koi itre xan la itre hne së hna inin.
Nyine Amekunën
Nemene la aqane ini së hnei Akötresie troa thili koi Nyidrë?
Pine nemene matre Iehova hmekuje hi la nyine tro sa thili kow?
Pine nemene matre tro sa ce icasikeu me itre xan?
ITRE XAA NYINE WANG
Ame ngöne la hna melën “Je ne suis plus esclave des idoles,” tro epuni a öhne la aqane nuetrij la ketre föe la itre hnasaatr.
Itre ixatua matre aijijë epun troa hamë mekun ngöne la itre icasikeu ne la ekalesia.
“Atrunyi Iehova Jë e Hnine La Ekalesia” (Ita Ne Thup Januare 2019)
Hnene la ketre nekö trahmanyi hna isine troa sine la itre icasikeu ne la ekalesia.
Ka nyipiewekë la kuluse ngöne la itre xaa hmi ka qeje Iesu. Ngo hapeu hna kapa kö hnei Iehova?
“Pourquoi les Témoins de Jéhovah n’utilisent pas la croix dans leur culte ?” (Itus jw.org)
a Tro pë hë sa ce wang la itre mekun celë, ngöne la itre xaa ini.