“Drengë Hë Hnei Nyipunie La Xomi Hni Iobu”
“Drengë hë hnei nyipunie la xomi hni i Iobu nge ate hë la hna nyi pune hnei Joxu, ka hape,Joxu la ate utipin me hnime atraqat.”—IAKOBO 5:11.
1, 2. Nemene itupathi hna cile kow hnene la lue trefëne ne Pologne?
HARALD ABT la ketre atre anyipici Iehova; ngöne la hnaaluene macatre ne nyihlue i Iehova angeic, hna traqa pi la itre sooce i Hitler matre musinëne la traone Danzig (enehila Gdansk) götrane ciepi ne la nöje Polony. Ngazongazo hë la pengöne aqane mel, nge ketre, jole catrë hë kowe la itre nyipi keresiano ne cili. Hnene la polisi Gestapo hna tupath troa una iele Harald troa sijihatrene la pepa ka qaja ka hape angeic a nuetrije la lapaune i angeic, ngo loi pe thipëne kö angeic. Thupene la itre wiike ne meköle kalabus, kola upi angeice pi kowe la kalabusi atraqatr e Sachsenhausen, nge e cili mina fe, hna axösisi angeice me lepi angeic. Hnene la ketre sooc hna köjane la soeë hnë dreu atr ka mec me hape koi Harald, “E tro pala kö eö a catre ngöne la lapaune i’ö tre, footrine pe hi lao drai matre elë jë eö kowe lai Iehova i ö!”
2 Ame lo ijine xöle huji Harald tre, kolo petre kö a iji thiine hnei Elsa föe i angeic la neköi nyidro jajiny ka treen lao treu. Ngo thaa ase kö thëthëhmi Elsa hnene la Gestapo. Thaa hmitre ju kö nge kolo fe ha umë nyiidro e hnine lo hnë humu atr e Auschwitz. Loi pe, hnei nyiidro hna catr, me atreine xomihni ngöne la itre macatre cili, tui Harald. Ijije tro epuni atrepengöne hnine la Tour de Garde ne 15 Eiperem,1980 la itre akötre i nyidro me aqane xomihnine nyidroti la itre iangazo. Kola cinyihane hnei Harald ka hape: “14 asë lao macatre hnenge hna melën ngöne la hnë humu atre me itre kalabus pine la lapauneng koi Akötresie. Hna hnyingë ni ka hape: ‘Ixatua kö la föi nyipë ngöne la ijine nyipëti a xomihnine la nöjei itupathi cili?’ Eje hi, ixatua ka sisitria catre Elsa koi ni! Atre petre kö ni qaane ekö laka thaa tëtë kö la lapaune i nyiidro, nge atreine hi tro nyiidroti a lapa nyipici uti hë la pun, nge celë hi la ka ithue egöcatrenge lai. Atre hi ni laka, aja i nyiidro troa wai ni e meci pine la nyipici, hune la troa atre laka hna nua amacanyi ni, ke, hnenge hna nue trije la nyipici. . . . Ketre ame fe Elsa, tre hnei nyiidro hna thue la itre iakötrë ka tru ngöne la itre macatre ne akalabusi nyiidro e Alema.”
3, 4. (a) Tulu qaathei drei la ka troa thue catr kowe la itre keresiano matre ijij troa hane xomihni ahoeany? (b) Pine nemen matre kola upi së hnei Tusi Hmitrötr troa wange la hna melëne hnei Iobu?
3 Kola mama ngöne la itre hna melën hnene la Itretre Anyipici Iehova ka alanyim, laka, thaa ka hmaloi kö e troa xomihnine la akötr. Celë hi kepin matre Tusi Hmitrötr a hamëne la eamo celë kowe la nöjei Keresiano asë, kola hape: “Ange tejine fe, nyi tupune ju la nöjei perofeta, ange hna ulatine ngöne la atesieti ne la Joxu, ngöne la aköt, me xomi hni.” (Iakobo 5:10) Ngöne la itre hadredre lao macatre, hna axösisine pala hi la itre hlue i Akötresie ngo pëkö nyipi kepin. Jëne la tulu ne la “itete anyipicin ka ala nyimu”, ijije hi tro sa hetrenyi la trengecatr ka troa xatua së troa catre nyenyape cememine la xomihni ngöne la iwaja i ange Keresiano.—Heberu 11:32-38; 12:1.
4 Ame ngöne la Tusi Hmitrötr, tre, Iobu la ketre tulu ka hlemu ngöne la troa xomihni ahoeany. Hna cinyihane hnei Iakobo ka hape: “Hanawang, easha mekune laka manathithi angete xomi hni. Dengë hë nyipunie la xomi hni Iobu, nge ate hë la hna nyi pune hnei Joxu, ka hape, Joxu la ate utipine me hnime atraqat.” (Iakobo 5:11) Ame la hna melëne hnei Iobu, tre, kola canga amamane koi së la itre ahnahna hna troa kapa hnei angetre mele nyipici, ene lo itre hnei Iehova hna amanathithin. Nge, ame la ewekë ka sisitria, tre, ej a amamane hnyawa la itre nyipici ka troa xatua së ngöne la itre ijine iangazo. Kola xatua së hnene la tusi Iobu troa sa la itre hnyinge celë, hna hape: Maine traqa pi hi koi së la ketre itupath, pine nemene matre nyipi ewekë tro sa pane thele troa trotrohnine la itre jole hnene itre ej hna amejën? Nemene jë la itre thiina ka loi me aqane wai ewekë ka ijij, ka troa xatua së troa xomi hnine itre ej? Tune kaa la aqane tro sa ithuecatre kowe la itre sine ce huliwa së keresiano ngöne la itre akötre i angatr?
Trotrohnine Hnyawane Jë Së La Etrune La Itre jol
5. Nemene la sipu kepin nyine tro sa lapa fë ngöne la ijine easa cile kowe la itre itupath maine itre iangazo pena?
5 Maine easa cile kowe la itre jol, nge hetre aja së troa cile catre pala hi ngöne la götrane la ua, haawe, thaa tro pi kö sa canga sesë menu ngo tro pe sa pane thele troa trotrohnine hnyawa la nöjei götrane ne itre jole cili. Nyipi ewekë troa ujë tune lai, wanga tro pena la itre sipu jole së a ahnuthe la aqane wai ewekë së ngöne la götrane la ua. Ame la ewekë ka sisitria catre koi së, tre, ene la troa mele nyipici koi Akötresie. Nyipi ewekë tro sa wanga atrune la ithuecatre hna hamëne koi së hnene la Tretretro së ekoho hnengödrai, kola hape: “Neköng, inamacanepi, mate madinejë la hning ; mate hete nyine sa koi angeic’ate qaja angazo ni.” (Ite Edomë 27:11) Drei la ketre hnëqa ka sisitria koi së! Ngacama itre atr ka kucakuca me ka ngazo së, ngo ijije hi tro sa amadrinëne la Atre Xupi së. Ame la easa cile catr kowe la itre jol memine la itre itupath, qa ngöne laka, easë a hnimi Iehova, haawe, easë hi lai a amadrinë Nyidrë. Hnene la nyipi ihnim thene la itre keresiano hna aijijë angatre troa xomihnine la nöjei ewekë asë. Pë jë pi kö troa pë thangan ej me paatre pena.—1 Korinito 13:7, 8.
6. Tune ka la aqane sili thoi Iehova hnei Satana nge drei fe la hnei angeic hna sili thoi hun?
6 Tusi Iobu a köja Satana, laka, angeice hi lo ka jelengazo Iehova. Eje fe a qaja la engazone la pengöne la ithupëjia ka sihngödr memine la aja i angeic troa thëtrij la aqane imelekeu së me Akötresie. Tune la hna amamane hnene la pengö i Iobu, Satana a jelengazone lo itre hlue i Iehova asë me qaja ka hape thaa hnei ihnimi kö la angatr a nyihlue i Nyidrë; angeice fe a thele troa amaman laka, ka canga tëtë hi la ihnimi angatre koi Akötresie. Itre thauzane hë enehila lao macatre ne nyiisi Akötresieti hnei angeic. Ame lo kola ukapië angeic qaa hnengödrai, hna qeje pengö i angeic hnene la nine ula qaa hnengödrai kösë “ate nyi ewekëne la ite tejine me eëshë” me hape, angeic a nyi ewekë angatr, “xajawa i Akötesie lai me jid.” (Hna Amamane 12:10) Haawe, jëne la aqane nyipici së me xomi hni së, easa amamane laka, ame la itre sili ewekë i angeic tre thaa ka nyipici.
7. Tune ka la aqane tro sa cile catr kowe la itre kucakuca ne la ngönetrei?
7 Thaa tro pi kö sa thëthëhmine laka, tro Satana a pune treqene lo itre ijine kola traqa koi së la ketre itupath, matre troa thele troa ananyi së qaathei Iehova. Eue lo ijine angeic a tupathi Iesu? Ngöne hi lo ketre ijine kola mecijiine hnei nyidrë, ke nyimu drai ne thaa xeni hë nyidrë. (Luka 4:1-3) Loi pe, hnene la trenge catre Iesu ngöne la ua, hna aijijë nyidrë troa thipetrije la itre itupathi Satana. Celë hi matre nyipi ewekë catr tro sa egöcatre ngöne la götrane la ua, matre troa atreine cile kowe la itre sine kucakuca ne la ngönetrei, maine jë hnei sine mec, maine qatre trootro pena! Ngacama “ame la ate huni e trön kola ethit, ngo tha kucakuca kö hun pine laka “kola ahmadradran’o drai pala hi la ate e kuhu hnin.”—2 Korinito 4:16.
8. (a) Nemene la aqane tro la mekune ka ngazo a apoizinë së? (b) Tune kaa la aqane mekune i Iesu?
8 Ketre, ijije tro la itre mekune ka ngazo a ananazijëne la lapaune së. Tro jë a thele hnene la ketre atr ka hape: ‘Hna uëne matre nue pi Iehova la ewekë celë?’ Maine pena, tro ketre atr a hnyingëne thele thupene la hna qanangazo angeic, ka hape: ‘Hnauëne la kola ujë tune la koi ni nge ketre trejine hi me eni?’ Jëne hi la itre mekun ka tuun, tro hë së a wangacone la itre jole ka tru, nge tro pena ha sasaithi tulu la aqane kukehnine së la itre hnepe jole së. Qa ngöne la hna nyi ewekë Iobu menu hnene lo köni sine i angeic, ene pe kola hleuhleu me hacehni hnei angeic. Kösë ceitune hmaca hi lai akötre cili, memine la akötre i angeic ngöne lo kola tithi angeic hnene la ketre mec. (Iobu 16:20; 19:2) Ketre tune mina fe, Paulo aposetolo a amaman laka, ame la troa nohni maine elëhni ahoeanyi tre kola “nue hne i Satana.” (Efeso 4:26, 27) Nyipi ewekë catre kö tro la keresiano a xötrethenge la tulu i Iesu lo “hna nue nyidrëti kö kowe la ate hnyingën’ amekötin,” Iehova Akötresie, hune la troa fe amamane la hleuhleu i angeic maine troa ielëhnikeu, maine troa wanga atrune menune pala ha la aqane angazo angeic. (1 Peteru 2:21-23) Maine tro sa hane “cila macanyi fë la hni ka tune lai“ tui Iesu, hetrenyi hë së la jiane ka sisitria troa icilekeu memine la itre iangazo i Satana.—1 Peteru 4:1.
9. Nemene la hna axeciëne hnei Iehova koi së e hace la itre ehnefe hne së hna thu maine itre itupathi pena hna cile kow?
9 Ame la ewekë hnapan, thaa tro pi kö sa mekune ka hape ame la itre jole së, tre, celë hi hatrene lai laka hna nuetriji së hnei Akötresie. Celë hi lai hna mekune hnei Iobu, matre akötre catre pi hë angeic; ketre, hna akötrë angeice fe hnene la itre trenge ithanata ka catr hna hamën hnene lo itre sinee i angeic. (Iobu 19:21, 22) Tusi Hmitrötr a thue catre koi së ka hape: “Tha’ teine kö troa tupathi Akötesie hnei ngazo, kete tha hnei nyidëti kö hna tupathi kete ate.” (Iakobo 1:13) Ngo, Iehova pe a thingehnaeane laka tro Nyidrëti a xatua së troa thue la itre hace së, me nyijëne kötre së qa ngöne la itre itupath. (Salamo 55:22; 1 Korinito 10:13) Maine tro sa qale catre pala hi koi Iehova ngöne la itre ijine easa akötr, haawe, thaa tro hë së a sasaithi tulu la aqane tro sa goeëne la itre jol, nge ijije hë tro sa hun ngöne la easa cile kowe la itre nyinyithina i Diabolo.—Iakobo 4:7, 8.
Itre Ixatua matre atreine troa xomi ahoean
10, 11. (a) Nemene la ka xatua Iobu troa xomihni ahoeany? (b) tune kaa la aqane xatua Iobu hnene la mekuthetheu ka tingeting?
10 Ngacama catrehnine la itre itupathi hna melëne hnei Iobu, ene lo itre trenge ewekë ka akötrë angeic hna qaja hnene lo “itete iaupun”, nge thaa ketre trotrohnine kö angeice la sipu kepine la itre akötre i angeic, ngo ame pe hnei Iobu pala hi hna mele nyipici. Nemene la ini hne së hna kapa qa ngöne la xomihni ahoeane i Iobu? Thaa tro kö sa lueluën, ame la nyipi kepin matre Iobu a hun, tre, hnene hi la aqane mele nyipici angeic koi Iehova. ‘Nge ate qoue Akötesie, me iananyine memine la ngazo.’ (Iobu 1:1) Celë hi la aqane mele i Iobu lai. Ngacama thaa trotrohnine kö Iobu la kepine matre kola traqa itrai la itre hulö koi angeic, ngo ame pe hnei angeice pala hi hna qale catre koi Iehova. Hnei Iobu hna mejiune pala hi laka, ngacama loi ju hë maine ngazo, ngo ame pe, tre, thaa itre ewekë kö lai ka troa sewe angeic troa nyihlue i Akötresie.—Iobu 1:21; 2:10.
11 Keukawa mina fe la hni Iobu, qa ngöne laka, lolo la mekuthethewe i angeic. Lapa hnyawa la mekuna i Iobu, pine laka hnei angeice pala hi hna xatuane la itre ka lapa easenyi angeic, me melëne hnyawa la itre hna amekötine hnei Iehova, nge hnei angeice fe hna thipe trije la nöjei hmi ka thoi. Itre ewekë lai akeukawane la hni Iobu ngöne lo ijine kola troa meci hnei angeic pine la itre akötr ka traqa koi angeic.—Iobu 31:4-11.
12. Nemene la aqane amekötine hnei Iobu la aqane wai ewekë i angeic, nge pine u?
12 Ngo eje hi lai laka, nyipi ewekë catr la tro Iobu a kapa la ketre ixatua, matre tro angeic a pane wenë amekötin la aqane wai ewekë i angeic ngöne la itre xaa götran. Hnei angeice hna ipië me kapa la ixatua. Celë hi ketre ewekë lai ka aijijë angeic troa xomihni ahoean uti hë la pun. Hnei Iobu hna pane qatixenyëne hnyawa me metrötrën la itre ihaji ka inamacane i Elihu, nge hnei angeice hna ujë thenge la ihaji i Iehova. Öni angeic: “Qa ngöne lai, nöngöti [hnenge] hna ulatin, nge pëkö trotrohnin. Qa ngöne lai inieti a zizi nieti kö (eni a aconyi ni), me ietra ngöne la xaxau me hnatesij.” (Iobu 42:3, 6) Ngacama hna tithi angeice hnene la meci ka akötrën la mele i angeic, ngo hnei Iobu pe hna madrine laka, pine la hna amekötin la itre mekune i angeic, haawe, ieasenyi hë angeice me Akötresie. Öni Iobu: “Atrengëtinë hë ni laka pucatin’asë kö enëtilai [Iehova].” (Iobu 42:2) Jëne la hna qaja hnei Iehova la pengöi Nyidrë, trotrohnine hnyawa ha Iobu la pengöi angeic atr, qëmekene la edraië ne la Atre Xupi angeic.
13. Nemene la eloine hna kapa hnei Iobu qa ngöne la ihnim, me utipine i angeic?
13 Ame la ewekë ka traqa koi Iobu, tre, nyine amamai së fe la tulu ne ihnim, me utipin. Hna akötrë Iobu hnene lo itre ka troa aupunyi angeic, ngo ame la Iehova a upi Iobu troa thithi sai angatr, angeic a drenge thenge. Thupene lai, hnei Iehova hna aloine la meci Iobu matre egöcatre hmaca pi angeic. (Iobu 42:8, 10) Mama hi laka e tro sa pi itëkeune la itre ngazo, tre thaa celë kö la ka troa xatua së lai troa xomihni ahoean; ohea, ihnimi hi me utipin. Maine tro pe sa thipetrije la imethinë me thaa iatëkeune la itre ngazo hna kuca koi së, haawe, celë hi ka troa aegöcatrenyi së lai ngöne la ua, nge ewekë lai hnei Iehova hna amanathithin.—Mareko 11:25.
Itretre Iapunyi Ka Inamacan Ka Xatua Së Troa Xomihni Ahoean
14, 15. (a) Nemene la itre thiina ka aijijëne la atre hamë ihaji matre xatua itre xan? (b) Qeje pengöne jë la kepin matre hetre thangane ka loi la ixatua i Elihu koi Iobu.
14 Ame la ketre ini hne së hna kapa qa ngöne la mele i Iobu, tre, ene la enyipiewekën la troa kapa la itre eamo qa thene la itre ka inamacan. Ame itre xan, tre, ceitune me “ate ihnimi la enehmu o ijin’ asë, ngo ngöne la aköte jini angeicë hë.” (Ite Edomë 17:17) Ngo, tune la ewekë ka traqa koi Iobu, thaa hna akeukawane kö la itre ka hleuhleu hnene la itretre hamë ixatua, ngo kolo pena ha akötrë nyudren. Loi e troa tui Elihu; ka atreine itrotrohni angeic me hamë ixatua cememine la metrötr me ihnim. Maine jë ame itre xaa ijin, tro la itre qatre thup memine la itre keresiano ka macaj a amekötine la aqane mekunene la itre trejin ka hacehni pine la itre jol. Celë hi matre atraqatre la ini hnei angatr hna troa kapa qa ngöne la tusi Iobu.—Galatia 6:1; Heberu 12:12, 13.
15 Nyimutre la itre ini ka sisitria hne së hna kapa qa ngöne la aqane xomiujine i Elihu la ithanata. Qëmekene tro angeic a ithanata, qea pi hë la hnei angeice hna pane drenge me qatixenyëne hnyawa la itre mekun ne la köni sinee i Iobu, ngacama thaa ka meköti kö la itre mekune cili. (Iobu 32:11; Itre Edomë 18:13) Hnei Elihu hna hë Iobu hnene la ëje i angeic, me ithanata koi angeic ceitune me kowe la ketre enehmu. (Iobu 33:1) Thaa hnei angeice kö hna pi draië hui Iobu, tune lo aqane ujëne lo köni ka iapunyi ka thoi. Öni Elihu: “Hna xupi ni fe qa ngöne la dro ka fed”. Thaa ajane kö angeic troa nyixane la akötr ka eje thei Iobu, hnene la itre trengewekë ka gufa. (Iobu 33:6, 7; Ite Edomë 12:18) Thaa hnei Elihu kö hna jelengazone la thiina hnapane i Iobu, ngo kolo pe a jele loine la meköti angeic. (Iobu 33:32) Ame la ewekë ka sisitria, tre, Elihu a wai ewekë thenge la aqane wai ewekë i Iehova. Hnei angeic hna xatua Iobu troa trotrohnine hnyawa laka, ame Iehova, tre, ka meköti pala hi la itre aqane ujë i Nyidrë. (Iobu 34:10-12) Hnei angeic hna ithuecatre koi Iobu troa treqen me mejiune koi Iehova, ngo thaa tro pe a canga thele amamane la sipu meköti angeic. (Iobu 35:2; 37:14, 23) Hapeu, thaa celë kö la itre ini ka lolo hna troa kepe thangan hnene la itre qatre thup me itre xane ju kö?
16. Kola mama tune kaa thene la köni ka hamë ixatua koi Iobu laka angatre hi la itre jiane huliwa i Satana?
16 Isa pengöne catre la itre ihaji ka inamacane qaa thei Elihu memine lo itre trenge ewekë ka akötre hna hamën hnei Elifaza, Biledad, me Zofar. Hnei Iehova hna qaja koi angatr, ka hape: “Tha hnei nyipunie hna qaja göi ni la ka meköt.” (Iobu 42:7) Ngacama kola mama laka hetre ajane i angatr troa xatua Iobu, ngo ame pe, itre jiane huliwa i Satana angatr, thaa itre sinee kö ka mele nyipici. Hnei angatr asë hi ala köni hna mekuhnine qaane lo xötrei ka hape, Iobu kö la atrekë zöne la itre hulö i angeic. (Iobu 4:7, 8; 8:6; 20:22, 29) Ame koi Elifaza, tre, pëkö mejiune i Akötresieti kowe la itre hlue i Nyidrë, nge thaa nyipi ewekë kö koi Nyidrë la tro sa atre thiina ka meköt maine thiina ka thaa meköti pena. (Iobu 15:15; 22:2, 3) Hnei Elifaza fe hna jelengazo Iobu menu ka hape hetre ngazo hnei angeic hna kuca. (Iobu 22:5, 9) Ame ngöne la ketre götran, hnei Elihu hna xatua Iobu troa wenë amekötine me acatrene hmaca la aqane imelekeu i angeic me Akötresie, nge celë hi ewekë lai hna troa thele pala hi hnene la atre hamë ixatua ka ihnim.
17. Nemene la ewekë nyine tro sa lapa mekune ngöne la kola tupathi së?
17 Hetrenyi la ketre ini göi xomihniahoeany hne së hna kapa qa hnine la Tusi Iobu. Öhne hi hnene la Akötresi së ka ihnim la itre ewekë ka traqa koi së, nge hetre hni ne ajane i Nyidrë nge atreine hi Nyidrë troa xatua së ngöne la nöjei götran. Ase hë së e ngöne lo xötrei, lo hna melëne ekö hnei Elsa. Pane mekune ju së la hna pune mekune hnei angeic, hna hape: “Qëmekene troa xölehuji ni jë, hnenge hna e la tusi ne la ketre trejine föe; angeic a qaja hape, fene la iangazo ka catrehnin tro la Uati Hmitrötre i Iehova a hetrë së hnene la tingeting me lapa xetietë. Hnenge hna pane mekun ka hape ma eahlo a nango atrun. Ngo ame hë la eni a ketre cile kowe la itre itupath, tre, eni ha trotrohnine hnyawa lo trenge ithanata i eahlo. Hna traqa tune hi lai. Eje hi laka, jole pi hë e tro sa mekun e thaa hne së kö hna melën, ngo celë hnyawa hi la ka traqa koi ni. Nyipici, Iehova a xatua së.” Thaa Elsa kö a qaja lo itre ewekë hnei Iehova hna atreine troa kuca maine hna kuca ha itre thauzanë hë lao macatre ngöne lo hneijine i Iobu. Eahlo a qaja la hneijine së enehila—“Nyipici, Iehova a xatua së!”
Manathith la atre xomi hni ahoeany
18. Nemene la itre hna kepe thangane hnei Iobu qa hnine la hna xomi hni?
18 Itre xan e easë hi la ka troa cile kowe la itre itupath ka catrehnin, tune lo itre itupath ka traqa koi Iobu. Ngo, wenini ju hë së hnene la itre hace ne la fene enehila, nyimutre la itre kepine ka upi së troa mele nyipici me thiina ka pë ethan tui Iobu. Eje hi laka, hnene la xomihni ahoeanyi hna atrenamone la mele i Iobu. Hnene eje fe hna ahmadradranyi angeic matre meköti angeic. (Iakobo 1:2-4) Eje a acatrene fe la imelekeui Iobu me Akötresie. Öni Iobu ka hape: “Nöngöti hna shama enëtilai hnene la lue hnashama (drei meje i cilieti hë ni); ngo enehila kola xajawa enëtilai hnei lue xajawangö,”(öhnyi Cilieti hë ni hnene la lue mekeng). (Iobu 42:5) Mama hnyawa ha laka, atre sili trengathoi lae Satana pine laka, thatreine ju kö troa athixötrë Iobu me sewe angeic troa mele nyipici koi Akötresie. Itre hadred lao macatre thupen, Iehova pala kö a qeje Iobu hlue i Nyidrë ceitune me ketre tulu ne thiina ka meköt. (Ezekiela 14:14) Ame la aqane qeje pengöne i Tusi Hmitrötr la mele ka pë ethan me xomihni ahoeanyi Iobu, tre, celë hi ka thue catre pala hi kowe la nöje i Iehova ekö, uti hë enehila.
19. Pine nemene matre xecie koi së laka hetre pune ka loi e tro pala hi sa xomihni ahoeany?
19 Ame la Iakobo a cinanyi kowe lo itre pane keresiano ekö göne la xomihni ahoeany, hnei angeic hna qaja la madrin hna kapa qa ngöne la xomihni ahoeany. Nge hnei angeic hna amexeje la tulu i Iobu matre troa amekunëne hmaca, laka, Iehova a amanathithine hnyawa la itre hlue i Nyidrëti ka nyipici. (Iakobo 5:11) Easa e ngöne Iobu 42:12, ka hape: “Nge tru la hnei Iehova hna amanathithi Iobu ngöne la pune hune la meken.” Hnei Iehova hna hamë Iobu alue kö la etrune lo itre ewekë hna apaatren thei angeic, nge ketre, hna mel aqeanyi me madrin hnei Iobu. (Iobu 42:16, 17) Ketre tune mina fe, easa xomihnine ahoeane la itre hace me itre akötr, me hleuhleu fë la itre pengöne jol ngöne la pune la fene ka ngazo celë; loi pe, itre ewekë lai ka troa paatr elany, nge thaa tro hmaca kö a mekune itre ej ngöne la fen ka hnyipixe i Akötresie. (Isaia 65:17; Hna Amamane 21:4) Drenge hë së lo xomihni ahoeanyi Iobu, nge catre la aja së troa xötrethenge la tulu i angeic; ketre, Iehova a xatua së. Hna thingehnaeane hnei Tusi Hmitrötr, ka hape: “Manathithi la ate xomi hnine la itupath, ke e ase hë tupath, tro angeic a hetenyi la korona ne mel, lo hnei Iehova hna thinge hnaeane koi angete hni nyidrë.”—Iakobo 1:12.
Tro epuni a sa tune kaa?
• Tune kaa la aqane tro sa amadrinëne la hni Iehova?
• Pine nemene matre thaa tro pi kö sa mekune ka hape, ame la itre jole së, tre, hatrene hi lai laka thaa kepe së kö hnei Akötresie?
• Nemene la itre kepin ka upi Iobu troa xomi hni ahoeanyi?
• Tro sa xötrethenge tune kaa la tulu i Elihu ngöne la easa xatuane la ketre sine hmi së?