Caasi Kö La Mekuna i Epuni Me Iehova Göne La Itre Ewekë Ka Hmitrötr?
“Wange hnyawa ju . . . wanga hete ate kuci ngazo, me ka tha nyipine.”—HEBERU 12:15, 16.
1. Nemene la aqane mekune ka hlemu hna thaa kapa kö hnene la itre hlue i Iehova?
Thaa metrötrëne hmaca kö enehila hnene la fene la itre ewekë ka hmitrötr. Hnei Edgar, ketre trahmanyi ne Faras ka inine la aqane melene la atr me itre ejolene ej, hna qaja ka hape: “Ame asë hi la itre thiina ka lolo hna nyitrepene hui Akötresie, hune la ihnadro me itre aliene ej, hune la nöj, hune la aqane trongene ej, me hune la aqane waiewekë, tre, paatre hë itre ej, ngo kolo hi lo itre ewekë lai hna catre fë ekö hnene la itre atr . . . Kola xome enehila hnene la itre atr me isa iëne la itre thiina hnei angatr hna mekune troa melën.” Celë hi lai “[ua, MN] ne la fen” maine pena lo “[ua, MN] ate huliwa hnine la ite ka tha idei.” (1 Korinito 2:12; Efeso 2:2) Ame la aqane mekune cili ka pë hni ne metrötre ngön, tre thaa hna kapa kö hnene la itre hlue i Iehova, ene lo itre ka hmala troa lapa fene la musi Nyidrëti ka meköt. (Roma 12:1, 2) Kolo pe a wanga atrune la itre ewekë ka hmitrötr hnene la itre hlue i Iehova ngöne la angatr a thili koi Nyidrë. Nemene la itre ewekë nyine tro sa ahmitrötrëne ngöne la mele së? Tro la hna cinyihane celë a ithanatane la faifi lao ewekë ka hmitrötr kowe la nöjei hlue i Akötresie. Tro la hna cinyihane ka troa xulu a qaja atrune la ehmitrötrene la itre icasikeu së itre keresiano. Ngo nemene la sipu aliene la hnepe hnëewekë hna hape “hmitrötr”?
2, 3. (a) Tune kaa la aqane atrune hnene la Itre Hna Cinyihane la ehmitrötre i Iehova? (b) Pine nemene matre loi e tro sa wanga atrune la ëje i Iehova ceitu me ketre ewekë ka hmitrötr?
2 Ame ngöne la Tusi Hmitrötr qene Heberu, tre, ame la hnepe hnëewekë hna hape “hmitötr,” ke, kola hape hna ketre amë kö, maine hna aisan. Ame hnine la hmi, tre, kola qaja la ketre ewekë hna ketre amë kö thatraqane la ketre huliwa hna hnëkëne kow, maine hna ahmitrötrëne pena. Iehova hmekuje hi la ka hmitrötre ne la nöjei ka hmitrötr asë. Hna hë Nyidrëti ka hape “Kahmitöt.” (Ite Edomë 9:10; 30:3) Ame ngöne lo Isaraela hnapan, kola acatrene hnene la atre huje ka sisitria ngöne la itrapetre i angeic la ketre ewekë gol, nge hna cinyihane ngöne eje ka hape, “Hmitöte koi Iehova.” (Esodo 28:36, 37) Kola qaja hnei Tusi Hmitrötr la itre kerubi me itre serafi, angatr a icilenyi e hnengödrai easenyine la therone i Iehova, nge angatr a uune ka hape: “Hmitöt, hmitöt, hmitöt, Iehova.” (Isaia 6:2, 3) Kola amamane hnene la aqane anyimua qaja la hnëewekë celë ka hape, ka hmitrötre Iehova, me pë ethan, me ka wië, nge pëkö sai Nyidrë ngöne la itre götrane celë. Eje hi laka, Nyidrëti hi la Qeqene la itre ewekë ka hmitrötr.
3 Ka hmitrötre la ëje i Iehova. Hna siejën hnene la atre cinyihane la salamo ka hape: “Tro angat’ a atrune la atesiwa i cilie ka tru me nune qouen; hmitöte nyidë.” (Salamo 99:3) Hnei Iesu hna ini së troa thithi ka hape: “Tetetro i ananyihunieti e kohoti hnengödrai, jiniati e hmitöte la atesiwa i enëtilai.” (Mataio 6:9) Hna qaja amamane hnene la thine i Iesu ene Maria, ka hape: “Kola atrunyi Iehova hnene la hning . . . hnei anganyidëti la ka mene hna kuca koi ni la ite ewekë atraqat ; nge hmitöte la atesiwa i nyidë.” (Luka 1:46, 49) Easë itre hlue i Iehova a wanga atrune la ëje i Nyidrë ceitu me ketre ewekë ka hmitrötr, nge easa neëne troa kuca la ketre ewekë ka troa adrone la ejë celë ka hmitrötr. Ketre, caasi hi la mekuna së me Iehova ngöne la hmitrötr, matre easa a ahmitrötrëne la itre ewekë ka hmitrötre xajawa i Nyidrë.—Amosa 5:14, 15.
Pine Nemene Matre Atraqatre La Metrötre Së Koi Iesu
4. Pine nemene matre Tusi Hmitrötr a hë Iesu ka hape “ka shewengönie [maine ka hmitrötr]”?
4 Pine laka, Iesu la “Hupuna ka utiwati [maine ka caas]” i Iehova lo Akötresie ka hmitrötr, haawe, ka hmitrötre fe Iesu ngöne la kola xupi nyidrë. (Ioane 1:14; Kolose 1:15; Heberu 1:1-3) Qa ngöne lai hna hë nyidrë ka hape, “Hupuna i Akötesie ka shewengönie [maine ka hmitrötr].” (Ioane 6:69) Ka hmitrötr pala hi Iesu ngöne lo kola nue la mele i nyidrë qaa hnengödrai a tro celë fen, ke, hna jëne la mene ne la Uati Hmitrötr la kola hnaho nyidrë hnei Maria. Hna qaja koi Maria hnene la ketre angela ka hape: “Tro ha traqa la Uati Hmitröte koi ‘ö, . . tro ha qaja la ëjene la ka hmitöte la hna troa hnahon, Hupuna i Akötesie.” (Luka 1:35) Ngöne la thithi ne la itre Keresiano ne Ierusalema, hna alua qaja la Nekö i Akötresie ka hape “hlue hmitöte i Cilie Iesu.”—Ite Huliwa 4:27, 30.
5. Nemene la hnëqa ka hmitrötr hna eatrëne hnei Iesu e celë fen, nge pine nemene matre ka tru alamekene la madra i nyidrë?
5 Ame ngöne lo Iesu e celë fen, hna athipe koi nyidrë la ketre hnëqa ka hmitrötr nyine tro nyidrëti a eatrën. Ame ngöne lo kola bapataiso nyidrë ngöne lo macatre 29 M.K., hna acili nyidrë troa Atre Huuj Ka Sisitria hnine la ēnē ka tru Iehova ngöne la ua. (Luka 3:21, 22; Heberu 7:26; 8:1, 2) Ketre, nyidrëti a troa hujëne la mele i nyidrë. Tro la madra hnei nyidrëti hna neng a itö mele ne la itre atr ka ngazo matre tro angatr hane hetrenyi la mel. (Mataio 20:28; Heberu 9:14) Qa ngöne lai, ka “tru alameken” koi së la madra i Iesu, ceitu me ketre ewekë ka hmitrötr.”—1 Peteru 1:19.
6. Tune kaa la aqane tro sa ujë koi Iesu Keriso, nge pine nemen?
6 Paulo a amamane laka easa metrötrëne la Joxu së me Atre Huuje Ka Sisitria, Iesu Keriso, ngöne la nyidrëti a cinyihane ka hape: “Ase hë Akötesie nyipi atrunyi nyidëti jë draië, me hamë nyidëti la atesieti (ëje) ka sisitia hune la nöjei ëjen’ asëjëihë ; mate troa sa watingöneca asëjëihë kowe la atesi Iesu hnei angete hnengödrai, me fene hnengödrai, me fene la fene hnengödrai nge mate amamanepi hnene la nöjei sesepeneqë asëjëihë, laka Iesu Keriso la Joxu, nyine atrunyi Akötesie Tetetro.” (Filii 2:9-11) Easa amamane laka caasi hi la mekuna së me Iehova göne la itre ewekë ka hmitrötr e tro sa drengethenge, cememine la madrin, la Atre eatrongë së me Joxu së ka mus, Iesu Keriso, lo Tane la ekalesia i Keresiano.—Mataio 23:10; Kolose 1:18.
7. Nemene la aqane tro sa amamane laka easa drengethenge Keriso?
7 Ame la troa drengethenge Keriso, tre, ene mina fe la troa metrötrëne la itre trejin hna acil hnei nyidrë, matre troa xomiujine la huliwa ne cainöj, lo huliwa hnei nyidrëti hna elemekene enehila. Loi e tro la itre hna iën hnei uati hmitrötr ka hane sine la lapa ne xomi meköt, me itretre thup hna acil ngöne la itre wapicine la sasaiatri, me itretre thupëne la distrik, me itretre thupëne la sirkoskripsio, me itretre thupëne la itre ekalesia a wangatrune la hnëqa i angatr ceitu me ketre hnëqa ka hmitrötr. Qa ngöne lai, loi e tro sa metrötrëne hnene la hni së ka pexej, me drengethenge la hna amekötine cili.—Heberu 13:7, 17.
Ketre Nöje Ka Hmitrötr
8, 9. (a) Kola hapeue la hna qaja ka hape, Isaraela la ketre nöje ka hmitrötr? (b) Hnei Iehova hna kuca tune kaa matre troa trotrohnine hnyawa hnei angetre Isaraela la pengöne la ewekë ka hmitrör.
8 Hnei Iehova ekö hna isisinyikeu me Isaraela. Kola aijijëne hnene la aqane imelekeu celë kowe lai nöje ka hnyipixe, la ketre göhmeku ka ketre pengön. Hna ahmitrötrë angatr, maine aisa angatre pena. Hnei Iehova hna ketre sipu qaja koi angatre ka hape: “Tro nyipunie a ite ka hmitöte koi ni ; ke hmitöte ni Iehova, nge hnenge hna ië nyipunie qa ngöne la nöjei nöje thatraqai ni.”—Levitiko 19:2; 20:26.
9 Ame ngöne lo kola xötrei acile la nöje Isaraela, hnei Iehova hna thele troa trotrohnine hnyawa hnei angatr la ehmitrötrene la itre ewekë. Nge thaa tro pi kö angatr a ketr lo wetr, hna hamë angatre ngön lo Treene Lao Wathebo, wanga troa humuthi angatr. Haawe, hna xome la Wetr Sinai ceitu me ketre ewekë ka hmitrötr. (Esodo 19:12, 23) Tro fe a ahmitötrëne la itretre huj, memine la uma maano, me itre aliene ej. (Esodo 30:26-30) Nge tune kaa pë hë la ekalesia i Keresiano?
Ekalesia i Keresiano
10, 11. Pine nemene la kola qaja ka hape ka hmitrötr la ekalesia ne la itre Keresiano hna iën, nge nemene la thangane lai kowe la “ite xa mamoe”?
10 Ka hmitrötre xajawai Iehova la ekalesia i Keresiano ne la itre hna iën. (1 Korinito 1:2) Eje hi laka, ngöne la nöjei hneijine kola mele la itre hna iën e celë fen, tre, hna aceitunë angatr me ketre uma hmitrötr, ngacama thaa angatre kö lo hna nyihatrene hnene lo ēnē ka tru i Iehova ngöne la ua. Iehova a lapane la uma cili, jëne la uati hmitrötre i Nyidrë. Hna cinyihane hnei Paulo aposetolo ka hape: “Kola tratraune hnyawa la uma asë thei nyidë [ Iesu Keriso], me kola draië nyine ēnēti hmitöte thei Joxu [Akötesie] ; nge hna ce xupi nyipunieti fe me nyidë nyine hnamunë i Akötesie hnene la Ua.”—Efeso 2:21, 22; 1 Peteru 2:5, 9.
11 Ame hë thupen, hnei Paulo hna cinyihane kowe la itre Keresiano hna iën ka hape: “Ke tha’te kö nyipunie laka ēnē i Akötesie nyipunie, nge Ua i Akötesie a munëti e kuhu hni nyipunie? . . . ke hmitöte la ēnē i Akötesie, ene nyipunie.” (1 Korinito 3:16, 17) Jëne la uati hmitrötre i Iehova, Nyidrëti a ‘lapa’ thene la itre hna iën, me ‘ce tro me angatr.’ (2 Korinito 6:16) Nyidrëti pala hi a eatrongëne la “hlue” i Nyidrë ka nyipici. (Mataio 24:45-47) Kola wangatrune hnene la “ite xa mamoe” la hnëqa ka lolo thei angatr, ene la troa caasi memine la lapa ne la “uma hmitrötr,” ene la lapa ne la itre hna iën.”—Ioane 10:16; Mataio 25:37-40.
Itre Ewekë Ka Hmitrötre Ngöne La Mele Ne La Keresiano
12. Nemene la itre ewekë ka hmitrötr ngöne la mele së itre Keresiano, nge pine nemen?
12 Thaa sesëkötre kö së laka, nyimutre la itre ewekë hna ahmitrötrën ngöne la mele ne la itre Keresiano hna iën me itre sine huliwa i angatr. Ketre ewekë ka hmitrötr la aqane imelekeu së me Iehova. (1 Aqane lapa ite Joxu 28:9; Salamo 36:7) Ka sisitria catre koi së la ewekë cili, ene pe thaa nue kö së la ketre ewekë maine ketre atr pena troa ananyi së qaathei Iehova Akötresie. (2 Aqane lapa ite Joxu 15:2; Iakobo 4:7, 8) Nyipi ewekë catre la thith maine easa ajane troa acatrene hnyawa la aqane imelekeu së me Iehova. Pine laka ka hmitrötre catre la thithi koi Daniela perofeta, haawe, thaa hnei angeice kö hna pane nue la troa thith ngacama xönë hi tro angeic a meci pine lai. (Daniela 6:7-11) Hna nyihatrene la “ite thithi ne la nöjei ate ka hmitöte,” ene la itre Keresiano hna iën, hnene la itre sinöe ka pui loi hna dreuthe hnine la ēnē. (Hna Amamane 5:8; 8:3, 4; Levitiko 16:12, 13) Kola amamane hnyawa hnene la ceitune celë la ehmitrötrene la thith. Drei la ketre madrine ka tru, ene la troa atreine ithanata kowe la Joxu ne la hnengödrai memine la fene hnengödrai. Haawe, easa trotrohnine hnyawa laka, ame la thith, tre, celë hi ketre götrane ka hmitrötr ngöne la mele së.
13. Nemen la men ka hmitrötr, nge tro sa ujë tune kaa matre troa hetre thangane ej ngöne la mele së?
13 Hetrenyi thene la itre Keresiano hna iën me itre sine huliwa i angatr, la ketre men hnei angatr hna ahmitrötrën, ene la uati hmitrötr. Trenge catre i Iehova la ua cili, nge pine laka eje pala hi a ujë thenge la aja i Akötresie Ka Hmitrötr, haawe, meköti e troa hën ej ka hape “uati hmitrötr” maine “[“ua,” MN] hmitöt.“ (Ioane 14:26; Roma 1:4) Jëne la uati hmitrötre i Iehova, Nyidrëti a hamëne la trenge catre kowe la itre hlue i Nyidrë troa cainöjëne la maca ka loi, matre angatre hi la Itretre Anyipici Nyidrë. (Ite Huliwa 1:8; 4:31) Iehova a hamën la ua i Nyidrë koi “angete denge thenge nyidë,” kowe la itre ka “tro pala hi . . . ngöne la ua,” ngo thaa thenge kö la itre aja ne ngönetrei. (Ite Huliwa 5:32; Galatia 5:16, 25; Roman 8:5-8) Kola aijijëne la itre Keresiano hnene la mene celë troa melëne la itre “wene la ua,” ene la itre thiina ka lolo, me “nyipici ngöne la thina ka hmitöt me thina ka ijiji Akötesie.” (Galatia 5:22, 23; 2 Peteru 3:11) Maine ka tru koi së la uati hmitrötr, thaa tro kö sa kuca la ketre ewekë ka troa ‘akötrëne’ la ua cili, maine troa sewe eje pena troa xataua së.—Efeso 4:30.
14. Nemene hnëqa ka lolo hna ahmitrötrën hnene la itre hna iën, nge hna hane xome tune kaa la hnëqa cili hnene la itre xaa mamoe?
14 Ame la ketre hnëqa ka lolo the së nyine tro sa ahmitrötrën, tre, ene la ëje ne la Akötresie ka Hmitrötre hne së hna xom, Iehova, memine la troa Itretre Anyipici Nyidrë. (Isaia 43:10-12, 15) Hna aijijëne hnei Iehova la itretre Keresiano hna iën matre tro angatr a “nyi hlue ne la isisinyikeu ka hnyipixe.” (2 Korinito 3:5, 6) Haawe, hna ahnithe koi angatre la hnëqa ne troa cainöjëne “la maca ka loi celë ne la baselaia” me “inine la nöjei nöj’ asëjëihë.” (Mataio 24:14; 28:19, 20) Angatre a eatrëne hnyawa la hnëqa cili, nge kola kapa la maca cili hnene la itre milio la etrune la itre atr hna aceitunëne me itre mamoe, kösë angatr a qaja kowe la itre hna iën ka hape: “Tro huni a ce tro me nyipunie, ke ate hë huni laka thei nyipunie la Akötesie.” (Zekaria 8:23) Kola huliwa madrine hnene la itre atr ka menyike celë, ceitu me itre ka “eëny” me “thupë vine” ne la itre “hlue i Akötresie” hna iën. Celë hi ixatua ka tru lai hna hamën hnene la itre xaa mamoe kowe la itre hna iën, matre tro angatr a eatrëne la huliwa ne cainöje i angatr e cailo fen.—Isaia 61:5, 6.
15. Nemene la huliwa hnei Paulo aposetolo hna ahmitrötrën, nge pine nemene matre tro sa xome la aqane waiewekë cili?
15 Paulo aposetolo la ketre atr ka xome la huliwa ne cainöj, ceitune me ketre ewekë ka hmitrötr. Hnei angeice hna sipu qeje angeice ceitu me ketre “hlue i Keriso Iesu koi angete ethen, troa kuca la qâ ne la ate huje ngöne la maca ka loi Akötesie.” (Roma 15:16) Hnei Paulo fe hna qaja la huliwa ne cainöje i angeic ceitu me “tenga mo,” ngöne la angeic a cinyihane kowe la itre Keresiano ne Korinito. (2 Korinito 4:1, 7) Jëne la huliwa ne cainöje së, easa ahlemune la “wesi ula i Akötesie.” (1 Peteru 4:11) Qa ngöne lai, ngacama ketre hlue i Akötresieti së hna iën maine ketre atrene la itre xaa mamoe pena, ngo loi e tro pala hi sa xome la huliwa ne cainöj ceitune me ketre hnëqa ka hmitrötr.
“Kola Apexejene La Thina Ka Hmitöte Ngöne La Qoue Akötesie”
16. Nemene la ka troa xatua së troa hmek wanga tro sa elany a itre atr “ka thaa nyipine” la itre ewekë ka hmitrötr?
16 Hnei Paulo aposetolo hna hmekëne lo itre Keresiano ne la hneijine i nyidrë, wanga tro angatr a itre atr “ka tha nyipine” la itre ewekë ka hmitrötr. Ngo hna xatua angatre pe troa ‘xötrethenge la thina ka hmitrötr,’ me “wange hnyawa . . . wanga xölejë la wane ka haite troa akötë [angatr], ame hna ngazopi la ka ala nyimu hnene lai.” (Heberu 12:14-16) Ame la xötrehnëewekë hna hape “wane ka haite,” tre kola qaja lo itre atr ka ala xalaithe e hnine la ekalesia ka jelengazone la itre ewekë hna kuca e hnin ej. Hanawange la ketre ceitun, maine jë ka isazikeu la mekuna i angatr memine la mekuna i Iehova göne la ehmitrötrene la faipoipo, maine ngöne la enyipiewekë la troa pë ethane ngöne la thiina. (1 Thesalonika 4:3-7; Heberu 13:4) Maine pena, angatr a qaja agöne la itre mekune ka thoi, nge ka icilekeu, nge itretre “menu qa ngöne la nyipici” la itre ka qaja la “ite tenge ewekë ka ngazo me tha nyipi ewekë.”—2 Timoteo 2:16-18.
17. Pine nemene matre nyipi ewekë troa catre hnene la itre hna iën tro pala hi angatr a caasi la mekuna i angatr me Iehova göne la itre ewekë ka hmitrötr?
17 Hnei Paulo hna cinyihane kowe la itre trejine me angeic itre hna iën, ka hape: “Ange hnimina fe, hetenyi hë shë la ite hna qaja hnaeane cili, loi e tro sha nyihnyawa shë kö qa ngöne la nöjei ka sisi asë ne la ngönetei memine la [“ua,” MN], kola apexejene la thina ka hmitöte ngöne la qoue Akötesie.” (2 Korinito 7:1) Kola amamane hnene la trenge ewekë celë laka nyipi ewekë tro la itre Keresiano hna iën, “angete sine la hna hëne qa hnengödrai,” a catre troa anyipicine ngöne la nöjei götrane la mele i angatr laka, caasi hi la mekuna i angatre me Iehova ngöne la itre ewekë ka hmitrötr. (Heberu 3:1) Ketre tune mina fe, hnei Peteru aposetolo hna xatuane la itre trejine me angeic hna iën ka hape: “Loi e cei tui nyipunie memine la ite ka idei nge the cei tune kö memine la aja ka hekö i nyipunie, lo jidi pete kö ; ngo tro nyipunie a hmitöte ngöne la nöjei thina i nyipunie asë, tune la aqane hmitöte nyidëti ate hë nyipunie.”—1 Peteru 1:14, 15.
18, 19. (a) Kola amamane tune kaa hnene la ka ala nyimu atraqatr, laka caasi hi la mekuna i angatr me Iehova göne la itre ewekë ka hmitrötr? (b) Nemene la ketre götrane ka hmitrötre ne la mele ne la itre Keresiano nyine tro pë hë së a ce wange ngöne la hna cinyihane hnapin?
18 Ame koi itre atrene la “ka ala nyimu atraqat” ka troa mele pe ngöne la “aköte atraqat” elany, nemene la pengö i angatr? Nyipi ewekë fe koi angatre troa anyipicine laka caasi hi la mekuna i angatre me Iehova göne la itre ewekë ka hmitrötr. Hna qeje angatre hnine la tusi Hna Amamane ka hape, angatr a “nyi hlue” i Iehova ngöne la ketre hnahag, ene lo götran e celë fen ne la eneti hmitrötre i Nyidrë ngöne la ua. Angatre a lapaune kowe la mele hna huujëne hnei Keriso, ene la thupene mel; celë hi hna amamane hnene la angatr a ‘hnea la itre ixetre i angatr, me awiën itre ej ngöne la madra ne la Arenio.’ (Hna Amamane 7:9, 14, 15) Ewekë lai ka aijijë angatre troa cile xajawa i Iehova cememine la hni ka wië, nge kolo fe a upi angatre troa catre “nyihnyawa [angatre] kö qa ngöne la nöjei ka sisi asë ne la ngönetei memine la [“ua,” MN], kola apexejene la thina ka hmitöte ngöne la qoue Akötesie.”
19 Ame la ketre götrane ka nyipi ewekë catre ngöne la mele ne la itre Keresiano hna iën, me itre sine huliwa i angatr, tre, ene la aqane sine pala hi angatre la itre icasikeu göi troa thili koi Iehova me inine la Wesi Ula i Nyidrë. Ame koi Iehova, tre, ka hmitrötre la itre icasikeu ne la nöje i Nyidrë. Tro pë hë së a ce wange ngöne la hna cinyihane hnapin, la aqane tro sa xome la aqane waiewekë i Iehova ngöne la götrane cili ka nyipi ewekë catre memine fe la kepine lai?
Revizio
• Nemene la aqane waiewekë ne fen hna thaa kapa kö hnene la itre hlue i Iehova?
• Pine nemene matre Iehova la Qeqene la nöjei ewekë ka hmitrötr?
• Easa amamane tune kaa laka easa metrötrëne la itre ewekë ka hmitrötr thenge la tulu i Keriso?
• Nemene la itre ewekë nyine tro sa ahmitrötrëne ngöne la mele së ne Keresiano?