Ita Ne Thup göi 11 MAAC
Nyima 23 me 26 Qene Drehu
Iehova La Akötresie Ka Hetre Hni Ne Ole
“Tha thina ka tha meköti kö Akötesie mate troa thëthëhmine la huliwa i nyipunie, memine la ihnimi hnei nyipunie hna amamane kowe la atesiwa i nyidë.”—HEBERU 6:10.
1. Nemene la aqane amamane Iehova laka hetre hni ne ole i Nyidrëti koi Rutha ketre föe ne Moaba?
KA tru catre koi Iehova la itre atr ka catre thele troa kuca la aja i Nyidrë, matre Nyidrëti a amanathithi angatr. (Heberu 11:6) Atre hnyawa hi hnei Boaza ketre atr ka lapaun, la thiina i Akötresieti cili, ene pe nyidrëti a qaja jë koi Rutha, ketre föe ne Moaba ka thupëne hnyawa la thine ne la föi nyiidro, ka hape: “Iehova a nyi june la huliwa i ‘ö, nge troa nyipi nyi thupene koi ‘ö qa thei Iehova.” (Rutha 2:12) Hapeu, hna amanathithi Rutha kö hnei Akötresie? Eje hi! Hna cinyihane hnine la Tusi Hmitrötr la ewekë ka traqa koi eahlo! Ketre, hnei eahlo hna faipoipo me Boaza, nge eahlo la xötrapane i Davita joxu me Iesu Keriso. (Rutha 4:13, 17; Mataio 1:5, 6, 16) Nyimu ceitun e hnine la Tusi Hmitrötr ka amamane laka hetre hni ne ole i Iehova kowe la itre hlue i Nyidrë.
2, 3.(a) Nemene la nyine haine thei Iehova ngöne la Nyidrëti a amamane la hni ne ole i Nyidrë? (b) Pine nemen matre atreine hi Iehova troa amamane la sipu hni ne ole i Nyidrë? Hamëne jë la ketre ceitun.
2 Ame koi Iehova, tre, maine pëkö hni ne ole thei Nyidrë, tre, kolo lai a hape thaa ka thiina ka meköti kö Nyidrë. Kola qaja ngöne Heberu 6:10: “Thaa thina ka tha meköti kö Akötesie mate troa thëthëhmine la huliwa i nyipunie hna amamane kowe la atesiwa i nyidë, ene lo hnei nyipunie hna nyi hluene la ite ka hmitöt, nge kolo pala hi a nyi hluen.” Kola mama hnyawa jëne la itre trenge ewekë ka lolo celë, laka, Akötresieti a amamane la hni ne ole i Nyidrëti kowe la itre atr ka catre nyihlue i Nyidrë, ngacama itre atr ka ngazo nge thaa traqa kö kowe la lolo i Nyidrë.—Roma 3:23.
3 Pine laka itre atr ka ngazo së, maine jë tro sa mekune ka hape, ame la itre huliwa hne së hna kuca koi Akötresie, tre, ma ka pëkö pengön nge ka gufa, nge thaa ijije kö tro Akötresieti a hane amanathithi së. Ngo trotrohnine hnyawa hi Iehova la itre aliene hni së memine la itre aqane mele së, nge Nyidrëti a nyipine la huliwa hne së hna kuca cememine la hni ka pexej. (Mataio 22:37) Tro sa xome la ketre ceitun: Kola öhne hnene la ketre thin la ketre ahnahna hune la laulau; ketre fini cein ka thaa tru menu kö la thupen. Ijije hi tro eahlo a mekune laka, thaa ka tru alamekene kö la ahnahna, ene pe thaa semesinene kö eahlo. Ngo ame ju hi la eahlo a e la sine pepa ka ce tro memine lai ahnahna, ene pe kola qaja ka hape qaathene la nekö i eahlo jajinyi ka co; hnei nyën hna nue asë la manie hnei nyën hna xeen amë, matre troa itöne lai fini cein. Ketrepengöne hë la aqane goeën la thin la ahnahna. Maine jë kola xölaxöla la trenge timidra i eahlo ngöne la eahlo a idremi memine la nekö i eahlo, me fe amamane la hni ne ole i eahlo koi nyën.
4, 5. Nemene la aqane xötrethenge hnei Iesu la tulu i Iehova, ngöne la troa amamane la hni ne ole i Nyidrë?
4 Atrehmekune hnyawa hi Iehova la itre aliene hni së me itre ifego së, ene pe Nyidrëti a wanga atrune la easa kuca asë la hne së hna atrein troa nyihlue i Nyidrë, ngacama tru maine co hi. Nge e cili, Iesu hi la iahnuene ka pexej ne la Tretretro i nyidrë. Mekune hi së lo hna qaja hnei Tusi Hmitrötr göne lo sine föe. “Nyidëti a xajawatine la ite tena mo kola isa kuiëne la ite ahnahna i angate kowe la tenge ne mani. Nge nyidëti a xajawatine la kete sine föe ka pë ewekë kola kuiëne la lue mani ka co. Nge nyidëti a ulatin, ka hape, Nyipici ini a qaja koi nyipunie, tru la hnene la sine föe ka pë ewekë celë hna kuiëne hui angat’asë ; Ke hnei angat’a asë hna isa kuiëne kowe la tengene ahnahna qa ngöne la tiqa i angat ; ngo hnei nyidoti ka pë ewekë hna kuiën’asë la nune mele i nyido.”—Luka 21:1-4.
5 Eje hi, atre hnyawa hi Iesu la pengöne la föe, laka, sine föe eahlo nge ka puafala, ene pe nyidrëti a trotrohnine hnyawa la etrune la ahnahna i eahlo, nge celë hi ka upi nyidrëti troa wanga atrune lai ahnahna hna hamën. Ijije hi troa hane qaja tune lai göi Iehova. (Ioane 14:9) Ketre ithuecatre ka tru la troa atre laka, ngacama isa pengöne la itre aqane mele së, ngo ijije hi troa hane kepe së me wanga atrunyi së hnei Akötresie memine la Hupuna i Nyidrë.
Iehova a Amanathithin La Atre Aithiope Ka Xoue Nyidrë
6, 7. Pine nemen nge tune kaa la aqane amamane Iehova la hni ne ole i Nyidrë koi Ebede-melek?
6 Hna anyimua amexeje e hnine la Tusi Hmitrötr la aqane amamane Iehova la hni ne ole i Nyidrë kowe la itre atr. Tro sa pane ce wang la itre aqane ujë i Nyidrë koi Ebede-melek, ketre atr ne Aithiope ka xoue Akötresie, nge ka mele ngöne la hneijine i Ieremia; ketre, angeic la ketre hlue ka huliwa hnine la uma ne la ketre Joxu ne Iuda ka thaa mele nyipici kö, Zedekia la ëje i nyidrë. Drenge hë Ebede-melek laka, hna upezöne menu Ieremia Perofeta hnene la itre tane i angetre Iudra pine icilekeu me musi joxu, ene pe angatr a kuië nyidrëti ju e hnine la ketre hnaop, matre tro nyidrëti a meci hnei mecijin. (Ieremia 38:1-7) Atre hë Ebede-melek laka hna axösisi Ieremia pine laka hnei nyidrëti hna cainöjëne la maca, ene pe angeic a nue pi la mele i angeice me thele troa ithanata memine la joxu. Kola nue asë hnei Ebede-melek la trengecatre i angeic me qaja ka hape: “Joxu tixenge fe, ngazo asë la thina ne la nöjei ate cili lo hnei angate hna kuca koi Ieremia perofeta, lo hnei angate hna kuiëne kowe la hnaop, ke tro angeic’a meci e cili hnei mecijin.” Kola mejë jë hnei Ebede-melek cememine la 30 lao thupëtresij me thapa la perofeta i Akötresie, thenge la hna upi angatr troa kuca hnene la joxu.—Ieremia 38:8-13.
7 Öhne hi Iehova laka, ka tru la lapaune i Ebede-melek; celë hi ka xatua angeice lai troa elë hune la itre hnepe xou i angeic. Haawe, hnei Iehova hna amamane la hni ne ole i Nyidrë koi Ebede-melek me qaja koi angeic jëne Ieremia ka hape: “Hana wang, tro ni a axulune la tenge ewekënge kowe la lapa ce mate ngazo, nge tha loi kö . . . tro ni a amele eö ngöne la drai cili, . . . nge tha tro kö a nue eö kowe la ime ne la ite ate lo hnei ‘ö hna qouen. Ke tro kö ni a amele eö . . .; nge tro la mele i ‘ö a edö i ’ö ; ke hnei ‘ö hna lapaune koi ni, öni Iehova.” (Ieremia 39:16-18) Nyipici, hnei Iehova hna thepe Ebede-melek me Ieremia qa ngöne la ihnatrapaime ne la itre tane i angetre Iudra ka ngazo, nge thupene jë hi lai kola thepe nyidroti fe qaathene la itretre Babulona, ene lo angetre lepe apaatrene e Ierusalema. Kola qaja ngöne Salamo 97:10, ka hape: “[Iehova] a thupëne la ite u i ange hnimina i nyidë; tro nyidëti a thepi angate qa ngöne la ime ne la nöjei ka ngazo.”
“Tro La Tetetro i ‘ö, Ate Xajawatine Ngöne La Ga Sihngödi a Nyi Thupene Koi ‘ö”
8, 9. Tune la hna amamane hnei Iesu, nemene la pengöne thithi hnei Iehova hna wanga atrun?
8 Ame la ketre ewekë ka anyipicine laka, Iehova a wanga atrune me nyipiewekëne la itre aqane catre nyihlue i Nyidrëti hne së, tre, eje e ngöne la hna qaja hnei Tusi Hmitrötr göi thith. Hna qaja hnene la ketre thupëtresiji ka inamacan, ka hape: “Aja i anganyidëti [Akötresieti] la thithi ne la ite ka meköt.” (Ite edomë 15:8) Ame ngöne lo hneijine i Iesu, nyimutre la itre hene ne hmi ka thithi qëmekene la ka ala nyimu, thaa cememine kö la hni ka menyike me ipië, ngo kolo hi matre troa hai angatr hnene la itre atr. Öni Iesu ka hape: “Hetenyi hë angate la thupe i angat.” Nyidrëti fe a inine la itretre drei nyidrë, me hape: “Ngo e tro eö a thith, löju kowe la hnahage i ‘ö, nge ase hë thinge la qëhnelö, thithi ju kowe la Tetetro i ‘ö ngöne la ga sihngöd, nge tro la Tetetro i ‘ö, ate xajawatine ngöne la ga sihngödi a nyi thupene koi ‘ö.”—Mataio 6:5, 6.
9 Eje hi lai laka, thaa Iesu kö a jelengazone la itre thithi hna cile fë qëmekene la ka ala nyim, pine laka, ketre hnei nyidrëti fe hna hane thithi ngöne la itre xaa ijin qëmekene la itre atr. (Luka 9:16) Iehova a wanga atrune la itre thithi hne së hna tro fë qa kuhu hni së ka nyipici, ngo thaa göi tro kö a haine hnene la itre xaa atr. Ame ngöne lo easa isa thithi caas, tro hi a mama hnyawa e cili maine ka jui catre la ihnimi së koi Akötresie memine la mejiune së koi Nyidrë. Haawe, thaa sesëkötre kö së la Iesu a thele e itre xaa ijine la itre götran gaa pë atr matre troa thithi caas. Ame ngöne lo ketre ijin, tre, hnei nyidrë hna tro troa thith nge “jidi pete kö.” Ame pena ha ngöne la ketre ijin, “nyidëti a elëne la wete ga pa ate troa thith.” Nge qëmekene tro Iesu a iëne lo truelofe lao aposetolo i nyidrë, hnei nyidrë hna pane thithi caasi ngöne la jidri ka pexej.—Mareko 1:35; Mataio 14:23; Luka 6:12, 13.
10. Ame ngöne la kola mama jëne la itre thithi së la hni ka menyike së memine la etrune la itre aliene hni së, nemene la ka troa xecie hnyawa koi së?
10 Pane mekune jë së la aqane qatixenyëne hnyawa Iehova lo itre trenge ewekë ne la Hupuna i Nyidrë ka qa kuhu hni nyën! Eje hi laka, ame ngöne la itre xaa ijin, hnei Iesu hna thithi “me teije cate me xötexöte la lue tenge timida koi nyidëti ate ateine troa amele nyidë qa ngöne la mec, nge hna dei nyidë ke qou i nyidë e Akötesie.” (Heberu 5:7; Luka 22:41-44) Maine kola mama laka, easa thithi cememine la hni ka menyik nge easë fe a amamane la aliene hni së, haawe, tro ha xecie koi së laka, troa qatixenyë së hnyawa me nyipi së hnene la Tretretro së e koho hnengödrai. Eje hi laka, “eashenyi Iehova koi angat’ asë . . . angete hë nyidë ngöne la nyipici.”—Salamo 145:18.
11. Nemene la hnei Iehova hna mekune ngöne la itre hne së hna kuca ngöne la gaa sihngödr?
11 Maine Iehova a wanga atrunyi së la easë a thithi ngöne la gaa sihngödr, drei kö la aqane wanga atrunyi së hnei Nyidrë ngöne la easë a drengethenge Nyidrë ngöne la gaa sihngödr! Nyipici laka, atrehmekune hnyawa hi Iehova la hne së hna kuca ngöne la gaa sihngödr. (1 Peteru 3:12) Eje hi laka, ame la easë a mele nyipici me drengethenge ngöne la easë caas, tre, celë hi ewekë lai ka amamane laka ka “hni ka pexeje” së koi Iehova, nge ka pë ethane la aliene hni së, nge ka catre së kowe la ewekë ka meköt. (1 Aqane lapa ite Joxu 28:9) Drei la aqane amadrinëne la hni Iehova hnene la aqane ujë cili!—Ite Edomë 27:11; 1 Ioane 3:22.
12, 13. Tune kaa la aqane tro sa thupëne la itre mekuna së memine la itre hni së me troa hane tui Natanaela ketre atre drei Iesu?
12 Qa ngöne lai, kola thupëne hnene la itre nyipi Keresiano matre thaa tro kö a kuca juetrëne la itre ewekë ka ngazo wanga troa adrone la itre mekune memine la itre hni angatr, tune la troa goeëne la itre film ka ngazo memine la itre film ka amamane la itre isi me itre ihumuth. Ngacama hetrenyi la itre xaa ngazo hna juetrëne koi atr, ngo ame pe, easë a wanga atrehmekune laka “mamapi hë la nöjei ewekë asëjëihë kowe la lue xajawa i nyidë, ene lo hne shë hna troa isa amamai thina kow.” (Heberu 4:13; Luka 8:17) Maine tro sa catre troa neëne la itre ewekë hnei Iehova hna thipetrij, tro hë së a hetrenyi la ketre mekuthethew ka wië nge easa madrine laka kola kepe së hnei Akötresie. Nyipici, thaa sihngödre kö koi së laka, Iehova a wanga atrune hnyawa la “ate tro meköt, me kuca la meköt, me qaja la nyipici qa kuhu hni angeic.”—Salamo 15:1, 2.
13 Nemene hö la aqane tro sa thupëne la itre mekune së me itre hni së ngöne la fene hna haöthe hnene la ngazo? (Ite Edomë 4:23; Efeso 2:2) Thaa tro hmekuje kö së a kepe thangane la nöjei hnei Iehova hna hamën nyine troa acatrene la lapaune së, nyipi ewekë fe tro sa catre thipetrije la ngazo me kuca la loi, me canga he la itre aja ka ngazo matre thaa tro kö itre ej a thithë me hnahone la ngazo. (Iakobo 1:14, 15) Drei la tro nyipunie a madrin e tro Iesu a ithanata koi epun, ceitune memine lo aqane ithanata nyidrë koi Natanaela, kola hape: “Hana wange la [ketre atr] pëkö hnepe thoi thei angeic.” (Ioane 1:47) Hna hë Natanaela fe ka hape Batolomaio, nge ame pë hë thupen, hna ië angeice fe troa hane sine lo truelofe lao aposetolo i Iesu.—Mareko 3:16-19.
“Ate Huje Ka Sisitia Ka Ihnim Me Nyipici”
14. Nemene la aqane goeëne Iesu la aqane ujë i Maria, laka isapengöne kö memine lo aqane goeëne hnei itre xan?
14 Qa ngöne laka Iesu la “hnaiji [Iehova], Akötesie ka tha mama kö,” haawe, hnei nyidrëti pala hi hna xötrethenge hnyawa la tulu ne la Tretretro i nyidrë, ene la troa wanga atrune hnyawa la itre ka nyihlue i Akötresie cememine la hni ka pë ethan. (Kolose 1:15) Drei la ketre ceitun, ame ngöne lo faifi lao drai qëmekene troa humuthi Iesu, hna könë nyidrëti memine la itretre drei nyidrë kowe la uma i Simona e Bethania. Ame ngöne la jidri cili, hnei Maria xa i Lazaro nge trejine me Maretha hna “xome la litara tenge muro nyipi narado, ka tru alameken” (kösë kolo asë hi lo manie hna kapa ngöne la caa macatre ne huliwa i maseta), nge hna nenge la ka punepune cili hune la he me lue ca i Iesu. (Iesu 12:3) Ene pe hna qaja hnei itre xane ka hape, “Nyine ue la troa aluuzine tune lai?” Ngo isapengöne kö la aqane waiewekë i Iesu me angatr ngöne la aqane ujë i Maria. Nyidrëti a goeëne lai aqane ujë cili, me ketre aqane ham ka tru, nge hetre nyipi aliene la ewekë cili göne lo ijine meci nyidrë laka easenyi hë memine fe lo kola troa kelemi nyidrë. Haawe, thaa hnei nyidrëti kö hna jelengazo Maria, ngo hnei Iesu pe hna atrunyi nyiidro. Öni nyidrëti ka hape: “Ame e cailo fene la hna troa cainöjëne la maca ka loi celë ngön, te, tro fe a amamane la hna kuca hnei nyidoti la nyine mekune koi nyido.”—Mataio 26:6-13.
15, 16. Nemene la aqane tro sa kepe thangane la mele i Iesu me aqane nyihlue i Akötresieti hnei nyidrë ngöne lo nyidrëti ekö e celë fen?
15 Drei la ketre madrine ka tru koi së troa xomi Iesu ketre atr ka lolo nyine Tane la mele së! Eje hi laka, ame lo Iesu a mele ceitune me ketre atr, tre, kolo hi lai a hnëkë nyidrë thatraqane la huliwa hnei Iehova hna eköthe amë thatraqai nyidrë, ene la troa ketre Atre Huuj Ka Sisitria, me Joxu ne la ekalesia ne la itre hna iën ngöne la qaan, nge thupene lai kola joxu ne la fen.—Kolose 1:13; Heberu 7:26; Hna Amamane 11:15.
16 Qëmekene tro Iesu a traqa e celë fen, atraqatre la aqane wanga atrune la itre atr nge ketre pengöne kö la aqane hnimi angatr hnei nyidrë. (Ite Edomë 8:31) Ame la nyidrëti a mele ceitune me ketre atr, nyidrëti mina fe a trotrohnine hnyawa la pengöne la itre itupath me itre akötr hne së hna xomihnine ahoean ngöne la easë a huliwa koi Akötresie. Hna cinyihane hnei Paulo aposetolo ka hape: “[Hna] celohmë [Iesu] tune la ite tejine me nyidë ngöne la nöjei ewekë asëjëihë, mate tro nyidëti a ate huje ka sisitia ka ihnimi me nyipici . . . Ijije hë nyidëti troa xatua angate hna tupath, ke hnei nyidëti hna xome la aköte ngöne la itupath.” Atreine hi Iesu troa “akötre ngöne la itre kucakuca shë; ngo hna tupathi nyidë ngöne la nöjei ewekë asëjëihë tui eëshë, ngo pë pe ngazo i nyidë.”—Heberu 2:17, 18; 4:15, 16.
17, 18. (a) Nemene la hna amamane hnene la itre tusi hna cinyihane kowe lo sevene lao ekalesia ne Asia, göne la ejuine lo hni ne ole i Iesu? (b) Nemene la huliwa hna troa kuca hnene la itre keresiano hna iëne nge hna hnëkë angatre kow?
17 Kola mama hnyawa la aqane wanga atrune me trotrohnine Iesu la itre itupathi ne la itretre drei nyidrë, thupene lo hna amele nyidrëti hmaca. Tro sa ce wange la itre tusi nyidrë kowe lo sevene lao ekalesia e Asia; hna cinyihane lai hnei Ioane aposetolo. Hnei Iesu hna qaja kowe la ekalesia ne Semurina, ka hape: “Ate hë ni la nöjei huliwa i ‘ö, memine la aköte i ‘ö, me pë ewekë i ‘ö.” Ame e celë, tre, Iesu a qaja ka hape, ‘Trotrohnine hnyawa hi ni la itre jole ka eje thei eö; atre hnyawa hi ni la itre itupath hnei eö hna cile kow.’ Thupene lai, pine laka hnei nyidrëti hna ketre akötre uti hë la mec, haawe, atraqatr la utipine i nyidrë nge atreine hi tro nyidrëti a qaja ka hape: “Nyipici jë eö uti hë la mec, nge tro ni a hamë eö la korona ne mel.”—Hna Amamane 2:8-10.
18 Eje e hnine la itre tusi kowe lo lai sevene lao ekalesia, la itre ewekë ka amamane hnyawa la etrune la aqane trotrohnine Iesu la itre itupathi ne la itretre drei nyidrë memine la ejuine la hni ne ole i Iesu kowe la aqane mele nyipici angatr. (Hna Amamane 2:1–3:22) Loi e tro sa mekune hnyawa pala hi laka, ame lo lai itre hnei Iesu hna ithanata kow, tre, kolo itre Keresiano hna iën ka mejiune troa ce musi me nyidrëti e koho hnengödrai. Angatr a xötrethenge la tulu ne la Joxu i angatr, laka, kola hnëkë angatr kowe la hnëqa i angatr ka draië; ene la troa ixatua me utipine ngöne la kola troa elemekene la itre manathith ka xulu qa ngöne la thupene mele i Keriso thatraqane la itre atr ka akötr.—Hna Amamane 5:9, 10; 22:1-5.
19, 20. Tune kaa la aqane amamane hnene la ka ala nyimu atraqatr la hni ne ole i angatr koi Iehova me kowe la Hupuna i Nyidrë?
19 Eje hi laka, caasi hi la aqane hnime Iesu la itre hna iën, memine lo itre “xaa mamoe” ka mele nyipici koi nyidrë, laka itre milio la etrun enehila, nge angatre hi lo “ka ala nyimu atraqatr . . . qa ngöne la itre xöte nöj’ asë,” ka troa mele pe elanyi qa ngöne la “aköte atraqat.” (Ioane 10:16; Hna Amamane 7:9, 14) Kola traqa ala nyimu me epe catre koi Iesu hnene la itre mamoe cili, pine laka, hetre hni ne ole i angatr kowe la mele hnei nyidrëti hna hujën thatraqai angatr, nge pine mina fe la mejiune hnei angatr hna kapa, ene la troa mele epine palua. Tune kaa la aqane amamane angatr la ole i angatr? Angatr a “nyi hlue i [Akötresie] e lai me jid.”—Hna Amamane 7:15-17.
20 Ame la rapor ne hna huliwa macatre 2006, tre hna amamane hnyawa ngöne la götrane 27 koi 30, la enyipicine laka, ame lo lai itre hlue ka mele nyipici, tre, angatr a “nyihlue i [Iehova] e lai me jidr.” Ame ngöne la caa macatre, hna ce kuca hnei angatre memine lo thelene la lapa ne la itre Keresiano hna iën, la 1 333 966 199 lao hawa ne cainöje trootro, kösë 152 283 lao macatre ne huliwa!
Catre Pi Troa Amamane La Hni Ne Ole Së!
21, 22. (a) Ame göi hni ne ole, pine nemen matre nyipi ewekë tro la itre Keresiano a hmeke hnyawa enehila? (b) Nemene pë hë la itre nyine tro sa ce wange ngöne la hna cinyihane ka troa xulu?
21 Ka draië catre la aqane amamane Iehova me Iesu Hupuna i Nyidrë, laka nyidroti a wanga atrune hnyawa la itre atr ka ngazo. Ngazo pe, tre nyimutre catre kö la itre atr ka wanga aconyi Akötresie me nyinyape thele la itre sipu aja i angatr. Hnei Paulo hna qeje pengöne la itre atr ka mele ngöne “la ite drai hnapin,” matre hnei nyidrë hna cinyihane ka hape: “Nöjei ate a hnimi angate kö, me meciu mani . . . me tha ole kö.” (2 Timoteo 3:1-5, Phillips) Drei la eisapengöi angatre lai memine la itre nyipi Keresiano, laka jëne lo itre thithi angatre cememine la hni ka nyipici, me hni ne drengethenge, me catre huliwa cememine la hni ka pexej, angatr a amamane la hni ne ole i angatr kowe la nöjei hnei Akötresieti hna kuca koi angatr!—Salamo 62:8; Mareko 12:30; 1 Ioane 5:3.
22 Ame ngöne la hna cinyihane ka troa xulu, tro pë hë së a ce wange hmaca la itre ewekë ka nyimutre ngöne la götrane la ua, hnei Iehova hna hamëne cememine la ihnimi koi së itre hlue i Nyidrë. Epi troa kökötre catre pala hi la hni ne ole së, ngöne la easa mekune la ‘itre ahnahna ka lolo’ cili.—Iakobo 1:17.
Nemene La Nyine Troa Sa?
• Nemene la aqane ketre amamane Iehova la hni ne ole i Nyidrë?
• Nemene la aqane tro sa amadrinë Iehova ngöne la gaa sihngödr?
• Nemene la itre aqane amamane Iesu la hni ne ole i nyidrë?
• Qa ngöne la hnei Iesu hna mele e celë fen, nemene la ixatua hnei nyidrëti hna kapa matre troa hetrenyi la utipin nge troa ketre joxu ka iwanga atruny?