Ita Ne Thup göi 15 EIPEREM
Nyima 12 me 7 Qene Drehu
Loi E Tro Sa Ce Ngöne Adraiëne La Atresiwa I Iehova
“Ce me ini ju troa atrunyi Iehova; nge tro sha cengöne adraiëne la atesiwa i nyidë!”—SALAMO 34:3.
1. Ame ngöne lo Iesu e celë fen, nemene la tulu ka loi hnei nyidrëti hna hamën?
AME ngöne la jidri ne 14 Nisa 33 M.K., hnei Iesu hna ce icasikeu memine la itre aposetolo i nyidrë hnine la hnahage ka tru ne la ketre uma e Ierusalema, angatr a ce thinge la itre nyima nyine atrunyi Iehova. (Mataio 26:30) Drai tixenuë ne Iesu hi lai a hane ce nyima memine la itre aposetolo ngöne lo nyidrëti e celë fen. Thaa sesëkötre kö së la kola nyipune tune lai la icasikeu i nyidrë me angatr. Eje hi lai laka, ame ngöne la Iesu a cainöj e celë fen, hnei nyidrëti hna atrune la Tretretro i nyidrë me catre thele tro la itre atr a atre la ëje i Iehova. (Mataio 4:10; 6:9; 22:37, 38; Ioane 12:28; 17:6) Hnei nyidrëti hna hane amexeje la trenge ewekë ka lolo hna qaja hnene la atre cinyihane la salamo, kola hape: “Ce me ini ju troa atrunyi Iehova; nge tro sha cengöne adraiëne la atesiwa i nyidë! ” (Salamo 34:3) Drei la ketre tulu ka lolo nyine tro sa xötrethenge!
2, 3. (a) Easë a atre tune kaa ka hape hetre hna perofetane hnene la Salamo 34? b) Nemene la hne së hna troa ce wange ngöne la hna cinyihane celë memine la ka troa xulu?
2 Thupene la hna ce thinge la itre nyima me Iesu, hetrenyi pena ha la ketre ewekë ka ketrepengöne hna öhne hnei Ioane aposetolo. Hnei nyidrë hna öhne la Maseta i nyidrë memine la lue atr ka ngazo hna athipe hune la itre sinöe ne iakötrë, matre tro angatr a mec. Hnene la itre sooc hna lepe axeciene la itre lue ca ne la lue atr ka ngazo matre tro nyidroti a canga mec. Ngo kola qaja hnei Ioane ka hape, thaa hna hane fe kö lepe axeciene la lue ca i Iesu. Ame ngöne la kola easenyi Iesu hnene la itre sooc, tre, meci hë nyidrë. Ame ngöne la evangelia i Ioane, tre, angeic a wanga atrehmekune laka, kola eatre lo hna ahnithe hë ngöne la ketre götrane ne la Salamo 34 kola hape: “Tha tro kö a xecie la ketre ne it’ ej (jun).”—Ioane 19:32-36; Salamo 34:20.
3 E je e hnine la Salamo 34 la itre mekune ka nyimutre ka lolo catre kowe la itre Keresiano. Haawe, ame ngöne la hna cinyihane celë me ngöne la hna cinyihan ka troa xulu, tro sa ce wange la itre ewekë ka traqa ngöne la Davita a cinyihane la Salamo celë, nge thupene lai, tro sa wange la itre xötre ne ej ka troa thuecatrenyi së.
Kola Huzu Davita Hnei Saulo
4. (a) Pine nemen matre hna ië Davita troa ketre joxu ne Isaraela? b) Pine nemen matre “atraqatre la hnei Saulo hna hnimi Davita”?
4 Nekönatre Davita ngöne lo kola musi hui Isaraela hnei Saulo. Kola tro la itre macatre nge Saulo ha ena la itre trenge wathebo i Iehova, ene pe kola nuetriji angeic hnei Akötresie. Celë hi matre hna qaja koi angeic hnei perofeta Samuela ka hape: “Hnei Iehova hna zezenepi la baselaia ne Isaraela qa thei nyipë, ngöne la drai celë, me hamëne kowe la sine i nyipë ka loi hui nyipë.” (1 Samuela 15:28) Ame pë hë thupen, hnei Iehova hna upi Samuela troa sië Davita, lo neköne qatre i Iese, matre troa joxu i Isaraela. Ame göi Saulo, tre, paatre hë thei nyidrë la uati hmitrötre i Akötresie, celë hi matre kola jole ngöne la itre xaa ijine la mekuna i nyidrë. Ka atreine catre Davita troa elo miuzik, ene pe hna hë angeic a tro Gibea matre troa nyihluene la joxu. “Atraqatre la hnei [Saulo] hna hnimi [Davita]” pine laka kola akeukawane la hni nyidrë hnene la miuzike i Davita.—11 Samuela 16:11, 13, 21, 23.
5. Pine nemen matre kola saze la aqane ujë i Saulo koi Davita, nge nemene hë la hna kuca hnei Davita?
5 Kola tro la itre drai, nge kolo fe ha mama hnyawa laka ce Iehova me Davita. Hnei Nyidrëti hna xatua angeic troa ngaa Goliatha, lo ketre atr ka hoea ne Filisiti, nge kola mama mina fe laka ce Iehova me angeic ngöne lo kola atrune hnene la nöj la itre ijine angatr a ngaan la itre ithupëjia me angatr. Ngo pine laka hna amanathithi Davita hnei Iehova, ene pe kola zalu hnei Saulo me methinë Davita. Alua thele Saulo troa jaqa Davita ngöne lo angeic a elo kitara koi nyidrë. Ngo hnei Davita hna ezi kötr matre trianyi angeice ju kö. Thupene la hna hnaakönine neëne lai jo, kola trotrohnine e cili hnene la ka troa joxu elanyi e Isaraela laka, loi e tro angeic a kötr matre troa mel. Nge pine laka kola isine hnei Saulo troa xölehuje me humuthi Davita, haawe, Davita a thele ju troa zae ngöne la ketre götran e tröne e Isaraela.—1 Samuela 18:11; 19:9, 10.
6. Pine nemen matre kola iupi hnei Saulo troa humuthe la itre atr ne Nob?
6 Ame ngöne la Davita a tro kowe la itre ifego ne la nöje Isaraela, hnei angeic hna pane cile trootro e Nob, ketre traon hna hnen ngön la uma ne heta i Iehova. Hetrenyi la itre thöthi trahmanyi ka ce kötre me angeic; matre angeice hi lai a thele xeni thatraqai angatr me angeice fe. Atre hë Saulo laka, hnene la atre huje ka sisitria hna hamë xeni koi Davita memine la itre atre i angeic, nge hnei angeice fe hna xome lo taua i Goliatha. Ame e cili, hnei Saulo hna humuthe asë la itre atrene la traon, memine fe la itretre huuj ka ala 85..—1 Samuela 21:1, 2; 22:12, 13, 18, 19; Mataio 12:3, 4.
Kola Kötre Mele Hmaca Hnei Davita
7. Pine nemen matre ame la traon e Gatha, tre, thaa ketre traone kö nyine troa zae ngön hnei Davita?
7 Hnei Davita hna kötre kuë kowe la itre götrane i angetre Filisiti, kösë footre lao kilomet qaa Nob; hnei angeice hna zae thei Akisa joxu ne Gatha, lo traon hna hnaho Goliatha ngön. Kola mekune hnei Davita, ka hape, maine jë troa xou hnei Saulo troa tro kowe la traone celë. Ngo canga wanga atrehmekunyi Davita hi hnene la itre hlue ne la joxu ne Gatha. Ame la angeic a atre ka hape ase hë wanga atrehmekunyi angeic, ene pe “ataqate la qou i angeic’ e Akisa joxu ne Gatha”.”—1 Samuela 21:10-12.
8. (a) Nemene la hna ini së hnene la Salamo 56 ngöne la ewekë ka traqa koi Davita ngöne la traon ne Gatha? b) Nemene la aqane kuca Davita matre mele ju kö angeic?
8 Hna xölehuji Davita hnene la itretre Filisiti. Maine jë e cili hi lo Davita a sile lo ketre salamo ka lolo catr, kola qaja hnyawa la aqane xëwe angeice koi Iehova, ka hape: “Nenge ju la ite tenge timidange kowe la ge i cilie.” (Salamo 56:8 me hune tus) Haawe, angeic a amamane e celë la mejiune i angeic laka, thaa tro jë kö Iehova a thëthëhmine la akötre i angeic nge tro Nyidrëti a nyihnyawa angeic me thupë angeic. Hnei Davita fe hna kuca la ketre aqane troa iaöne la joxu ne Filisiti. Hnei angeic hna nyi ka hmo. Ene pe kola hajine jë hnei Akisa la itre hlue i nyidrë, pine la hnei angatr hna traqa fë koi nyidrë la ketre atr ka “hmo.” Eje hi laka, hnei Iehova hna amanathithine la aqane iaö celë. Hna lö sai Davita qa hnine la traon, ene pe mele ju kö nyidrë.—1 Samuela 21:13-15.
9, 10. Nemene la ka upi Davita troa cinyihane la Salamo 34, nge drei la hnei angeic hna mekune ngöne la angeic a cinyihan la Salamo cili?
9 Thaa hna qaja kö hnei Tusi Hmitrötr la pengöne lo itre sine trongei Davita, maine hnei angatr hna kötre qa hnine la traon e Gatha, maine hnei angatre pena hna lapa goeë angeic qa ngöne la itre traone ka co ne Isaraela gaa thaa nanyi menu kö. Ngo eje hi lai laka, ame jë la Davita a pane qaja koi angatr la aqane thepe angeice hmaca hnei Iehova, drei jë kö la etrune la madrine i angatr troa iöhnyi hmaca! Celë hi ewekë lai ka upi Davita troa cinyihane la Salamo 34, tune la hna amamane ngöne la hune tus. Ame ngöne la sevene lao pane xötr ne la salamo celë, Davita a atrunyi Akötresie pine la hnei Nyidrëti hna thepe angeic, nge kolo mina fe a hëne la itre sine ce huliwa i angeic matre tro angatr a ce atrunyi Iehova, lo Atre amelene la nöje i Nyidrë.—Salamo 34:3, 4, 7.
10 Thupene lai, hnei Davita hna ce zae memine la itre atre i angeic hnine la ngönemenyi Adulama, ngöne la ketre götran e Isaraela gaa hetre wetr, fifitrine lao kilomet ngöne la götrane ahië ne Gatha. Hna ce me angatre pë hë hnene la itretre Isaraela ka icilekeu me xele ma wange la aqane musi Saulo. (1 Samuela 22:1, 2) Ame pë hë thupen, hnei Davita hna sile la itre trenge ewekë ne la Salamo 34:8-22, maine jë angeic a mekune lai itre atr cili. Ame koi së enehila, itre xötre lai ka qatrenge me amekunë së la itre trepene meköti ka sisitria catr, nge troa hetre thangane ka loi hne së hna kapa qa ngön la Salamo cili e hne së hna wanga atrun eje hnyawa.
Hapeu, Eje Fe Kö The Së La Ewekë Hna Wanga Atrune Catrën Hnei Davita?
11, 12. Nemene la itre kepine matre loi e tro sa atrunyi Iehova?
11 “Tro pala kö ni a ole koi Iehova o ijin; tro pala kö la qeng’ a atrunyi nyidë.” (Salamo 34:1) Qa ngöne laka kola kötre Saulo hnei Davita, haawe, hetrenyi angeic la itre ewekë hna hnehengazon ngöne la götrane la ngönetrei, ngo tune la hna amamane hnene caha itre trenge ewekë, thaa hna thahe kö hnene la itre aja cili la hni ne ajane i angeic troa atrunyi Iehova. Drei la ketre ceitune ka lolo nyine troa xötrethenge ngöne la easa qëmeke kowe la itre jol! Ngacama easë ju hë ngöne la hna ini, maine ngöne la hna huliwa, maine ce memine la itre sine huliwa së itre Keresiano, maine ngöne la hna cainöje trootro, ngo ame la nyine tro pala hi sa pane hnehengazone, tre, ene la troa atrunyi Iehova. Drei la itre kepine ka upi së troa kuca tune lai? Drei la ketre ceitun, hmaca të ju kö së lai, e tro sa thele troa trotrohnin asë me kepe eloine asë qa ngöne la itre xupunai Iehova. Mekune ju fe së lo nöjei hnei Nyidrëti hna aeatrëne jëne la organizasio i Nyidrë e celë fen! Jëne fe la itre atr ka mele nyipici, ngacama itre atr ka ngazo, ngo hnei Iehova hna huliwa angatre göi troa kuca la itre ewekë ka tru ka mama ngöne la hneijine së. Hapeu, atreine kö troa aceitunëne la itre huliwa hna kuca hnei Akötresie memine la itre hna kuca hnene la itre atr, lo itre hna idrolan hnei fen? Ma drei jë fe lai epuni a hane kapa la aqane wai ewekë i Davita tune la hnei nyidrë hna cinyihan ka hape: “Joxu fe, pëkö ka tui cilie ene la ite haze; nge pëkö huliwa ka tune la ite huliwa i cilie.”—Salamo 86:8.
12 Tui Davita, epi tro la itre huliwa ka pë san hna kuca hnei Iehova a upi së troa atrunyi Nyidrë o drai. Ketre mina fe, atraqatre la madrine së la easë a atre ka hape, Baselaia i Akötresieti hë enehila a meköle ngöne la ihnatrapaimene lo atre troa nyihnane huti Davita, ene Iesu Keriso. (Hna Amamane11:15) Hatrene hi lai ka hape calemi hë la pun, celë hi matre e hetre ihnimi së kowe la atr ene lo 6 miliar nge hetre munën e celë fen, ijine tro hi së la a xatua angatr. Thaa ijine tro hmaca kö enehila a xomahmalohmaloeëne la huliwa ka tru nyine tro sa kuca, ene la tro sa qaja kowe la nöjei atr asë la pengöne la Baselaia i Akötresie me itre nyine tro eje a kuca kowe la atr. Thaa ijine tro hmaca kö së la a meijëne la ixatua nyine hamëne kowe la nöjei atr matre hane fe angatr ce atrunyi Iehova me easë. Eje hi laka, ame la ewekë ka sisitria ne la mele së, tre ene la troa thupëne wanga luuzi pi la ketre hnepe ijine ka ijije göi troa thue catrene la ketre atr matre hane fe angeice kapa la “maca ka loi” celë e ijine petre kö.—Mataio 24:14.
13. (a) Drei la hnei Davita hna atrun, nge drei la itre atr ka kapa la itre trenge ewekë i angeic? b) Tune kaa la aqane hule enehila kowe la itre ekalesia i Keresiano, la itre atr ka hni ka ipië?
13 “Tro ha la ung a selë Iehova; tro ha drenge me madine hnei angete ipië.” (Salamo 34:2) Thaa Davita kö la a sipu selë angeice maine ewekë ka tru hnei angeice hna kuca. Hanawange la enyipicini, thaa hnei angeice kö lo hna selë angeice lo kola atreine iaön lo joxu ne Gatha. Atre hi angeice laka Iehova lo atre thupë angeice e Gatha, nge qaathei Nyidrë la ixatua me petre i angeic. (Ite Edromë 21:1) Haawe, thaa hnei Davita kö hna sipu selë angeice ngo Iehova pe la hna atrun. Tune la pengöne celë, kola hule la itre ka hni ka ipië koi Iehova. Ame lo Iesu a huliwane la maca ka loi e celë fen, tre hnei nyidrë hna atrune la Atresiwa i Iehova, nge ame la thangane lai, kola traqa koi Akötresie hnene la itre ka hni ka ipië nge ka ajane troa atrepengöi Nyidrë. Ame enehila hnedrai së, kola hule la itre ka hni ka ipië ne la nöjei ethene kowe la ekalesia ne la itre keresiano hna iëne ngöne la fen asë, lo hna cilë mekene hnei Iesu, ene lo he ne la ekalesia. (Kolose 1:18) Ame la kola drenge hnene la itre atr ka hni ka menyik, la itre hlue i Akötresie a selën cememine la hni ka ipië la atresiwa i Nyidrë, ketre ju hi la hni angatr. Hna ketri angatre fe qa ngöne la hnei angatre hna drenge la maca qa hnine la Tusi Hmitrötr, nge hetre trotrohnine i angatre jëne la ua i Akötresie.—Ioane 6:44; Ite huliwa 16:14.
Itre icasikeu a acatrene la lapaune la lapaune së
14. (a) Hapeu, Davita hi a atrunyi Iehova ngöne lo angeic ngöne la gaa sihngödr? b) Nemene la tulu hnei Iesu hna hamën göne la itre icasikeu thatraqane la hmi?
14 “Ce me ini ju troa atrunyi Iehova, nge tro sa ce ngöne atrune la atresiwa i nyidrë!” (Salamo 34:3) Tune la hna qaja hnei Davita, thaa loi kö la tro sa isa hmi caas. Celë hi matre hetre ekeukawane la ihë i Davita, göi troa ce atrune la atresiwa i Akötresie. Ka ceitu hnyawa hi lai me Davita Ka Tru, ene Iesu Keriso, laka tru pala hi la madrine i nyidrë troa atrunyi Iehova nyipine la ka alanyim—hnine la itre sunago, maine ngöne lo itre ijine pui ne xeni e hnine la ēnēti hmitrötre i Akötresie e Ierusalema , me cememine lo itretre dreng. (Luka 2:49; 4:16-19; 10:21; Ioane 18:20) Ketre madrine ka tru me hnëqa nyine wanga atrun, la tulu hna amë pe hnei Iesu, ene la troa atrunyi Iehova o ijine cememine la itre sinatronge së, nge nyipi ewekë catre lai enehila, ke, ‘calemi catrë hë la drai’ hawe catre pi! — Heberu 10:24, 25.
15. (a) Nemene la thangane thene la itre atre i Davita, la aqane thepe angeic hnei Iehova? b) Nemene la thangane la hne së hna sine la itre icasikeu?
15 “Hnenge hna thele Iehova, ame hnei nyidrëti hna shama nie me amele ni qangöne la itre qoung’ asë.” (Salamo 34:4) Hna ketri Davita hnene la aqane amele angeice hnei Iehova. Haawe, öni angeice jë: “Hna hëjë hnene la ate ka aköte celë, nge shamatinë hë Iehova me amele angeice qangöne la ite aköte i angeice asë.” (Salamo 34:6) Ame lo itre ijine easë a icasikeu memine la itre sine hmi së keresiano, tre, itre ijine ka nyimutre lai göi troa ithuecatrekeu, ene la troa porotrikëne la itre ewekë hne së hna melën, nge ka amamane la aqane xatua së hnei Iehova matre cile catre kö së ngöne la itre drai ka jol. Itre porotrike lai ka troa acatrene la lapaunene la itre trejine me easë trahmanyi me föe ngöne la ua, tune lo itre ithahnata i Davita a ithuecatrene lo itre sinetronge i angeic. Ame göi Davita, hnei angatre “hna goeë nyidrë, ame hna laipi angate; nge tha hmahma kö la ite qëmeke i angate. “ (Salamo 34:5.) Pëkö hni ne hmahma thei angatr ngöne la angatr a kötrene ananyi Saulo joxu. Xecie hnyawa koi angatr laka, ce Akötresieti me Davita, ene pe atraqatre la madrine i angatr. Ka ceitune hnyawa hi memine la itre ka xötrei atre la nyipici, memine fe lo itre ka hekö hë melëne la nyipi hmi, hnei angatre asë hi hna thele ixatua thei Iehova. Pine laka hnei angatr hna kapa la ixatua qaathei Nyidrë, haawe, atraqatre la madrine i angatr la ixatua hnei angatre hna kapa, mama hnyawa pi hi la lai ne la itre qemeke i angatre hnene laka, ka xeci hnyawa ha e kuhu hni angatre la troa melëne hnyawa la nyipici.
The thëthëhmine kö lo itre ixatua hna traqa fë hnene la itre angela
16. Tune kaa la aqane xome Iehova la itre angela matre troa xatua së?
16 “ Kola lapa la angela i Iehova xötrethi angetre qoue nyidrë, me amele angat.” (Salamo 34:7) Atre hi Davita laka thaa angeice hmekuje kö la hna amelene hnei Iehova. Nyipici, Davita la hnei Iehova hna iëne troa joxu e Isaraela, ngo atre hi angeice ka hape, Iehova a upe la itre angela i Nyidrë troa thupëne la itre hlue ka mele nyipici koi Nyidrë, itre ka mama ju hë maine itre ka huliwa ngöne la gaa sihngödr. Ame ngöne la hneijine së, Iehova pala hi a thupëne la itre ka nyihlue nyipici koi Nyidrë. Ame ngöne la itre nöje ka nyimutre tune e Alema lo ijine i itre nazi me Agola, me Malawi, me Mozabik, hnene la itre ka cilë musin la itre nöje cili hna thele jëne troa apaatrene trij la Itretre anyipici Iehova. Catre pi hë angatre ngo ka gufa pe la pun. Thaa paatre kö la Itretre anyipici Iehova, ngo angatre pe a mana me ahlemun la atresiwa i Akötresie ngöne la itre nöje cili. Pine nemen? Pine laka hnei Iehova hna upe la itre angela ka hmitrötre i Nyidrë matre tro angatre a thupëne me amamai gojenyi kowe la Itretre anyipici Nyidrë.—Heberu1:14.
17. Nemene la itre aqane xatua së hnene la itre angela?
17 Ketre, atreine hi tro la itre angela i Iehova a kuca matre troa xometrij qangöne la nöje i Iehova la itre keresiano ka iathixötrë. (Mataio 13:41; 18:6, 10) Ame mina fe, ngacama thaa öhne kö së, ngo itre angela a xometrije la itre ewekë nyine athixötrëne la itre hlue Akötresie ngöne la huliwa i angatre koi Nyidrë, nge angatre fe a thupë së qa ngöne la itre ewekë ka troa apuingazone la aqane imelekeu së me Iehova. E hune la nöjei ewekë cili, angatre a amamai gojenyi koi së ngöne la hna cainöjëne “la maca ka loi ka tha ase palua kö” kowe la nöjei atre asë, me e nyipine fe la itre gaa hetre iangazo. (Hna Amamane 14:6) Hna lapaa qaja e hnine la itre itusi ne la Itretre Anyipici Iehova la itre ijine kola pane mama mina la ixatua ne la itre angela. Pine laka tru catre la itre ewekë ka tune lai, haawe, thatreine kö së troa qaja ka hape itre ewekë lai ka traqa menu hi tune la.
18. (a) Nemene la nyine tro sa kuca matre troa kapa la ixatua qaathene la itre angela? b) Nemene la nyine tro sa ce wang e wiike ka troa xulu?
18 Maine easa ajan troa eatrongë së pala hi me thupë së hnene la itre angela, loi e tro mina fe sa catre atrune la ëje i Iehova, ngacama tru la icilekeu. The thëthëhmine kö së, ame la angela i Akötresie, tre, ej a lapa hmekuje hi ‘xötreithe la itre ka xoue Iehova.’ Kolo lai a hapeu? Nemene la aliene la hna hape, troa xoue Akötresie, nge tune kaa la aqane tro sa xoue Iehova? Pine nemen matre kola ajan hnene la ketre Akötresieti ka ihnim, tro sa xoue Nyidrë? Tro pë hë së a sa la itre hnyinge celë e wiike ka troa xulu.
Troa Sa Tune Kaa?
• Nemene la itre itupath hna xomihnine hnei Davita ngöne lo angeic a thöth?
• Tui Davita, Nemene la sipu nyine tro sa hnehengazon?
• Tune kaa la aqane tro sa goeëne la ite icasikeu i Keresiano?
• Tune kaa la aqane xome Iehova la itre angela matre troa xatua së?