Ita Ne Thup göi 6 Mei
Nyima 11 me 16 Qene Drehu
Itre Dremoni—tune Kaa La Aqane Tro Sa Cile Catre Kow?
“Ame la nöjei angela angete tha cile huti ngöne la aqane joxu angat, ngo hna nue tije la nyipi hnalapa i angat, nyidëti a thupë angate hna othe ngöne la jidi ka epine palua, uti hë e troa amekötine ngöne la drai atraqat.”—IUDA 6.
1, 2. Nemene la itre hnying nyine amamane la pengöi Satana lo Diabolo memine la itre dremoni?
Kola ithuemacanyi koi së hnei aposetolo Peteru, ka hape: “Inamacanepi, me hmekënejë. Ke ithupëjia me nyipunie, ene Diabolo, a tro agö, kösë liona a ho, kola thele tha i nyën.” (1 Peteru 5:8) Öni Paulo e qeje itre dremoni, ka hape: “Tha ajane kö ni e tro nyipunie a ce me ite demoni. Tha’teine kö nyipunie troa iji la inege i Iehova, me inege ne la ite demoni; tha’teine kö nyipunie troa isa hetenyi qa ngöne la laulau i Iehova, me laulau ne la ite demoni.”—1 Korinito 10:20, 21.
2 Drei lai e Satana lo Diabolo memine lo itre dremoni? Hnauëne matre hetre dremoni jë nge eu la angatr a nyiqaane mama? Hapeu, Akötresieti la ka xupi angatr? Hnei angatr hna musinëne tune kaa la itre atr? Nemene jë la aqane tro sa hmekën wanga thaxöji së jë hnei angatr?
Hnauëne Matre Hetre Satana Pi Memine La Itre Dremoni?
3. Hna tune kaa matre nyi Satana pi me Diabolo lo ketre angela i Akötresie?
3 Ame petre kö ekö ngöne lo kola nyiqaane mele hnene la atr ngöne la hlapa e Edena, hna icilekeu hi ngöne la ijine cili hnene la ketre angela i Akötresie. Pine nemen? Pine laka thaa madrine kö angeic la hnëqa i angeic hnine la organizasio i Iehova e koho hnengödrai. Ngöne la kola xupi Adamu me Eva, ijine cili hi la angeice a thele jëne troa atrianyi nyidro matre nanyi pi nyidro qathei Akötresie, nge tro pena ha atrunyi angeic. Satana nge Diabolo pi hi lo lai angela, pine la hnei angeic hna icilekeu me Akötresie me iaön la lue pane atr troa eni wathebo. Ame ngöne la ijine cili, hna xötrethenge angeic hnene la itre xaa angela, matre icilekeu me Akötresie. Tune kaa?—Genese 3:1-6; Roma 5:12; Hna amamane 12:9.
4. Nemene la hna kuca hnene la itre xaa angela ka icilekeu qëmekene troa Di ngöne lo hneijine i Noa?
4 Qëmekene troa xulu lo di ka tru ngöne lo hnedrai i Noa, hna qaja hnei Tusi Hmitrötr laka, hnene la itre xaa angela hna piine menune la itre föe e celë fene hnengödrai. Pine la aja ka ngazo ekuhu itre hni angatr, kola qaja hnei Tusi Hmitrötre ka hape “öhnë hë la nöjei nekö i Akötesie la ite neköne la nöjei ate jajinyi laka lolo angat; ame hnei angate hna xome nyine ite fö’i angate lo hnei angate hna isa ajan.” Qa ngöne la hna kuci ngazo hnene la itre angela cili memine la itre neköi atr, ene pe hnahone pi hi la itre nekön hna hëne ka hape itre hoea hmae. (Genese 6:2-4) Itre xaa angela fe hë a thaa idrei, haawe, angatre fe hi lai a hane ca gojenyi jë me Satana troa icilekeu me Iehova.
5. Nemene la ewekë ka traqa kowe lo itre angela ka icilekeu, ngöne lo ijine Iehova a apaatren la fen jëne lo Iwë atraqatr?
5 Ame la kola axulune la iwë atraqatr hnei Iehova kowe la itre atr, kolo hi a apaatrene ju fe lo itre hmae ka hoea memine la itre thine i angatr qa la fen. Celë hi matre hnene la itre angela ka icilekeu hna nuetrije la itre itraunene i angatr, ene lo itre ngönetrei ne atr, me elë hmaca hnengödrai eë. Ngo, thaa hna aijijë angatre hmaca kö troa “cile huti ngöne la aqane joxu angat” lo hna ami angatr ngöne la qaan hnei Akötresie. Ketre, hna nyi thupene koi angatr hnei Akötresie me nue angatr kowe “la ite hnaope ga melöhlem,” hna hëne mina fe ka hape Gena; kösë hna thaipië angatre hnyawa.—Iuda 6.
6. Tune kaa la aqane amenune la itre atr hnene la itre dremoni?
6 Qaane lo angatr a aluzine la “aqane joxu angat,” thaa itre angela ka loi hmaca kö angatr, ngo itre dremoni hë, angetre ce tro me Satana, me sajuëne la itre aja i angeic ka ngazo. Celë hi matre qaane ju hi lai drai cili, thatreine hmaca kö lo itre dremoni troa lö hnine lo itre ngönetrei ne atr. Ngo, ijiji angatre hi jëne la itre nyinyithina i angatr troa iaöne la itre trahmanyi me itre föe matre troa kuca la nöjei pengöne aqane kuci ngazo. Hnene mina fe la itre dremoni hna amenune la itre atr jëne la kuci haze, ene la troa xahmi, me hmi Vaudou, nyi trene u ne ta. (Deuteronomi 18:10-13; 2 Aqane Lapa Ite Joxu 33:6) Caasi hi la pune kowe la itre angela me Diabolo, tro ha apaatrenyi angatr epine palua. (Mataio 25:41; Hna Amamane 20:10) Ngo ame enehila, tre, nyipi ewekë tro sa cile catr me thipetrije la aqane nyinyithina me aqane iaö i angatr. Celë hi matre loi e tro sa atrehmekune hnyawa la ecatrene la musi Satana memine la aqane tro sa cile koi angeic me itre dremoni angeic.
Tune Kaa La Ecatrene La Musi Satana?
7. Nemene la pengöne la musi Satana hune la fene hnengödrai celë?
7 Hnei Satana pala hi hna sili thoi Iehova. (Ite Edomë 27:11) Nge hnei angeic hna ajojezine la nöjei atr ka nyimutre. Kola qaja hnei 1 Ioane 5:19 ka hape: “Fene hnengödrai asëjëihë a meköle thene la atre ka ngazo.” Celë hi matre hnene lo Diabolo hna thele troa tupathi Iesu me hamë nyidrëti la mus, memine la lolo ne “la nöjei baselaia asëjëihë e celë fen.” (Luka 4:5-7) Hnei Paulo, aposetolo hna qaja göi Satana, ka hape: “Maine sihngödi la maca ka loi huni, te, sihngödi koi ange ka troa hnëjin ; nge hna atimekëne la ite hni angete tha lapaune kö hnene la haze ne la fen, wanga wië koi angate la lai ne la maca ka loi ka lolo i Keriso lo hnaiji Akötesie.” (2 Korinito 4:3, 4) Ketre, Satana hi “la ate thoi, nge keme ne ej” ngo hnei angeic hna sipu ujë angeic kö troa tune la ketre “angela ka lai.” (Ioane 8:44; 2 Korinito 11:14) Hetrenyi thei angeic la men memine la itre aqane nyinyithiina, nyine troa atimekëne la itre hni ne la itre ka cilë musi ne la fen me itre atren ej. Hnei angeic hna amenune la itre atr, jëne la itre ini ka hmo ne la itre hmi, ene lo itre trenga thoi.
8. Nemene la aqane qeje pengöne Tusi Hmitrötr la iajojezi Satana?
8 Kola mama hnyawa la ecatrene la musi Satana memine la aqane nyinyithiina i angeic, lo hneijine i Daniela perofeta ekö, a faifi hadredre petre kö lao macatre matre traqa pi Keriso. Ame la kola upe la ketre angela hnei Iehova troa tro fë la maca ne ithuecatre koi Daniela, hnene la angela hna pane isi memine la “la joxu [ketre ua] ne la baselaia ne Peresi.” Tuedri wane pi kö lao drai ne kola pane cilaxome la angela ka loi, uti hë la hna traqa hnei “Mikaela kete joxu ka tru” troa xatua angeic. Hna tro tune lai mina fe hnene “lo joxu (ene lo dremoni) ne Heleni.” (Daniela 10:12, 13, 20) Nge ame ngöne tusi Hna Amamane 13:1, 2, hna aceitunë Satana memine “la drakona” ka hamën kowe la öni ka kuci politik “la mene i nyën, me therone i nyën, me musi atraqat.”
9. Drei la hnene la itre Keresiano hna troa isi me ikuië memin?
9 Celë hi matre thaa sesëkötre kö së la kola qaja hnei Paulo aposetolo ka hape: “Tha eëshë kö a ikuë me ate, ngo ite joxu pe, me itete mus, me ite tane la jidi e celë fen, me ite u ka ngazo ngöne la ite hnë e hnengödrai.” (Efeso 6:12) Ketre ame enehila, ngacama sihngödre la itre dremoni, ngo hetre mene i angatr pe troa musi kowe la tane la itre baselaia ne fen memine la itre atr asë, pine laka angatr e hune la ihnatrapaime i Satana. Qa ngöne lai, atreine angatr troa kuca la itre huliwa ka ngazo, ene la troa thele troa lepe apë matranën la ketre lapa ka tru, me ami theth hnei boob, me ihumuth. Tro hë sa wang enehila la aqane tro sa hmekën la itre ua ka ngazo nge ka men.
Nemene La Aqane Tro Sa Cile Kowe La Itre Dremoni?
10, 11. Nemene la ka aijijë së troa hmekë Satana memine la itre angela i angeic ka ngazo?
10 Thaa ijiji hmekuje kö la trenge catr së troa cile koi Satana memine la itre angela i angeic ka ngazo, ceitune hi ngöne la ngönetrei maine ngöne la mekune së. Celë hi matre Paulo a thuecatre së me hape: “Ange trejine me ini, catre jë thei Joxu, hnene la trenge catre ne la mene i nyidrë.” Haawe, Akötresieti la hnapo së. Öni Paulo hmaca jë hi ka hape: “Xetëneju la ixete ne ishi ka pexeje i Akötesie, mate ateine nyipunie troa thipe tije la ite nyinyithina i Diabolo . . . Xomejë nyipunie la ite nyine ishi asë qa thei Akötesie, mate ateine nyipunie cile cate ngöne la drai ne ngazo, nge e hna kuca la nöjei ewekë asëjëihë, cile huti ju nyipunie.”—Efeso 6:10, 11, 13.
11 Alua ithuecatr Paulo aposetolo kowe la itre Keresiano, matre troa xetrëne “la ixete ne ishi ka pexeje i Akötresie.” Ame la hnëewekë lo hna hape “ka pexeje” ke kola hape pëkö ewekë ngöne la götrane ua nyine tro sa wange sixane wanga thaxöji së pi hnene la itre dremoni. Celë hi matre, nemene la götranen la ixetre ne isi hna melene nyine tro la itre Keresiano a canga hetrenyi enehila, matre atreine jë angatr cile kowe la itre dremoni?
Tro Sa “Cile Huti”—Tune Kaa?
12. Tune kaa la aqane tro la itre Keresiano a xetrëne la nyipici?
12 Öni Paulo ka hape: “Cile huti ju kö nyipunie, hna oteëne la nyipici, nge hna xetëne la mano hnene la ixete ne ishi, ene la thina ka meköt.” (Efeso 6:14). Ame la lue götran ne la ixetre hna qaja e celë, ke kolo otrene hni, ene la beletr, memine lo ixetre ne isi. Maine tro la ketre sooc a amë la otrene hni angeic, ene la beletr (nyipine la fene i mano memine la itre ihenentrepë), loi e troa sile hnyawa ej, ke göhnene fe hi la taua i angeice lai. Ketre, loi e tro la nyipici e hnine la Tusi Hmitrötr a tro xomi së hnyawa, maine easa ajane troa melëne ej. Hetre porogaram ne e Tusi Hmitrötr së fe kö hne së hna xötrethenge o drai? Nge Hapeu fe la itre atrene la fami së? Hne së kö hna majemine ce wai pengön memine la fami la topik ne la drai? Easë fe kö a trotrohnine hnyawa me hane melën la itre hna qaja hnine la itre zonal hna upe koi së hnene la “hlue ka nyipici me ka inamacan”? (Mataio 24:45) Maine eje hi, haawe easë hi lai a eatrëne lo hna eamone hnei Paulo. Hetrenyi mina fe the së la itre video me DVD ka qeje pengöne la itre hna cinyihane hnei Tusi Hmitrötr. Maine tro sa melëne hnyawa me fedre kowe la nyipici, tro hë së lai a atreine axeciëne hnyawa la itre mekun, nge tro fe lai a thupë së qa ngöne la itre gojenyi ka ngazo.
13. Tune kaa la aqane tro sa thupëne la hni së ngöne la götrane ua?
13 Ame la ixetre ne isi ke nyine thupëne la imano ne la sooc me hni angeic me itre xaa götrane emele i angeic (tune la wene thëhmi me idrefitr...)—E hetrenyi thei angeic la ihnimi kowe la itre aqane wai meköti Iehova me itre trenge wathebo i Nyidrë, haawe, aqane tro hi angeice lai a atreine thupëne la hni angeic. Ame mina fe ngöne la götrane ua, kola thupë së hnene la ixetre ne isi matre thaa tro kö sa wange sixane la Wesi Ula i Akötresie. Nyipici, e ajane së troa neëne “la ite jëne ka ngazo asë”, loi e tro sa “methinëne la ngazo, me hnine la loi.”—Amosa 5:15; Salamo 119:101.
14. Nemene la aliene la hna hape, tro sa “sile la ite tengene hnatrapaca së ene la hna hnëkëne la maca ka loi ne tingeting”?
14 Hnene la itre sooc ne Roma hna majemine otrë butr ka catr, göi troa trongëne la itre gojenyi gaa nanyi kowe la itre hna isi. Nemene la aliene kowe la itre Keresiano la hnëewekë hna hape, “ite tengene hnatrapaca i nyipunie ene la hna hnëkëne la maca ka loi ne tingeting”? (Efeso 6:15) Kolo lai a hape tro sa cilehmek. Tro pala hi së a thupëne la nöjei pengöne ijine göi troa cainöjëne la maca ka loi ne la Baselaia i Akötresie. (Roma 10:13-15) Hnene la hne së hna catre xome la huliwa ne cainöj, qa ngöne lai, kola thupë së qa ngöne la itre “nyinyithiina” i Satana me “itre aqane ujë i angeic ka iaö.”—Efeso 6:11.
15. (a) Nemene la ka amamane la esisitriane la petr ene la lapaun?(b) Nemene la itre ethane ka troa angazone la lapaune së hna afetrane hnene “la ite jo ne hazo eë?”
15 Kola sisedrëne hnei Paulo ka hape: “Nge ce me it’ej’asë xomejë fe la pete ene la lapaune, mate cate nyipunie troa apine la ite jo ne hazo eë ne la ka ngazo.” (Efeso 6:16) Qëmekene troa iupe troa xome la pete ne la lapaun, ke hna pane nyiqaane la xötre celë hnene la hnepe hna ithanata hna hape “ce me it’ej’asë,” göi troa amamane hnyawa la esisitriane la jiane isi celë. Thaa tro pi kö a hetre hnepe ethane la lapaune së. Ke ceitune memine la ketre petre ka tru, ijije hi tro ej’a thupë së me apine “la ite jo ne hazo eë” i Satana. Nemene la pengöne la itre jo cili ngöne la hneijine së enehila? Kolo hi lai a qaja la itre iqaqa me itre trenga thoi, memine la itre xaa neköi aqane iaö ju kö hna haöth hnene la itre ithupëjia memine la itre perofeta ka thoi göi troa ananazijëne la lapaune së. Kola tupathi së mina fe hnene la itre jo ne hazo eë cili troa aja mo, uti hë la tro sa itö menu göi tro hi a pi mama me pi sisitria hui itre xan. Celë hi matre angatre jë a itöne la itre hnalapa me itre loto ka tru thupen, me nöjei ewekë nyine thaipine la ngönetrei angatr, maine itre fini cein ka tru thupene catr me itre ihetre ka hnyipixe; tro pala hi a nyinyape thele la nöjei pengöne ewekë hna hnyipi amamane hnene la itre magazë. Ngacama kola ujë tune lai hnene la itre atr ka lapa xötreithi së, ngo e ka catr la lapaune së, ijije hi tro sa ajeane la itre “jo ne hazo eë” cili. Tune kaa la aqane tro sa akökötrene la lapaune së me thupëne matre tro pala hi a catr?—1 Peteru 3:3-5; 1 Ioane 2:15-17.
16. Nemene la ka troa xatua së troa thupëne me akökötrene la lapaune së?
16 Ijiji së hi troa easenyi Akötresie, e hne së hna majemine isa inine pala hi la Tusi Hmitrötr, me catre thith. Ijije mina fe tro sa sipo Iehova troa acatrene la lapaune së me kuca la itre huliwa ka ihmeku memine la itre thithi së. Hanawang la ketre ceitun, hne së kö hna majemine hnëkëne la Ita Ne Thup hna amekötine kowe la wiik matre ijiji së troa hamë mekune ngöne la ijine icasikeu? Tro la aqane inine së la Tusi Hmitrötr memine la aqane e së la itre itusi ka qeje pengöne ej a akökötrene tune kaa la lapaune së?—Heberu 10:38, 39; 11:6.
17. Tune kaa la aqane tro sa “xome la itrapete ne ishi ene la mel”?
17 Hnei Paulo hna nyipune la aqane qeje pengöne i angeic la itre nyine isi asë, jëne la ketre eamo ka hape: “Xomejë fe la itrapete ne ishi ene la mel, memine la taua ne la Ua, ene la wesi ula i Akötesie.” (Efeso 6:17) Ame la huliwa ne la itrapete ke nyine troa petëne la he memine la atuat ne la sooc, pine laka e cili hi la qeqene la nöjei pengöne mekun hne së hna troa xom. Ketre, tro mina fe la mejiune së itre Keresiano a thupëne la itre aqane mekune së. (1 Thesalonika 5:8) The tro kö së a nyialiene la itre he së hnene la itre aja ne la fen me aja mo, ngo loi e tro pe sa amamane hnyawa me eköthe la itre mekune së hune la mejiune hna hamëne koi së hnei Akötresie, tune la aqane kuca i Iesu.—Heberu 12:2.
18. Pine nemen matre thaa tro pi kö sa wanga acone la porogarame ne e Tusi Hmitrötre së?
18 Ame la ewekë tixenuë ka troa thupë së qa ngöne la itre nyinyithina i Satana memine la itre dremoni angeic, tre, ene la Wesi Ula, maine maca i Akötresie ka eje e hnine la Tusi Hmitrötr. Drei la kepine matre thaa tro kö sa nuetrije la porogarame ne e Tusi Hmitrötr së. Hnene laka kökötre catre the së la atrehmekune qathene la Wesi Ula i Akötresie, haawe, kola thupë së qa ngöne la itre trenga thoi Satana me itre ithuemacanyi ka ngazo ne la ite dremoni, memine la itre hna afetrane hnene la itre iangazo qa thene la itre perofeta thoi ka iamenumenu me aelëhni së.
Loi e Troa “Thithi Pala Hi”
19, 20. (a) Nemene la ewekë ka troa traqa koi Satana memine la itre dremoni angeic? (b) Nemene la ka troa akeukawanyi së ngöne la götrane ua?
19 Easenyi hë la pune koi Satana, me itre dremoni angeic memine la fene ka ngazo. Trotrohninë hë Satana laka “xoxopate pe hi la ijine i nyën.” Angeic a elëhni me tro troa isi memine lo “angetre drenge thenge la nöjei wathebo i Akötesie, me angetre xome la nyine anyipici Iesu Keriso.” (Hna Amamane 12:12, 17) Nyipi ewekë tro pe sa catre cile koi Satana memine la itre dremoni angeic.
20 Drei la ketre madrine ka tru koi së troa kapa la eamo ka upi së troa xetrëne la ixetre ne isi ka pexeje i Akötresie! Hnei Paulo hna afenesine la ithanata i angeic göne la ixetre ne isi ngöne la götrane ua, hnene la ithuecatre celë hna hape: “Kola thithi pala hi nyipunie, ene la thithi sipo asë ngöne la Ua, nge kola hmekëne kowe lai hnen la ielen’asë me sipo nyine thatraqane la itre ka hmitrötre asë.” (Efeso 6:18) Tro la thithi a akeukawane la itre hni së ngöne la götrane la ua, me xatua së pala hi troa hmek. Haawe, loi e tro sa hnine la itre trenge ewekë i Paulo me catre troa thith, haawe, tro ha xatua së troa cile koi Satana me itre dremoni angeic.
Nemene La Hnei Nyipunie Hna Inin?
• Hna tune kaa matre hetre Satana pi memine la itre dremoni angeic?
• Nemene la ecatrene la mene i Diabolo?
• Nemene la nyine tro sa kuca matre tro sa atreine cile koi Satana me itre Dremoni?
• Tune kaa la aqane tro sa xetrëne la ixetre ne isi ka pexeje i Akötresie?