Ita Ne Thup göi 13 JANUARE

Nyima 8 me 212 Qene Drehu

Musi Cile I Iehova Me Baselaia I Nyidrë

“Iehova fe, enëtilai la ka sisitia, me ka men, me ka lolo, me cat, me nyine atrun ; ke nöjei ewekë i cilieti la nöjei ewekë asë e koho hnengödrai me e celë fen; Iehova fe, enëtilai la baselaia, nge ase hë atrunyi enëtilai ka hune la nöjei ewekë asëjëihë.” —1 AQANE LAPA ITE JOXU 29:11.

1. Pine nemene matre meköti e troa hë Iehova ka hape Atre Musi Cile hune la hnengödrai memine la fene hnengödrai?

“ASE hë Iehova amë catëne la therone i nyidë e hnengödrai; nge kola musi hune asë la baselaia i nyidë.” (Salamo 103:19) Kola amamane hnyawa hnene la atre cinyihane la Salamo la ini ka nyipici göi mus. Iehova Akötresieti la Atre xupi së, matre meköti troa qeje Nyidrëti ka hape, Atre Musi Cile hune la hnengödrai memine la fen.

2. Tune kaa la aqane qeje pengöne hnei Daniela la götrane hna musi ngön hnei Iehova ngöne la götrane la ua?

² Eje hi laka, kola cile la joxu, e hetrenyi nyidrëti la itre jin. Ka musi pala hi Iehova qaane ekö, hna nyiqaane musi hune la itre xupuana i Nyidrë ua, laka ame la hnapan, tre, ene la Hupuna i Nyidrëti ka caas, nge thupene lai itre xaa angela. (Kolose 1:15-17) Ame pë hë e thupen, hnei perofeta Daniela hna qaja la aqane trongene la musi Iehova e koho hnengödrai. Öni nyidrëti ka hape: “Ini a goeëne uti hë ase hë acile la ite theron, nge kola të la qate ate ka hekö. . . . Ca thausane la o thausan’ a nyi hlue i nyidë, nge ca miriade la o miriad a cile xajawa i nyidë.” (Daniela 7:9, 10) Ka hekö catre Iehova, nge Nyidrëti la “Qate Ate Ka Hekö,” ka cile ceitune me Atre Musi Cile hune la lapa ka tru ne la itre angela, hna eköthe hnyawa, ka huliwa ceitune me “hluewa” kola kuca la aja i Nyidrë.—Salamo 103:20, 21.

3. Tune kaa la aqane ethe atrune Iehova la musi cile i Nyidrë kowe la hnengödrai me fen ngöne la götrane ngönetrei?

³ Eje hi lai laka, hnei Iehova hna ethe atrune la musi Nyidrë; hnei Nyidrëti hna xupe la hnengödrai memine la fene hnengödrai, ene mina fe la ihnadro. (Iobu 38:4, 7) Ame kowe la atr e celë fen ka goeëne la hnengödrai, tre, pëkö isazikeu ngöne la aqane trongëne la itre ewekë hna xup e caha, nge kösë kola mama laka pëkö ka eatrongëne me musinëne itre ej. Ngo hna qaja hnene la atre cinyihane la salamo, ka hape: “Loi e tro angat’ a nyima madine hune la ite göhne i angat. Nge hnei nyidëti hna acile hunyi angat’ epin’ epine palua; hnei nyidëti hna ami ifego, nge tha tro kö a shashaith.” (Salamo 148:5, 6) Hnei Iehova pala hi hna musi cil, me eatrongën me musi hune la itre götrane la ua me itre götrane la ngönetrei ne la hnengödrai memine la fene hnengödrai.—Nehemia 9:6.

4. Tune kaa la aqane musi Iehova hune la itre atr?

⁴ Ame ngöne la kola xupe la lue pane atr hnei Akötresie, tre, ketrepengöne aqane xome pena ha Nyidrëti la musi Nyidrë. Thaa hnei Iehova hmekuje kö hna hamëne koi nyidro la itre ewekë hnei nyidroti hna ajan matre troa mele ka loi, ngo hnei Nyidrëti fe hna nue koi nyidro troa musi hune la itre öni e celë fen. (Genese 1:26-28; 2:8, 9) Qa ngöne lai, kola mama hnyawa laka thaa ka ithue loi hmekuje kö la musi Akötresie, ngo eje fe a metrötrëne me wanga atrune hnyawa la itre jini ne ej. Maine hnei Adamu ju me Eva hna lapa hnyawa fene la musi cile i Iehova, eje hi lai laka, tro hë nyidroti a hetrenyi la mele ka epine palua hnine lo Paradraiso ekö e celë fen.—Genese 2:15-17.

5. Nemene la nyine tro sa qaja ngöne la aqane musi Iehova?

⁵ Nemene hë la hne së hna trotrohnine jëne la nöjei ewekë cili? Ame la hnapan, hnei Iehova pala hi hna musi hune la nöjei hnei Nyidrëti hna xupe asë. Ame la hnaaluen, tre, ka lolo nge ka iwanga atrunyi la musi Nyidrë. Nge ame la hnaakönin, tre, e tro sa drengethenge me sajuëne la musi Akötresie, haawe, tro hë së a kapa la itre manathithi ka cile huti epine palua. Thaa sesëkötre kö së la kola qaja hnei Davita, joxu ne Isaraela ka hape: “Iehova fe, enëtilai la ka sisitia, me ka men, me ka lolo, me cat, me nyine atrun; ke nöjei ewekë i cilieti la nöjei ewekë asë e koho hnengödrai me e celë fen; Iehova fe, enëtilai la baselaia, nge ase hë atrunyi enëtilai ka hune la nöjei ewekë asëjëihë.”—1 Aqane lapa ite Joxu 29:11.

Kepine Matre Kola Acile La Baselaia i Akötresie?

6. Nemene la aqane ce tro la musi cile i Akötresie memine la Baselaia i Nyidrë?

⁶ Pine laka ka musi pala hi Iehova e koho hnengödrai me e celë fen, pine nemene kö la kola acile pena ha la Baselaia i Nyidrë? Hna majemine hnene la ketre atre musi troa acile la ketre lapa maine ketre atr pena, matre troa musi hune la itre jini nyidrë. Qa ngöne lai, ame la Baselaia i Akötresie, tre, celë hi qene qaja ne la Musi Cile i Akötresie hune la itre hnei Nyidrëti hna xup; celë hi ketre jëne maine jiane huliwa hnei Nyidrëti hna xome matre troa mus.

7. Pine nemene matre Iehova a acile la ketre aqane musi cile i Nyidrë ka hnyipixe?

⁷ Nyimu pengöne aqane mama la musi cile i Iehova ngöne la nöjei hneijin. Hnei Nyidrëti hna acile la ketre aqane troa musi ka hnyipixe, matre troa cile kowe la ketre jole ka hnyipixe. Nemene jol? Ngöne hi lo kola mejë hnene la ketre ua i Akötresie ka icilekeu, ene Satana, troa ajojezi Adamu me Eva me uku nyidro troa icilekeu memine la musi Iehova. Celë ketre ewekë lai ka icilekeu memine la musi cile i Akötresie. Ngöne nemene götran? Ame la Satana a qaja koi Eva ka hape, ‘thaa tro jë kö nyiidro a mec’ e tro nyiidro a xeni wene lo sinöe hna wathebon; angeice hi lai a jelethoi Iehova, matre thaa tro kö nyidroti a mejiune koi Nyidrë. Öni Satana fe e qaja koi Eva, ka hape: “Ate hmekune kö Akötesie laka ngöne la drai ne tro nyipoti a xeni wen’ ej, tro ha maca la lue meke i nyipo, mate kösë lue akötesie nyipo, mate ate hmekune la loi me ngazo.” Satana hi lai a qaja ka hape, ka sisitria kö la tro Adamu me Eva a nuetrije la hna amekötine hnei Akötresie me ketre mele caas, hune la troa nue Nyidrëti troa eatrongë nyidro. (Genese 3:1-6) Kolo hi lai a isenyine me qeje gelene la aqane musi Akötresie. Matre nemene la hnei Iehova hna troa kuca?

8, 9. (a) Tune kaa la aqane cile hnene la musi ne la ketre atr kowe la ketre icilekeu e hnine la nöje hnei angeic hna musi ngön? (b) Nemene la aqane cile Iehova kowe lo icilekeu ekö e Edena?

⁸ Nemene la hna ajan troa kuca hnene la ketre atre ka mus, ngöne la kola icilekeu hnene la ketre jini nyidrë? Ame kowe la itre ka atre hnyawa la aqane trongene la mele ne la atr, tre, canga tro hi angatr a mekune la itre xaa ceitun. Thaa hna wanga acone kö lai icilekeu, ngacama ka loi thiina ju hë la ka mus, ngo hna majemine troa amekötine la itre ka icilekeu, me jelengazone la aqane iwanaxoeë i angatr. Thupene lai, angeic a upe la ketre atr troa kootrëne lai itre ka icilekeu me acile hmaca la tingeting. Ketre tui Iehova mina fe, laka, hnei Nyidrëti hna amamane laka, thaa kötrekötre kö la musi Nyidrë, ngöne la Nyidrëti a axeciëne me amekötine hë la pune kowe la itre ka icilekeu. Hnei Nyidrëti hna ëji Adamu me Eva matre luuzi hë thei nyidro la mele ka thaa ase palua kö, nge kolo fe hë a upetriji nyidro qa ngöne la hlapa e Edena.—Genese 3:16-19, 22-24.

⁹ Ame hi lai Nyidrëti a qaja la pune hna athipe koi Satana, tre, Iehova mina fe hi lai a amamane la ketre aqane musi Nyidrë ka hnyipixe, aqane tro Nyidrëti a acile hmaca la tingeting me eköthe la caas thene la itre hnei Nyidrëti hna xup. Öni Nyidrëti koi Satana ka hape: “Tro ni a aithupëjia hmunë memine la fö, me matra i hmunë memine la matra i angeic; tro angeic’a athe la he i hmunë, nge tro hmunë a athe la tidöca i angeic.” (Genese 3:15) Haawe, Iehova a amamane laka, aja i Nyidrë troa nue la hnëqa kowe la ketre “matran” troa wajafici Satana memine la itre ka ce xöle me angeic, me troa anyipicine la emekötine la musi cile i Nyidrë.—Salamo 2:7-9; 110:1, 2.

10. (a) Drei la “matran”? (b) Nemene la hna qaja hnei Paulo göne la aqane eatr la pane hna perofetan?

¹⁰ Ame ju hi lai “matran” tre, mama pi hë ka hape Iesu Keriso hi, memine fe la itre xaa ka troa ce musi me nyidrë. Angatr a ce cilëne la Baselaia i Akötresie memine la Mesia. (Daniela 7:13, 14, 27; Mataio 19:28; Luka 12:32; 22:28-30) Ngo thaa hna canga qaja amamane kö la nöjei ewekë cili. Eje hi, ame la aqane troa eatre lai pane hna perofetane ekö, tre, hna aceitunëne ej me ketre “ewekë ka sihngödi hna juetëne ekö qa palua.” (Roma 16:25) Ame ngöne la itre macatre ka nyimutre catr, tre, hnene la itre atr ka lapaune hna lapa treqene la ijine kola troa amamane la “ewekë ka sihngödr,” memine la pane hna perofetane ka troa eatrëne la musi cile i Iehova.—Roma 8:19-21.

Kola Mama Trootro La “Ewekë Ka Sihngödr”

11. Nemene la hna amamane hnei Iehova koi Aberahama?

¹¹ Kola tro la itre macatre, nge Iehova a amamane trongëne la itre götranene la “ewekë ka sihngödi ne la baselaia i Akötesie.” (Mareko 4:11) Hnei Iehova hna pane qaja amamane lai koi Aberahama, lo atr hnei Nyidrëti hna sipu hëne ka hape, “enehmu i Iehova.” (Iakobo 2:23) Hnei Iehova hna thingehnaeane koi Aberahama ka hape Nyidrëti a troa kuca matre troa xulu la “ketre nöje atraqatr” qaathei angeic. Ame pë hë thupen, hnei Akötresie hna qaja fe koi Aberahama ka hape: “Troa xulu qathei’ö la nöjei joxu,” nge “tro ha manathithi qa thene la matra i ‘ö la nöjei nöje asëjëihë e celë fen.”—Genese 12:2, 3; 17:6; 22:17, 18.

12. Tune kaa la aqane mama la matra i Satana thupene lo iwë ekö?

¹² Ame ngöne lo hneijine i Aberahama, tre, hetrenyi hë la itre atr ka thele troa musinëne la itre xan. Kola qeje Nimeroda lo ketre xötre api Noa; öni Tusi Hmitrötre ka hape: “Celë hi ate nyi qane troa cat’ e celë fen. Ate cat’ angeice troa weje öni xajawa i Iehova.” (Genese 10:8, 9) Kola mama hnyawa, laka, ame Nimeroda memine la itre xaa ka tui angeic ka thele troa mus, tre, itre nyimo i Satana angatr. Angatre lai memine la itre ka ce xöle me angatr, lo ka sine la matra i Satana.—1 Ioane 5:19.

13. Nemene la hnei Iehova hna ahnithe jëne Iakobo?

¹³ Ngacama kola catre thele hnei Satana troa ukune la itre atr troa mus, ngo thatreine kö angeice troa sewe Iehova troa aejëne la aja i Nyidrë. Jëne Iakobo xötre api Aberahama, hnei Iehova hna qaja amamane ka hape: “Tha tro kö a pate thei Iuda la tö, memine la ate ithue wathebo qa fa ca i nyëne uti hë e traqa ha la Silo, nge tro ha la nöjei nöj’ a drenge thenge anganyidrë.” (Genese 49:10) Ame la hnëewekë hna hape, “Silo”, tre kolo lai a hape, “Ewekë Thei Nyidrë, Maine Nyidrëti Hi La Atrekë Ewekën.” Haawe, kola amamane hnyawa hnene la itre trenge ewekë hna perofetane celë, ka hape, kola troa traqa la atre ka ijije troa kapa la “tö,” maine mus, me “ate musi” hune la “itre nöj,” maine nöjei atr asë. Matre drei elanyi la Atre musi cili?

“Uti Hë e Traqa Ha La Silo”

14. Nemene la hnei Iehova hna isisinyikeu me Davita?

¹⁴ Ame la pane hnei Iehova hna iëne thene la itre matra i Iudra, matre troa joxu hune la nöje i Nyidrë, tre, Davita atre thupë mamoe lo nekö i Iese.a (1 Samuela 16:1-13) Ngacama hnei Davita hna tria me kuca la ngazo, ngo ame pe, tre, kola kepe angeic hnei Iehova, pine laka, ka lapa qale pala hi angeic me nyipici fene la musi cile i Iehova. Hnei Iehova hna isisinyikeu me Davita, matre kola nango mama hnyawa lo ewekë hna perofetane ekö e Edena, öni Nyidrë: “Tro ni a acile la matra i ‘ö thupe i ‘ö, lo troa traqa qa thei ‘ö, nge tro ni a acatene la baselaia i nyën.” Nge kösë thaa hna nyifegone kö lai thene lo nekö i Davita nge hnai nyidrë, ene Solomona, ngöne laka, hna qaja hnene la hna isisinyikeu ka hape: “Tro ni a acatrene la therone la baselaia i nyën’ epine palua.” Kola mama hnyawa ngöne la hna isisinyikeu me Davita laka, ame lo “matra” ne la Baselaia hna thingehnaeane, tre, tro ej a xulu qa ngöne la xötre lapa i Davita.—2 Samuela 7:12, 13.

15. Pine nemene matre kola qaja ka hape ame la baselaia ne Iudra, tre, celë hi iahnuene la Baselaia i Akötresieti lai?

¹⁵ Hna nyiqaane hi thei Davita lo itre xötre joxu hna siën hnene la atre huuj ka sisitria; hna sië angatr hnei wakacu ka hmitrötr. Ene pe hna hëne la itre joxu cili ka hape itre hna iën, maine itre mesia. (1 Samuela 16:13; 2 Samuela 2:4; 5:3; 1 Ite Joxu 1:39) Hna qeje angatr ka hape, angatr a lapa hune la therone i Iehova me musi ceitune me itre joxu ka nyi trenge ewekë i Nyidrë e Ierusalema. (2 Aqane lapa ite Joxu 9:8) Nyine tro hi lai a amamane, ka hape, kola nyi hatrene la Baselaia i Akötresie hnene la baselaia i Iudra; celë hi qene qaja ne la musi cile i Iehova ekö e celë fen.

16. Nemene la itre thangane la musi ne la itre joxu ne Iudra?

¹⁶ Ame ngöne la kola drengethenge hnene la joxu memine la nöj nge angatr a lapa fene la musi Iehova, Nyidrëti hi a thupë angatr me amanathithi angatr. Pëkö ketre ijine ekö ka tune la ijine musi Solomona, laka, ketre hneijine ka tingeting me pipixenyë; kolo hi lai a nyiqaane amamane la aqane troa eatre elanyi la hna perofetan göne la musi ne la Baselaia i Akötresie, ngöne la kola troa apaatrene palua la iajojezi i Satana me anyipicine la musi cile i Iehova. (1 Ite Joxu 4:20, 25) Ngazo pe, ala nyimu la itre joxu ka fetra qaathei Davita ka thaa trongëne kö la itre hna amekötine hnei Iehova, nge kola kei la nöj kowe la kuci idrola memine la kuci ngazo. Ame hë la pun, hnei Iehova hna nue koi angetre Babulona troa apaatrene la baselaia ngöne lo macatre 607 M.P.K. Kola mama laka hetre thangane pi hë la iajojezi Satana memine la aqane thele angeic troa amenune la itre atr matre thaa tro kö angatr a lapa fene la musi cile i Iehova.

17. Nemene la ka amamane ka hape Iehova pala hi la ka mus ngacama hna ngaan la baselaia i Davita?

¹⁷ Ame la kola ngaan la baselaia i Davita memine lo baselaia ne la götrane ailopi ne Isaraela hna pane lepetrij, tre, thaa kolo kö lai a troa anyipicine ka hape thaa meköti kö tro Iehova a mus, maine thatreine jë pena kö Nyidrë troa mus. Kolo pe lai a amamane la itre thangane ka ngazo qa ngöne la hna iajojezi hnei Satana memine la aqane pi mele ananyi Akötresieti hnene la atr. (Ite Edomë 16:25; Ieremia 10:23) Ngo kola mama laka Iehova pala hi a mus, qa ngöne la itre trenge ewekë hnei Nyidrëti hna qaja jëne Ezekiela perofeta, kola hape: “Xome jë la itrapetr, xome jë fe la korona. . . . Tro ni a qene ipiën, qene ipiën ; nge tha ejë hë lai uti hë traqa ha nyidëti ate troa amekötin, nge tro ni a hamëne kow.” (Ezekiela 21:26, 27) Kola amamane hnene la itre trenge ewekë celë ka hape, ame lo hna thingehnaean, ene la “matran,” celë hi lo Atre “[ka ijije] troa amekötin” laka thaa traqa petre kö nyidrë.

18. Nemene la hna qaja koi Maria hnene la angela Gaberiela la ëjen?

¹⁸ Tro hë sa sesë kowe lo macatre 2 M.P.K. Hna upe lo angela, Gaberiela la ëjen, koi Maria, ketre nyipi jajiny ne Nazareta ketre nöj ne Galilaia ngöne la götrane ailopi ne Palestine. Hnene la angela hna qaja ka hape: “Hana wang, tro ha eö a upune, me hnahone la nekö trahmany, nge tro eö a qaja la ëje i anganyidë Iesu. Tro anganyidë a atraqat, nge troa qaja la ëje i nyidëti Hupunanëti la Kasisitia ; nge troa hamë nyidëti hnei Joxu Akötesie la therone i Davita keme i nyidë; nge tro anganyidëti a musinëne la lapa i Iakobo epine palua, nge tro ha pë pune la baselaia i nyidë.”—Luka 1:31-33.

19. Calemi hë la ketre ijine kola troa traqa la itre ewekë nyine hain; nemene la itre ewekë cili?

¹⁹ Calemi catre hë la ijine tro ha mama lo “ewekë ka sihngöd”. Easenyi hë troa mama lo pane wene ne la “matran” hna thingehnaean. (Galatia 4:4; 1 Timoteo 3:16) Troa athe la tidroca i angeic hnei Satana. Ngo tro pena ha la “matran” a athe elanyi la he i Satana, me apëne la iajojezi angeic me itre sinexöle i angeic. Tro fe nyidrëti a anyipicine laka, jëne la Baselaia i Akötresie, tro ha apaatrene lo itre ewekë ka ngazo hna axulune hnei Satana matre itre ewekë ka lolo hmaca pena ha, nge troa anyipicine fe la musi cile i Iehova. (Heberu 2:14; 1 Ioane 3:8) Tune kaa la aqane troa eatrëne hnei Iesu lai? Nemene la tulu hnei nyidrëti hna hamëne koi së? Tro pë hë së a sa la hnyinge celë ngöne la ini ka troa xulu.

[Ithueamacany]

Qeje Pengöne Jë?

• Nemene la ka aijijë së troa qaja ka hape Iehova la Atre Musi Cil e koho hnengödrai me e celë fen?

• Pine nemen matre Iehova a acile la Baselaia?

• Tune kaa la aqane amamane trongëne Iehova la “ewekë ka sihngödr”?

• Nemene la ka amamane ka hape Iehova pala kö a mus ngacama hna ngaane hë lo hna nyi joxu i Davita?