Sabath drai 13 Januare

Nyima 16 me 11

Pëkö Ewekë Hna Kuca Nyine Ishi Me Eö Hna Troa Ien

“Pëkö ewekë hna kuca nyine ishi ... me nyipo hna troa ien.”—ISAIA 54:17.

1, 2. Nemene la aqane amamane hnene la itre ewekë hna melën hnene la Itretre Anyipici Iehova ne Alebania, la ini ka nyipici hna qaja ngöne Isaia 54:17?

QAANE lo nyipine itre macatre 1940 uti hë lo 1990, tre, hetrenyi ngöne la ketre nöje ka co götrane ailojë ne Erop, la ketre hnepe gurup, itre Keresiano angatr, laka pëkö xou thei angatr. Hnene la musi ne la itre Communiste hna catre thele troa lepe apaatrenyi nyudren. Ngacama hna qanangazo angatr me umën hnine la itre götrane gaa ngazo catr, me icilekeu pena hnene la itre jëne ithuemacany, ngo thatreine kö troa apaatrenyi nyudren. Drei lai hnepe gurupe cili? Kolo hi lo Itretre Anyipici Iehova ne Alebania. Ngacama jole catre koi angatr troa ce icasikeu me cainöj, ngo qa ngöne la aqane cile catre angatr ngöne la itre macatre ka nyimutre catr, haawe, kola adraiëne la nyipi hmi Keresiano, me atrune la ëje i Iehova. Ame hi lo macatre 2006, kolo hi a löthe lo itre biero i sasaiatri ngöne la nöje cili, ene pe qaja jë hi la ketre trejine ka mele nyipici nge ka hekö catre hë ngöne la nyipici ka hape: “Thaa sihngödre kö la ecatrene la aqane icilekeu i Satana, ngo ase hë ngaa angeic nge Iehova la ka hun!”

² Celë hi nöjei tulu ne mele lai ka amamane hnyawa la enyipicine lo hna thingehnaeane hnei Akötresie kowe la nöje i Nyidrë, a hna qaja ngöne Isaia 54:17, ka hape: “Pëkö ewekë hna kuca nyine ishi me nyipo hna troa ien ; nge tro nyipoti a jele ngazone la ite sesepeneqë asëjëihë itete ikelikelë me nyipo ngöne la hna amekötin.” Kola mama hnyawa ngöne la aqane trongene la mele ne la atr, laka, thatreine kö tro la fene i Satana a sawa la itre hlue i Iehova Akötresie, troa thilli koi Nyidrë.

Thaa Ie Kö Satana Ngöne La Pi Icilekeu i Angeic

3, 4. (a) Nemene la itre jiane isi hna xome hnei Satana? (b) Ngöne nemene götrane la kola gufa la itre jiane isi hna xome hnei Diabolo?

³ Nyimutre la itre jiane isi hna xome nyine isi memine la itre nyipi hlue i Akötresie, tune la troa wathebone la huliwa ne cainöj, maine troa isi me icilekeu la itre atr ka nyimutre, me iakalabusi, me troa ‘tratraune la iangazo hnei wathebo.’ (Salamo 94:20) Ngöne la itre xaa nöj enehila, kola ini ngöne la hna cinyihane celë hnene la Itretre Anyipici Iehova; kola “tupathe” la aqane mele nyipici ne la itre nyipi Keresiano cili koi Akötresie.—Hna Amamane 2: 10.

⁴ Hanawange la ketre ceitun, kola qaja hnene la ketre biero ne la Itretre Anyipici Iehova, ka hape, ame ngöne la caa macatre, tre, hna e la 32 lao hlue i Akötresie hna lepe ngöne la angatr a cainöjëne la maca ka loi. Ketre, 59 la etrune la itre trejine hna othe hnei polis; itre thöth me itre qatr, me itre föe me trahmany, pine la hnei angatr hna cainöje ngöne la gaa tru atr. Ame itre xan, hna xome la itre thupene la hene wanakoime i angatr, me foto i angatr, me umë angatr hnine kalabus ceitune me itre ka ihumuth. Ame itre xan, tre, hna axounyi angatr me thele troa lepi angatr. Ame ngöne la ketre nöj, kola e enehila la 1 100 la etrune la Itretre Anyipici Iehova hna oth, me tran hnei mus (troa nyithupene la ngazo), maine lepe pena. Kolo fe a e la 200 la etrune la itre trejine hna akötrëne tune lai ngöne lo hmekune kola icasikeu matre troa atrune la Drai Ne Amekunëne la meci Iesu! Ngo hnene pala hi la uati hmitrötre i Iehova hna aijijëne la nöje i Nyidrë, troa mele pe ngacama kolo asë hi a icilekeu me angatr, a ngöne la itre nöje cili me ngöne la itre xane ju kö. (Zakaria 4:6) Thatreine jë kö tro la aqane catre icilekeu ne la ithupëjia, a ahumune la qe ne la itre ka atrunyi Iehova. Ngo easë pe a mejiune laka, pëkö ketre jiane isi ka atreine troa lepe trije la aja i Akötresie.

Troa Jelengazone La Itre Sesepeneqë Ka Thoi

5. Nemene la itre sesepeneqë ka thoi ka icilekeu ekö memine lo itre hlue i Iehova ne la hneijine i Iesu?

⁵ Hnei Isaia hna perofetane ka hape tro la nöje i Akötresie a jelethoine la nöjei sesepeneqë ka icilekeu me angatr. Ame ngöne lo hneijine i Iesu, tre, hna lapaa atrune menune la itre hna qaja göi itre Keresiano, ene pe kolo pena ha xomi angatr ceitu me itre atr ka ngazo. Kola mama ngöne la Ite Huliwa 16:20, 21, la itre trenge ewekë nyine iupezö, hna hape: “Kola agomegomëne la lapa shë hnei angete Iuda celë, kola amamane la ite thina ka tha ijiji shë angete Roma troa kapa, me kuca.” Ame ngöne la ketre ijin, kola ukune hnene la itre ithupëjia la itretre mus ngöne la traon troa icilekeu memine la itretre drei Keriso, me catre fë ka hape: “Ame angate la angete agomegomëne la fene hnengödrai, te traqa ha e celë, [nge angatr] a sixane la nöjei wathebo i Kaisara.” (Ite Huliwa 17: 6, 7) Hna ati ëje i Paulo aposetolo hnei angat, ka hape, atre “ikuiajojo” nyidrë, nge taan la ketre wapicine ka aciane la ngazo “e cailo fen.”—Ite Huliwa 24:2-5.

6, 7. Nemene la ketre aqane tro la itre nyipi Keresiano a jelengazone la itre trenga thoi hna sile hui angatr göi troa icilekeu me angatr?

⁶ Qa ngöne lai, thaa sesëkötre kö së enehila la kola atrune menune me qaja angazone la itre nyipi Keresiano, me sili trenga thoi angatr, me hamëne trongën la itre ithuemacanyi me itre trenga thoi matre troa qeje gele i angatr. Nemene la aqane tro sa jelengazone la itre trenga thoi hna xome nyine icilekeu me easë?—Isaia 54:17.

⁷ Ame la itre iupezö cili memine la itre trenga thoi hna sil, ke, hna lepe trije me jelethoine hnene la aqane ujë ne la Itretre Anyipici Iehova. (1 Peteru 2: 12) Ame la kola mama laka itre Keresiano, a metrötrëne la itre wathebo i mus me thiina ka loi ngöne la aqane hane hnehengazone angatre la mele ne la itre la xaa atr, haawe, ame ju hi lo lai itre iupezö me itre trenga thoi hna sile hui angatr, tre, canga ae ju hi. Kolo kö a isa qaja aloinyi së hnene la itre thiina së. Ame hë la kola öhne hnene la itre atr la aqane catre kuca së la itre huliwa ka loi, ene pe kolo hi a upi angatre jë troa hane atrune la Tretretro së e koho hnengödrai me hane thele troa atre la kepine matre kola sisitria la aqane mele ne la itre hlue i Nyidrë.—Isaia 60:14; Mataio 5:14-16.

8. (a) Nemene la ka nyipi ewekë e itre xaa ijin, maine easa ajane troa cilëgöline la aqane nyitrepene së la mele së hnei Tusi Hmitrötr? (b) Tui Iesu, nemene la aqane tro sa jelengazone la itre sesepeneqë ka icilekeu?

⁸ Maine nyipici laka, ka nyipi ewekë catr tro sa thupëne la aqane ujë së itre Keresiano, ma ka lolo mina fe e itre xaa ijin troa cilëgöline me qaja amamane la aqane nyitrepene së la mele së hune la Tusi Hmitrötr. Ame la ketre aqane troa kuca, tre, ene la troa sipone ielene kowe la itre musi me itre hnakootr troa thupë së. (Ezera 8:3; Ite Huliwa 22:25-29; 25:10-12) Ame ngöne lo Iesu ekö e celë fen, hna hane xöjetriji nyidrëti fe, nge hnei nyidrëti hna thipetrije la itre trenga thoi me jelethoine la itre aqane iupezö ne la itre xan. (Mataio 12:34-37; 15:1-11) Maine tro sa xötrethenge la tulu i Iesu, tro hë së a xome la itre ijine cili ceitune me ketre ijine troa qeje pengöne hnyawa kowe la itre xan la mejiune ka catr ka eje ekuhu hni së. (1 Peteru 3:15) Epi thaa tro kö sa nue la aqane ahmahmanyi së ngöne la hna ini, ngöne la hna huliwa maine qaathene pena la itre sinee së ka thaa hmi kö, troa sewe së troa hane qaja la nyipici e hnine la Wesi Ula i Akötresie.—2 Peteru 3:3, 4.

Ierusalema, ketre “Etë Ka Hace”

9. Nemene Ierusalema la hna nyihatrene hnene la “etë ka hace” hna qaja hnei Zakaria 12:3, nge drei la ka nyi trenge ewekëne la Ierusalema cili e celë fen?

⁹ Kola amamane hnene la hna perofetane hnei Zakaria la kepine matre kola icilekeu la itre nöj memine la itre nyipi Keresiano. Hanawange la hna qaja ngöne Zakaria 12:3, kola hape: “Ngöne la ijine cili tro ni a celohmë Ierusalema nyine etë ka hace kowe la nöjei ate asë.” Drei Ierusalema la hna qaja hnene la hna profetane hnei Zakaria? Ame la hna perofetane göi Ierusalema, tre, kola eatre hune la “Ierusalema ne hnengödrai,” ene lo Baselaia e koho hnengödrai hna hnëkëne thatraqane la itre Keresiano hna iën. (Heberu 12:22) Hetrenyi pala kö e celë fen la thelene lai itre hna iëne cili ka troa hane musi hune la Baselaia ne la Mesia. Kola xatua angatr hnene la itre sine huliwa i angatr, ene lo “itre xaa mamoe,” troa xatuane la itre atr matre tro angatr a hane itre jini ne la Baselaia i Akötresie e ijine petre kö. (Ioane 10:16; Hna Amamane 11:15) Tune kaa la aqane ujë ne la itre nöje ngöne la kola könë angatre tune la? Nemene la enyipiewekëne la trenge ewekë celë ngöne la ixatua hnei Iehova hna hamëne enehila kowe la itre nyipi hlue i Nyidrë? Tro sa pane ce wange trongëne la aliene la tusi Zakaria mekene 12. Maine tro sa kuca tune lai, tro ha xecie hnyawa e kuhu itre hni së laka, ‘pë jë kö ketre ewekë hna kuca nyine isi’ memine la itre hna iëne hnei Akötresie me itre sine huliwa i angatr, ka troa ‘ie.’

10. (a) Pine nemene matre kola icilekeu memine la itre atre i Akötresie? (b) Nemene la ewekë ka traqa kowe la itre ka thele troa xejë la “etë ka hace” qa ngöne la gojeny?

¹⁰ Kola amamane hnei Zakaria 12:3 ka hape ame la itre nöj, tre, troa “ela la itei” angatr. Troa eatre tune kaa lai? Hnei Akötresieti hna amekötine ka hape, troa cainöjëne la maca ka loi ne la Baselaia. Kola wanga atrune catrëne hnene la Itretre Anyipici Iehova la hna amekötine cili. Ngo ame la troa cainöjëne la Baselaia, ene la sipu mejiune kowe la nöjei atr asë, tre, kösë “ketre etë ka hace” lai kowe la itre nöj. Angatr a thele troa sewe së troa cainöjëne la Baselaia. Ame hi lai angatr a huliwa tune lai, ene la kola isewi troa cainöj hnene la itre nöj, tre, kolo hi lai a “ela la itre itrei” angatr, nge kösë hna thupethupe angatr ngöne la itre götrane ka nyimutre. Hna adrone la ëje i angatr, nge kola akötrën me thaipië angatr hnene la engazone la aqane ujë i angatr. Thatreine jë kö angatr troa lepe athaupune la itre nyipi hlue Akötresie; ke atraqatre la ajane la Itretre Anyipici Iehova troa atrune la huliwa, ene la troa cainöjëne la “maca ka loi ka tha ase palua kö” ne la Baselaia ne la Mesia qëmekene troa nyipune la fene ka ngazo celë. (Hna Amamane 14:6) Ame ngöne la kola öhne hnene la ketre atr ka thupëne la itre hna akalabusin e Afrik, la aqane axösisine la itre hlue i Iehova, öni nyidrëti jë hi ka hape: ‘Epuni a aluuzine la trenge catre i epuni troa icilekeu memine la itre atre celë. Thaa tro jë kö angatre lai a kei thenge la mekuna i epun. Kolo jë pe ka hape, catre kökötre jë angatr nge thatreine jë kö tro sa sawa lai.’

11. Tune kaa la aqane eatrëne Akötresieti la hnei Nyidrëti hna thingehnaean ngöne Zakaria 12:4?

¹¹ Kola sipone matre troa e la Zakaria 12:4. Iehova a thingehnaeane ka hape, tro Nyidrëti a atine la lue meke i angatr ngöne la götrane la ua, me kuca matre troa “qou hni” la itre ka isi memine la itretre catre tro fë la maca ne Baselaia. Hnei Nyidrëti hna aejëne la hnei Nyidrëti hna qaja. Drei la ketre ceitun, hna wathebone troa hmi koi Iehova ngöne la ketre nöj, ngo thatreine kö tro la itre ka icilekeu troa sawa la nöje i Akötresie troa kapa la göxeni ne la ua me hamëne la itre itus kowe la itre atr. Goi qaja fe la ketre zonale ka hape, kola kapa hnene la Itretre Anyipici Iehova la itre itus jëne la itre balo ka tru hna tith, ka sesë e caha! Kola eatre hnyawa lo hnei Akötresieti hna thingehnaeane kowe la itre sipu hlue i Nyidrë, kola hape: “Tro ni a lepe la nöjei hose asë hnei qou hni, me itete tith’ it’ eje hnene la troa hmo, nge tro ni a wange pala hi la lapa i Iuda, nge tro ni a atimekëne la nöjei hose ne la nöjei ate.” Hnene la elëhni angatr matre thaa öhne hë nge thatre hë la itre ithupëjia memine la Baselaia la nyine tro angatr a kuca. Ngo xecie hnyawa koi së laka, tro Iehova a thupëne la itre atre i Nyidrë, ene lai gurup, me hane hnehengazone la mele i angatr.—2 Ite Joxu 6:15-19.

12. (a) Nemene la aliene la hna qaja ka hape, hnei Iesu hna nyiqaane amelene la eë ngöne lo nyidrëti ekö e celë fen? (b) Tune kaa la aqane eköthe hnene la itre hna iën la itre ewekë ka nyi een la eë ngöne la götrane la ua, nge nemene la itre thangane lai?

¹² Kola sipone troa pane e la Zakaria 12:5, 6. Ame la “ite gavana ne Iuda,” tre, kola qaja la itre ka xome la hnëqa, ene la troa thupëne la nöje i Akötresie. Iehova a xatuane la itre atre i Nyidrë matre tro angatr a hetrenyi la trenge catre troa eatrëne la itre aja ne la Baselaia i Nyidrë e celë fen. Ame ngöne la ketre ijin, hnei Iesu hna qaja kowe la itretre drei Nyidrë, ka hape: “Traqa ha ni troa kuiëne la eë kowe la fene hnengödrai.” (Luka 12:49) Eje hi, hnei nyidrëti hna amelene la ketre eë. Ame ngöne la nyidrëti a catre cainöj, kola mama hnyawa laka, ame la ewekë ka sisitria, tre, ene la troa tro fë la maca ne Baselaia i Akötresie. Celë hi ka amelene me aciane la itre mekune ka isazikeu thene la nöje Iudra. (Mataio 4:17, 25; 10:5-7, 17-20) Ketre tune mina fe, “tune la en’ öle ngöne la ite sinö, me tune la ukejina ngöne la uke qit,” ame la itre huliwa ne la itretre drei Keriso ngöne la hnedrai së enehila, tre, itre ewekë lai ka huene la eë ngöne la götrane la ua. Kola catre qaja amamane hnyawa hnene la itus Le mystère de Dieu accomplia la aqane hmi thoi ne la itre atr ka selëne ka hape itre Keresiano angatr. Celë hi ka aelëhnine la itre hene hmi lai. Ame mina fe lo Itre Ithuemacanyi Ne La Baselaia Na. 37, hna nyi taan ka hape, “Calemi Catre Hë La Pune La Itre Hmi Ka Thoi!”, tre, ej a upe la itre atr ka nyimutre troa cilëgöline maine tro pena a icilekeu memine la Baselaia i Akötresie.

Hna Thapa “La Ite Uma Mano Ne Iudra”

13. Nemene la hna amamane hnene la xötrehnëewekë hna hape “ite uma mano i Iuda,” nge pine nemene matre Iehova a amelene lo itre hna ketr?

¹³ Kola sipone troa e la Zakaria 12:7, 8. Ame ekö e Isaraela, tre, ame la itre uma mano, celë hi ketre ewekë lai ka mama cil ngöne la nöj; thaa ka sihngödre kö kowe la itre atr, ke, hna majemine xome la itre uma mano hnene la itre ka thupë öni memine la itre ka eëny. Celë hi itre atr lai hna troa pane ketr, nge ka ajane troa thupë angatr e lepe jë la traone Ierusalema hnene la itre nöje ithupëjia. Ame la xötrehnëewekë hna hape “itre uma mano i Iuda”, tre, kola amamane ka hape, ame la itre thelene lo itre hna iën ne la hnedrai së enehila, tre, angatr e cahu tröne la traon, ngo thaa angatre kö e koho hnine la ketre göhnë hna ekögölith me hnë zae ka lolo. Nge ame e cahu trön, tre, pëkö xou thei angatr troa cilëgöline la itre ajan la Baselaia ne la Mesia. Tro Iehova ne Sabaoth a “pane amelene la ite uma mano i Iuda,” pine laka, itre eje hi lo itre hna pi ajane troa lepe hnei Satana.

14. Tune kaa la aqane cilëgöline Iehova la itre ka mele hnine la “ite uma mano ne Iuda” me thupën matre thaa tro kö angatr a thixötr?

¹⁴ Ketre, kola anyipicine hnene la itre ka edomëne la itre drai hnapan, ka hape, Iehova a cilëgöline la itre hna iëne cili, itre qene qaja ne la Baselaia ka mele e hnine la “itre uma mano” i angatr e tröne la traon.b Nyidrëti a thupë angatr matre thaa tro kö angatr a “thixötr,” ngo kolo pe a aegöcatrenyi angatr tui Davita, lo joxu nge sooci ka catr.

15. Pine nemene matre Iehova a “thele troa apatene la nöjei nöj’ asëjëihë,” nge eue la ijine tro Nyidrëti a kuca lai.?

¹⁵ Kola sipone troa e la Zakaria 12:9. Pine nemene matre Iehova a “apatene la nöjei nöj’asë”? Pine laka hnei angatr hna catre icilekeu memine la Baselaia ne la Mesia. Pine mina fe la hnei angatr hna qanangazone me icilekeu memine la nöje i Akötresie, haawe, hnëjinë hë angatr. Easenyi hë matre jöeë pi la itre atre i Satana troa lepe tixenuë la itre nyipi hlue i Akötresie; celë hi ewekë lai ka axulune lo isi hna qaja hnei Tusi Hmitrötr, hna hape Amagedo. (Hna Amamane 16:13-16) E cili hi, kola sesë hnene la Atre Amekötine ka sisitria troa cilëgöline la itre hlue i Nyidrë me ahmitrötrëne la ëje i Nyidrë e nyipine la itre nöj.—Ezekiela 38:14-18, 22, 23.

16, 17. (a) Nemene la hna hape “edö ne la ite hluewa i Iehova”? (b) Nemene la hna anyipicine hnene la aqane xomihnine ahoeane së la itre icilekeu i Satana?

¹⁶ Pëkö jiane isi Satana ka ijije troa ananazijëne la lapaun maine ka apujene pena la aqane catre ne la itre atre i Akötresie e cailo fen. Kola xatua së hnene la tingeting ngöne la götrane la ua; tingeting ka xulu qa ngöne la hne së hna atre laka Nyidrëti a xatua së hnene la mene i Nyidrë. Celë hi “edö ne la ite hlue i Iehova.” (Isaia 54:17) Pëkö ka ijije troa sawa me thapa la tingetinge së me ajojezine la mele së ngöne la götrane la ua. (Salamo 118:6) Tro Satana a catre iuku troa icilekeu me thele troa iakötrë. Kola amamane hnyawa hnene la aqane nyipici me xomihniahoeane së ngöne la kola icilekeu me easë laka, eje the së la uati hmitrötre i Akötresie. (1 Peteru 4:14) Hna cainöjëne e cailo fene laka ase hë acile la Baselaia i Akötresie. Tune la itre ewekë hna xome ceitune me itre jiane isi nyine troa axouene la itre atr, haawe, nyimutre la itre “pehna” ngöne la götrane la ua hna xome nyine icilekeu memine la itre atre i Akötresie. Ngo Iehova a xatuane la itre hlue i Nyidrë hnene la trenge catre i Nyidrë matre troa cile catre kowe la itre etë cili, me apë ecatrene itre ej. (Zakaria 9:15) Thatreine jë kö troa ahmacane la thelene ne la itre hna iën memine la itre sine huliwa i angatr ka nyipici!

¹⁷ Loi e tro sa treqene me ajane catrëne la ijine troa thepe së qa ngöne la itre icilekeu i Diabolo. Drei la eloine me ekeukawane la mekun, ene laka, ‘pëkö ewekë hna kuca nyine ishi me easë ka troa hun ; nge tro easa jele ngazone la ite sesepeneqë asëjëihë itete ikelikelë me easë ngöne la hna amekötin’!

[Ithueamacany]

Troa Sa Tune Kaa?

• Nemene la ka amamane ka hape thaa ie kö la itre hna kuca hnei Satana nyine isi memine la itre hlue i Iehova?

• Tune kaa la aqane “ketre etë ka hace” la Ierusalema ne hnengödrai?

• Tune kaa la aqane amelene Iehova la “ite uma mano i Iuda”?

• Pine laka calemi hë Amagedo, nemene la hne së hna mejiune kow nge ka xecie hnyawa koi së?