Ita Ne Thup göi 08 Juun e Mont Ravel
Nyima 7 me 11 Qene Drehu
Loi E Tro Sa Nue Akötresie Troa Eatrongë Së Ngöne La Nöjei Jë Së
“Ke ame la Akötesie celë, te, Akötesi shë epin’epine palua; tro nyidëti a ea trongë shë uti hë la mec.”—SAL. 48:14.
1, 2. Pine nemene matre loi tro sa nue Iehova troa eatrongë së, hune la troa mejiune kowe la sipu inamacane së kö, nge nemene la itre hnyinge hne së hna troa ce ithanatan?
Ame la easa wanga atrune la itre ewekë ka pë alien kowe la mele së nge ka hetre ethane koi së, canga tro hi itre ej a amenune la aqane waiewekë së. (Ite edomë 12:11) Maine eje the së la nyipi ajane troa kuca la ketre ewekë nge thaa ka ihmeku kö memine la mele ne la keresiano, tro la hni së a thele ngöne la itre xaa ijin la nöjei kepin matre troa aejëne la aja cili. (Iere. 17:5, 9) Haawe, kola mama la inamacane ne la atre cinyihane la salamo ngöne la angeic a thith, ka hape: “Upepi la lai cilie me nyipici cilie; tro lue ej’ a e ni.” (Sal. 43: 3) Thaa hnei angeice kö hna amë la mejiune i angeic kowe la sipu inamacane i angeic, ngo loi pe koi Iehova, ke, pëkö ketre atr ka ijij troa eatrongë angeice hnyawa. Tune la atre cinyihane la salamo, loi e tro sa nue Akötresie troa eatrongë së.
2 Pine nemene matre loi e tro sa nue Iehova, tro hmekuje hi Nyidrëti a eatrongëne la mele së? Eue la itre ijine tro sa thele la ixatua i Nyidrë? Nemene la itre thiina hne së hna troa eën matre troa hetre thangane ka loi koi së, nge tune kaa la aqane troa eatrongë së hnei Iehova enehila? Celë hi itre hnyinge ka tru la hne së hna troa ce ithanatan.
Pine Nemene Matre Loi e Tro Sa Nue Iehova Troa Eatrongë Së?
3-5. Nemene hë la itre kepine matre loi e troa amë catrëne la mejiune së koi Iehova?
3 Iehova hi la Tretretro së e koho hnengödrai. (1 Kor. 8:6) Isa atrepengö së hnyawa kö hnei Nyidrë, nge ijiji Nyidrëti troa atrehmekune la itre ewekë ka eje kuhu hni së. (1 Sam. 16:7; Ite edomë 21:2) Öni Davita joxu koi Akötresieti, ka hape: “Cilieti a ate hmekune la e lapa ni, nge e cile ni; cilieti a trotrohnine la mekuneng’ e ga nany. Iehova fe, pë pete kö ewekë ngöne la thinemeng, ngo hana wang, cilieti a ate hmekun’ asë.” (Sal. 139:2, 4) Pine laka, atrepengö së hnyawa hi hnei Iehova, haawe, xecie hnyawa koi së laka, atrehmekune hnyawa kö Nyidrëti la ewekë ka loi koi së. Ketre, Akötresie ka inamacane catre Iehova. Öhne asë hi Nyidrëti la nöjei ewekë, nge thaa ka tëtë kö la aqane waiewekë i Nyidrë tune la atr; ketre canga öhne petre kö Nyidrëti ngöne lo qaan, la pune ne la itre ewekë. (Is. 46:9-11; Rom. 11:33) Nyidrëti la “Akötesieti ka inamacane hmekuje kö”.—Rom. 16:27.
4 Ketre, Iehova a hnimi së nge Nyidrëti a ajan tro pala hi sa mele ka loi. (Ioane 3:16; 1 Ioane 4:8) Pine laka Akötresieti ka ihnimi Nyidrë, haawe, ka hame mina fe Nyidrë. Öni Iakobo ka hape: “Ame la nöjei ahnahna ka loi asë, te, qa koho thene la Tetetro ine la lai, lo ka tha uke kö, nge ka pë hatene la hna ujë thei Nyidë.” (Iako. 1:17) Ame la itre atr ka nue Akötresie troa eatrongë angatr, tre, angatr a ohnyi thangane ka loi qa ngöne la aqane hame Nyidrë.
5 Iehova la Akötresie ka Pucatin asë. Qa ngöne lai, önine la atre cinyihane la ketre salamo ka hape: “Kola jilapa ngöne la ahnuene la Kapucatinasë hnene la ate lapa ngöne la Kasisitia. Tro ni a ulatine koi Iehova, Cilieti la hniteng, me hnapong, me Akötesingö; ini a lapaune kow.” (Sal. 91:1, 2) Ame ngöne la easa nue Iehova troa eatrongë së, kolo hi lai a amamane laka, easa thele hna zae thei Nyidrë, ke, hnapo ka cile huti Nyidrë. Haawe, matre ngacama troa icilekeu me easë, ngo tro Iehova a xatua së. Thaa tro pi kö Nyidrëti a nuetriji së. (Sal. 71:4, 5; E jë la Ite Edomë 3:19-26.) Nyipici laka, atrepengöne hnyawa hi Iehova la ewekë ka loi koi së, nge Nyidrëti a ajane la ka sisitria thatraqane la mele së; ketre, ijiji Nyidrëti hi troa hamëne koi së la itre ewekë cili. Celë hi matre, aqane ujë ne ka hmo la ka troa thipetrije la ixatua qaathei Iehova! Ngo, eu la easa ajane troa kapa la ixatua cili?
Eue la Easa Aja Ixatua?
6, 7. Eue la itre ijine easa ajane tro Iehova a eatrongë së?
6 Nyipici laka easa aja ixatua qaathei Iehova ngöne la nöjei ijine la mele së, qaane lo easa nekönatr uti hë la easa qatr. Önine la ketre atre cinyihane la salamo ka hape: “Ame la Akötesieti celë, te, Akötesie shë epin’ epine palua; tro nyidëti a ea trongë shë uti hë la mec.” (Sal. 48:14) Loi e tro la itre Keresiano ka inamacane a tune la atre cinyihane la salamo, laka, thaa tro kö angatr a hmaca troa thele ixatua thei Iehova.
7 Nyipici laka, hetrenyi kö lo itre hnepe ijine easa ajane catrëne la ketre ixatua. Ame ngöne la itre xaa ijin, easa melëne la itre “akötr” ka xulu qa ngöne la itre icilekeu, maine kola tithi së pena hnei mec, maine luuzi pena ha la huliwa së. (Sal. 69:16, 17) Ame ngöne la itre ijine cili, tre, tro ha akeukawane la itre hni së e hne së hna qëmeke koi Iehova, me mejiune ka hape, tro Nyidrëti a aegöcatrenyi së matre tro sa xomihni ahoean me atreine troa axecië mekune ka loi. (E jë la Salamo 102:17.) Ngo easë mina fe a aja ixatua ngöne la itre xaa ijin. Drei la ketre ceitun, ame la easa tro fë la maca ka loi kowe la itre atr ka lapa xötreithi së, easa aja ixatua qaathei Iehova matre tro sa maca ngöne la easa ithanata. Ketre, tune fe göne la itre nyine iamadrinë, me aqane heetr me nyi hnyawane la ngönetrei së, me ngöne la easa iëne la itre hne së hna majemine ce tro memin, me göi huliwa mina fe, me ini, maine itre xaa ewekë hmaca ju kö; eje hi laka, tro ha inamacane la aqane ujë së, e hne së hna xötrethenge la itre hna amekötine hnei Iehova ngöne la easa troa axecië mekun ngöne la itre götrane celë. Qa ngöne lai, ame ngöne la nöjei götrane la mele së, tre, nyipi ewekë pala hi troa eatrongë së hnei Akötresie.
Itre Ethanyine la Troa Thipetrije la Ixatua Qa Thei Akötresie
8. Nemene la hnei Eva hna amamane ngöne la angeic a xeni la wene sinöe?
8 Ngo the thëthëhmine kö së laka, isa qanyi së kö troa nue Iehova maine thaa tro pena kö a nue Nyidrë troa eatrongë së. Thaa tro jë kö Iehova a upe iele së troa trongëne la itre hnei Nyidrëti hna amekötin, e thaa ajane kö së. Eva lo pane atr ka xele ma nue Iehova troa eatrongë angeic, nge kola amamane hnene la tulu i angeic la engazone la troa axeciëne menune la itre mekun. Pane mekune ju së la itre thangane la hna thaa idrei hnei Eva. Hnei Eva hna xeni wene la sinöe pine la aja ka eje thei angeic troa “kösë lue akötesie mate ate hmekune la loi me ngazo.” (Gen. 3:5) Kola mama e celë la aja i angeic troa xome la göhnë i Akötresie, ngöne la angeic a sipu xomi mekune göi loi me ngazo, ngo thaa xötrethenge pe la itre trepene meköti Akötresie. Celë hi aqane methinëne Eva la musi cile i Iehova, pine laka, thaa ajane kö angeice troa qeje thiina koi ketre me ketre. Nge hnei Adamu, föi angeic, hna hane sine fe la icilekeu.—Rom. 5:12.
9. Maine thaa kapa kö së la ixatua qaathei Iehova, nemene la hne së hna kuca, nge pine nemene matre aqane ujë ne la atr ka hmo lai?
9 Ame mina fe enehila, tre, maine thaa xötrethenge kö së la itre trepene meköti Iehova, haawe easë hi lai a thipetrije la musi cile i Iehova. Hanawange la ketre ceitun, hnene la ketre atr hna majemine goeëne la itre iatr ka ngazo. Maine jë ketre sinee ne la itre keresiano, eje hi lai laka atrehmekune hi angeic la itre hna amekötine hnei Iehova göne la götrane cili. Ngöne laka thaa tro hmaca kö sa qaja la itre ewekë ka sis, ketre ceitune mina fe, thaa tro kö sa piine me goeëne itre ej. (Efe. 5:3) Ame la kola thipetrije la itre trepene meköti Iehova hnene la atr cili, tre, angeice hi lai a amamane ka hape, angeic a methinëne la musi cile i Iehova memine la mus i Nyidrë. (1 Kor. 11:3) Celë hi aqane ujë ne la atr ka hmo, pine laka, hna qaja hnei Ieremia, ka hape: “tha qâ i ate troa amekötine la ite jë i angeic.”—Iere. 10:23.
10. Pine nemene matre loi e tro sa inamacan ngöne la aqane tro sa atreine xomi mekun?
10 Maine jë thaa kapa kö itre xan la hna qaja hnei Ieremia, pine laka angatr a mekune laka, hnei Iehova hna nue së troa isa xomi mekun, haawe, thaa tro jë kö Nyidrëti lai a jele ngazone la aqane xomi mekune së. Ngo thaa tro pi kö sa thëthëhmine ka hape, ame la atreine troa xomi mekun, tre, thaa ahnahna caasi kö lai, ngo ketre hnëqa fe. Tro sa isa qeje thiina epin koi Akötresie, pine la itre ewekë hne së hna qaja me itre hne së hna kuca. (Rom. 14:10) Öni Iesu ka hape: “Ke kola ewekë la që qa kuhu hni ka tiqa.” Hnei nyidrëti mina fe hna qaja, ka hape: “Ke kola löpi qa kuhu hni la meku ngazo, me humu at, me nyi xetë, me kuci ngazo, me ënö, me atë la thoi, me jele ngazon.” (Mat. 12:34; 15:19) Haawe, kola mama la itre aliene hni së hnene la itre aqane ithanata së me aqane ujë së. Kola amamane la nyipi pengö së isa ala caas. Celë hi matre ame la keresiano ka inamacan, tre, angeic a thele la ixatua i Iehova ngöne la nöjei götrane ne la mele i angeic. Ngöne laka, Iehova a goeën la “hni ka meköt” i angeic, qa ngöne lai, tro hë Nyidrëti a “kuca la loi” koi angeic.—Sal. 125:4.
11. Nemene la ini hne së hna kapa qa ngöne la aqane trongene la mele ne la nöje Isaraela?
11 Pane mekune hmaca jë së la aqane trongene la mele i angetre Isaraela. Ame lo angatr a xomi mekune ka loi, me drenge thenge la itre hnei Iehova hna amekötin, tre, hnei Nyidrëti pala hi hna thupë angatr. (Ios. 24:15, 21, 31) Ngo a nyimu a huliwane angazone angatr la atreine ië mekun. Öni Iehova göi angatr ngöne lo hneijine i Ieremia, ka hape: “Ngo tha denge kö me hnangenyëne hnei angat, nge angat’ a trongëne la hna ithanata hnei angate kö, thenge la ecatene hni angate ka ngazo; me hutrö, nge tha qëmeke kö.” (Iere. 7:24-26) Hleuhleu pi hë! Haawe, thaa tro pi kö sa hune fë mekune me wang’ahmalohmaloeën la itre aja së me thiina së ka ngazo; wanga nuetrije pi së la ixatua qaathei Iehova me tro thenge la itre sipu mekuna së, nge tro hë sa “tro hutrö, ngo tha qëmeke kö”!
Nemene La Hna Thele Thene La Itre Ka Trongëne La Ixatua i Iehova?
12, 13. (a) Nemene la thiina ka loi ka upi së troa xötrethenge la itre hna amekötine hnei Iehova? (b) Pine nemene matre nyipi ewekë catr la lapaun?
12 Ihnimi koi Iehova la ka troa upi së troa trongëne la itre hnei Nyidrëti hna amekötin. (1 Ioane 5:3) Ngo hetre ketre ewekë kö ka sisitria hnei Paulo hna amaman, ngöne lo nyidrëti a qaja, ka hape: “Eëhuni a tro hnene la lapaun, ngo tha hnene kö la goeën.” (2 Kor. 5:6, 7) Pine nemene matre nyipi ewekë troa lapaun? Pane mekune jë së laka, Iehova a eatrongë së “ngöne la ite gojenyi ka meköti”, ngo thaa itre gojenyi kö lai ka troa ee së kowe la itre trenga mo ka tru, me itre hnëqa ka hlemu ngöne la fene celë. (Sal. 23:3) Celë hi kepine matre, loi e tro la lapaune a upi së troa mekune hnyawa la itre manathithi ka sisitria catr ngöne la götrane la ua, hne së hna kapa qa ngöne la hna nyihlue i Iehova. (E jë la 2 Korinito 4:17, 18.) Ketre, kola xatua së fe hnene la lapaun troa atreine mejihnin, ngöne la easa aejëne la itre pane aja së ngöne la götrane la ngönetrei.—1 Tim. 6:8.
13 Hnei Iesu hna amamane laka, ame la troa xome la nyipi hmi, tre, nyipi ewekë tro sa huujëne la mele së, nge ka sisitria catre fe tro sa lapaun. (Luka 9:23, 24) Mele ne huuj la hna melëne hnene la itre xaa hlue i Iehova ka lapaun, ke, hnei angatr hna xomihnine la pë ewekë, me iakötrë, me iwangatrehmekunyi atr, memine fe la iaxösisi. (2 Kor. 11:23-27; Hna ama. 3:8-10) Lapaune ka catre hmekuje hi la ka aijijë angatre troa xomihnine la itre ewekë cili ce memine la madrin. (Iako. 1:2, 3) Ketre tune mina fe, hnene laka easa catre lapaun, haawe, xecie hnyawa e kuhu hni së laka, mekune ka lolo pala hi la troa xötrethenge la hna amekötine hnei Iehova, nge, celë pala pë hë nyine loi koi së. Ketre, ka xecie hnyawa koi së ka hape, ame la manathithi hna troa kapa hnene la itre ka nyipici me ka xomihni ahoean, tre, ka sisitria catre ju kö hune lo itre akötre hna melëne enehila.—Heb. 11:6.
14. Pine nemene matre nyipi ewekë tro Hagara a ipië?
14 Tro sa ce wange mina fe la enyipiewekëne la ipië ngöne la easa nue Iehova troa eatrongë së. Hanawange la tulu i Hagara, hlue i Sarai. Pine laka pë pala ha neköi Sarai, haawe, eahlo a upi Hagara koi Aberahama. Upune hë Hagara ngo thupene jë hi lai, pitru hë la hni angeic ke safëje pë hë maseta i angeic. Ame hë la pun, tre, hnei Sarai hna “akötë nyido”, matre kötre pi hë Hagara. Nge itronyi hë la angela i Iehova me Hagara, kola qaja koi angeic, ka hape: “Hmacaju kowe la ate musinë nyipo, nge aconyi nyipo ju fei angeic.” (Gen. 16:2, 6, 8, 9) Maine jë, thaa celë kö la ixatua hnei Hagara hna pi troa kapa. Eje hi lai laka, ame la ixatua hna hamëne hnene la angela, tre, kola upi angeic troa thipetrije la aqane ujë i angeic ka pi tru. Loi pe, hnei Hagara hna ujë cememine la ipië tune lo aqane qaja hnene la angela koi angeic, ene pe hnaho Isamaela jë hi, nekö i angeic, ngöne la uma ne heta i Aberahama, keme i nyën.
15. Hetre itre hnepe götrane laka, ame la troa nue Iehova troa eatrongë së, tre, kola upi së troa hetre ipië. Amexeje jë la itre götrane cili.
15 Ame la troa nue koi Iehova troa eatrongë së, tre, kolo fe lai a hape, loi e tro sa aipië së kö. Maine jë kola upi itre xan troa kapa, laka ame la ketre nyine iamadrinë hnei angatre hna ajan, tre, ka akötrëne la hni i Iehova. Ketre, maine hna akötrëne la ketre Keresiano hnei ketre, tre, loi e tro angeic a qeje menu. Maine tro angeic a tria, tre, thaa tro kö a kelikelë. Ngo tune kaa fe, e kuca ju hnene la ketre Keresiano la ketre ngazo ka sis? Loi e tro angeic a aipië angeice kö, me tro kowe la itre qatre thup matre troa qaja amamane la ngazo hnei angeice hna kuca. Maine jë tro ha upetriji angeic. Loi e tro angeic a hetrenyi la hni ka ipië me ietra me ujë matre troa kepe angeic hmaca e hnine la ekalesia. Ame ngöne la itre jole celë me itre xane ju kö, tre, kola akeukawane la itre hni së hnene la itre trenge ewekë qa hnine la tusi Ite Edomë 29: 23, kola hape: “Ame la pi tru ne la at, te, kola aipië angeic ; ngo tro la ate hni ka ipië a xome la atrun.”
Tune Kaa la Aqane Eatrongë Së Hnei Iehova?
16, 17. Pine laka Tusi Hmitrötre la jia ne huliwa hnei Akötresie hna xome matre troa eatrongë së, tune kaa la aqane tro sa kepe thangane ka loi qa ngön?
16 Ame la pane aqane eatrongë së hnei Iehova, tre, hna jëne la Wesi Ula i Nyidrë, ene la Tusi Hmitrötr. (E jë la 2 Timoteo 3:16, 17.) Maine easa ajan troa kepe thangane ka loi qa ngöne la Wesi Ula i Akötresie, the treqene kö troa cile kowe la ketre itupath troa thele eamo e hnine la Tusi Hmitrötr. Ngo loi e tro pe sa majemine e la Tusi Hmitrötre o drai. (Sal. 1:1-3) Qa ngöne lai, tro hë sa atrepengöne hnyawa la aliene la Wesi Ula i Akötresie. Tro fe sa hetrenyi la itre aqane waiewekë i Akötresie, nge ijiji së fe hë troa hane cile kowe la itre hnepe jol ka traqa koi së.
17 Ketre ewekë ka sisitria fe la troa sine thele la itre mekune hne së hna e hnine la Tusi Hmitrötr, me thithi fë itre ej. Ame la easa sine thele la itre xötr hne së hna e, tre, easa thele la aqane tro sa xötrethenge la itre trepene meköt cili ngöne la itre hnepe götrane la mele së. (1 Tim. 4:15) Ame la easa cile kowe la itre jole ka tru, easa thithi koi Iehova me sipo Nyidrë troa hamëne koi së la ixatua ka ijij. Tro la uati hmitrötre i Nyidrëti a xatua së troa mekune hmaca lo itre trepene meköti ka lolo hne së hna xome thatraqane la itre jole së. Kolo itre trepene meköti hne së hna e hnine la Tusi Hmitrötr maine itre xaa itusi ka qeje pengöne ej.—E jë la Salamo 25:4, 5.
18. Tune kaa la aqane eatrongë së hnei Iehova jëne la caa lapa ne la itre keresiano?
18 Ame la ketre aqane eatrongë së hnei Iehova, tre, hna jëne la itre trejine së Keresiano. Ame la ka sisitria e hnine la lapa trejine së, tre, ene laka, hetrenyi la ketre “hlue ka nyipici me ka inamacan” memine la qene qaja i angeic, ene lo Lapa ne Xomi Meköt, atre thawa la xeni ngöne la ua jëne lo itre itusi memine la itre porogaram göne la itre icasikeu me itre kovasio. (Mat. 24:45-47; wange ju fe la Ite Huliwa 15:6, 22-31.) Hetrenyi mina fe the së la itre trejine Keresiano ka macaje tune la itre qatre thup, lo itre hna iëne troa hamë ithuecatre me eamo qa hnine la Tusi Hmitrötr. (Is. 32:1) Ketre, hetre jëne ixatua fe ka lolo catre kowe la itre thöth ka tru ngöne la nyipici. Keme me thine hi lo hna acile hnei Iehova troa eatrongë nyudren; nge loi e tro pala hi la itre thöth a thele ixatua thei nyidro.—Efe. 6:1-3.
19. Nemene la itre manathithi hne së hna troa kapa, e hne së pala hi hna nue Iehova troa eatrongë së?
19 Eje hi laka, nyimutre la itre aqane eatrongë së hnei Iehova, ngo loi e tro sa hane thele troa kepe thangane qa ngöne itre ej. Ame ngöne lo itre ijine mele nyipici la nöje Isaraela, öni Davita joxu ka hape: “Hna lapaune koi cilieti hnei ite xötapane hun; hnei angate hna lapaun, nge hnei cilieti hna amele angat. Hnei angate hna teije koi cilie, ame hna mele pi; hnei angate hna lapau cilie, nge tha hmahma kö angat.” (Sal. 22:3-5) Maine tro sa mejiune kowe la aqane eatrongë së hnei Iehova, ‘tha tro fe kö sa hane hmahma’. Thaa tro kö a pë thangane la mejiune së. Maine tro fe sa ‘nue la jë [së] koi Iehova,’ nge thaa tro kö sa mejiune kowe la sipu inamacane së, eje hi lai laka, tro hë së a kapa qaane enehila la itre manathithi ka tru. (Sal. 37:5) Nge maine tro pala hi sa drengethenge me mele nyipici koi Iehova, me xomihnine ahoeane fe la itre akötr, haawe, tro hë sa kapa la itre manathithi ka epine palua. Hnei Davita joxu hna cinyihane ka hape: “Ke Iehova a ajane la meköt, nge tha hna tije kö la ite ka hmitöte i nyidë ; hna thupë angate palua kö ; ngo tro ha thupa tije la ite matra ne la nöjei ka ngazo . . . Tro ha la ange ka meköti a hetenyi la nöj, me lapa palua kö ngön’ ej.”—Sal. 37:28, 29.
Ijiji Nyipunie Troa Qeje Pengön?
• Pine nemene matre loi e tro sa mejiune kowe la aqane eatrongë së hnei Iehova?
• Nemene la hne së hna amamane ngöne la easa thipetrije la aqane eatrongë së hnei Iehova?
• Nemene la itre götrane laka, loi e tro la keresiano a hni ka ipië?
• Tune kaa la aqane eatrongë së hnei Iehova enehila?