Ita Ne Thup göi 24 Mei
Nyima 11 me 26 Qene Drehu
Iehova Hmekuje Hi La Nyine Tro Sa Atrun Cememine La Hni Ka Caas
“Atrunyi Ia jë nyipunie!”—SAL. 111:1.
1, 2. Nemene la aliene la hnëewekë hna hape, “Haleluya,” nge tune kaa la aqane ujëne ej ngöne la Itre Hna Cinyihane Qene Heleni?
“HALELUYA!” Hna majemine drenge la hnëewekë celë ngöne la itre uma hmitrötr ne la itre nöj ka uune ka hape, itre Keresiano angatr. Ketre hna ithanata lai hna majemine qaja hnene la itre atr ngöne la mele i angatr. Ngo xalaithe hi la itre ka atre la nyipi aliene ej; ketre, kola ahmahmanyi Akötresie hnene la aqane mele ne la itre atr ka qaja la hnëewekë cili. (Tito 1:16) Kola qaja hnene la ketre itus ka qejepengöne la itre hnëewekë hnine la Tusi Hmitrötr, ka hape, ame la “Haleluya,” tre, ketre “hnëewekë hna xome hnene la itre ka cinyihane la itre salamo, matre troa könëne la nöjei atr asë troa ce atrunyi Iehova me angatr.” Eje hi laka, nyimutre la itre ka inamacan e celë fen ka amamane laka, ame la aliene la “Haleluya,” tre, kolo lai a hape, “ ‘Atrunyi Iehova jë’.”
2 Qa ngöne lai, Tusi Hmitrötr a ujëne la hnëewekë cili ngöne Salamo 111:1 ka hape, “Atrunyi Ia jë nyipunie!” Ame ngöne Hna Amamane 19:1-6, a foa lao mama la hnëewekë cili qene Heleni, ngöne la kola atrune la aqane umuthe la hmi ka thoi. Ame ngöne la kola traqa la ijine cili, tre, ijije hë troa qaja hnyawa hnene la itre nyipi hlue i Akötresie cememine la metrötr, ka hape “Haleluya.”
Atraqatre La Itre Huliwa i Nyidrë
3. Nemene la nyipi aliene la easa icasikeu lapa?
3 Nyimutre la itre kepin hna hamëne hnene la atre cinyihane la Salamo mekene 111, ka amamane laka, Iehova hmekuje hi la nyine tro sa atrun cememine la hni ka caas. Kola qaja ngöne la xötre 1 ka hape: “Tro ni a ole Iehova hnene la hni ka pexej, nyipine la nöjei ka meköt, me ngöne la icasikeu.” Celë hi la hna mekune mina fe hnene la Itretre Anyipicine i Iehova enehila. Ame la nyipi aliene la kola icasikeu lapa ngöne la itre ekalesia me ngöne la itre ijine asabele, tre, ene la troa atrunyi Iehova.
4. Tune kaa la aqane tro la itre atr a thele la itre huliwa i Iehova?
4 “Atraqate la ite huliwa i Iehova, hna thele hnei angat’ asë angete ajan’ it’ ej.” (Sal. 111:2) Hanawange la hnëewekë hna hape, ‘thel.’ Thenge la hna qaja hnene la ketre itus ka qeje pengöne lai xötre cili, ej a qaja la itre atr ka “sine thele me inine hnyawa” troa atrepengöne la itre huliwa i Akötresie. Nyimutre la itre elolone la itre ewekë hnei Iehova hna xup. Hnei Nyidrëti hna xupe la jö me ihnadro memine la treu nge isa hetre hnëqa ne itre ej, matre troa keukawa me lai la ihnadro së, me kuca matre lai jë nge jidri ju, me axulune la itre hneijin, memine la iwë me ihmej.
5. Nemene la hna amamane hnene la aqane trotrohnine la atr la pengöne la hnengödrai memine la fene hnengödrai?
5 Hnene la itre atr ka ini sias hna öhne laka, ka lolo hnyawa la göhnë ne la ihnadro la kola nyinyape kanothe la jö, nge ketre, ka ihmeku hnyawa la etrun me ehacen me göhnë ne la treu, memine la itre aja ne la fen. Ame la aqane ami göhnene me aqane isa nyinyape hnyawane la itre ewekë cili ngöne la hnengödrai, tre, itre ej a aijijëne matre hetrenyi pi la itre hneijine ngöne la itre xaa götran la fen. Ketre, tru catre mina fe hë la hne së hna atre göne la elolone la aqane eköthe la itre ewekë xötreithi së. Ame ngöne la ketre hna cinyihan hnene la ketre porofesör, tre, hna qaja, ka hape: “Hmaloi hi troa trotrohnine la kepin matre, ngöne lo thötre lao macatre ka ase hë nyimu ka ini sias ka saze mekun; ke jolë hë e tro angatr a mekun ka hape, ame la hnengödrai memine la fene hnengödrai, tre, ka xulu xan. Kola mama hnyawa hnene la elolone la aqane eköthe la ihnadro, laka, hetrenyi hnyawa hi la ketre Atre Xup ka inamacane catr.”
6. Nemene la mekuna së göne la aqane xupe Akötresieti la atr?
6 Ame la ketre huliwa ka tru i Akötresie ngöne la itre ewekë hnei Nyidrëti hna xup, tre, ene la aqane xupi së hnei Nyidrë. (Sal. 139:14) Ame ngöne la Nyidrëti a xupe la itre atr, tre, hnei Nyidrëti hna aijijë angatr troa atreine mekun me hetre ngönetrei cememine la itre götrane ne ej, memine fe la atreine troa huliwa. Drei la ketre ceitun, hnei Akötresieti hna hamëne kösë iamamanyikeu la troa atreine ithanata me atreine dreng, memine fe la troa cinyany me e tus. Nyimutre la itre atr ka hetrenyi la itre atreine cili. Ketre, ka lolo catre la aqane xupi së, ke, atreine hi tro la ngönetrei së a cile meköt. Qa ngöne lai, kola uku së hnene la emingömingön memine la itre hna atreine kuca hnene la ngönetrei së, troa hetrenyi la hni ka metrötr. Ketre, ame mina fe la itre nekö i none ka co catr ka isilekeune la itre non ne la atuat, nge ka aijijë së troa mekun me atreine troa kuca la itre xaa huliwa, tre, pëkö atr atreine troa tuluthe la esisitriane itre ej hune la nöjei ewekë hna kuca hnene la itre ka kuci sias. Eje hi laka kola atreine kuca la nöjei ewekë hnene la itre atr, ke, hetrenyi thei angatr la mekun memine la itre götrane ne la ngönetrei angatr. Thatreine kö tro la ketre atr ka inamacane catr a xupe la ketre ewekë ka mingöming me ka ixatua, tune la itre wanakoime me itre hene ne wanakoime ka tru. Haawe, loi e tro sa isa hnyingëne thele ka hape, ‘Maine paatre ju pe la itre wanakoime hna hamë së hnei Akötresie, tre, hapeu atreine kö së troa kuca la nöjei ewekë?’
Itre Huliwa Ka Tru i Iehova Me Itre Thiina i Nyidrë
7. Pine nemen matre loi e tro sa goeëne la Tusi Hmitrötr ceitu me ketre huliwa ka tru catr hna kuca hnei Akötresie?
7 Ame la itre huliwa ka tru i Iehova, tre, ene la itre xaa ewekë ka lolo hnei Nyidrëti hna kuca kowe la nöjei atr, hna qeje pengöne hnine la Tusi Hmitrötr. Ame la itre itus hna qatrenge hnene ej, tre, ka cepunikë itre ej. Thaa ka ceitu kö la Tusi Hmitrötr memine la itre xaa itus, ke, “qa thene la Ua i Akötesie . . . nge ka nyipi ewekë troa inin.” (2 Tim. 3:16) Drei la ketre ceitun, ame ngöne la pane tusi ne la Tusi Hmitrötr, ene Genese, tre, kola qaja la aqane köletrije Akötresie la ngazo e celë fen, ngöne la hneijine i Noa. Nge ame la hnaaluene tus, ene Esodo, tre, kola amamane la aqane ahmitrötrëne Iehova la hmi Nyidrë jëne la hna thepe Isaraela qa ngöne la hna ithahluë e Aigupito. Hna hane jë fe hi lapa mekune la itre ewekë cili hnene la atre cinyihane la salamo, ke öni angeic: “Ka lolo me mingeminge la huliwa i [Iehova], nge ka cile huti palua kö la thina ka meköti nyidë. Hnei nyidëti hna celohmëne la nyine mekune kowe la ite huliwa i nyidë nyine hain; ka menyike me ihnimi Iehova.” (Sal. 111:3, 4) Hapeu, eje fe hi koi epuni laka, ame la itre ewekë hnei Iehova hna kuca ngöne la aqane trongene la mele ne la atr, memine la itre ewekë hnei Nyidrëti hna kuca thatraqane la mele i epun, itre ka uku epuni fe hi lai troa mekune la “lolo me mingeminge” i Nyidrë?
8, 9. (a) Kola isapengöne tune kaa la itre huliwa i Akötresie memine la itre huliwa ne la itre atr? (b) Nemene la itre xaa thiina i Akötresie hnei epuni hna hain?
8 Kola qaja atrune e celë hnene la atre cinyihane la salamo la elolone la itre thiina i Iehova, tune la meköt me menyik, memine la ihnim. Atre hi epuni laka ame la itre huliwa ne la itre atr ka ngazo, tre, thaa hna hane kö nyi trepene kö hune la thiina ka meköt. Ngo itre eje pe a xulu e itre xaa ijine qa ngöne la meciu mani me izalukeu, memine la pi draië. Hna amamane la itre ewekë cili hnene la itre jia ne isi ka iakötrë hna xup hnene la itre atr memine la pi hetre manie. Celë hi itre ewekë lai ka ahleuhleune me humuthe menune la itre milio lao atr ngo itre ka thaa hane kö lö hnine la itre isi. Ketre, nyimutre la itre huliwa hna kuca hnene la itre atr nge ka angazone catrëne la mele ne la itre atr ka puafala. Ame la ketre ceitun hna xome pala hi hnene la itre atr, tre, ene la troa upe la itre hlue troa xupe la itre itraetë ka isaisa qa ngöne la trepen nge jo jë hë draië, hna hape piramid. Hna xupe hmekuje hi la itre itraetë cili nyine hua ne ami ngönetrei ne la itre farao ka pi draië. Tune mina fe la hnedrai së, thaa iakötrë hmekuje kö la itre huliwa ne la itre atr, ngo itre eje mina fe a “ajifelönëti la fewatin.”—E jë la Hna Amamane 11:18.
9 Drei la eisapengönene memine la itre huliwa i Iehova laka, itre hna nyitrepene pala hi hnene la thiina ka meköt! Ame ngöne la itre huliwa i Nyidrë, tre, kolo mina fe a qaja la ketre ewekë hnei Nyidrëti hna hnëkëne cememine la ihnim, nyine mele kowe la nöjei atr asë ka ngazo. Ame la Akötresieti a hamëne la thupene mel, tre, hatrene hi la “thina ka meköti nyidë.” (Rom. 3:25, 26) Nyipici, “ka cile huti palua kö la thina ka meköti nyidë”! Kola mama la thiina ka menyike i Nyidrë, ngöne la aqane ce huliwa Nyidrë memine la itre atr ka ngazo. Ame ngöne lo hneijine ekö, hnei Nyidrëti pala hi hna ujë koi angatr cememine la ihnim, ngöne lo Nyidrëti a sipo angatr troa bëeke hmaca qa ngöne la itre jë i angatr ka ngazo, me kuca la ewekë ka meköt.—E jë la Ezekiela 18:25.
Ka Nyipici Iehova Kowe La Itre Hnei Nyidrëti Hna Thingehnaean
10. Ame la easa goeëne la aqane isisinyikeu i Iehova me Aberahama, nemene la tulu ne inyipicikeu hnei Nyidrëti hna hamë së?
10 “Hnei nyidëti hna thu a i angete qoue nyidë; tro nyidëti a hnine la isisinyikeu i nyidë uti hë epine palua.” (Sal. 111:5) Kola qaja e celë hnene la atre cinyihane la salamo, la isisinyikeu hnei Akötresie hna kuca me Aberahama. Hnei Iehova hna thingehnaeane, ka hape, tro Nyidrëti a amanathithine la matra i Aberahama me qaja fe, ka hape, tro angatr a hetrenyi la qanahage ne la itre ithupëjia me angatr. (Gen. 22:17, 18; Sal. 105:8, 9) Kola mama ngöne lo kola pane eatre lo lai itre hna thingehnaeane cili, laka, angetre Isaraela hi la matra i Aberahama. Ngacama ekö hë thahluëne la nöje cili e Aigupito ngo “[hnei] Akötesie [hna] mekune la hnei nyidëti hna isisinyikeu me Aberahama,” ene pe hnei Nyidrëti hna thepe angatr. (Eso. 2:24) Kola mama ngöne la aqane ujë i Iehova koi angatr laka, ketre atr ka hame Nyidrë. Hnei Nyidrëti hna hamë xeni nyine ithuane la ngönetrei angatr, me hamë angatr la itre ithuemacanyi matre xatua angatr troa trongëne la itre trepene meköti Nyidrë. (Deu. 6:1-3; 8:4; Neh. 9:21) Ame ngöne lo itre hadredre macatre thupen, tre, thaa hna lapaa drengethenge Iehova kö hnene la nöje cili, ngacama hnei Nyidrëti hna upe la itre perofeta matre troa ithuecatre koi angatr troa bëeke hmaca. Traqa koi 1 500 lao macatre thupene lo kola thepe angatr qaa Aigupito, hnei Akötresieti hna upe la Hupuna i Nyidrë ka caas kowe la fen. Nyimutre la angetre Iudra ka thipetriji Iesu, me nue troa humuthi nyidrë. Thupene lai, hnei Iehova hna eköthe hmaca la ketre nöje ka hnyipixe, ketre nöje ngöne la götrane la ua, ene la “Isaraela i Akötesie.” Keriso memine la nöje cili la matra i Aberahama ngöne la götrane la ua, ene lo hnei Iehova hna troa xom matre troa amanathithine la fene hnengödrai asë.—Gal. 3:16, 29; 6:16.
11. Tune kaa la aqane amamane Iehova laka, Nyidrëti pala hi a “mekune la hnei nyidëti hna isisinyikeu” me Aberahama?
11 Iehova pala hi a “mekune la hnei nyidëti hna isisinyikeu” memine la itre manathithi hnei Nyidrëti hna thingehnaean ka xulu qa ngön. Ame enehila, Nyidrëti a hamëne la ketre göxeni ka mana ngöne la götrane la ua, ngöne la 400 lao qene hlapa. Ketre Nyidrëti mina fe a drenge la itre thithi së, göne la itre aja së ngöne la götrane la ngönetrei, thenge la itre trenge ewekë celë, kola hape: “Nunuë anganyihunieti pi la drai celëti la xötönëti ka ijije ngöne la drai.”—Luka 11:3; Sal. 72:16, 17; Is. 25:6-8.
Atraqatre La Mene i Iehova
12. Hna hamëne tune kaa “la zi ne la nöjei nöj” kowe la nöje Isaraela ekö?
12 “Hnei nyidëti hna amamane la mene la ite huliwa i nyidë kowe la nöjei ate i nyidë, mate hamë angate la zi ne la nöjei nöj.” (Sal. 111:6) Maine jë kola mekune hnene la atre cinyihane la salamo lo ketre ewekë nyine hain ka traqa ngöne la mele ne la angetre Isaraela, ene lo ijine thepe angatr qaa Aigupito hna jëne la ketre iamamanyikeu. Ame la Iehova a nue angetre Isaraela troa lapaane lo Nöje Hna Thingehnaean, tre, hnei angatre hna ngaane lo itre baselaia qaa kohië me kuë ne la Hneopegejë Ioridrano. (E jë la Nehemia 9:22-25.) Eje hi, hnei Iehova hna hamë Isaraela “la zi ne la nöjei nöj.” Drei la hatrene la mene i Akötresie!
13, 14. (a) Nemene la aqane huliwane Akötresieti lo mene i Nyidrë koi Babulona, ewekë hna mekun hnene la atre cinyihane la salamo? (b) Nemene la itre huliwa ka tru catr hna kuca hnei Iehova matre troa thepe angetre Isaraela?
13 Ngo atrehmekune hi së laka ngacama tru catre la hnei Iehova hna kuca koi angatr, ngo thaa hnei angatre kö hna metrötrë Nyidrë tune la aqane thaa metrötrëne angatre la itre xötrapane i angatr, ene Aberahama, Isaaka me Iakobo. Icilekeu ju pë hë angatr uti hë la Iehova a nue Babulona troa thepe angatr qa ngöne la zi angatr, me xomi angatr troa po. (2 A.l.ite jo. 36:15-17; Neh. 9:28-30) Tune la hna mekune hnene la itre xaa atr ka qeje pengöne la Tusi Hmitrötr, maine jë hnene la atre cinyihane la salamo 111 hna mele thupene la hna po hnei Isaraela e Babulona, haawe, nyimutre la itre kepin ka uku angeic troa atrunyi Iehova pine la aqane nyipici Nyidrë memine la mene i Nyidrë. Hnei Akötresieti hna amamane lai ngöne la Nyidrëti a thapa la angetre Iudra qaa Babulona, lo ketre musi atraqatr ekö laka e po hë la ketre nöj e cili, pë hmaca kö nue.—Is. 14:4, 17.
14 Ame ngöne lo faifi hadredr lao macatre thupen, tre, hna mama la mene i Iehova ngöne la ketre götrane ka sisitria catr, ene la kola nue amacane la itre atr ka ietra qa ngöne la ngazo me mec. (Rom. 5:12) Kepe thangane panëne jë hi lai hnene lo ala 144 000 lao atr, ene lo itre hna aijijëne me hna iëne hnei uati hmitrötr troa itre hlue i Keriso. Ame ngöne lo macatre 1919, tre, hnei Iehova mina fe hna nue la mene i Nyidrë matre troa thapa la itre thelen, ene lo itre hna iën matre alö angatre pi qa hnine la hmi ka thoi. Jëne la mene i Akötresie, matre atreine jë angatre kuca la itre huliwa ngöne la hnedrai së. Maine tro angatr a mele nyipici uti hë la mec, haawe, ijije hë tro angatr a ce musinëne la fene hnengödrai me Iesu Keriso qa koho hnengödrai, matre nyine loi kowe la itre atr ka ietra. (Hna ama. 2:26, 27; 5:9, 10) Sisitria catre kö la manathithi hnene la itre atr cili hna troa kapa hui angetre Isaraela ekö, ke, tro angatr a lapaane asë la ihnadro.—Mat. 5:5.
Itre Trepene Meköt Ka Epine Palua Me Ka Cile Hut
15, 16. (a) Nemene mina fe la itre huliwa ne la lue ime i Akötresie? (b) Nemene la itre wathebo hnei Akötresieti hna hamëne koi Isaraela ekö?
15 “Nyipici me meköti la ite huliwa ne la lue ime i nyidë; ka cile huti la ite wathebo i nyidë asëjëihë. Cate it’ eje uti hë epin’ epine palua; nge hna kuca thenge la nyipici me meköt.” (Sal. 111:7, 8) Ame ngöne la “ite huliwa ne la lue ime i [Iehova],” tre, kolo mina fe a qaja lo lue etë ka isaisa hna cinyihane ngön lo treen lao wathebo ka sisitria thatraqai Isaraela. (Eso. 31:18) Ame la itre wathebo cili memine fe lo itre xaa hna amekötin asë ngöne lo Wathebo i Mose, tre, itre hna nyitrepene hnene la itre trepene meköti ka epine palua me ka cile hut.
16 Drei la ketre ceitun, kola qaja hnene la ketre wathebo hna cinyihane ngöne lai itre etë cili, ka hape: “Iehova ni Akötesi ’ö, Akötesie ka isaxolo.” Nge kola sisedrëne, ka hape, Iehova a amamane “la tenge ihnimi kowe la ite xöte ka thauzan itete hnine koi [Nyidrë], me thupëne la nöjei wathebo [Nyidrë].” Ketre, ame ngöne la itre etë ka isaisa, tre, hetrenyi mina fe la itre trepene meköt nyine troa trongën ngöne la nöjei ijin me ngöne la nöjei götran, tune la kola hape “metötëneju la keme i ö me thine i ö” me “the tro kö eö a ënö,” nge hetrenyi mina fe la ketre wathebo ka tru alien, ene lo ka wathebone troa meciune la itre ewekë ne la itre xan.—Eso. 20:5, 6, 12, 15, 17.
Atre Itö Mele Së Ka Hmitrötr Me Hna Xouen
17. Nemene la itre kepine ka uku angetre Isaraela troa ahmitrötrëne la ëje i Akötresie?
17 “Hnei nyidëti hna upe la mele kowe la nöje i nyidë; ase hë nyidëti ahnithe la isisinyikeu i nyidë uti hë epine palua; hmitöte me hna qouene la atesiwa i nyidë.” (Sal. 111:9) Maine jë kolo hmaca ha mekun hnene la atre cinyihane la salamo lo aqane mele nyipici Iehova kowe lo isisinyikeu hnei Nyidrëti hna kuca me Aberahama. Celë hi matre thaa hnei Iehova kö hna nuetrije la nöje i Nyidrë ngöne lo kola ithahluë e Aigupito ekö, me ngöne lo angatr a po e Babulona. Ame ngöne la lue götrane cili, hnei Akötresieti hna itö mele ne la nöje i Nyidrë. Thaa nyipi ewekë kö troa mana menu ju pë la itre hna kuca hnei Akötresie matre tro angetre Isaraela a ahmitrötrëne la ëje i Nyidrë, ijije hi lai lue ewekë hna kuca hnei Nyidrë.—E jë la Esodo 20:7; Roma 2:23, 24.
18. Pine nemen matre nyipunieti a mekun, laka, ketre manathithi ka tru la troa xom la ëje i Akötresie?
18 Ketre tune mina fe la itre Keresiano enehila, laka hna thapa me itöne la mele i angatr qa ngöne la ngazo me mec. Loi e tro sa catre troa mele thenge lo hna pane sipon ngöne la tulu ne thihi, kola hape: “Jiniati e hmitöte la atesiwa i enëtilai.” (Mat. 6:9) Maine tro sa mekune thel la ëje cili ka sisitria, haawe, tro hë sa xoue Akötresie. Eje thene la atre cinyihane la salamo 111 la aqane waiewekë ka loi göne la troa xoue Akötresie, ke, öni angeice ka hape: “Ame la qane la inamacane, te, qoue Iehova; nge kola trotrohnine hnyawa hnei angat’ asë angete kuca it’ ej [trongëne la itre hna amekötine hnei Nyidrë].”—Sal. 111:10.
19. Nemene la nyine tro sa wange ngöne la hna cinyihan ka troa xulu?
19 Maine ka pexeje hnyawa the së la xoue Akötresie, haawe, tro hë lai a xatua së troa sisine la ewekë ka ngazo. Ketre, tro mina fe lai a xatua së troa nyitipune la itre thiina ka lolo i Akötresie, tune la hna amamane ngöne Salamo 112, laka, tro pë hë sa ce wange ngöne la hna cinyihan ka troa xulu. Kola amamane hnene la salamo cili la aqane tro sa maca, matre troa hane e së fe thene lo itre atr, laka, itre milio la etrun ka thele troa atrunyi Akötresie cememine la madrin uti hë epine palua. Nyidrëti hmekuje hi la nyine troa atrun. “Tro pala kö a atrunyi nyidë epine palua.”—Sal. 111:10.
Itre Hnyinge Nyine Troa Mekune Thel
• Pine nemene matre Iehova hmekuje hi la nyine tro sa atrun cememine la hni ka caas?
• Nemene la itre thiina i Iehova ka mama ngöne la itre huliwa i Nyidrë?
• Tune kaa la aqane goeëne nyipunieti la manathithi ka tru, ene la troa xome la ëje i Akötresie?