Ita Ne Thup göi 14 Juun
Nyima 07 me 23 Qene Drehu
Kola Amadrinëne La Hni Iehova Hnene La Mele i Nyipunie Ka Pë Ethan
“Neköng, inamacanepi, mate madinejë la hning; mate hete nyine sa koi angeic’ ate qaja angazo ni.”—ITE EDOMË 27:11.
1, 2. (a) Nemene la pengöne la itupathi Satana hna qaja hnene la tusi Iobu? (b) Nemene la ka amamane laka, thupe i Iobu Satana pala hi a jele ngazo Iehova?
HNEI Iehova hna nue Satana troa tupathi Iobu ketre hlue i Akötresie ka mele nyipici ka pë ethan la mel, nge ka mele nyipici. Ame la itre thangane lai, tre, meci asë hë la itre si Iobu memine la itre nekö i angeic, nge ketre hna tithi angeice mina fe hnei mec. Ngo ame la Satana a tupath la mele i Iobu ka pë ethan, tre, hetrenyi la itre xaa hnei angeice hna mekun. Öni Satana ka hape: “Kupeine hnane la kupein, nge ite ewekë asë hna hetenyi hnene la ate tro angeic’ a hamëne hnane la mele i angeic”. Hetre ketre hnying hna amexeje hnene la itupathi celë, ngo thaa kolo kö a ketri Iobu hmekuje hi, kolo mina fe a ketr la itre atr asë ka troa mele pë hë thupene la angeic a mec.—Iobu 2:4.
2 Traqa ha koi 600 lao macatre thupene la hna pane tupathi Iobu, nge kola cinyihane hnei Solomona, ka hape: “Neköng, inamacanepi, mate madinejë la hning; mate hete nyine sa koi angeic’ ate qaja angazo ni.” (Ite edomë 27:11) Kola mama hnyawa laka ame ngöne la ijine cili, tre, Satana pala hi a tupathi Iehova. Ketre, ame ngöne la hna meköle goeëne hnei Ioane aposetolo, tre, kola jele ngazone la itre hlue i Akötresie hnei Satana thupene la kola helë angeic qaa hnengödrai, itre drai thupene la hna acile la Baselaia i Akötresie ngöne lo macatre 1914. Nyipici, ngacama easë enehila ngöne la hneijin ne la pun la fene ka ngazo celë, ngo Satana pala hi a tupath la mele ne la itre hlue i Akötresie ka pë ethan!—Hna ama. 12:10.
3. Nemene la itre ini ka sisitria hne së hna xom qa ngöne la tus i Iobu?
3 Loi e tro sa pane ce wange la köni ini ka sisitria hna troa xom qa ngöne la tus i Iobu. Ame la hnapan, tre, kola amamane koi së hnene la itre itupath ka traqa koi Iobu, la pengöne la nyipi ithupëjia memine la nöjei atr asë memine fe la qaane la icilekeu memine la itre hlue i Akötresie. Satana Diabolo hi la ithupëjia cili. Ame la hnaaluen, tre, ngacama isapengöne la itre itupath hne së hna troa qëmeke kow, ngo maine ka catre hnyawa la aqane imelekeu së me Iehova, haawe, tro pala hi sa catre troa pë ethan la mele së. Nge ame la hnaakönin, tre, maine nyimutre la itre aqane tupathi së, ngo loi e xecie hnyawa e kuhu hni së laka, tro pala hi Iehova a xatua së, tune la hnei Nyidrëti hna kuca koi Iobu. Ame enehila, Iehova a xatua së jëne la Wesi Ula memine la Organizasio memine fe la uati hmitrötre i Nyidrë.
Loi e Tro Pala Hi Sa Lapa Mekun La Nyipi Ithupëjia Me Easë
4. Drei la atrekë zöne la itre aqane mele e celë fen?
4 Nyimutre la itre atr ka mekune ka hape pëkö Satana. Celë hi matre, ngacama angatr a seseu pine la aqane tro ngazo la mele e celë fen, ngo thaa atrehmekune kö angatre laka, ame la atrekë zön la itre ewekë cili, tre, Satana hi lo Diabolo. Nyipici, atr mina fe la atrekë zön la itre akötr e cailo fen. Hnene lo pane keme me thine së, ene Adamu me Eva, hna iëne troa thipetrije la musi ne la Atre Xupi nyidro, matre tro nyidroti a ketre sipu mus. Qaane ju hi la ijine cili, hnene la itre matra i nyidro hna ujë ceitu me itre hmo. Hnei Diabolo hna iaö Eva matre hane jë fe angeice icilekeu me Akötresie. Musi hë Satana nge angeice la ka eköthe la aqane mel ngöne la fene celë hna lapaane hnene la itre atr ka thaa pexeje hmaca kö, nge ka tro fe a mec. Pine laka Satana hi la “haze ne la fen,” eje hi laka, canga mama hi thene la itre atr ne fen la itre thiina ka eje thei angeic, tune la pi draië me ikucany, me zalu me meciun me hleuhleu memine la icilekeu. (2 Kor. 4:4; 1 Tim. 2:14; 3:6; e jë la Iakobo 3:14, 15.) Hnene laka hetrenyi thene la itre atr la itre thiina cili, matre kola xulu la itre isi ngöne la politik me hmi, me iwangatrehmekunyi atr me iaxösisi me menumenu, nge itre eje hi lai a akökötrene catrëne la akötr ne la nöjei atr asë.
5. Nemene la hne së hna ajane troa kuca memine la atrehmekune ka sisitria catr hne së hna hetreny?
5 Drei la ketre atrehmekune ka sisitria catre hne së hna hetreny, itre hlue i Iehova! Nyipici, atre hi së la atrekë zön la itre aqane mele ka ngazo e celë fen. Hapeu, thaa kolo kö lai a uku së troa thuemacane la itre atr ngöne la hna cainöj, la pengöne la ithupëjia me easë? Nge hapeu, thaa madrine kö së troa catre ce memine la nyipi Akötresie, ene Iehova, me qaja kowe la itre xan la aqane tro Nyidrëti elanyi a apaatrenyi Satana memine la itre akötre ne la nöjei atr asë?
6, 7. (a) Drei la atrekë zön la icilekeu hna melëne hnene la itre nyipi hlue i Akötresie? (b) Tune kaa la aqane tro sa xötrethenge la tulu i Elihu ekö?
6 Satana la atrekë zön la itre akötre ngöne la fen asë, ngo angeice mina fe la qaan la icilekeu hna melëne hnene la nöje i Akötresie. Eje e kuhu hni angeic la aja troa tupathi së. Hnei Iesu Keriso hna qaja koi Peteru aposetolo, ka hape: “Simona, Simona fe, hana wang, ase hë Satana aja nyipunie troa jumejume nyipunie tune la qit.” (Luka 22:31) Ketre, tro mina fe a tupathi së isa ala caas, easë itre ka xötrethenge la itre thupaca i Iesu. Hnei Peteru hna aceitunë Diabolo memine la ketre “liona a ho, kola thele tha i nyën.” Nge hnei Paulo hna qaja, ka hape: “Tro ha axösisi angat’ asë angete ajane troa lapa fë la thina ka ijiji Akötesie thei Keriso Iesu.”—1 Pet. 5:8; 2 Tim. 3:12.
7 Tune kaa la aqane tro sa amamane laka, atre hnyawa hi së la pengöne la sipu ithupëjia me easë, ngöne la kola traqa la ketre akötr kowe la ketre trejine me easë? Thaa tro pi kö sa iananyi memine lai trejine cili ka akötr, ngo loi e tro sa ujë tui Elihu ekö, lo atre laka ithanata koi Iobu ceitun me ketre nyipi enehmu. Loi e tro sa xatua angeic troa isi memine la ithupëjia me easë, ene Satana. (Ite edomë 3:27; 1 Thes. 5:25) Ame la aja hne së hna thele troa eatrën, tre, ene la troa xatuane la trejine me easë troa pë ethan la mele i angeic ngöne la kola traqa la itre itupath, nge eje hi lai laka troa amadrinëne la hni i Iehova.
8. Pine nemene matre thaa hune ju kö Satana troa sewe Iobu troa atrunyi Iehova?
8 Ame la pane ewekë i Iobu hnei Satana hna apaatren, tre, ene la ume öni angeic. Ka tru alamekene catr la itre öni cili koi Iobu, pine laka jëne manie i Iobu hi lai. Nge itre hnei Iobu fe lai hna xom kowe la itre huliwa ne la hmi. Thupene la hnei Iobu hna ahmitrötrëne la itre nekö i angeic, ene pe [hnei angeic hna] ilë e hmakanyi me hujëne la ite huje ne deuthe atrë angat’ asë; ke öni Iobu, Maine hna kuca la ngazo hnene la ite neköng, me jele ngazo Akötesie e kuhu hni angat. Hnei Iobu hna kuca tune pala hi.” (Iobu 1:4, 5) Celë hi kepin matre, hnei Iobu pala hi hna huujëne la itre öni koi Iehova. Ame la kola nyiqaane traqa koi angeic la itre itupath, tre, thaa ijiji angeice hë troa ujë tune lai. Pë hë “nyi” angeic nyine troa atrunyi Iehova. (Ite edomë 3:9) Ngo angeic a atrunyi Iehova pë hë hnene la ukeineqë i angeic!
Loi e Tro Sa Acatrene La Aqane Imelekeu Së Me Iehova
9. Nemene la ewekë ka sisitria catre hne së hna hetrenyi ngöne la mele së?
9 Ngacama itre ka trenamo maine ka puafala së, thöthi ju hë maine qatr, ka egöcatr maine ka wezipo pena, ngo ijiji së hi troa acatrene la aqane imelekeu së me Iehova. Maine easa qëmeke kowe la itre itupath, tre, tro ha aijijë së hnene la ecatrene la aqane imelekeu së me Iehova, troa pë ethan pala hi la mele së me amadrinëne la hni Nyidrë. Ngacama co hi la atrehmekun ne la itre xaa atr göne la nyipici, ngo hnei angatr hna catre troa cile hut me thele troa pë ethan la mele i angatr.
10, 11. (a) Hnene la ketre trejine föe hna ujë tune kaa ngöne la kola tupath la mele i eahlo ka pë ethan? (b) Nemene la mekune ka catr hnene la trejine celë hna hamëne koi Satana?
10 Pane ce wange jë së la tulu hna hamëne hnene la trejine föe, Valatina Garnovskaya la ëjen; angeice la ketre Atre Anyipicine i Iehova qa Rusi ka ujë tui Iobu. Hnei eahlo hna catre troa pë ethan la mele i eahlo ngöne la itre itupath ka akötre catr. Ame ngöne lo macatre 1945, hnene la ketre trejine trahmanyi hna cainöje koi eahlo, nge 20 lao macatre i eahlo. Alua bëeke hmaca nyidrë troa ithanatane la Tusi Hmitrötr me eahlo, ngo thupene lai, thaa hnei eahlo hmaca kö hna öhnyi nyidrë. Ngacama hna traqa la jole cili ngo hnei Valatina hna nyiqaane cainöj kowe la itre atr ka lapa easenyi eahlo; ene pe hna akalabusi eahlo uti hë la traqa koi eitr lao macatre. Kola nue eahlo lo macatre 1953, nge canga xome hmaca jë hi eahlo la huliwa ne cainöj; ene pe akalabusi eahlo hmaca ju hi, ngo koi treene pena lao macatre. Thupene la itre macatre ne umë eahlo ngöne la caa kalabus, kolo hmaca ha xomi eahlo kowe la ketre kalabus. Ame la itre trejine föe hna akalabusin e cili, tre, hetrenyi angatre la ketre Tusi Hmitrötr hna fejan. Ame ngöne la ketre drai, hnene la ketre trejine hna amamane koi Valatina lai Tusi Hmitrötr. Drei la ketre ijine eahlo a pane madrin! Pane mekune jë nyipunie laka, ekö catre pala ha lo macatre 1945 la Valatina a pane öhne la Tusi Hmitrötr, ene lo hna xome trongëne hnene lo trejine trahmany!
11 Kola nue Valatina qa kalabus ngöne lo macatre 1967, nge macatre ne eahlo hi lo lai a hane xome la bapataiso. Hnei eahlo hna catre troa cainöj uti hë lo macatre 1969. Ngo ame ngöne la macatre cili, tre, hna othi eahlo hmaca e kalabusi, a koi theri pena ha lao macatre. Ngo Valatina pala hi a catre cainöj. Qëmekene tro eahlo a mec ngöne lo macatre 2001, hnei eahlo hna xatuane la 44 lao atr troa atre la nyipici. Traqa koi 21 lao macatre ne mele eahlo ngöne la itre kalabusi me hna po. Hnei eahlo hna nuetrije la nöjei ewekë, memine fe la itre sipu aja i eahlo, matre troa thele pala hi troa pë ethan la mele i eahlo. Nge ame ngöne la pun la mele i eahlo, hnei Valatina hna qaja, ka hape: “Pëkö hnalapang ekö. Ame la nöjei ewekë hnenge hna hetreny, tre, itre ej asë hi ngöne la sine iwatreng, ngo ame pe, atraqatre pala hi la madrineng troa nyihlue i Iehova.” Drei la ketre mekune ka catr hna sa hnei Valatina koi Satana, ene lo ka inyizö me qaja ka hape, thaa tro kö a mele nyipici koi Akötresie hnene la itre atr ngöne la itre itupath! (Iobu 1:9-11) Ka xecie hnyawa e kuhu hni së laka, hnei eahlo hna amadrinëne la hni Iehova, nge Nyidrëti a treqene hnyawa la ijine troa amele Valatina hmaca memine la itre xaa hlue i Nyidrë ka mele nyipici uti hë la mec.—Iobu 14:15.
12. Nemene la enyipiewekëne la ihnim ngöne la aqane imelekeu së me Iehova?
12 Hna nyi trepene la aqane imelekeu së me Iehova hnene la ihnimi së koi Nyidrë. Easa haine la itre thiina i Akötresie, nge easë mina fe a kuca la hne së hna atrein matre troa mele thenge la itre aja i Nyidrë. Itre trengathoi la hnei Diabolo hna qaja, ke, easa hnimi Iehova cememine la hni ka ajan me ka pexej, ngo thaa göi thupene kö. Kola acatrene la aja së troa pë ethan pala hi la mele së ngöne la kola traqa la itupath, hnene lai ihnimi cili ka qaa kuhu hni. Nge eje hi laka, tro pala hi Iehova a “thupëne la gojene la ite ka hmitöt.”—Ite edomë 2:8; Sal. 97:10.
13. Tune kaa la aqane goeëne Iehova la itre ewekë hne së hna kuca koi Nyidrë?
13 Kola uku së hnene la ihnim troa atrune la ëje i Iehova, ngacama easa mekun e itre xaa ijin, laka, thaa tru kö la hne së hna kuca. Öhne hi Nyidrëti la itre nyipi aliene hni së, nge thaa tro pi kö Nyidrëti a ameköti së e thaa ijiji së kö troa kuca la nöjei ewekë hne së hna ajane troa kuca. Ame la ka nyipi ewekë catr, tre, thaa ene hmekuje kö la itre ewekë hne së hna kuca, ngo ene mina fe la itre kepin ka uku së troa kuca la itre ewekë cili. Ngacama atraqatre la akötre i Iobu nge ketre tru fe la itre ewekë hnei angeice hna xomihnin, ngo hnei angeice pala hi hna qaja kowe la itre atr ka ijelengazo, la aqane hnime angeic la itre jë i Iehova. (E jë la Iobu 10:12; 28:28.) Ame ngöne la mekene tixenuë ne la tus i Iobu, hnei Akötresie hna qaja ka hape, tro Nyidrëti a elëhni koi Elifaza me Biledad me Zofar, pine laka hnei angatre hna thoi. Ame ngöne la ketre götran, tre, hnei Iehova hna amamane laka, Nyidrëti a kepe Iobu hnene la hna hë angeic, ka hape, “hluenge” nge hnene mina fe la hna aijijë angeice troa thithi fë la itre atr cili ka tria. (Iobu 42:7-9) Epi tro fe sa catre troa ujë tune lai, matre tro mina fe a hane kepe së hnei Iehova.
Iehova a Xatuane La Itre Hlue i Nyidrë Ka Mele Nyipici
14. Hnei Iehova hna xatua Iobu tune kaa troa amekötin la aqane waiewekë i angeic?
14 Ngacama ketre atr ka thaa pexeje kö Iobu, ngo hnei angeice pala hi hna thele troa pë ethan la mele i angeic. Ame itre xaa ijin, pine laka catrehnine catr la itre akötr, haawe, thaa hnei angeice kö hna goeëne aloine la itre ewekë. Drei la ketre ceitun, hnei angeice hna qaja koi Iehova, ka hape: “Ini a xewe koi cilie, nge tha shama nieti kö hnei cilie . . . Cilieti a weji ni fë la themie i cilie ka cat.” Ketre, tru catre pala ha la hnei angeice hna thele troa jele meköti angeice kö, ke, öni angeice ka hape: “Tha ate ka ngazo kö ni” nge ketre “tha pine kö la iangazo ngöne la lue iwanakoimeng; nge pëkö ethane la thithing.” (Iobu 10:7; 16:17; 30:20, 21) Ngo hnei Iehova hna xatua Iobu cememine la hni ka menyik troa amekötine la aqane goeëne Iobu la sipu pengö i angeic, hnene la hna anyimua hnying. Ketre, hnene la itre hnyinge cili hna aijijë angeice troa atrehmekune laka, ka draië catre kö Akötresie nge pëkö ketre atr ka ceitu me Nyidrë. Hnei Iobu hna kapa la ixatua memine la ihaji.—E jë la Iobu 40:8; 42:2, 6.
15, 16. Iehova a xatuane tune kaa la itre hlue i Nyidrëti enehila?
15 Iehova mina fe a hamë ixatua me eamo kowe la itre hlue i Nyidrë enehila. Ketre, ka sisitria catr la itre manathithi hne së hna kapa. Drei la ketre ceitun, hnei Iesu Keriso hna hamëne la thupene mel, ene pe ijiji hë troa senge la itre ngazo. Kola aijijë së fe hnene la huuje celë troa acatrene hnyawa la aqane imelekeu së me Akötresie, ngacama itre atr ka thaa pexeje kö së. (Iako. 4:8; 1 Ioane 2:1) Ame la easa qëmeke kowe la itre itupath, tre, easë mina fe a sipone la ixatua memine la trengecatre ne la uati hmitrötre i Akötresie. Ketre, hetrenyi së la ketre Tusi Hmitrötr ka pexej, nge maine easë pala hi a e me sine thele ej, haawe, tro ha hnëkë së hnyawa troa qëmeke kowe la itre itupath. Kola xatua së fe hnene la hna inine la Tusi Hmitrötr troa trotrohnine la aqane jelengazone la musi cile i Iehova e koho hnengödrai me e celë fen, memine la aqane troa pë ethane la mele së.
16 Ketre, easa kepe thangane ka loi qa ngöne la hna ce huliwa memine la lapa ne la itre trejine e cailo fen, ene la hnei Iehova hna ithuane ngöne la götrane la ua, jëne la “hlue ka nyipici me ka inamacan.” (Mat. 24:45-47) Ame ngöne la 100 000 lao ekalesia ne la Itretre Anyipicine i Iehova, tre, kola eköthe la itre icasikeu matre troa ini së me acatrene la lapaune së, qëmekene troa cile kowe la itre itupath. Kola anyipicine lai hnene la hna melëne hnei Sheila, ketre thöthi ka nyi hlue i Iehova nge ka mele e Alema.
17. Tune kaa la aqane amamane hnene la hna melëne hnene la ketre nekö jajiny, laka, aqane ujë ka inamacan la troa sine la itre icasikeu ne la itre Keresiano enehila?
17 Ame ngöne la ketre drai, tre, hna nango nue caasi Sheila memine la itre sine ce ini me angeic ngöne la uma ne ini angatr. Ame ju hi e cili, tre, hnene la itre sine ini angeic hna xome la ketre inehe nyine kuci iöni hna hape, planche oui-ja. Ene pe kola canga kötre lö pi hnei Sheila qa hnine la uma ne ini; hetre madrine i angeice pine la aqane ujë i angeic, ke, e thupene lai, drei mejene hë angeice la ewekë ka traqa e cili. Ame la kola thele ewekë jëne la inehe cili, hna hape oui-ja, hnene la itre xaa ka ini, angatr a drenge laka, kola löthi angatr hnene la itre dremoni, ene pe angatr a xou nge hane pi fe hi angatre kötre lö qa hnine la uma. Ngo nemene la ka xatua Sheila troa canga lö qa hnine la uma ne ini? Öni Sheila e qeje pengön, ka hape: “Qëmekene troa traqa la ewekë cili, hnei eahuni hë hna ithanatane la itre ethanyine la inehe oui-ja ngöne la ketre icasikeu ngöne la Uma Ne Baselaia. Qa ngöne lai, atre hë ni la nyine troa kuca. Hnenge hna ajane troa amadrinë Iehova, tune lo hna qaja hnei Tusi Hmitrötr ngöne Ite Edomë 27:11.” Drei la thangane ka loi hna kapa hnei Sheila, qa ngöne laka, hnei angeice hna sine la icasikeu me hane drenge hnyawa la porogaram!
18. Nemene la hnei nyipunieti hna thele troa catre kuca?
18 Loi e tro së isa ala caas, a catre troa xötrethenge la itre hna amekötine hne së hna kapa qaathene la organizasio i Akötresie. Maine tro pala hi sa sine la itre icasikeu me e la Tusi Hmitrötr, me inine la itre itusi së me thithi me ce tro memine la itre trejine Keresiano ka macaj, haawe, tro hë sa kapa la ixatua ka ijij. Iehova a ajane troa pë ethane la mele së, nge ketre, Nyidrëti a mejiune laka, tro pala hi sa catre troa ujë tun. Drei la ketre manathithi ka tru hna hamë së, ene la troa atrune la ëje i Iehova, me thele troa pë ethane pala hi la mele së, memine fe la troa amadrinëne la hni Iehova!
The Tro Kö Nyipunieti a Thëthëhmin
• Nemene aqane mel me itupath ka xulu qaathei Satana?
• Nemene la ewekë ka sisitria catre hne së hna hetreny?
• Nemene la ka nyi trepene la aqane imelekeu së me Iehova?
• Nemene la itre xaa aqane xatua së hnei Iehova enehila?