Ita Ne Thup göi 19 Semitrepa
Nyitipu Iesu Jë Ene La Troa Inine La Itre Atr Cememine La Ihnim
“Pëkö ate ewekë tune lai.”—IOANE 7:46.
1. Hnene la itre atr hna ujë tune kaa kowe la aqane hamë ini i Iesu?
PANE mekune jë së la elolone la troa drei Iesu la kola hamë ini! Easa öhne ngöne la Tusi Hmitrötr la thangan hna kapa hnene la itre atr qa ngöne la hnei angatre hna drei nyidrë. Hanawange la ketre ceitun, kola qaja hnei Luka ketre atre cinyihane la Evangelia, ka hape, hnene la itre atr ne Nazareta “hna . . . haine la nöjei wesi ula ne ihnimi hna tropi qa ngöne la ine ula i nyidë.” Mataio mina fe a qaja, ka hape, hnene lo itre atr ka drenge la Cainöje i Iesu hune la Wetr “hna haine atraqate . . . la ini nyidë.” Nge ketre, kola amamane hnei Ioane laka thaa hna xölehuji Iesu ju kö hnene lo itre sooc, ke, öni angatr, ka hape: “Pëkö ate ewekë tune lai.”—Luka 4:22; Mat. 7:28; Ioane 7:46.
2. Nemene la itre aqane hamë ini i Iesu?
2 Thaa tria kö la hna mekune hnene lai itre sooce cili. Nyipici, Iesu hi la Atre Hamë Ini ka sisitria e celë fene hnengödrai. Ame la itre ini hnei nyidrëti hna hamën, tre, ka nualai hnyawa me hmaloi troa trotrohnin, nge pëkö ketre atr ka atreine troa jele thoin. Hnei nyidrëti pala hi hna huliwane inamacanëne la itre ceitun memine la itre hnying. Ketre, hnei nyidrëti fe hna hamëne la itre ini thenge la aqane mele ne la itre atr ka drei nyidrë, ka trenamo ju hë angatr maine ka puafala pena. Ame la itre nyipici hnei nyidrëti hna inin, tre, ka hmaloi hi troa trotrohnin nge ka jui catre itre ej. Ngo thaa cili hmekuje kö la itre ewekë ka amamane laka, ketre Atre Hamë Ini ka sisitria lae Iesu.
Ihnim—Ketre Thiina Ka Sisitria Catr
3. Nemene eisapengönene la aqane hamë ini Iesu memine la itre hene ne hmi ne la hneijine i nyidrë?
3 Ame thene lo angetre cinyihane me angetre Faresaio, tre, maine jë hetrenyi thei angatr la atrein, me atrehmekun nge atreine hi angatr troa hamë ini. Ngo nemene la ka isapengön ngöne la aqane hamë ini Iesu memine la aqane hamë ini angatr? Pëkö ihnimi ne la itre hene ne hmi ne la hneijine cili, kowe la itre atr ka puafala. Kolo pe a methinë angatr me goeë angatr ceitu me ‘itre atr hna ahnëjinën.’ (Ioane 7:49) Ngo ame Iesu, hnei nyidrëti hna utipi angatr pine laka “kucakuca ha angat, me isa ije hë, tune la nöjei mamoe ka pa ate thupën.” (Mat. 9:36) Ka hni ka menyike nyidrë me utipin. Ketre, pëkö nyipi ihnimi ne la itre hene ne hmi koi Akötresie. (Ioane 5:42) Ngo ame Iesu, tre, atraqatre la ihnimi nyidrë kowe la Tretretro i nyidrë, nge madrine catre nyidrë troa kuca la aja i Akötresie. Hnene la itre hene ne hmi hna aqaline la itre trenge ewekë i Akötresie matre troa sajuëne la itre sipu aja i angatre kö, ngo ame Iesu, tre, nyidrëti a hnine la “wesi ula i Akötesie” hnene la hna inin me qeje pengön ej me isigöline ej, me mele thenge la itre trepene meköti ka ej e hnine la Wesi Ula. (Luka 11:28) Nyipici, hnei Keriso hna amamane la ejuine la ihnimi nyidrë ngöne la itre ini hnei nyidrëti hna hamën, ngöne la aqane ujë i nyidrë memine la itre atr, me ngöne mina fe la aqane ini angatr hnei nyidrë.
4, 5. (a) Pine nemene matre ka nyipi ewekë troa hamë ini cememine la ihnim? (b) Pine nemene matre ka nyipi ewekë mina fe la atrehmekun memine la atrein, ngöne la kola hamë ini?
4 Hapeu, tune kaa fe së? Pine laka easë la itre hlue i Keriso, easa ajane troa nyitipu nyidrë ngöne la huliwa ne cainöje me ngöne la mele së. (1 Pet. 2:21) Qa ngöne lai, ame la nyine tro sa eatrën, tre, thaa ene hmekuje kö la troa hamëne la atrehmekune qa hnine la Tusi Hmitrötr, ngo ene mina fe la troa amamane la itre thiina i Iehova, tune la ihnimi Nyidrë. Tru ju hë maine co pena la atrehmekune së, tune mina fe la atreine së troa hamë ini, ngo e mama hnyawa the së la ihnim, haawe, tro hë lai a ketr la hni ne la itre atr hne së hna cainöje kow. Maine easa ajane troa hetre thangane ka loi ngöne la easa inine la itre atr, haawe, nyipi ewekë tro sa nyitipu Iesu, ene la troa hamë ini cememine la ihnim.
5 Eje hi laka, maine easa ajane troa itretre hamë ini ka lolo, nyipi ewekë tro sa atre hnyawa la taane cainöje së, me atreine mina fe troa ce thawa memine la itre xan la atrehmekune cili. Hnei Iesu hna xatuane la itretre drei nyidrë troa hetrenyi la lue ewekë cili, nge Iehova fe a xatua së enehila jëne la organizasio i Nyidrë troa kuca tune fe. (E jë la Isaia 54:13; Luka 12:42.) Ketre, maine nyipici laka tro sa nue la hne së hna atrein matre troa inine la itre atr, ngo loi e qa kuhu hni së pala hi la itre ini hne së hna hamën. Maine tro sa ce huliwane la atrehmekun me atrein, me ihnim, tro ha hetre thangane ka loi la hne së hna hamë ini. Haawe, nemene la itre aqane tro sa amamane la ihnimi së ngöne la kola hamë ini? Hnei Iesu memine la itretre drei nyidrë hna amamane tune kaa la ihnimi angatr? Tro sa pane ce wange la itre mekun ka sa la lue hnying cili.
Nyipi Ewekë Tro Sa Hnimi Iehova
6. Tune kaa la aqane tro sa porotrikëne la ketre atr hne së hna hnim?
6 Easa madrine troa porotrikëne la itre ewekë hne së hna hnin catrën. Canga tro hi a öhne hnene la itre atr la etrune la madrine së ngöne la easa ithanatane la itre ewekë cili. Kola mama hnyawa lai ngöne la easa porotrikëne la ketre atr hne së hna hnim. Nyipici, ketre aja ka tru koi së troa qaja kowe la itre xan la hne së hna atre göne la atr cili. Easa atrun me metrötrën me nyixöle i angeic, ke, easa ajane tro la itre xan a hane qaja aloinyi angeic me epe koi angeic hnene la itre thiina i angeic ka lolo.
7. Nemene la thangane la ihnimi Iesu koi Akötresie?
7 Qëmekene tro sa akökötrene thene la itre xaa atr la ihnimi koi Iehova, nyipi ewekë tro sa isa pane atrepengöi Nyidrëti hnyawa, me hnimi Nyidrëti fe. Atre hnyawa hi së laka, hna nyitrepene la aqane hmi së hnene la ihnimi koi Akötresie. (Mat. 22:36-38) Iesu la ketre tulu ka pexeje ngöne la götrane cili. Hnei nyidrëti hna hnimi Iehova cememine la hni ka pexej me mekune ka pexej, me u ka pexej me trenge catre i nyidrëti ka pexej. Maine jë hnene laka nyimutre la itre macatre ne ce mele nyidrë memine la Tretretro i nyidrë e koho hnengödrai, ene pe, atre Nyidrëti hnyawa ha hnei Iesu. Nemene la thangane lai? Öni Iesu, ka hape: “Ini a hnine la Tetetro.” (Ioane 14:31) Hna mama la ihnimi cili ngöne la itre ewekë hnei Iesu hna qaja me kuca. Nge hna uku nyidrëti pala hi hnene la ihnim troa kuca la itre ewekë ka amadrinë Akötresie. (Ioane 8:29) Ketre, eje mina fe a upi Iesu troa qajaqaja la aqane huliwa thoi ne la itre hene ne hmi ka uune fë laka, itre ka nyi trenge ewekë i Akötresieti angatr. Nge ketre, ej a upi nyidrë troa qeje Iehova me xatuane la itre xan troa atrepengöi Akötresie me hnimi Nyidrë.
8. Nemene la thangane la hna hnimi Akötresie hnene la itretre dreng?
8 Ceitune hi la aqane ujë ne la itretre dreng me Iesu, laka, hnei angatr hna hnimi Iehova, nge hnene la ihnimi cili hna uku angatr troa catre cainöjëne la maca ka loi. Hnei angatre hna haöth e Ierusalema hnene la itre ini i angatr, ngacama catrehnine la icilekeu ne la itre hene ne hmi. Nyipici, thatreine kö tro la itre hlue i Iesu a hmacahmaca troa ithanatane la itre ewekë hnei angatre hna öhn me dreng. (Ite hu. 4:20; 5:28) Atrehmekune hi angatr laka, ce Iehova me angatr nge tro Nyidrëti a amanathithi angatr; nge nyipici ju kö laka hnei Nyidrëti hna amanathithi angatr! Thötre lao macatre thupene lo Iesu a mec, hnei Paulo aposetolo hna cinyihane, ka hape, hna cainöjëne la maca ka loi “kowe la nöjei ate asëjëihë e celë fen.”—Kol. 1:23.
9. Tro sa acatrene tune kaa la ihnimi së koi Akötresie?
9 Maine easa ajane tro sa itretre hamë ini ka maca, nyipi ewekë mina fe tro pala hi a acatrene la ihnimi së koi Akötresie. Matre nemene la aqane tro sa acatrene la ihnimi së koi Akötresie? Hnene la hna ithanata pala hi me Akötresie ngöne la thith. Ketre, easë mina fe a acatrene la ihnimi së koi Nyidrë, hnene la hna inine la Wesi Ula, me e la itre itusi së, me hane sine mina fe la itre icasikeu ne la itre Keresiano. Pine laka kolo pala hi a kökötre la atrehmekune së göi Akötresie, haawe, tro ha kökötre mina fe e kuhu hni së la ihnimi së koi Iehova. Thupene lai, hnene laka easa amamane la ihnimi së koi Akötresie ngöne la itre trenge ewekë së me itre huliwa së, haawe, tro ha mama la ihnimi cili kowe la itre xan, nge maine jë tro lai a uku angatr troa hane easenyi koi Iehova.—E jë la Salamo 104:33, 34.
Nyipi Ewekë Tro Sa Hnine Catrën La Itre Ewekë Hne Së Hna Inin
10. Nemene la ka amamane laka, ka lolo la aqane hamë ini hnene la ketre Keresiano?
10 Troa mama laka ketre atre hamë ini ka lolo la ketre atr, hnene la aqane hnine angeic la itre ini hnei angeice hna hamën. Loi e tro angeic a mejiune laka, ka nyipici me nyipi ewekë, nge ka tru alamekene catr la itre ini cili. Maine angeic a hnine la itre ini cili, haawe, tro ha mama la madrine i angeic nge tro hë lai a hetre thangane thene la itre atr hnei angeice hna inin. Ame ngöne la ketre götran, maine thaa hnine hnyawa kö angeic la itre ini hna hamën, hapeu tro kö a wanga atrune itre eje hnene la itre hnainin? Thaa tro pi kö sa wanga acone laka, troa ketr la hnainin hnene la aqane hamë ini së qa hnine la Tusi Hmitrötr. Öni Iesu, ka hape: “Tro ha cei tune la nöjei ate ka inamacane memine la ate ini angat.”—Luka 6:40.
11. Pine nemene matre Iesu a hnine la itre ini hnei nyidrëti hna hamën?
11 Hnei Iesu hna hnine catrëne la itre ini hnei nyidrëti hna hamën. Atrehmekune hi nyidrë laka, hetrenyi thei nyidrë la ketre ewekë ka sisitria troa thawa, ene la nyipici göne la Tretretro i nyidrë e koho hnengödrai, memine la “wesi ula i Akötesie,” memine fe la “nöjei wesi ula ne shewengönie ka tha ase palua kö.” (Ioane 3:34; 6:68) Kola aceitunëne la itre nyipici hna inine hnei Iesu memine la ketre laam ka mel, laka itre ej a qajaqaja la ewekë ka ngazo me wanga atrune la ewekë ka loi. Hnene itre eje hna thue mejiune me akeukawane la hni ne la itre ka hni ka ipië, ene lo itre hna amenune hnene la itre hene ne hmi ka thoi me hna akötrëne hnei Diabolo. (Ite hu. 10:38) Kola mama laka Iesu a hnine la nyipici ngöne la itre ini hnei nyidrëti hna hamën, ngo ngöne mina fe la nöjei ewekë asë hnei nyidrëti hna kuca.
12. Tune kaa la aqane goeëne Paulo la maca ka loi?
12 Tui Iesu, hnene la itretre dreng hna hnine catrëne me wanga atrun la nyipici göi Iehova memine la Hupuna i Nyidrë, ene pe thaa hune ju kö lo itre ka icilekeu ka thele troa sewe angatr troa cainöjëne lai kowe la itre xan. Hnei Paulo hna cinyihane kowe la itre Keresiano ne Roma, ka hape: “Ini a hnëkëne, e ateine ni, troa cainöjëne la maca ka loi . . . Ke tha ini kö a hmahma ene la maca ka loi, ke celë hi mene i Akötesie nyine amelene la nöjei ate asëjëihë kola lapaun.” (Rom. 1:15, 16) Hnei Paulo hna goeëne la huliwa ne troa cainöjëne la nyipici, ceitune me ketre manathith ka tru. Hnei nyidrëti hna cinyihan, ka hape: “Ame la ihnimi gufa celë hna hamë ni . . . mate tro ni a cainöjëne kowe la nöjei etheni la tenge nyi Keriso ka tha simana kö.” (Efe. 3:8) Haawe, thaa ka jole kö koi së troa mekune la aqane madrine Paulo troa inine la pengö i Iehova, memine la itre aja i Nyidrë kowe la itre xan.
13. Nemene la itre kepin ka uku së troa hnine la maca ka loi?
13 Kola aijijë së hnene la maca ka loi ka ej e hnine la Wesi Ula i Akötresie, troa atrepengöne la Atre Xupi së me eköthe la ketre aqane imelekeu ka lolo me Nyidrë. Ej a hamë së fe la itre mekune ka sa hnyawa la itre hnying ka sisitria thatraqane la mele së, me saze la mele së me thue mejiune së, me acatrene mina fe la lapaune së ngöne la easa cile kowe la icilekeu. Ketre, ej a köjane la gojenyi ka troa eatrongë së kowe la ketre mele ka pë pun nge ka nyipi ewekë koi së. Pëkö ketre atrehmekune ka sisitria catr hune la maca ka loi. Nyipici, ketre ahnahna lai ka tru alamekene koi së, nge hetre manathithi ka tru qa ngön. Ketre, ej a akökötrene la madrine së ngöne la easa ce thawa la ahnahna cili memine la itre xan.—Ite hu. 20:35.
14. Tune kaa la aqane tro sa hnine catrëne la itre ini hne së hna hamën?
14 Nemene la nyine troa kuca matre tro sa hnine catrëne la maca ka loi? Ame la easa e la Wesi Ula i Akötresie, tre, loi e tro sa pane xomi ijin matre troa sine thele la hne së hna e. Drei la ketre ceitun, pane mekune jë së laka, easa ce tro me Iesu ngöne la huliwa ne cainöje i nyidrë, maine easë pena ce tro me Paulo aposetolo. Mekune pena jë së laka, easa mele ngöne la fene ka hnyipixe, nge easa goeëne la eisapengönene la mele enehila me elany. Sine thele jë së la itre manathithi hne së hna kapa qa ngöne la hna drengethenge la maca ka loi. Maine tro pala hi sa hnine catrëne la maca ka loi, haawe, tro ha hetre thangane la aja cili thene la itre atr hne së hna inin. Celë hi ketre kepin ka lolo matre loi e tro sa mekune hnyawa la itre hne së hna inin, me wanga atrune mina fe la itre ini hne së hna hamën.—E jë la 1 Timoteo 4:15, 16.
Nyipi Ewekë Tro Sa Hnime La Itre Atr
15. Pine nemene matre loi e tro la atre hamë ini a hnime la itre atr hnei angeic hna ini tus memin?
15 Kola thele hnene la atre maca troa hamë ini, tro la hnainin a hmala me ajane troa hane inine la itre ewekë me hane qeje mekun. Kola hamëne la atrehmekune hnene la atre ihnim, pine laka, eje thei angeic la ajane troa hnehengazone la hnainin. Angeic a thele troa ihmeku la itre ini hnei angeic hna hamën memine la itre aja memine la itre hnei angeic hna atreine trotrohnin. Angeic a wanga atrune mina fe la itre hna atreine kuca me itre aqane mele ne la hnainin. Maine hetrenyi la ihnimi cili thene la atre hamë ini, haawe, tro ha atrehmekune lai hnene la hnainin, ene pe tro ha eje thei nyidroti asë la madrin.
16. Hnei Iesu hna amamane tune kaa la ihnimi nyidrëti kowe la itre atr?
16 Kola mama thei Iesu la aqane ihnimi cili. Hnei nyidrëti hna amamane la ihnimi ka tru i nyidrëti jëne la hna hamëne la mele i nyidrëti, matre troa aijijëne la itre xan troa hetrenyi la mel. (Ioane 15:13) Ame ngöne la nyidrëti a cainöj, tre, thaa hnei Iesu kö hna mano troa xatuane la itre atr me ini angatr la pengöne la Tretretro i nyidrëti. Thaa hnei nyidrëti kö hna treqene tro la itre atr a traqa koi nyidrë, ngo hnei nyidrëti pe hna trongëne la itre gojenyi gaa nanyi troa cainöjëne koi angatr la maca ka loi. (Mat. 4:23-25; Luka 8:1) Hnei nyidrëti hna xomihni ahoean me trotrohni angatr. Ame la kola aja ihaji hnene la itretre dreng, tre, hnei Iesu hna haji angatr cememine la ihnim. (Mar. 9:33-37) Hnei nyidrëti hna ithuecatr me hamë mejiune koi angatr laka, tro angatr elanyi a atreine cainöjëne la maca ka loi. Pëkö ketre atre hamë ini ka ihnim tui Iesu. Hnene la ihnimi Iesu kowe la itretre dreng hna uku angatr troa hane hnimi nyidrëti fe me thupëne pala hi la itre wathebo i nyidrë.—E jë la Ioane 14:15.
17. Hnene la itretre drei Iesu hna amamane tune kaa la ihnimi angatr kowe la itre xan?
17 Ceitune la itretre dreng me Iesu, laka, hnei angatre hna amamane la ejuine la ihnimi angatr kowe la itre atr hnei angatre hna cainöje kow. Hnei angatre hna xomihnine la iaxösisi me nue la mele i angatr matre troa cainöj kowe la itre xan, me hane kepe thangane ka loi qa ngöne la hna tro fë la maca ka loi. Drei la etrune la ihnimi angatr kowe la itre atr ka kapa la maca ka loi! Ketre, kola mama hnyawa la trenge ihnimi Paulo aposetolo, ngöne lo nyidrëti a qaja, ka hape: “Hne huni hna menyike koi nyipunie, tune la ate ijithine kola hiane la ite nekö i nyido. Hne huni hna hnime atrunyi nyipunie, mate loi koi huni troa hamëne koi nyipunie, tha maca ka loi Akötesie hmekuje hi, ngo ite mele huni fe, ke hna hnimi nyipunie hne hun.”—1 Thes. 2:7, 8.
18, 19. (a) Pine nemene matre hetre aja së troa nue la hne së hna hetreny, matre troa kuca la huliwa ne cainöj? (b) Hamëne jë la ketre ceitun ka amamane laka, kola goeëne la aqane ihnimi së hnene la itre xan.
18 Ketre tune mina fe ngöne la hneijine së, kola haöthe la fen asë hnene la Itretre Anyipicine i Iehova ka thele la itre atr ka ajane troa atre Akötresie me nyihlue i Nyidrë. Eje hi, ame ngöne la semidriin lao macatre ka ase hë, tre, kola e ngöne la nöjei macatre la caa milio la etrun lao hawa hne së hna kuca ngöne la huliwa ne cainöj me inine la itre atr; nge easë pala hi enehila a catre sisedrëne la huliwa cili. Ngacama kola thele the së tro sa huujëne la traeme së me trenge catre së, me itre mo së thatraqane la huliwa ne cainöj, ngo ame pe tre, eje e kuhu hni së la ajan troa xome la huliwa cili. Ceitu së hi me Iesu, laka, easa trotrohnine, ka hape, aja ne la Tretretro së ka ihnim, tro la nöjei atr a hetrenyi la atrehmekun ka troa eatrongë angatr kowe la mele ka thaa ase palua kö. (Ioane 17:3; 1 Tim. 2:3, 4) Kola uku së hnene la ihnim troa xatuane la itre atr ka hni ka meköt, troa atrepengö Iehova me hnimi Nyidrë, tune la hne së hna kuca.
19 Kola goeëne hnene la itre xan la ihnimi së. Drei la ketre ceitun, hnene la ketre trejine föe ka pionie hna cinyanyine la itre tus, matre troa akeukawane la hni ne la itre atr ka akötr pine la meci ne la ketre sinee i angatr. Önine la ketre trahmanyi a sa la tus i eahlo, ka hape: “Ini a pane sesëkötre laka, hnene la ketre atr hna catre troa cinyanyine la ketre tus kowe la ketre trehnyiwa, matre troa xatua angeic troa xomihnine la itre ijine akötr. Ngo ini pe a atrehmekune laka, hetre ihnimi nyipo kowe la itre xaa atr me kowe la Akötresie ka eatrongëne la nöjei atr asë ngöne la gojenyi ne mel.”
20. Nemene la enyipiewekëne troa hamë ini cememine la ihnim?
20 Hne së hë lo hna qaja, ka hape, maine kola ce tro la ihnimi memine la atrein, haawe, tro hë sa kepe thangane ka loi. Ame la easa hamë ini, loi e tro la itre hnainin a akökötrene la atrehmekune i angatr göi Akötresie memine la ihnimi angatre koi Nyidrë. Nyipici, maine easa ajane troa maca ngöne la kola hamë ini, nyipi ewekë tro sa hetrenyi la ihnimi ngöne la köni götrane celë, ene la troa hnimi Akötresie me hnine la nyipici, me hnime la itre atr. Maine tro sa eëne la aqane ihnimi cili me amamane lai ngöne la hna cainöj, haawe, tro hë sa melëne la madrine ka tru troa ham, nge ene mina fe la manathith troa atrehmekune laka easa nyitipu Iesu me amadrinë Iehova.
Tro Nyipunieti a Sa Tune Kaa?
• Ame ngöne la easa qaja la maca ka loi kowe la itre xan, tre, pine nemene matre ka nyipi ewekë troa . . .
hnimi Akötresie?
hnine catrëne la itre ini hne së hna hamën?
hnime la itre atr hne së hna hamë ini kow?