Ita Ne Thup Koi 14 Diseba Me Wiike Cili
“Ite Sinenge Nyipunie”
“Maine tro nyipunie a kuca la nöjei ewekë hnenge hna ahnithe koi nyipunie, ite sinenge nyipunie.”—IOANE 15:14.
1, 2. (a) Nemene la aqane mele ne la itre enehmu i Iesu? (b) Pine nemen matre ka nyipi ewekë catr tro sa ce sinee me Iesu?
AME la itre trahmanyi ka ce lapa me Iesu ngöne la hnahag e koho, tre, isa aqane mele i angatre kö. Ame Peteru me Anederea, tre, lue trejine nyidro ka nyi ie. Ame Mataio, tre, ketre telona angeice ekö, ketre huliwa hna methinëne hnene la angetre Iudra. Hetrenyi la itre xan tui Iakobo me Ioane, laka, hnei angatre hna ce tru me Iesu. Ame pena la itre xan, tui Nathaniela, tre, xalaithe hi la itre macatre he ce mele angatr me nyidrë. (Ioane 1:43-50) Ngo ame la nöjei atr asë ka sine lo lai jidri ne Paseka e Ierusalema, tre, ka xecie hnyawa koi angatr, ka hape, Iesu hi lo la Mesia hna perofetan me Hupuna ne la Akötresie ka mel. (Ioane 6:68, 69) Drei la kola akeukawane la hni angatr, ngöne la angatr a drei Iesu e qaja koi angatr, ka hape: “Hnenge hna hape, ite sinenge nyipunie, ke ame la nöjei ewekë asë hnenge hna denge qa thei Kaka, ase hë ni amamane koi nyipunie.”—Ioane 15:15.
2 Ame la Iesu a qaja la itre trenge ewekë celë kowe la itre aposetolo i nyidrë ka nyipici, tre, kösë nyidrëti mina fe a qaja kowe la itre Keresiano hna iën ngöne la hneijine së, me kowe la itre sine tronge i angatre mina fe, ene la “ite xa mamoe.” (Ioane 10:16) Ngacama isa nöje së kö me aqane mele së, ngo ame pe hetrenyi the së la manathithi ka tru, ene la troa ce sinee me Iesu. Sisitria catre la aqane imelekeu së me nyidrë, ke, ame la easa ce sinee me Iesu, tre, easë mina fe lai a ce sinee me Iehova. Eje hi laka, thatreine kö tro sa easenyi koi Iehova, nge thaa hne së kö hna easenyi koi Iesu. (E jë la Ioane 14:6, 21.) Qa ngöne lai, nemene la nyine tro sa kuca, matre tro pala hi sa ce sinee me Iesu? Qëmekene tro sa ithanatane la taane mekun celë ka tru, loi e tro sa pane ce wange la tulu hnei Iesu hna amë pe, ene la troa ketre enehmu ka lolo, nge tro fe sa ce xomi ini qa ngöne la aqane ujë ne la itretre drei Iesu koi nyidrë.
Tulu Hna Amë Hnei Iesu Göne La Troa Ketre Enehmu Ka Lolo
3. Nemene la kepin matre hlemu jë Iesu?
3 Hnei Solomona, ketre joxu ka inamacan hna cinyihane ka hape: “Ala nyimu la itete hnime la ate tena mo.” (Ite edomë 14:20) Kola mama hnyawa e celë la thiina hna xom hnene la itre atr ka thaa pexeje kö, laka, angatre hmekuje hi a thele troa ce sinee memine la itre atr ka troa hamë ewekë i angatr. Thaa hnei Iesu fe kö hna xome la thiina ka ngazo cili. Thaa hna ajojezi nyidrëti kö hnene la etrune la manie ne la ketre atr, maine hnene pena la göhnë ngöne la nöj. Nyipici laka, hnei nyidrëti hna hnime la ketre joxu ka trena mo, me hë angeice troa xötrethenge nyidrë. Ngo, hnei Iesu hna upe la thupëtresiji cili troa pane salemëne la nöjei ewekë hnei angeice hna hetreny, me hamëne la maniene kowe la itre puafala. (Mar. 10:17-22; Luka 18:18, 23) Kola hlemu hnei Iesu thaa hnene kö laka, hnei nyidrë hna ce tro memine la itre atr ka trenamo maine pena ka hetre göhnë ka tru ngöne la nöj, ngo hnene laka hnei nyidrë hna ce sinee memine la itre atr ka puafala me ka akötr.—Mat. 11:19.
4. Pine nemen matre ijije tro sa qaja, ka hape, ka hetre engazone fe la itre enehmu i Iesu?
4 Nyipici laka, ka hetre engazone fe la itre enehmu i Iesu. Ame ngöne la ketre ijin, hna tria la aqane waiewekë i Peteru, laka, ka ifekethe nge thaa ka ihmeku kö memine la mekuna i Iehova. (Mat. 16:21-23) Ame pena ha Iakobo me Ioane, tre, hna mama thei nyidro la ajane troa pi draië, ngöne la nyidroti a sipo Iesu troa nue koi nyidro troa lapane la lue göhnë ka tru ngöne la Baselaia. Hna elëhni hnene la itre xaa aposetolo pine la aqane ujë i nyidro, ene pe qaane iwesitrë i angatre pala hi la aja göhnë ka draië. Ngo hnei Iesu pala hi hna xomihni ahoean me thele troa amekötine la aqane waiewekë ne la itre enehmu i nyidrë; ketre, thaa ka canga wesitre kö nyidrë koi angatr.—Mat. 20:20-28.
5, 6. (a) Pine nemen matre hnei Iesu pala hi hna ce sinee memine la itre xaa aposetolo i nyidrë? (b) Pine nemen matre hnei Iesu hna senge itre otrene ihnimi ka iothekeu nyidrë me Iudra?
5 Kola cile huti la aqane imelekeu i Iesu memine la itre atr cili ka thaa pexeje kö, thaa hnene kö laka nyidrëti a sixane me nuenue la itre xaa ewekë ka ngazo, maine pena nyidrëti a thinge la lue meke i nyidrë ngöne la itre ngazo i angatr. Ohea, nyidrëti pe a catre troa wanga atrune la itre ewekë ka loi ka eje e kuhu hni angatr, memine la itre thiina ka loi i angatr. Drei la ketre ceitun, ame ngöne lo hnepe hawa ka jole catr koi Iesu, tre, thaa hnei Peteru kö me Iakobo me Ioane hna hmek me xatua nyidrë, ngo hnei angatre pe hna meköl. Eje hi laka, thaa madrine kö Iesu hnene la aqane ujë i angatr. Ngo öhne hi nyidrëti laka, ka lolo la itre aliene hni angatr, celë hi matre öni nyidrëti, ka hape: “Kola ajane la hni, ngo kucakuca la ngönetei.”—Mat. 26:41.
6 Ame ngöne la ketre götran, hnei Iesu hna senge la otrene ihinimi ka iothekeu nyidrë me Iudra Isakariota. Ngacama hnei Iudra pala hi hna amamane koi nöjei atr, ka hape, ketre sinee i Iesu angeic, ngo hnei Iesu hë hna atrehmekune laka, ase hë angeice nue la itre ewekë ka ngazo troa ajojezine la hni angeic. Pine laka hnei Iudra hna nyi sinee ne la fen, ene pe ketre ithupëjia i Akötresieti hë angeic. (Iako. 4:4) Qa ngöne lai, ase hë Iesu thipetriji Iudra ngöne lo nyidrëti a qaja pë hë kowe lo ala 11 lao aposetolo ka mele nyipici pe, ka hape, itre sinee i nyidrëti angatr.—Ioane 13:21-35.
7, 8. Hnei Iesu hna amamane tune kaa la ihnimi nyidrë kowe la itre sinee i nyidrë?
7 Thaa hnei Iesu kö hna sasaithi tulu ngöne la aqane goeëne nyidrë la itre ngazo ne la itre sinee i nyidrë, ngo hnei nyidrëti pala hi hna kuca la itre ewekë ka loi thatraqai angatr. Drei la ketre ceitun, hnei nyidrëti hna sipone kowe la Tretretro i nyidrë troa thupë angatr ngöne la angatr a cile kowe la itre itupath. (E jë la Ioane 17:11.) Hnei Iesu hna utipi angatr ngöne la angatr a kucakuca. (Mar. 6:30-32) Nge ketre, hnei nyidrëti hna hnehengazo angatr, thaa ngöne hmekuje kö la nyidrëti a qaja la mekuna i nyidrë koi angatr, ngo ngöne mina fe la nyidrëti a drenge me trotrohnine la itre ewekë hnei angatre hna mekun.—Mat. 16:13-16; 17:24-26.
8 Hnei Iesu hna mel me meci thatraqane la itre sinee i nyidrë. Nyipici laka, atre hnyawa hi nyidrëti ekö, laka, nyipi ewekë tro nyidrëti a huujëne la mele i nyidrë matre troa ihmeku hnyawa memine la thiina ka meköti Akötresie. (Mat. 26:27, 28; Heb. 9:22, 28) Ngo, hnei nyidrëti hna hamëne la mele i nyidrë nyine hatrene la ihnimi nyidrë. Öni Iesu, ka hape: “E tro kete ate a hamëne la mele i angeice thatraqane la ite sine i angeic, pëkö ihnimi ka sisitia hune lai.”—Ioane 15:13.
Nemene La Hna Kuca Hnene La Itretre Dreng Matre Troa Ce Sinee Me Iesu?
9, 10. Hnene la itre atr hna ujë tune kaa kowe la aqane hame i Iesu?
9 Hnei Iesu pala hi hna ham, kola mama ngöne la aqane nue nyidrë la traeme i nyidrë, me aqane ihnimi nyidrë, memine fe la itre mo hnei nyidrëti hna hamën. Celë hi matre nyimutre la itre atr ka ajane troa easenyi nyidrë me ketre hane amamane fe la hni ne ole i angatr koi nyidrë. (Luka 8:1-3) Pine laka hnei nyidrëti hna melëne lai, ene pe ijije hi tro nyidrëti a qaja, ka hape: “Hamënejë, nge tro pena a hamë nyipunie; nge tro hë la nöjei ate a hamëne kowe la imano i nyipunie la tulu ka loi, hna hujan, me ijumejumekeun, me kola malamala. Nge ame la aqane tuluthe hnei nyipunie, te, tro pena a tuluthe koi nyipunie.”—Luka 6:38.
10 Nyipici laka, hnene la itre xaa atr hna thele troa ce sinee me Iesu, göi tro hi a hane kapa la itre thangane ka loi qa ngöne la itre hnei nyidrëti hna kuca. Thaa itre nyipi sinee kö, ke, ame lo kola thaa trotrohnine hnyawa hnei angatr la itre trenge ewekë i nyidrë, ene pe angatre hi a nuetriji nyidrëti ju. Maine ju ijije hi tro angatr a qaja koi Iesu, ka hape, thaa trotrohnine kö angatre la hnei nyidrëti hna qaja, ngo hnei angatr hna canga jele ngazo nyidrë, me hutrö koi nyidrë. Thaa ceitune kö la aqane ujë i angatr memine la itre aposetolo ka mele nyipici. Ngacama ame itre xaa ijin, hna tupath la aqane imelekeu i angatr me Keriso, ngo hnei angatre pala hi hna nue la trenge catre i angatr matre troa xatua nyidrë, itre ijine ka loi ju hë maine ka ngazo pena. (E jë la Ioane 6:26, 56, 60, 66-68.) Ame ngöne lo jidri tixenuë i nyidrë e celë fen, hnei Iesu hna qaja amamane la hni ne ole i nyidrë kowe la itre sinee i nyidrë, ka hape: “Nyipunie la angete cile huti thenge ngöne la hna tupathi ni.”—Luka 22:28.
11, 12. Hnei Iesu hna akeukawane tune kaa la hni ne la itretre drei nyidrë, nge nemene la hnei angatre hna kuca?
11 Thupene la hnei Iesu hna qaja aloine la aqane mele nyipici ne la itretre drei nyidrë, angatre hmaca hi a nuetriji nyidrëti ju. Thaa qea kö nge angatre fe a nue la xoue atr troa he la ihnimi angatr koi Keriso. Ngo hnei Iesu hmaca hna nue la ngazo i angatr. Thupene la meci me mele hmaca i Iesu, hnei nyidrë hna mama koi angatr me anyipicine la ihnimi nyidrëti koi angatr. Ketre, hnei nyidrë hna ahnithe koi angatr la ketre hnëqa, ene la troa “inine la nöjei nöj’ asëjëihë” me anyipici nyidrë “uti hë la cane la fene hnengödrai.” (Mat. 28:19; Ite Hu. 1:8) Nemene ju hë la hna kuca hnene la itretre dreng?
12 Hnene la itretre drenge hna kuca la hnei angatr hna atrein, matre troa akökötrene la maca ne la Baselaia. Hnene la ixatua qaathene la uati hmitrötre i Iehova hna aijijë angatr troa haöth e Ierusalema hnene la ini hnei angatr hna hamën. (Ite Hu. 5:27-29) Ngacama troa humuthi angatr, ngo thaa celë kö la ka sewe angatre troa drengethenge la hnei Iesu hna amekötine koi angatr, ene la troa inine la nöjei atr. Thaa xalaithe ju kö la itre macatre thupene la hnei angatr hna kapa la hna amekötine hnei Iesu, nge kola cinyihane hnei Paulo aposetolo, ka hape, hna cainöjëne la maca ka loi “kowe la nöjei ate asëjëihë e celë fen.” (Kol. 1:23) Thaa luelue kö së, laka, hna anyipicine hnene la itretre dreng ka hape, angatr a wanga atrune la aqane imelekeu i angatr me Iesu!
13. Hnene la itretre dreng hna nue tune kaa la itre ini hna hamëne hnei Iesu troa ketr la itre hni angatr?
13 Ame mina fe la itre atr ka xötrethenge Iesu thupen, tre, hnei angatre hna nue matre tro la itre ini hna hamëne hnei Iesu a hetre thangane ngöne la mele i angatr. Ala nyimu thei angatr, la angetre saze la aqane ujë me itre thiina. Ame itre xan e angatr, tre, itre ka qene sodoma ekö, me ka nyi xetë me ka hmo hnei kahaitr, me ka atrekënö. (1 Kor. 6:9-11) Itre xane a saze la aqane ujë i angatr kowe la itre atr ka isa hane ngönetrei kö me angatr. (Ite Hu. 10:25-28) Ngo, hnei angatre hna drengethenge Iesu. Hnei angatre hna trije la atr ka hekö, me xetrëne la atr ka hnyipixe. (Efe. 4:20-24) Hnene laka atrepengöne hë angatr “la mekuana i Keriso,” ene pe angatr a trotrohnine me nyitipune la aqane waiewekë i nyidrë me aqane ujë i nyidrë.—1 Kor. 2:16.
Aqane Ce Sinee Së Enehila Me Iesu
14. Nemene la hnei Iesu hna thingehnaeane troa kuca, ngöne la “puatine la fewatin”?
14 Nyimutre la itre pane Keresiano ekö ka atrepengöi Iesu hnyawa, maine pena ka hane öhnyi nyidrë thupene la mele hmaca i nyidrë. Ngo ame së, tre, thaa hane fe kö së öhnyi nyidrë. Haawe, tune kaa la aqane tro sa hane ce sinee me Keriso? Ame la ketre aqane tre, ene la troa drengethenge la hna amekötine hnene la lapa ne la hlue ka nyipici me ka inamacan, ene lo itre trejine me Iesu hna iën ka mele pala kö e celë fen. Hnei Iesu hna thingehnaean, ka hape, ame ngöne la “puatine la fewatin,” tre, tro hë nyidrëti a acile la hlue cili matre troa musinëne “la nöjei ewekë i nyidrëti asë.” (Mat. 24:3, 45-47) Ame la itre atr ka nyimutre enehila ka thele troa ce sinee me Iesu, tre, thaa angatre kö a hane sine lo lapa ne la hlue cili. Tro la aqane ujë i angatr kowe la itre hna amekötine hnene la hlue ka nyipici, a aijijë angatre tune kaa troa ce sinee me Keriso?
15. Nemene la ka troa amamane ka hape, ketre mamoe maine ketre gootr, la ketre atr?
15 E jë la Mataio 25:31-40. Hnei Iesu hna hëne la itre atrene la lapa ne la hlue cili ka nyipici, ka hape, itre trejine me nyidrë. Ame ngöne la ceitun ka amamane la aqane thawaluëne la itre mamoe me itre gootr, hnei Iesu hna qaja hnyawa, ka hape, kola ketri nyidrëti hnene la aqane ujë së kowe la itre trejine me nyidrë. Eje hi laka, hnei nyidrëti hna qaja, ka hape, tro hë nyidrëti a wanga atrehmekune la ketre mamoe me ketre gootr, jëne la aqane ujë i angeice kowe la “ka co cate ka lue tejine me [nyidrë].” Qa ngöne lai, maine eje thene la itre ka mejiune troa mele e celë fen, la aja troa ce sinee me Iesu, haawe, ame la pane ewekë nyine tro angatr a kuca, tre, ene la troa sajuëne la lapa ne la hlue ka nyipici.
16, 17. Tro sa amamane tune kaa la aja së troa ce sinee memine la itre trejine me Keriso?
16 Maine epuni a mejiune troa mele e celë fen fene la Baselaia i Akötresie, tro epuni a amamane tune kaa la aja i epuni troa ce sinee memine la itre trejine me Keriso? Loi e tro sa pane ce wange la köni jëne tro sa ce sinee me angatr. Ame la ewekë hnapan, tre, ene la troa catre kuca la huliwa ne cainöj cememine la hni ka pexej. Hnei Keriso lo hna amekötine kowe la itre trejine me nyidrë troa cainöjëne la maca ka loi e cailo fen. (Mat. 24:14) Ngo jole catre enehila kowe la itre thelene la itre trejine me Keriso troa eatrëne la hnëqa cili, e thaa hna xatua angatre kö hnene la itre sine tronge i angatr, ene la itre xaa mamoe. Eje hi laka, maine kolo pala hi a xome la huliwa ne cainöj hnene la itre atrene la lapa ne la itre xaa mamoe, haawe, angatre hi lai a xatuane la itre trejine me Keriso troa eatrëne la hnëqa ka hmitrötr hna ahnithe koi angatr. Atraqatre la hni ne ole i Keriso memine la hlue ka nyipici me ka inamacan, kowe la aqane ujë celë.
17 Ame la hnaaluene aqane tro la itre xaa mamoe a xatuane la itre trejine me Keriso, tre, ene la troa sajuëne la huliwa ne cainöj jëne la itre ahnahna i angatr. Hnei Iesu hna ithuecatre kowe la itretre drei i nyidrë troa thele sinee hnene la itre “tenga mo ka tha meköti kö.” (Luka 16:9) Thaa kolo kö a qaja, ka hape, ka hetre thupen la troa ce sinee me Iesu maine Iehova pena. Ngo maine tro sa huliwane la itre mo së matre troa sajuëne la itre aja ne la Baselaia, easë hi lai a amamane la aja së troa ce sinee me nyidro me ihnimi së koi nyidro, thaa jëne hmekuje kö la itre trenge ewekë, ngo jëne mina fe “la huliwa me nyipici.” (1 Ioane 3:16-18) Easa hamëne la itre ahnahna cili ngöne la easa cainöjëne la maca ka loi, me ngöne la easa hamë mani matre troa xup me nyidrawane la itre uma ne icasikeu, me ngöne la easa ami mani kowe la huliwa ne cainöje e cailo fen asë. Ngacama co ju hë maine tru la etrune la itre ahnahna së, ngo xeci e kuhu hni së laka, atraqatre la hni ne ole i Iehova me Iesu kowe la aqane hamëne madrine së la itre ewekë cili.—2 Kor. 9:7.
18. Pine nemen matre loi e tro sa trongëne la itre hna amekötine qa hnine la Tusi Hmitrötr hna hamën hnene la itre qatre thup ne la ekalesia?
18 Ame la hnaakönine aqane tro sa amamane laka, itre sinee i Keriso së, tre, ene la troa ce huliwa me drengethenge la itre hna amekötine hnene la itre qatre thup ne la ekalesia. Hnei Keriso hna acile la itre trahmanyi cili jëne la uati hmitrötr. (Efe. 5:23) Hnei Paulo aposetolo hna cinyihan, ka hape: “Ideiju kowe la ite mekene i nyipunie, me denge thenge ju.” (Heb. 13:17) Ame itre xaa ijin, maine jë nango jole koi së troa drengethenge la ketre hna amekötine qa hnine la Tusi Hmitrötr nge hna hamëne hnene la lapa ne la itre qatre thup. Atre hnyawa hi së laka itre atr ka thaa pexeje kö angatr, nge ijije tro lai a atriane la aqane goeëne së la itre eamo hnei angatre hna hamën. Ngo eje thei Keriso He ne la ekalesia, la aja troa huliwane la itre atr cili ka thaa pexeje kö. Haawe, tro ha hetre thangane la aqane ujë së kowe la musi angatr, ngöne la aqane thele së troa ce sinee me Keriso. Maine tro sa elë hun la itre hnepe ngazo ne la itre qatre thup, me madrine troa trongëne la hnei angatre hna amekötin, haawe, easë hi lai a amamane la ihnimi së koi Keriso.
Tro Sa Öhne Ekaa La Itre Enehmu Ka Lolo
19, 20. Nemene la hne së hna troa öhne e hnine la ekalesia, nge nemene la hne së hna troa ce wange ngöne la hna cinyihane ka troa xulu?
19 Kolo pala hi a thupë së hnei Iesu, thaa hnene hmekuje kö la hna xomiuji së hnene la itretre thupë mamoe ka ihnim, ngo hnene mina fe la hna hamë thine së ngöne la götrane la ua, me itre trejine trahmanyi me föe e hnine la ekalesia. (E jë la Mareko 10:29, 30.) Ame ngöne lo epuni a xötrei lö hnine la organizasio i Iehova, hnene la itre sinee i epuni hna ujë tune kaa? Hnei angatre hna xatua epuni troa catre easenyi koi Akötresie me Keriso. Ngo hnei Iesu hna hmekëne ka hape, ame itre xaa ijin, “ame la nöjei ithupëjia memine la ate, te, it’ eje kö ngöne la hnalapa i angeice kö.” (Mat. 10:36) Drei la kola akeukawane la itre hni së troa atre laka, ame e hnine la ekalesia, tre, ijije hi tro sa öhne la itre atr ka troa fedre catre koi së, hune la ketre trejine me easë ngöne la ngönetrei!—Ite edomë 18:24.
20 Kola mama hnyawa jëne la itre ibozu i Paulo ngöne la pune la tusi nyidrë kowe la ekalesia ne Roma, laka, nyimutre la itre enehmu i nyidrë. (Rom. 16:8-16) Hnei Ioane aposetolo hna nyipune la hnaakönine tusi nyidrë, ka hape: “Ini a isa hnime kowe la ite sine.” (3 Ioane 14) Eje hi laka nyimutre mina fe la itre sinee i nyidrë, nge ka cile huti la aqane imelekeu i angatr. Tro sa trongëne tune kaa la tulu i Iesu memine lo itretre drei i nyidrë ekö, ene la troa eköthe me acatrene la aqane ce sinee së memine la itre trejine me easë hnine la ekalesia? Tro la hna cinyihane ka troa xulu a sa la hnyinge celë.
Tro Nyipunieti A Sa Tune Kaa?
• Nemene la tulu hna amë hnei Iesu ngöne la troa ketre enehmu ka lolo?
• Nemene la hna kuca hnene la itretre dreng matre tro pala hi a ce sinee me Iesu?
• Tro sa amamane tune kaa, laka, easa ce sinee me Keriso?