Troa Xome La Ita Ne Thup Celë e 10 Mei Me Wiike Cili
Catre Jë Nyipunie Troa Tro Ngöne La Ua Me Mele Thenge La Hnei Nyipunie Hna Sa Xepu
“Tro pala hi nyipunie ngöne la Ua, mate tha kuca kö nyipunie la aja i ngönetei.”—GAL. 5:16.
1. Nemene pengöne bapataiso lo hna kuca ngöne lo ijine Penetekos?
KOLA ithanatane la itre xaa qene hlapa hnene lo itretre drei Iesu ngöne lo ijine Penetekos 33 M.K., thupene la hna bapataiso angatr hnei uati hmitrötr. Hnei angatre hna melëne la ketre iamamanyikeu, ketre ahnahna qaathene la ua cili. (1 Kor. 12:4-10) Nemene lo la thangane la ahnahna cili memine la hna cainöj hnei Peteru? Nyimutre la itre atr “hna thine la ite hni.” Tune lo hna thuecatre koi angatre hnei Peteru, angatr a ietra jë me hane bapataiso. Kola qaja hnene la edromë, ka hape: “Ame hna bapataiso angat’ angete kapa la tenge ewekë i angeic; nge hna nyi xane koi angate ngöne la drai cili kösë köni thausan.” (Ite hu. 2:22, 36-41) Tune lo hna inine hnei Iesu, ase hë bapataiso angatr ngöne tim me ngöne la atresiwa ne la Tretretro, me Hupuna me uati hmitrötr.—Mat. 28:19.
2, 3. (a) Qaja jë la eisapengönene la troa bapataiso hnei uati hmitrötr memine la troa bapataiso ngöne la atresiwa ne la uati hmitrötr. (b) Pine nemene matre nyipi ewekë tro la itre nyipi Keresiano enehila a bapataiso ngöne tim?
2 Ngo hapeu, hetre eisapengönene kö la troa bapataiso hnei uati hmitrötr memine la troa bapataiso ngöne la atresiwa ne la uati hmitrötr? Eje hi. Ame la itre atr ka bapataiso hnei uati hmitrötr, tre, itre hna hnahone hmaca, ke, itre nekö i Akötresieti hë angatr, itre hna iëne hnei uati hmitrötr. (Ioane 3:3) Hna ië angatr matre troa itre joxu elany me itretre huuj ngöne la Baselaia i Akötresie e koho hnengödrai, me hane nyi hnepe ngönetrei i Keriso ngöne la götrane la ua. (1 Kor. 12:13; Gal. 3:27; Hna ama. 20:6) Qa ngöne lai, ame la kola bapataisone la itre atr hnei uati hmitrötr, tre, celë hi ketre hna amekötine lai hnei Iehova qaane lo ijine Penetekos uti hë enehila; Nyidrëti a iëne la itre atr angatr isa ala cas, itre ka troa hane sine la matra i Keriso. (Rom. 8:15-17) Ngo nemene pe kö la aliene la bapataiso ngöne la atresiwa ne la uati hmitrötr, lo hna majemine kuca hnene la nöje i Iehova enehila ngöne la itre asabele me kovasio?
3 Ketre ewekë nyine troa kuca hnene la itre nyipi Keresiano, ene la troa bapataiso ngöne la tim matre troa nyihatrene la mel hnei angatre hna nue apexejene koi Iehova Akötresie. Hna amekötine lai kowe la itre atr hna hëne troa mele e koho hnengödrai. Ngo ketre hna amekötine mina fe lai kowe la itre milio lao trahmanyi me föe enehila ka mejiune troa mele epine palua e celë fen. Ngacama isa pengöne kö la mejiun ne la itre atr, ngo nyipi ewekë tro angatr a bapataiso ngöne la atresiwa ne la Tretretro, me Hupuna, me uati hmitrötr, matre troa kepe angatr hnei Akötresie. Qa ngöne lai, ame la nöjei Keresiano ka xome la bapataiso cili, tre, nyipi ewekë tro angatr a “tro pala hi . . . ngöne la Ua.” (E jë la Galatia 5:16.) Hapeu, epuni kö a tro ngöne la ua, me catre mele thenge la hnei epuni hna sa xepu?
Nemene La Alien La Troa “Tro . . . Ngöne La Ua”
4. Kola hapeue la troa “tro . . . ngöne la ua”?
4 Ame la troa “tro . . . ngöne la ua,” tre, kola hape troa nue la uati hmitrötr troa huliwa ngöne la mele së me eatrongë së. Ame ngöne la ketre götran, tre, kola hape, troa nue la uati hmitrötr troa musinëne la mele së ngöne la nöjei drai. Kola mama ngöne Galatia mekene 5 la eisapengönene la troa nue troa musinë së hnene la uati hmitrötr memine la troa musinë së hnene la ngönetrei së.—E jë la Galatia 5:17, 18.
5. Nemene la itre huliwa nyine tro sa ananyin, matre tro sa nue la uati hmitrötr troa musinë së?
5 Maine tro sa nue troa musinë së hnene la uati hmitrötr, haawe, tro hë sa thele troa ananyine la itre huliwa ne la ngönetrei. Kolo lai a qaja “la kuci ngazo, me thina ka sis, me qene tratraij, me hmi kowe la idola, me nyi haze, me ithupëjia, me iwatratra, me ikucany, me iwesitë, me ikelikelë, me kaqa, me isathë, me iqenehelë, me hmo hnei ka hait, me pelulu.” (Gal. 5:19-21) Kola hape, loi e tro sa “ humuthe la ite huliwa ne la ngönetei hnene la [“ua,” MN].” (Rom. 8:5, 13) Tro hë lai a xatua së troa hnehene la itre ewekë ne la ua me ce huliwa memine ej, hune la troa nue la itre aja ne la ngönetrei troa musinë së.
6. Amamane jë jëne la ketre ceitun, la enyipiewekëne troa eëne la wene ne la ua.
6 Pine laka kola huliwa la uati hmitrötr ngöne la mele së, haawe tro hë sa melëne la itre thiina i Akötresie, ene la “wene la Ua.” (Gal. 5:22, 23) Ngo easa atrehmekune laka, nyipi ewekë tro sa catr. Hanawange la ketre ceitun: Kola eënyi hnene la ketre atr. Nyipici laka nyipi ewekë catr la jö me tim; e paatre kö la lue ewekë cili, eje hi laka, thatreine kö tro angeic a menuëne hnyawa la zi angeic. Ketre, ijije tro sa aceitunëne la uati hmitrötr memine la jö. Nyipi ewekë catr tro sa hetrenyi la uati hmitrötr, matre troa eëne la wene ne ej. Ngo nemene la hna troa menuëne hnene la atre eëny, e thaa hnei angeice kö hna catre huliwa? (Ite edomë 10:4) Eje hi, tro ha lolo me mana la wene ne la ua ngöne la mele së, e hne së hna catre troa nyihnyawane la hni së. Qa ngöne lai, isa thele jë, ka hape, ‘Hapeu, eni kö a nue la uati hmitrötr troa huliwa e kuhu hning, me wa wene ka loi?’
7. Pine nemen matre nyipi ewekë tro sa ini Tus me sine thel ej, e easa ajane troa eëne la wene ne la uati hmitrötr?
7 Maine kola ajane hnene la itre ka eëny troa wa wene hnyawa la hlapa, haawe, nyipi ewekë tro angatr a fie lapaane la itre feja i angatr hnei tim. Maine epuni a ajane troa eëne la wene ne la ua, nyipi ewekë la itre nyipici e hnine la Tusi Hmitrötr, me e hnine la ekalesia ne Keresiano enehila. (Is. 55:1) Maine jë hnei epuni hna amamane kowe la itre atr ka nyimutre laka, ketre thangane la huliwa ne la uati hmitrötr, lo Itre Hna Cinyihan Ka Hmitrötr. (2 Tim. 3:16) Ketre, kola aijijë së hnene la lapa ne la hlue ka nyipici me ka inamacan troa trotrohnine la itre nyipici qa hnine la Tusi Hmitrötr, ene lo timi ka pë ethan. (Mat. 24:45-47) Haawe, kola mama e celë la nyine tro sa kuca. Tro ha hetre emenene la uati hmitrötr ngöne la mele së, e hne së hna e me sine thele la Wesi Ula i Akötresie. Maine tro sa ujë tune lai, haawe, easë hi lai a xome la tulu ka lolo ne la itre perofeta ekö ka “thele me hnyingëne” la itre ithuemacany hna hamën. The thëthëhmine kö së laka, itre angela mina fe a thele troa atrepengöne la itre nyipici ngöne la götrane la ua, göne lo Matrane hna thingehnaean memine lo ekalesia ne la itre Keresiano hna iën.—E jë la 1 Peteru 1:10-12.
Troa Hetre Menene Tune Kaa La Ua Ngöne La Mele Së?
8. Pine nemene matre nyipi ewekë tro sa sipone koi Iehova la uati hmitrötre i Nyidrë?
8 Ngo thaa tro hmekuje kö a inine hi la Itre Hna Cinyihan me sine thele itre ej. Nyipi ewekë tro pala hi sa thele la ixatua qaathei Iehova. Atreine hi tro Nyidrëti a “kuca la nöjei ewekë asë ka sisitia hune la hne shë hna sipone me mekune kow.” (Efe. 3:20; Luka 11:13) Ngo tro së a sa tune kaa kowe la ketre atr ka hnying, ka hape, “Maine atre hë Akötresie ‘[la ewekë hnenge hna ajan,] pine nemene matre tro pala kö ni a sipo’?” (Mat. 6:8) Ame la kepin, tre, ame la easa sipone la uati hmitrötr, easë hi lai a amamane la mejiune së koi Iehova. Drei la ketre ceitun, maine ketre atr a sipo ixatua the së, eje hi laka tro sa kuca la hne së hna atrein matre troa xatua angeic; ngo ame la pane kepin matre angeic a sipo ixatua the së, tre, hnene laka angeic a mejiune koi së. (Aceitunëne jë me Ite Edomë 3:27.) Ketre tune mina fe, atraqatre la madrine i Iehova ngöne la easa sipone la uati hmitrötre i Nyidrë, nge eje hi laka thaa tro jë kö Nyidrëti a cipane koi së.—Ite edomë 15:8.
9. Nemene ixatua la hna hamë së hnene la itre icasikeu matre atreine së mele thenge la uati hmitrötre i Akötresie?
9 Hetrenyi la ketre jëne troa nue la uati hmitrötre i Akötresie troa musinëne la mele së; kola qaja la itre icasikeu me itre asabele me itre kovasio. Nyipi ewekë tro sa catr troa hane sine me drenge hnyawa la porogaram. Maine tro sa ujë tune lai, haawe, tro ha xatua së troa trotrohnine “la nöjei ewekë asë ga jui Akötesie.” (1 Kor. 2:10) Ketre, nyimutre la itre manathithi hne së hna troa kapa, e hne së hna catre troa qeje mekun. Pane mekune jë së lo itre icasikeu hne së hna sin ngöne lo fao lao wiik ka asë hë. A ije lao lime së troa hane sa la ketre hnying matre troa qaja amamane la lapaune së? Hapeu, hetre ewekë kö nyine tro sa kuca ngöne la götrane cili? Maine eje hi, haawe, catre pi së troa eatrëne lai ngöne la itre wiik ka troa traqa. Eje hi laka tro hë Iehova a öhne la aja ka eje the së troa hane qeje mekun, nge tro hë Nyidrëti a hamëne la uati hmitrötre i Nyidrë, matre troa xatua së troa kepe thangane hnyawa qa ngöne la hne së hna sine la itre icasikeu.
10. Maine easa ajane troa tro ngöne la ua, nemene ihë la hne së hna troa catre tro fë kowe la itre xan?
10 Maine easa ajane troa tro ngöne la ua, nyipi ewekë mina fe troa kapa la ihë celë ngöne Hna Amamane 22:17, kola hape: “Öni Ua me tepu i Iesu, ka hape, Trohemi. Nge loi e hapejë la ate denge, Trohemi. Nge ame la ate pi iji, Trohemi. Nge ame la ate ajan, xome gufane jë la timi ka mel.” Kola ihë hnene la ua troa xome la timi ka mel, jëne la lapa ne la tepu, ene lo itre hna iën. Maine ase hë së kapa la ihë, ka hape, “trohemi,” tre, hapeu easë kö a hane catre qaja kowe la itre xan, ka hape, “Trohemi”? Drei la ketre manathithi ka tru, troa hane catre kuca la huliwa cili ka troa hamë mel!
11, 12. Kola mama tune kaa la thangane la uati hmitrötr ngöne la huliwa ne cainöj?
11 Hnene la ixatua ne la uati hmitrötr, matre kola eatre hnyawa enehila la huliwa ne iamele cili. Easa öhne ngöne lo hneijine i Iesu la thangane la uati hmitrötr ngöne la kola fe la itre xaa teritoare ka hnyipixe kowe la itre mesinare. “Hnei Uati Hmitöte hna shewe [Paulo aposetolo memine la itre sine tronge i nyidrë] troa qaja la tenge ewekë e Asia”; ketre, thaa hna nue angatre kö troa tro Bithunia eë. Thatre hnyawa kö së la aqane sewe angatr hnene la ua troa tro kowe la itre götrane cili, ngo kola mama laka hnene la ua hna eatrongë Paulo kowe la lapa ka tru e Erop. Thupene lai, hnei nyidrëti hna meköle goeëne la ketre trahmanyi ne Makedonia e sipo ixatua.—Ite hu. 16:6-10.
12 Ketre tune mina fe enehila, kola elemekene la huliwa ne cainöj e cailo fen hnene la ua i Iehova. Eje hi laka thaa Iehova hmaca kö a hamëne la itre hna amekötin jëne la itre hna meköle goeën, ngo Nyidrëti pe a köja gojenyine la itre hna iën jëne la uati hmitrötre i Nyidrë. Nge ua mina fe la ka upe la itre trejin, trahmanyi me föe troa kuca la hnei angatre hna atrein, matre troa cainöj me inine la itre atr. Maine jë epuni mina fe a hane catre troa eatrëne la huliwa ne iamele cili. Hapeu, epuni kö a thele troa akökötrene la madrine i epun ngöne la huliwa ka lolo cili?
13. Tro sa nue tune ka la uati hmitrötr troa eatrongë së? Qaja jë la ketre ceitun.
13 Loi e tro sa drengethenge la aqane eatrongë së hnene la uati hmitrötr, hnene la hna trongëne la itre ithuemacanyi hna hamëne kowe la nöje i Akötresie. Tro sa pane ce wange la tulu i Mihoko, ketre thöthi ne Zapo. Hnene laka angeice petre hi a xome la huliwa ne pionie, ene pe angeic a mekun, ka hape, thatreine kö angeic troa iwai hmaca; thatre kö angeic la aqane troa ahlëne la aja ka eje thene la ketre atr. Ame ngöne la ijine cili, hna hamëne ngöne la Huliwa Ne Baselaia la itre mekun nyine ixatua ngöne la aqane troa iwai hmaca. Thupene lai, hna fejane la boroshür hna hape, Une vie pleinement satisfaisante : Comment ? Celë hi mekune hna thele me ajane troa sa hnene lo angetre Zapo. Ene pe hnei Mihoko hna trongëne la itre mekun hna hamën göne la aqane troa tro fë la boroshüre cili ngöne la kola iwai hmaca. Thaa hmitre kö nge angeice fe hë a nyiqaane inine la Tusi Hmitrötr memine lo itre atr ka xele ekö ma ini Tus. Öni angeice, ka hape, “Ala nyimu catre hë la itre atr ka ini Tus me ini, goi xomiujine fe ni la truelof lao ini tus ngöne la ketre ijin, matre hnenge hna pane sipone kowe la itre xan troa itreqe!” Tro hë sa kepe thangane ka loi maine tro sa catre tro ngöne la ua, me trongëne la itre hna amekötine kowe la itre hlue i Iehova.
Loi e Tro Sa Mejiune Kowe La Uati Hmitrötre i Akötresie
14, 15. (a) Nemene la ka aijijëne la itre atr ka thaa pexeje kö troa mele thenge la hnei angatre hna sa xepu? (b) Tro hë sa hetre enehmu hna jëne nemen?
14 Pine laka hna acili së troa nyihlu, haawe, hetrenyi la ketre huliwa nyine tro sa eatrën. (Rom. 10:14) Maine jë easa mekun, ka hape, thaa ijiji së kö troa xome la hnëqa cili. Ngo Akötresieti la ka aijijë së tune la aqane aijijë angetre hna iën hnei Nyidrëti ekö. (E jë la 2 Korinito 3:5.) Maine tro sa catre kuca la hne së hna atrein me mejiune kowe la uati hmitrötre i Akötresie, tre, tro hë sa mele thenge la hne së hna sa xepu koi Akötresie.
15 Nyipici, thaa ka pexeje kö së, ene pe jole koi së troa mele thenge la hne së hna sa xepu kowe la Akötresie ka pexej ene Iehova. Maine jë troa sesëkötre hnene la itre xaa atr ka ce mele me easë ekö, hnene laka, saze hë la aqane mele së, nge maine jë tro angatr a ‘jele ngazo së.’ (1 Pet. 4:4) Ngo thaa tro pi kö sa thëthëhmin laka, hetre itre xaa enehmu së hë, nge ame la ka sisitria catr, tre, ene la troa ce me Iehova me Iesu. (E jë la Iakobo 2:21-23.) Nyipi ewekë mina fe troa atre hnyawa la itre trejin trahmanyi me föe ne la ekalesia së, ke, itre atrene la lapa i “ange tejin” e cailo fen asë. (1 Pet. 2:17; Ite edomë 17:17) Tro Iehova a xatua së jëne la uati hmitrotre i Nyidrë troa öhnyi enehmu së ka troa xatua së nge ka troa aijijë së troa kepe thangane ka loi qa ngöne la hne së hna ce me angatr.
16. Pine nemene matre ijije tro sa “madine la nöjei kucakuca,” tui Paulo?
16 Ngacama kola xatua së hnene la itre enehmu së hnine la ekalesia, ngo thaa ka hmaloi kö troa isa cile pë hë kowe la itre itupathi ngöne la nöjei drai. Maine jë tro sa kucakuca e itre xaa ijin ngöne la easa cile kowe la itre jol, kösë easë e hnine la ketre hnaop. Celë hi ijine tro së lai a thithi koi Iehova, me sipone la uati hmitrötre i Nyidrë. Hnei Paulo aposetolo hna cinyihan, ka hape: “E kucakuca ni, celë hi ijine cate ni.” (E jë la 2 Korinito 4:7-10; 12:10.) Atre hnyawa hi Paulo, laka, ijije tro la ua i Akötresie a xatuane la atr ka kucakuca troa thipetrije la itre hnepe ngazo i angeic ngacama jole catre ju hë. Qa ngöne lai, ijije mina fe tro la ua i Akötresie a aegöcatrenyi së ngöne la easa kucakuca me aja ixatua. Hnei Paulo hna cinyihan, ka hape, nyidrëti a “madine la nöjei kucakuca.” Nyidrëti a öhne la thangane la uati hmitrötr ngöne la mele i nyidrë, ngöne la itre ijine nyidrëti a kucakuca. Ijije mina fe tro sa melëne la hnei nyidrëti hna melëne hë!—Rom. 15:13.
17. Kola xatua së tune kaa hnene la uati hmitrötr troa traqa hnyawa ngöne la götran hne së hna tro kow?
17 Nyipi ewekë tro sa hetrenyi la ua i Akötresie, matre tro sa mele thenge la hne së hna sa xepu koi Nyidrë. Mekune jë së laka, easë la kapen ne la ketre bootr. Aja së troa nyihlue i Iehova uti hë epine palua. Kola aceitunëne la uati hmitrötr memine la eny hne së hna thele troa ea la bootr, matre tro sa traqa hnyawa ngöne la götran hne së hna tro kow. Thaa aja së kö troa xom agö së hnene la ua ne la fene i Satana. (1 Kor. 2:12) Qa ngöne lai, nyipi ewekë tro sa atrehmekune hnyawa la nyipi eny me drengethenge ej. Nge ame la enyi cili, tre, uati hmitrötr. Haawe, tro hë la uati hmitrötr a ee së kowe la gojenyi ka meköt, jëne la Wesi Ula i Akötresie me organizasio i Nyidrë hna elemekene hnene la ua.
18. Nemene la hnei epuni hna catre kuca, nge pine nemen?
18 Maine easa hane inine la Tusi Hmitrötr cememine la Itretre Anyipicine i Iehova, me madrine troa casi me angatr ngöne la götrane la ua, ngo thaa hne së pala kö hna sa xepu me xome la bapataiso, haawe, isa thele jë së ka hape, ‘Pine nemen matre eni a luelu?’ Maine easa wanga atrehmekune la hnëqa ne la uati hmitrötr ngöne la aja i Akötresie, me wanga atrune la eloine ej ngöne la mele së, haawe, catre jë së troa kuca la ewekë ka meköt thenge la hne së hna inin. Eje hi laka tro Iehova a amanathithi së hnyawa. Tro Nyidrëti a hamëne gufane koi së la uati hmitrötre i Nyidrë. Maine ka hekö hë së xome la bapataiso, haawe, öhne fe hë së la thangane la uati hmitrötr ngöne la mele së. Öhne hë së nge hne së fe hë hna melëne la aqane aegöcatrenyi së hnei Akötresie jëne la ua i Nyidrë. Nge tro pala pë hë a tune lai uti hë epine palua. Qa ngöne lai, epi tro pala hi sa catre ce tro memine la uati hmitrötr.
Mekune Pala Kö Nyipunie?
• Kola hapeue la troa “tro . . . ngöne la Ua”?
• Nemene la ka troa xatua së troa “tro pala hi ngöne la Ua”?
• Tune kaa la aqane tro sa mele thenge la hne së hna sa xepu?