Troa Xome La Ita Ne Thup Celë e 5 Julai Me Wiike Cili
Itre Föe Fe, Pine Nemene Matre Loi e Tro Nyipunieti a Drengethenge La Mus?
“Trahmanyi la he i fö.”—1 KOR. 11:3.
1, 2. (a) Nemene la hnei Paulo aposetolo hna cinyihane göi mus me idrengethenge tune lo hna amekötine hnei Iehova? (b) Nemene la itre hnying hna troa ithanatane ngöne la hna cinyihane celë?
HNEI Paulo aposetolo hna qaja la aqane amekötine Iehova la pengöne la mus ngöne la nyidrëti a cinyihan, ka hape, “Keriso la he ne la nöjei trahmany” nge “Akötesieti la he i Keriso.” (1 Kor. 11:3) Hnene lo hna cinyihane hnapan hna amamane laka, hnei Iesu hna goeëne la troa drengethenge Iehova Akötresie He i nyidrë, ceitu me ketre manathithi ka tru me ketre jëne madrin; nge ame kowe la itre Keresiano trahmany, tre, Iesu la He i angatr. Hna mama ngöne la aqane ujë i Keriso kowe la itre atr, laka, ka thiina ka lolo nyidrë, me ka menyik, me ka utipin, nge thaa ka sipu meku nyidrëti kö. Celë hi la aqane tro la itre trahmanyi a ujë kowe la itre xan e hnine la ekalesia, ngo sisitria catre kö kowe la itre föe i angatr.
2 Nge tune kaa fe la itre föe? Drei la He i angatr? Hnei Paulo hna cinyihan, ka hape: “Trahmanyi la he i fö.” Tro la itre föe a goeëne tune kaa la trenge ewekë celë? Maine thaa ka hmi kö la trahmany, hapeu, tro pala kö a trongëne la trepene meköti celë? Hapeu, ame la troa drengethenge la musi trahmany, tre, kolo lai a hape, tro pe hi la föe a lapa thaup, me thaa hane sine la kola troa axecië mekun? Tune kaa la aqane troa qaja aloine la föe?
“Tro Ni a Kuca Thatraqai Angeice La Ixatua Ka Ijij”
3, 4. Pine nemen matre hetre thangane ka loi la itre hna amekötin göi mus hnine la faipoipo?
3 Iehova la qaane la itre hna amekötine göi mus. Thupene la hna xupi Adamu, öni Iehova Akötresie, ka hape: “Tha loi kö e troa lapa casi la at. Tro ni a kuca thatraqai angeice la ixatua ka iji.” Thupene la hna xupi Eva, ene pe kola elitrauje la madrine i Adamu, ke, hetre sine tronge i angeice hë me ixatua; haawe, öni angeic, ka hape: “Dei lola june sine la ite juneng, me ijöne sine la ijöng.” (Gen. 2:18-24) Hnei Adamu me Eva hna kapa la manathithi ka tru troa lue keme me thine ne la nöjei atr asë ka pexej, ka troa mele epine palua cememine la madrin ngöne la Paradraiso e celë fen.
4 Pine laka hnene lo lue pane keme së hna icilekeu, haawe, luuzi hë la mele ka pexej ngöne la hlapa e Edena. (E jë la Roma 5:12.) Ngo thaa saze kö la itre hna amekötine hnei Iehova göi mus. Maine tro sa trongëne hnyawa la itre hna amekötine cili, tro hë sa kapa la itre manathithi ka tru me tro loi la mele së hnine la faipoipo. Ketre, tro hë sa melëne la itre manathithi hnei Iesu hna kapa qa ngöne la hna drengethenge la He i nyidrë, ene Iehova. Qëmekene tro Iesu a traqa e celë fen, hnei nyidrë hna “madi xajawa i [Iehova] o ijin’ asë.” (Ite edomë 8:30) Hnene laka thaa ka pexeje kö la itre atr, ene pe, thatreine kö troa pexej la aqane musi ne la itre trahmany; nge, thatreine kö troa pexej la aqane idrengethenge ne la itre föe. Ngo maine tro la itre trahmanyi me itre föe a catre troa kuca la hnei angatre hna atrein, tro hë angatr a mele madrin hnine la faipoipo.
5. Pine nemen matre loi e tro la lue trefën a wanga atrune la eamo hna hamën ngöne Roma 12:10?
5 Maine troa tro loi la faipoipo, nyipi ewekë tro la lue trefën a trongëne la eamo celë qa hnine la itre Hna Cinyihan hna hamëne kowe la nöjei Keresiano asë, kola hape: “Ihnimikeuneju tune la aqane ihnimi tejin. Pi pa troa atrune la kete.” (Rom. 12:10) Loi e tro mina fe la lue trefën a catre troa “ihnimi ipitö . . . , nge iutipinekeun, kola inu’ aloinekeun.”—Efe. 4:32.
Maine Thaa Ka Hmi Kö La Föe Hmunë
6, 7. Nemene la thangan e tro la föe Keresiano a drengethenge la föi nyiidro ka thaa hmi kö?
6 Maine thaa ka nyihlue i Iehova kö la föi nyipunie, haawe, nemene la nyine tro nyipunieti a kuca? Nyimutre la itre trefën, ngöne laka trahmanyi la ka thaa hmi. Ame ngöne la götrane cili, tune kaa la aqane tro la föe a ujë kowe la trahmanyi angeic? Kola sa hnene la Tusi Hmitrötr, ka hape: “Nyipunie ite fö, denge thenge ju la ite fö’ i nyipunie; thatraqan’ e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo thaa hnei wesi ula; e goeëne hnei angate la thina i nyipunie a pë ethan, nge kola qou.”—1 Pet. 3:1, 2.
7 Ngacama thaa ka hmi kö la trahmany, ngo Wesi Ula i Akötresieti a upe la föe troa drengethenge angeic. Ijije tro la thiina ka lolo i nyiidro a ukune la föi nyiidro troa thele troa atrepengöne la kepin matre nyiidro a ujë tune lai. Nge ame la thangane lai, maine jë tro la trahmanyi a inine la itre ini hna mejiune kow hnene la föe Keresiano, me hane kapa e thupen la nyipici.
8, 9. Maine thaa ujë hnyawa kö la trahmany ka thaa hmi kö kowe la föe Keresiano ka thiina ka lolo, haawe, nemene la nyine tro nyiidro a kuca?
8 Ngo maine thaa kapa kö la nyipici hnene la trahmany ka thaa hmi kö, nemene hë la nyine tro la föe a kuca? Kola ithuecatre hnene la Itre Hna Cinyihan kowe la föe ka hmi troa eëne la itre thiina ne Keresiano ngöne la nöjei drai, ngacama traqa ju hë la itre jol. Drei la ketre ceitun, kola qaja ngöne 1 Korinito 13:4, ka hape: “Ihnimi la ate xome ahoean.” Haawe, loi e tro pala hi la föe Keresiano a catre troa ujë cememine “la hni ka ipië me menyik, memine la xomi hni ahoeany,” me thele troa xomihnine la jole cili ngöne la ihnim. (Efe. 4:2) Ijije tro la uati hmitrötre i Akötresie a xatua nyipunie troa eëne pala hi la itre thiina ne Keresiano, ngacama catrehnine ju hë la itre jol.
9 Hnei Paulo hna cinyihan, ka hape: “Ateine ni troa kuca la nöjei ewekë asëjëihë hnei nyidëti ate aegöcatenyi ni.” (Fil. 4:13) Hnene la ua i Akötresie, matre ijije tro la trahmany maine föe Keresiano, a kuca la itre ewekë ka nyimutre hna thatreine kö kuca hnei ketre e nyidro. Drei la ketre ceitun, hnene laka ka iakötrë la aqane ujë ne la trahmanyi kowe la föe, haawe, maine jë tro la föe a thele troa itëkeun. Ngo Tusi Hmitrötr a qaja kowe la nöjei Keresiano asë, ka hape: “The të kö la ngazo i kete ate hnei ngazo. . . . Qa ngöne la ase hë cinyihan, ka hape, Öni Iehova kola ulatin, qânge troa të ite ngazo, tro ni a nyi thupen.” (Rom. 12:17-19) Ketre tune mina fe, kola hamë së la ketre eamo ngöne 1 Thesalonika, ka hape: “Wange kö, the tro kö kete ate a të la ngazo hnei ngazo koi kete ate; ngo tro pala hi nyipunie a xöte thenge la ka loi, thei nyipunieti kö, me nöjei ate asë.” Jëne la ixatua ne la uati hmitrötre i Iehova, atreine hi së troa kuca la itre ewekë hne së hna thatreine kuca hnene la sipu trenge catre së. Drei la enyipiewekëne tro sa sipone la uati hmitrötre i Akötresie jëne la thith, matre tro ej a hamë së la ka pë the së!
10. Hnei Iesu hna cile tune kaa kowe la itre trenge ewekë me itre huliwa ka ngazo ne la itre xan?
10 Hetre tulu ka lolo hnei Iesu hna amë ngöne la aqane ujë kowe lo itre atr ka qaja maine kuca pena la itre ewekë ka ngazo koi nyidrë. Kola qaja ngöne 1 Peteru 2:23, ka hape: “Lo hna qaqan, ngo tha hane pena kö qaqa. Hnei nyidë hna aköt; ngo tha hna ikuiajojo pe kö; ngo hna nue nyidëti kö kowe la ate hnyingën’ amekötin.” Nyipi ewekë tro sa xome la tulu ka lolo i nyidrë. Thaa tro pi kö sa elëhni pine la aqane ujë ka ngazo ne la itre xan. Loi pe tro sa xötrethenge la eamo hna hamëne kowe la nöjei Keresiano asë, ene la troa “feje hnin, me hni ka ipië; the të kö la ngazo hnei ngazo, me lice hnei ilic.”—1 Pet. 3:8, 9.
Hapeu, Tro Pe Hi La Itre Föe a Lapa Thaup?
11. Nemene la manathithi ka tru hna hamëne kowe la itre xaa föe Keresiano?
11 Hapeu, ame la troa drengethenge la musi ne la trahmany, tre, kolo lai a hape tro pe hi la föe a lapa thaup, nge thaa tro kö nyiidro a hane qaja la mekuna i nyiidro hnine la hnepe lapa, me ngöne la itre xaa götrane ju kö? Ohea. Nyimutre la itre hnëqa hnei Iehova hna ahnithe kowe la itre trahmany, ketre tune mina fe kowe la itre föe. Pane mekune jë së la manathith ka tru hna hamëne kowe la itre atr laka 144 000 la etrun; angatr a troa joxu me itretre huuj e koho hnengödrai fene la musi Keriso, ngöne la ijine nyidrëti elany a troa musinëne la fene celë! Kolo mina fe a hane e la itre föe thene la itre atr cili. (Gal. 3:26-29) Kola mama hnyawa e celë, laka, ame ngöne la itre ewekë hnei Iehova hna amekötin, tre, hetre hnëqa hna hamëne kowe la itre föe.
12, 13. Hamëne jë la ketre ceitun ka amamane laka, hnene fe la itre föe hna hane perofeta.
12 Drei la ketre ceitun, hetrenyi la itre xaa föe ka hane perofeta ngöne lo hneijine ekö. Hanawange la hna thingehnaeane ngöne Ioela 2:28, 29, ka hape: “Tro ni a nenge la Unge hune la nöjei ate asëjëihë; nge tro ha perofetane hnei ite nekö i nyipunie trahmanyi me jajiny. . . . Kete tro ni a nenge la Unge hune la ite hlue trahmanyi me föe ngöne la nöjei drai.”
13 Kola hane e la itre föe me itre trahmany thene lo ala 120 lao itretre drei Iesu ka icasikeu e Ierusalema hnine la ketre hnahag, ngöne lo ijine Penetekos 33 M.K. Hna atiqanyi angatr asë hnene la ua i Akötresie. Hnei Peteru hna amexeje hmaca lo hna thingehnaeane hnei Ioela perofeta, me qaja la aqane eatre la hna perofetane cili kowe lo itre trahmanyi me itre föe ngöne la ijine cili. Öni Peteru, ka hape: “Dei lola ewekë hna qaja hnene la perofeta Ioela, ka hape, ‘Nge ngöne la nöjei drai hnapin,’ ulatine hi hnei Akötesie, ka hape, ‘Tro ni a nenge la Unge hune la nöjei ate asëjëihë; nge tro ha perofetane hnene la ite nekö i nyipunie trahmanyi me jajiny . . . ; nge ngöne la nöjei drai cili tro ni a nenge la Unge hune la ite hluenge trahmanyi me fö; nge tro angat’ a perofetan.’ ”—Ite hu. 2:16-18.
14. Nemene la huliwa ka tru hna kuca hnene lo itre föe ngöne lo hneijine i Iesu, matre troa akökötrene la hmi Keresiano?
14 Ame ngöne lo hneijine i Iesu, tru la huliwa hna kuca hnene lo itre föe matre troa akökötrene la hmi ne Keresiano. Hnei angatre hna cainöjëne la Baselaia i Akötresie kowe la itre xaa atr, me kuca la itre ewekë ka sajuëne la huliwa ne cainöj. (Luka 8:1-3) Drei la ketre ceitun, hnei Paulo aposetolo hna qeje Fibi ceitu me ketre “hlue ne la ekalesia e Kenikerea.” Nge ame lo Paulo a qaja aloine lo itre sine huliwa i nyidrë, tre, hetrenyi la itre föe ka mele nyipici hnei nyidrëti hna qaja, tui “Trufaina me Trufosa, luete huliwa i Joxu.” Hnei nyidrëti mina fe hna qeje “Peresi la hnimina [së], lo ate huliwa atrunyi koi Joxu.”—Rom. 16:1, 12.
15. Nemene la huliwa hna kuca hnene la itre föe enehila, matre troa akökötrene la hmi Keresiano?
15 Ame ngöne la hneijine së, traqa koi ala sevene milio nge sin lao atr ka cainöjëne la maca ka loi ne la Baselaia i Akötresie; nge kola hane e fe thei angatr la itre föe ka isa macatre i angatr. (Mat. 24:14) Ala nyimu thei angatr la itre ka cainöj ngöne la drai ka pexej, me ka mesinare, me ka huliwa hnine Bethela. Hnei Davita hna nyiman, ka hape: “Tro Iehova a ulatine la wesi ula; [“trongene isi ka sisitria la itre föe ka” MN] cainöjën’ ej.” (Sal. 68:11) Drei la enyipicine la trenge ewekë celë! Iehova a wanga atrune hnyawa la huliwa hna kuca hnene la itre föe, ene la troa cainöjëne la maca ka loi me eatrëne la itre aja i Nyidrë. Nyipici laka ame la hnei Nyidrëti hna amekötine kowe la itre föe Keresiano göne la idrengethenge, tre, thaa kolo kö a qaja la troa lapa thaup.
Lue Föe Ka Thaa Hane Kö Lapa Thaup
16, 17. Kola mama tune kaa jëne la tulu i Sara, laka, thaa tro kö la itre föe a lapa thaup hnine la faipoipo?
16 Maine Iehova a ahnithe kowe la itre föe la itre hnëqa ka tru, hapeu aqane ujë ka loi kö e tro la itre trahmanyi a thele troa atre la mekuna ne la itre föe i angatr qëmekene troa xome la ketre mekune ka tru? Celë hi jëne inamacane lai. Kola qaja hnene la Itre Hna Cinyihan la itre xaa hna melën, laka, itre föe a qaja maine kuca pena la itre ewekë, ngo thaa hna hnyingëne pe la mekuna i angatre hnene la itre föi angatr. Tro sa ce wange la lue ceitun.
17 Hnei Sara lo ifënekö i Aberahama qatr, hna iele nyidrë troa upetrije lo hnaaluene föe i nyidrë memine lo nekö i eahlo, ke, pëkö hni ne metrötre i nyidro. “Aköte atraqate Aberahama ngöne la ewekë cili,” ngo thaa hna akötrë Akötresieti fe kö hnene la aqane ujë i Sara. Ene pe Iehova a qaja koi Aberahama, ka hape: “The aköte kö eö pine la nekönat, memine la föe hna itöne hnei ’ö. Ngo cengöne denge thenge ju la hna qaja koi ’ö hnei Sara.” (Gen. 21:8-12) Haawe, hnei Aberahama hna drengethenge Iehova, me drei Sara me aejëne la sipo i eahlo.
18. Nemene la hnei Abigaila hna thele troa canga kuca?
18 Tro pena sa mekune la tulu i Abigaila, lo ifënekö i Nabala. Ame ngöne lo Davita a kötre Saulo lo Joxu ka zalu koi angeic, tre, hnei angeice hna pane hunuma ezine la itre hna axö mamoe i Nabala. Thaa hnei Davita kö me itre atre i angeic hna thele troa ënö la itre mo i Nabala, hnei angatre pe hna thupëne itre ej. Ngo pine laka “ate wathöthöle [lae Nabala], me ngazo thina,” ene pe hnei angeice “hna wesitëne” lo itre atre i Davita. Ketre “ate i Belial [atr ka ngazo]” angeic, nge eje thei angeic ‘la thiina ka hmo.’ Hnei Nabala hna thipëne lo sipo kemeji ne lo itre atre i Davita. Tune kaa la aqane ujë i Abigaila ngöne lo eahlo a drenge la itre ewekë cili? Thaa hnei eahlo kö hna thuemacanyi Nabala, eahlo a “canga xome la ite areto ka lue haded, me lue waina, me tripi la o mamoe ka tro, me tripi la o tulu qite hna deuth, me ca hadede la o iwene vine hna ho fitan, me lue hadede la o xutha wene hmejieng” me tro fë itre ej koi Davita me kowe la itre atre i angeic. Hapeu, meköti kö la aqane ujë i Abigaila? Kola qaja hnei Tusi Hmitrötr, ka hape: “Hnei Iehova hna lepi Nabala, mate meciju.” Thupene lai, hnei Davita hna xomi Abigaila matre föi nyidrë.—1 Sam. 25:3, 14-19, 23-25, 38-42.
‘Kola Qaja Aloine La Föe’
19, 20. Nemene la ka amaman, laka, ka sisitria catre la ketre föe?
19 Kola qaja aloine hnei Tusi Hmitrötr la nöjei föe asë ka ujë thenge la itre jë i Iehova. Ame ngöne la tusi Ite Edomë, kola atrune “la föe loi thina,” ka hape: “Sisitia la qāte i nyido hune la ite penina. Tro la hni ne la fö’ i nyido a lapaune koi nyido, tha pate kö thei nyidë la thangan. Tro nyidoti a kuca la loi koi nyidë nge tha ngazo kö ite drai ne mele nyido asë.” Ketre, “nyidoti a qaja inamacanën, nge eje ngöne la sesepeneqe i nyido la wathebo ne ihnim. Nyidoti a thupëne la ite thina ne la lapa i nyido, nge tha ate xeni ehlehlei kö. Ite nekö i nyido a cile me qaja aloinyi nyido, nge fö’ i nyido mina a atrunyi nyido.”—Ite edomë 31:10-12, 26-28.
20 Nemene la ka amaman, laka, ka sisitria catre la ketre föe? Kola qaja ngöne Ite Edomë 31:30, ka hape: “Ate thoi la sheming, wanamamike la lolo; ngo ame la fö’ ate qoue Iehova, te, troa qaja aloin.” Ame la atr ka xoue Iehova, tre, ene la atr ka drengethenge cememine la hni ka ajan la hna amekötine hnei Akötresie göi mus. “Trahmanyi la he i fö,” tui “Keriso la he ne la nöjei trahmany,” nge “Akötesieti la he i Keriso.”—1 Kor. 11:3.
Loi e Tro Sa Hetre Hni Ne Ole Kowe La Ahnahna i Akötresie
21, 22. (a) Nemene la itre kepin ka upe la itre Keresiano ka faipoipo hë troa hetre hni ne ole kowe la ahnahna i Akötresie, ene la faipoipo? (b) Pine nemene matre loi e tro sa metrötrëne la itre hna amekötine hnei Iehova göi mus?
21 Nyimutre la itre kepin ka upe la itre Keresiano ka faipoipo hë troa amamane la hni ne ole i angatr koi Akötresie! Ijije troa tro loi me madrine la faipoipo i angatr. Angatr a olene koi Iehova la ahnahna hnei Nyidrë hna hamë angatr ene la faipoipo, ke, kolo lai a aijijë angatr troa cas me cengöne ce tro me Nyidrë. (Rutha 1:9; Mika 6:8) Pine laka Nyidrëti la Atre Acile la faipoipo, haawe, atre hnyawa hi Nyidrë la itre ewekë ka sisitria nyine troa kuca matre troa tro loi la faipoipo. Epi tro pala hi nyipunieti a ujë thenge la itre jë i Nyidrë, nge eje hi lai laka, tro hë ‘la madrine qaathei Iehova a aegöcatrenyi nyipunie’ ngöne la fene celë ka ngazo.—Neh. 8:10.
22 Tro la Trahmanyi Keresiano ka hnime la föi angeic ceitu me angeice kö, a xome hnyawa la musi angeice cememine la thiina ka menyik me metrötr. Tro ha hnime la föe ka xoue Akötresie hnene la trahmany, ke, nyiidro a xatua angeic me metrötrë angeic. Ngo ame la ka sisitria catr, tre, ene laka tro la elolone la faipoipo i nyidro a atrune la Akötresi së nyine atrun, ene Iehova.
Mekune Pala Kö Nyipunie?
• Nemene la hna amekötine hnei Iehova göi mus me idrengethenge?
• Pine nemene matre loi e tro la lue trefën a imetrötrekeu?
• Tro la föe ka hmi a ujë tune kaa kowe la föi nyiidro ka thaa hmi kö?
• Pine nemene matre loi e tro la itre trahmanyi a thele troa atre la mekuna ne la itre föe i angatr qëmekene troa xome la ketre mekune ka tru?