Troa Xome La Ita Ne Thup Celë e 12 Julai Me Wiike Cili
Itre Trahmanyi Fe—Traane Jë Kowe La Ua Nge Thele Jë Troa Kökötr!
“Ame la ate trane kowe la Ua, tro ha menuëne la mele ka tha ase palua kö.” —GAL. 6:8.
1, 2. Kola eatre tune kaa la sipo i Iesu hna thingehnaeane ngöne Mataio 9:37, 38, nge nemene hë la hna ajan e hnine la itre ekalesia?
NYIPUNIETI enehila a cainöjëne la itre ewekë laka thaa tro kö a thëthëhmin epine palua! Kola kökötre hnyawa ngöne la hneijine së lo huliwa hna thingehnaeane hnei Iesu Keriso. Öni Iesu, ka hape: “Atraqate la meledrai, nge xalaithe hi la angete troa menue. Celë hi mate xëwejë nyipunie kowe la Joxu ne la meledrai, mate upepi la angete troa menue kowe la meledrai i anganyidë.” (Mat. 9:37, 38) Ketre pengöne pi kö la aqane sa Iehova Akötresie la itre thithi cili. Ame ngöne lo macatre ne huliwa 2009, hna elë la etrune la itre ekalesia ne la Itretre Anyipicine i Iehova koi 2031, kola hape, 105298. Kösë ala 757 la etrun la itre atr ka bapataiso e nöjei drai!
2 Hnene laka kolo pala hi a kökötre la huliwa ne cainöj, ene pe kola aja trejin trahmanyi ka maca, troa elemekene la huliwa ne hamë ini me thupëne la itre ekalesia. (Efe. 4:11) Traqa ha enehila koi itre macatre ne upe Iehova la itre trahmanyi ka maca troa sajuëne la itre aja ne la itre mamoe i Nyidrë; ketre, easa mejiune laka, tro pala hi Nyidrëti a ujë tune lai. Kola akeukawane la hni së hnene la hna perofetane ngöne Mika 5:5 göne la itre drai hnapin, kola hape, tro la nöje i Iehova a hetrenyi “la itete thupë mamoe ka luengemen, me ite hene nöje ka köningemen;” kola nyihatrene la itre trahmanyi ka ala nyimu nge ka maca ka troa eatrongëne la nöje i Nyidrë.
3. Qaja jë la aliene la kola hape, troa ‘trane kowe la Ua.’
3 Maine ketre trahmanyi nyipunie ka bapataiso hë, nemene la ka troa xatua nyipunie troa thele me xome la itre hnëqa e hnine la ekalesia? Nyipi ewekë catr tro nyipunieti a ‘trane kowe la Ua.’ (Gal. 6:8) Maine nyipunieti a ajane troa ujë tune lai, nyipi ewekë troa nue la uati hmitrötre i Akötresie troa eatrongëne la mele i nyipunie. The tro pi kö nyipunieti a ‘trane kowe la ngönetrei.’ The nue kö la itre ewekë celë, ene la troa thele mo me nyine iamadrinë troa ananazijëne la aja ka eje thei nyipunie troa catre huliwa i Akötresie. Loi e tro la nöjei Keresiano asë a ‘traane kowe la Ua,’ nge ame la itre trahmany ka ujë tune lai, ijiji angatre hë elanyi troa maca me xome la itre hnëqa e hnine la ekalesia. Hnene laka kola aja drikona me qatre thup enehila, haawe, thatraqai itre Keresiano trahmanyi la hna cinyihane celë. Qa ngöne lai, eahuni a ithuecatre koi nyipunie, itre trahmany, troa wanga atrune hnyawa la hna cinyihane celë ngöne la thith.
Ajane Jë La Ketre Huliwa Ka Loi
4, 5. (a) Nemene la itre hnëqa hnine la ekalesia hna troa ajane hnene la itre trahmany ka bapataiso hë? (b) Nemene la aqane ajane itre ej hnene la ketre trejine trahmany?
4 Thaa hnene kö laka trahmany, ke tro ha qatre thupe elany. Nyipi ewekë troa eje ekuhu hi angeic la aja kowe la “huliwa ka loi” cili. (1 Tim. 3:1) Kolo lai a hape, nyipi ewekë tro angeic a nyi hluene la itre trejine me angeic, hnene la hna sajuëne hnyawa la itre aja i angatr. (E jë la Isaia 32:1, 2.) Thaa ka pi draië kö la trahmanyi ka eëne la aja cili cememine la hni ka loi. Ngo kolo pe a elitrauj e kuhu hni angeic la aja ka pë thoi ngön, troa xatuane la itre xaa atr.
5 Maine kola thele hnene la ketre atr troa xome la hnëqa ne drikona me atre thup, haawe, nyipi ewekë tro angeic a catr troa eatrëne la itre hna amekötine hnine la Tusi Hmitrötr. (1 Tim. 3:1-10, 12, 13; Tito 1:5-9) Maine ketre trahmany nyipunie ka sa xepu hë, isa thele jë ka hape: ‘Hapeu, eni kö a catre troa xome hnyawa la huliwa ne cainöj, nge eni kö a xatuane la itre xan troa ujë tune lai? Eni kö a acatrene la lapaun ne la itre trejine me eni hnene la hna wanga atrune la itre aja ka eje thei angatr? Hapeu, kolo kö a goeë ni hnene la itre xan ceitu me ketre atr ka inine hnyawa la Wesi Ula i Akötresie? Eni kö a thele troa amacane la itre mekun hnenge hna hamëne ngöne la itre ijine icasikeu? Eni kö a xome hnyawa la itre hnëqa hna ahnithe koi ni hnene la itre qatre thup?’ (2 Tim. 4:5) Nyipi ewekë troa wanga atrune hnyawa la itre hnyinge celë.
6. Nemene la ewekë ka sisitria catr ka aijijëne la itre trejine trahmanyi troa cilëne la itre hnëqa e hnine la ekalesia?
6 Ame la ketre aqane troa aijijë nyipunieti troa hetre hnëqa e hnine la ekalesia, tre, ene la troa “aegöcatenyi nyipunie hnene la mene ne la Ua i [Akötresie] ngöne la ate e kuhu hni.” (Efe. 3:16) Ame la troa ketre drikona maine qatre thupe pena hnine la ekalesia ne Keresiano, tre, thaa thangane kö la hna voot. Nyipunieti a kapa la hnëqa cili hnene hmekuje hi laka, ka macaje nyipunie ngöne la götrane la ua. Hna tune kaa lai? Ame la ketre aqane troa kökötre ngöne la ua, tre, ene la tro nyipunieti a “tro pala hi . . . ngöne la Ua” me thele troa eëne la wene ne ej. (Gal. 5:16, 22, 23) Maine tro nyipunieti a amamane la itre thiina ka nyipi ewekë nyine troa xome la itre xaa hnëqa, me catre trongëne la itre eamo hna hamën ngöne la aqane troa kökötre ngöne la ua, haawe, tro ‘ha mama koi nöjei atr laka ka macaje nyipunie.’—1 Tim. 4:15.
Nyipi Ewekë TroaMele Ne Huuj
7. Kola hapeue la troa nyi hluene la itre xaa atr?
7 Maine nyipunieti a ajane troa nyi hluene la itre xaa atr, nyipi ewekë tro nyipunieti a catre huliwa me huujëne la mele i nyipunie thatraqai angatr. Pine laka ame la itre qatre thup Keresiano, tre, itretre thupë mamoe angatr ngöne la götrane la ua, haawe, angatr a hnehengazone la itre jol ka eje thene la itre mamoe. Hanawange la aqane ketri Paulo aposetolo hnene la itre hnëqa hnei nyidrëti hna xome ceitu me ketre atre thupë mamoe. Öni nyidrë kowe la itre sine ce hmi me nyidrë e Korinito, ka hape: “Hnenge hna cinyihane koi nyipunieti fë la aköt’ atraqate me tihnine me lue tenge timida; tha nyine akötë nyipunie, loi pe mate atejë nyipunie laka ihniminge [ka] tru la koi nyipunie.” (2 Kor. 2:4) Kola mama hnyawa e celë, laka, hnine catre Paulo la huliwa i nyidrë.
8, 9. Hamëne jë la itre ceitun qa hnine la Tusi Hmitrötr ka amamane la aqane sajuëne la itre trahmanyi la itre aja ka eje thene la itre xan.
8 Eje pala hi thene la itre trahmanyi ka catre huliwa kowe la itre hlue i Iehova la hatrene celë, ene la aqane huujëne angatr la mele i angatr. Drei la ketre ceitun, thatreine kö tro sa mekune laka, tro Noa a qaja kowe la itre atrene la hnepe lapa i nyidrë, ka hape: ‘Thuemacanyi ni jë e ase jë epuni cane la aka, matre tro fe ni a hane ce tro me epun.’ Ketre, thaa hnei Mose kö hna qaja kowe la angetre Isaraela e Aigupito, ka hape: ‘Tro pë hë ni a traqa itronyi me nyipunie ngöne la Hnagejë Ka Palulu. Kuca jë la hnei nyipunieti hna atrein matre troa traqa e cili.’ Ketre, thaa hnei Iosua kö hna qaja, ka hape: ‘Thuemacanyi ni jë e mala ha la itre hna xupi hag ne Ieriko.’ Nge, thaa hnei Isaia kö hna köjane la ketre atr me qaja, ka hape: ‘Angeice hi la! Upi angeice jë.’—Is. 6:8.
9 Iesu Keriso la tulu së ka lolo ngöne la troa nue la ua i Akötresie troa eatrongëne la mele së. Hnei nyidrë hna kapa qa kuhu hni nyidrë la hnëqa hna ahnithe koi nyidrë, ene la troa Atre Itö Mele ne la nöjei atr asë. (Ioane 3:16) Hapeu, thaa kolo fe kö a kökötr e kuhu hni së la hni ne ole me ajane troa huujën la mele së, qa ngöne laka hnei Iesu hna huujëne la mele i nyidrë cememine la ihnim? Hnene la ketre qatre thup ka hekö hë ngöne la nyipici hna qeje pengöne la aliene hni nyidrë kowe la hna axö mamoe, ka hape: “Hna ketri ni hnyawa hnene lo trenge ewekë i Iesu koi Peteru, ka hape, ‘thupëneju pë hë la ite mamoeng.’ Hnenge hna wanga atrehmekune ngöne la itre macatre, laka, ijije troa ithuecatre kowe la ketre atr hnene la itre hnepe hnëewekë ka menyik, maine pena hnene la ketre hnepe huliwa ka loi hna kuca. Atraqatre la madrineng troa xome hnyawa la huliwa celë, ene la troa thupëne la itre mamoe.”—Ioane 21:16.
10. Nemene la ka troa upe la itre Keresiano trahmany troa xome la tulu i Iesu, ene la troa nyi hluene la itre xan?
10 Eje e kuhu hni ne la itre trahmanyi ka sa xepu hnine la ekalesia, la ajane troa ujë hnyawa kowe la hna axö mamoe i Akötresie, me xome la aqane mekune i Iesu, lo ka qaja ka hape: “Tro ni amanonyi nyipunie.” (Mat. 11:28) Hnene la lapaune koi Akötresie me ihnim kowe la ekalesia, ene pe kola ajane hnene la itre Keresiano trahmany troa xome la huliwa ka loi cili, ngo thaa tro pe a mekune laka tru catre pala ha la itre ewekë hna troa huujën. Ngo maine thaa kolo kö a ajane hnene la ketre trejin troa xome la huliwa cili, nemene la nyine tro angeic a kuca? Ijije kö tro angeic a eëne e kuhu hni angeic la ajane troa nyi hluene la ekalesia?
Eëne Jë La Aja Troa Nyihlu
11. Tro la ketre trejin a eëne tune kaa la aja troa nyi hluene la itre xan?
11 Maine nyipunie a mekune laka, thaa ijiji nyipunieti kö, nge kolo lai a sewe nyipunie troa ajane la itre hnëqa, haawe, loi e tro nyipunieti a sipone la uati hmitrötr ngöne la thith. (Luka 11:13) Tro la ua i Iehova a xatua nyipunie troa cile kowe la itre ewekë cili hnei nyipunie hna hnehengazon. Ame la nyipi aja troa nyihlu, tre, celë hi ketre ahnahna qaathei Akötresie, pine laka, ua i Nyidrë la ka ukune la ketre trejine trahmany troa eatrëne la aja cili, nge ej a hamëne koi angeic la trenge catr ka ijij troa nyi hlue i Nyidrë. (Fil. 2:13; 4:13) Haawe, loi e tro nyipunieti a sipone koi Iehova troa xatua nyipunie troa akökötrene e kuhu hni nyipunie la ajan troa xome la itre hnëqa.—E jë la Salamo 25:4, 5.
12. Tro la ketre atr a kapa tune kaa la inamacan ka ijij matre troa xome hnyawa la itre hnëqa hna ahnithe koi angeic?
12 Maine jë ka xecie hë kowe la ketre Keresiano troa thipëne la hnëqa troa sajuëne la itre aja ne la itre mamoe, hnene laka angeic a öhne laka thaa ewekë ka hmaloi kö. Maine pena angeic a mekune laka, thaa ijiji angeice kö troa xome la itre hnëqa cili, ke, thaa macaje petre kö angeic. Maine eje hi, maine jë tro angeic a thele troa hetrenyi la inamacan hnene la hna catre inine la Wesi Ula i Akötresie memine la itre itusi së hna nyitrepene hnene ej. Loi e tro angeic a ketre thel, ka hape, ‘Hapeu, eni kö a xomi ijin troa inine la Wesi Ula i Akötresie me sipone la inamacan ngöne la thith?’ Hnene la ketre atre drei Iesu ene Iakobo, hna cinyihan, ka hape: “Maine kete e nyipunie ka pë inamacan, tro angeic’ a sipo Akötesie, ate hamëne atrune la nöjei ewekë asëjëihë, nge tha wesite kö, nge tro ha hamëne koi angeic.” (Iako. 1:5) Hapeu, nyipunieti kö a jele nyipicine la trenge ewekë celë? Hnei Akötresieti hna sa la thithi Solomona hnene la hna hamë angeic “la hni ka inamacane me wangate hmekun,” matre atreine angeice troa atrehmekune la loi me ngazo ngöne la angeic a troa iameköti. (1 Ite jo. 3:7-14) Nyipici laka isapengö së kö me Solomona. Ngo thaa luelue kö së laka, tro Akötresieti a hamëne la inamacan kowe la itre trahmany ka nyipici nge ka trene hnëqa hnine la ekalesia, matre tro angatr a sajuëne hnyawa la itre aja ne la itre mamoe i Nyidrë.—Ite edomë 2:6.
13, 14. (a) Qaja jë la aqane ketri Paulo hnene la “ihnimi Keriso.” (b) Troa ketri së tune kaa hnene la ihnimi Keriso?
13 Hetrenyi la ketre ewekë ka troa akökötrene la aja troa nyi hluene la itre xan, ene la troa sine thele hnyawa la nöjei ewekë asë hnei Iehova memine la Hupuna i Nyidrë hna kuca koi së. Drei la ketre ceitun, tro sa pane ce wange la tusi 2 Korinito 5:14, 15. (E jë.) Nemene la aliene la hna hape, “kola musinë huni hnene la ihnimi Keriso”? Hnene laka sisitria catr la ihnim hnei Keriso hna amaman, ngöne la nyidrëti a nue la mele i nyidrë koi së thenge lo aja i Akötresie, ene pe kola kökötre catr la hni ne ole së me ketri së hnyawa. Hnei Paulo hna nue la ihnim ka eje thei Keriso troa eatrongëne la mele i nyidrë. Celë hi la ka sewe nyidrë troa sipu kuci aja, me hane xatua nyidrëti fe troa thele troa eatrëne la itre aja ka loi, ene la troa nyi hlue i Akötresie memine la itre atr e hnine me e tröne la ekalesia.
14 Maine tro sa sine thele la aqane hnime Iesu la itre atr, tre, tro ha kökötre e kuhu hni së la hni ne ole. Haawe, tro hë sa atrehmekune laka thaa aqane ujë ka loi kö e tro sa ‘trane kowe la ngönetrei’ ene la troa nyinyape thele la itre sipu aja së kö me ketre sipu meku së kö. Loi e tro pe sa saze la itre götrane la mele së matre troa amë panëne la huliwa hnei Akötresieti hna hamë së troa kuca. Kola upi së, itre trejin troa ‘inyihluekeu’ ngöne la ihnim. (E jë la Galatia 5:13.) Maine tro sa goeë së ceitu me itre hlu ka huliwa cememine la hni ka ipië thatraqane la itre hlue i Iehova ka sa xepu hë, haawe, tro hë sa wanga atrunyi angatr me metrötrë angatr. Eje hi laka, thaa tro pi kö sa xome la aqane ujë i Satana ka hlemu,ene la troa ixöjetrij.—Hna ama. 12:10.
Trenge Catr Ne La Hnepe Lapa
15, 16. Maine kola thele hnene la ketre trahmany troa xome la hnëqa ne drikona maine qatre thup, nemene la hnëqa ne la hnepe lapa?
15 Maine ka faipoipo nge ka trene nekönatre hë la ketre trejin trahmany, haawe, tro ha wanga atrune la aqane mele ne la hnepe lapa i angeic, matre troa wange maine, ijiji angeice kö troa xome la hnëqa ne drikona maine qatre thup pena. Eje hi laka, hetre thangane la mele ne la hnepe lapa i angeic ngöne la götrane la ua me aqane mele ne ej, ngöne la hnëqa hnei angeice hna xom. Kola amamane hnyawa e celë la enyipiewekëne tro la hnepe lapa a xatuane la trahmany me kem, ngöne la angeic a thele troa sajuëne la itre aja ne la ekalesia ceitu me ketre drikona maine qatre thup pena.—E jë la 1 Timoteo 3:4, 5, 12.
16 Atraqatre la madrine i Iehova troa goeëne la aqane ce huliwa la itre atrene la hnepe lapa ne Keresiano. (Efe. 3:14, 15) Kola thele thene la hene ne la fami troa tuluthe la aqane troa xome hnyawa la itre hnëqa hnine la ekalesia me musinëne “aloine” la hnepe lapa i angeic. Qa ngöne lai, nyipi ewekë tro la qatre thup maine drikona pena, a ce inine la Tusi Hmitrötr memine la föe i angeic me itre nekö i angeic e nöjei wiik, matre tro asë hi angatr a kepe eloine qa ngöne la Hmi Ne La Hnepe Lapa. Loi e tro pala hi angeic a ce cainöj me angatr. Hnene fe la kepine cili, ene pe nyipi ewekë tro la itre atrene la fami a xatuane la he ne la lapa.
Tro Hmaca Kö Nyipunieti a Xome La Huliwa Ne Hlu?
17, 18. (a) Maine hna pane amë la ketre trejine trahmany qa ngöne la ketre hnëqa, nemene la nyine tro angeic a kuca? (b) Nemene la aqane waiewekë ka loi nyine tro la ketre trejine trahmany a xome maine ka qatre thup maine drikona pena angeice ekö?
17 Maine jë ketre qatre thupe nyipunieti ekö maine drikona pena, ngo thaa xome hë nyipunie la hnëqa cili enehila. Tru la ihnimi nyipunie koi Iehova nge xecie hnyawa koi nyipunie laka Nyidrëti pala hi a thupë nyipunie. (1 Pet. 5:6, 7) Hapeu, hna qaja kö koi nyipunieti la nyine troa saze ngöne la mele i nyipunie? Loi e tro nyipunieti a canga atrehmekun laka hnei nyipunie hna tria, me thele troa nyinyine lai hnene la ixatua qaathei Akötresie. Loi e troa thupë nyipunie qa ngöne la troa elëhni. Inamacane jë nyipunie nge thele jë troa goeëne aloine la itre ewekë. Hanawange la hna qaja hnene la ketre trejine ka qatre thup ekö ngöne la itre macatre, ngo hna pane amë; kola hape: “Eje e kuhu hning la aja ka catr troa xome pala hi lo itre hnenge hna majemine kuca ekö ngöne lo eni a qatre thup, ene la troa sine la itre icasikeu, me catre cainöj me e la Tusi Hmitrötr, matre tro hmaca ni a xome la hnëqa cili. Hnenge hna inine troa xomihni ahoean hnene laka hnenge hna mekune troa kapa hmaca la itre hnëqang thupene la ca macatre maine luetre; ngo hnenge hna treqene la sevene lao macatre qëmekene tro hmaca ni a xome la hnëqa ne qatre thup. Ame ngöne la ijine cili, kolo pala hi a ithuecatre koi ni troa eatrëne la ajang, ene pe ketre ixatua ka tru catre koi ni.”
18 Maine nyipunieti la ketre trejine trahmany ka melëne la jole cili, the luelu kö. Mekune ju nyipunie la aqane amanathithine Iehova la huliwa ne cainöje i nyipunie memine la hnepe lapa i nyipunie. Thele jë troa acatrene la mele ne la hnepe lapa i nyipunie ngöne la götrane la ua, me wange la itre ka wezipo me ithuecatre kowe la itre ka kucakuca. Ngo ame la ewekë ka sisitria, tre, ene la troa wanga atrune hnyawa la hnëqa i nyipunie, ene la troa atrunyi Akötresie me cainöjëne la maca ka loi ceitu me ketre Atre Anyipicine i Iehova.a—Sal. 145:1, 2; Is. 43:10-12.
Waipengöne Hnyawa Jë
19, 20. (a) Nemene la nyine troa kuca hnene la itre trahmanyi hna bapataisone hë? (b) Nemene la hna troa ithanatane hnene la hna cinyihane ka troa xulu?
19 Atraqatre enehila la aja qatre thup me drikona. Haawe, eahuni a ielene la nöjei trejine trahmany troa waipengöne hnyawa la mele i angatr, me isa hnyingëne thele ka hape, ‘Maine thaa ketre drikona kö ni maine ketre qatre thupe pena, eni kö a thele la kepine matre thaa kapa pala kö ni la ketre hnëqa ka tune lai?’ Epi tro la ua i Akötresie a xatua nyipunie troa hetrenyi la aqane waiewekë ka loi ngöne la götrane ka sisitria cili.
20 Tro hë la nöjei atrene la ekalesia a kepe eloine la aqane huujëne la itre trejine la mele i angatr. Maine tro sa ujë cememine la thiina ka menyik me kuca la loi cememine la ihnim, haawe, tro hë sa menuëne la madrin qa ngöne la hna nyi hluene la itre xaa atr me trane kowe la ua. Ngo kola troa amamane hnene la hna cinyihane ka troa xulu la enyipiewekëne tro sa neëne troa akötrëne la uati hmitrötre i Akötresie. Tune kaa la aqane tro sa ujë tune lai?
[Ithueamacany]
a Wange ju La Tour de Garde ne 15 Ogas 2009, götrane 30-32.
Tro Nyipunieti a Sa Tune Kaa?
• Kola akeukawanyi së tune kaa hnene la hna perofetane ngöne Mika 5:5?
• Qaja jë la aliene la troa huujëne la mele së.
• Tro sa eëne tune kaa la ajan troa nyi hluene la itre xaa atr?
• Kola mama tune kaa, laka, nyipi ewekë troa ce huliwa la fami, e kola thele hnene la trahmany troa xome la hnëqa ne drikona maine qatre thup pena?