Troa Xome La Ita Ne Thup Celë e 30 Ogas Me Wiike Cili

Nemene La Hna Troa Qaja Amamane Hnene La Drai Iehova

“Tro ha traqa la drai Iehova tune la ate kë ’nö, . . . nge tro ha manithe la fene hnengödrai fe memine la nöjei huliwa ngön’ ej.”—2 PET. 3:10.

1, 2. (a) Troa paatre tune kaa la fene ka ngazo celë? (b) Nemene la itre hnyinge nyine tro sa ce ithanatan?

HNA eköthe la fene ka ngazo celë hune la ketre tenga thoi, ene laka, ijije hi tro la atr a ketre sipu musinëne la ihnadro me thipetrije la musi Iehova matre troa ketre sipu mus. (Sal. 2:2, 3) Hapeu, tro kö a cile huti epine palua la ketre ewekë hna eköthe hune la thoi? Ohea! Ngo thaa tro kö sa ka hape troa ketre sipu paatre la fene i Satana elany. Akötresieti la ka troa lepe apaatrene ej ngöne la ijine hnei Nyidrëti hna sa, nge thenge kö la aqane mekuna i Nyidrë. Tro ha mama cile hnyawa la emeköti Nyidrë me ihnimi Nyidrë, ngöne la Nyidrëti a troa apaatrene elanyi la fene ka ngazo celë.—Sal. 92:7; Ite edomë 2:21, 22.

² Hnei aposetolo Peteru hna cinyihan, ka hape: “Tro ha traqa la drai Iehova tune la ate kë ’nö; ngöne hi lai tro ha pate la hnengödrai me troa ulili atraqat, nge tro ha ahmune hnei ideuthi la nöjei ewekë asëjëihë, tro ha manithe la fene hnengödrai fe memine la nöjei huliwa ngön’ ej.” (2 Pet. 3:10) Nemene la aliene la itre “hnengödrai” me “fene hnengödrai” hna qaja e celë? Nemene la “nöjei ewekë asëjëihë” hna troa ahmune hnei idreuth? Nge nemene la aliene la trenge ewekë i Peteru, hna hape, “tro ha manithe la fene hnengödrai fe memine la nöjei huliwa ngön’ ej”? Maine tro sa atre la itre mekune ka sa la itre hnyinge celë, tro hë lai a xatua së troa hnëkë hnyawa thatraqane la itre ewekë nyine xouen ka troa traqa ngöne la itre drai elany.

Tro Ha Paatre La Itre Hnengödrai Me Fene Hnengödrai

3. Nemene la itre “hnengödrai” hna qaja ngöne 2 Peteru 3:10, nge tro itre ej a paatre tune kaa?

³ Ame hnine la Tusi Hmitrötr, e kola xome la hnaewekë hna hape, itre “hnengödrai” nyine nyihatren, tre, kolo lai a qaja la itre ka mus hna acile hnene la itre atren. (Is. 14:13, 14; Hna ama. 21:1, 2) Ame la itre ‘hnengödrai ka troa paatr,’ tre, itre ej a nyihatrene la musi ne la atr ngöne la fene celë hna lapane hnene la itre atr ka thaa thiina ka ijiji Akötresieti kö. Maine jë ame la itre ej a paatre ngöne la “ulili atraqat,” tre, kolo hi lai a amamane la enyimenyimene la troa lepe apaatrene la itre hnengödrai cili.

4. Nemene la “fene hnengödrai,” nge tune kaa la aqane troa apatren ej?

⁴ Ame la “fene hnengödrai,” ej a nyihatrene la itre atr hna thipetrije hnei Akötresie. Hetrenyi ekö la ketre fene ka tune lai ngöne lo hneijine i Noa, nge hnene la hna amekötine hnei Akötresie, ene pe hna lepe apaatrene la fene cili hnene lo Iwë. “Ame la hnengödrai memine la fene enehila, hna amë hnene la wesi ulati cili, thatraqane la eë, hna amë uti hë la drai ne amekötine me hnëjine la nöjei ate thina ka tha ijiji Akötesie.” (2 Pet. 3:7) Maine nyipici laka ame ngöne lo Iwë, tre, caa ijine lepe apaatrene hi la itre atr ka thaa hni kö koi Akötresie; calemi fe la pune la fene celë, nge hetrenyi la itre ewekë ka troa eatre trootro ngöne la ijine “aköte atraqatr.” (Hna ama. 7:14) Ame ngöne la kola troa nyiqaane la akötre cili, tro Akötresieti a upe la itretre mus ne la fene celë troa lepe apaatrenyi “Babulona Atraqat,” haawe, tro ha mama la aqane methinëne Nyidrëti la föe ne gojenyi cili. (Hna ama. 17:5, 16; 18:8) Thupene lai, tro ha nyipune la akötre atraqatre cili hnene la isi e Amagedo, ijine Iehova a troa lepe apaatrene pe la thelene la fene i Satana.—Hna ama. 16:14, 16; 19:19-21.

“Tro Ha Ahmune . . . La Nöjei Ewekë Asëjëihë”

5. Nemene la hna nyihatrene hnene la nöjei ewekë?

⁵ Nemene la “nöjei ewekë” cili hna troa “ahmun”? Ame la “nöjei ewekë” hna qaja hnei Peteru, tre, kolo itre ewekë ka sisitria ka eje ngöne la fene celë, ka amamane la itre thiina ka thaa ijiji Akötresieti kö, ene la itre aqane ujë me itre jë i angatr me itre aja hna thele troa eatrën. Ame ngöne la “nöjei ewekë” cili, tre, kolo mina fe a qaja “la [“ua” MN] ne la fen,” ene la ka “huliwa hnine la ite ka tha idei.” (1 Kor. 2:12; e jë la Efeso 2:1-3.) Kola haöthe la fene i Satana hnene la ua cili, maine “eny” pena. Eje a löthe la itre mekune ne la itre atr, me itre ewekë hnei angatr hna eköth, me itre trenge ewekë i angatr, me itre aqane ujë i angatr, ene pe mama pi hi la aqane mekune i Satana lo “tane ate musinën’ e caha nyipin” ka pi tru me ka icilekeu.

6. Kola mama tune kaa la ua ne fen?

⁶ Haawe, ngacama atre ju hë angatr maine thatre pena, ngo ame la itre atr hna ajojezine hnene la ua ne fen, tre, angatre hi lai a nue Satana troa löthe la itre mekune me itre hni angatr, ene pe angatr a xome la aqane mekune me aqane ujë i angeic. Ame la pune lai, angatr a ketre sipu kuca la hnei angatre hna ajan, me thaa nyipine la aja i Akötresie. Angatr a ujë kowe la itre jol cememine la thiina ka pi draië me sipu kuci mekun; ketre, angatr a icilekeu kowe la mus me kei ngöne “la meciunyi ewekë i ngönetei, memine la meciune ne la lue mek.”—E jë la 1 Ioane 2:15-17.a

7. Pine nemene matre nyipi ewekë tro sa “thupëne hnyawa la hni [së]”?

⁷ Drei la enyipiewekëne la tro sa “thupëne hnyawa la hni [së],” hnene la hna thele la inamacane i Akötresie matre troa atreine axecië mekun; maine jë ngöne la troa ië sinee, me itre itus hne së hna e, me itre nyine iamadrinë, me itre site ngöne Ëternet! (Ite edomë 4:23) Hnei Paulo aposetolo hna cinyihan, ka hape: “Wange kö ke thöeë nyipunie hnei kete ate hnene la pi inamacane me tenge iaö nyine amenun, thenge la edomë i ate, me ite ini hnapane ne la fen, nge tha thenge Keriso kö.” (Kol. 2:8) Kola easenyi trootro la drai Iehova, nge nyipi ewekë catre troa trongëne hnene la nöjei atr asë la hna amekötine celë, ke, calemi hë tro la idreuthi ka pëkö ka tune ekö, a ahmune la “nöjei ewekë asëjëihë” ne la fene i Satana, me amaman e cili laka, pëkö thei angatre la itre thiina ka troa thepe angatre qa ngöne la eë ne la elëhni i Akötresie. Kolo lai a amekunë së la trenge ewekë i Malaki 4:1, kola hape: “Tro ha traqa la drai ne ideuthi tune la sha zi, nge ame la ite ka pi tru asë, me itete kuca la ngazo asë, te, tro ha ene qit; nge troa deuthe tiji nyudeni ngöne la drai ne troa xulu.”

“Tro Ha Manithe La Fene Hnengödrai Fe Memine La Nöjei Huliwa Ngön’ Ej”

8. Tune kaa la aqane troa “manithe” la fene hnengödrai memine la nöjei huliwa ngön’ ej?

⁸ Nemene la aliene la hna cinyihane hnei Peteru, hna hape, “tro ha manithe la fene hnengödrai fe memine la nöjei huliwa ngön’ ej”? Ame la hnëewekë hna hape, “manith,” tre, ijije tro fe sa ujëne, ka hape, “qaja amaman” maine pena “hna fe amaman.” Haawe, Peteru a qaja, ka hape, ame ngöne la akötr atraqatr, tro hë Iehova a amamane hnyawa la pengöne la fene i Satana, laka, ka icilekeu ej me Nyidrë memine la Baselaia i Nyidrë, nge qa ngöne lai, ijiji eje troa paatr. Hanawange la hna perofetane göne la ijine cili ngöne Isaia 26:21, kola hape: “Tro Iehova a jötëti qa ngöne la göhne i nyidë troa nyi thupene la ngazo i angete lapane la fen; nge tro la fen’ a amamane la madra ne ej, nge tha tro hmaca kö a hetëne la ite hna humuthe hnen’ ej.”

9. (a) Nemene la nyine tro sa thipetrij, nge pine nemen? (b) Nemene la nyine tro sa eën, nge pine nemen?

⁹ Ame ngöne la drai Iehova, tro ha qaja amamane la nyipi pengöne ne la itre atr hna löthe hnene la fen memine la ua ne ej ka ngazo, nge tro mina fe angatr a itö ihumuth. Eje hi, ame la nöjei aqane isi ka mama ngöne la itre nyine iamadrinë enehila, tre, itre ej a lapane la itre mekune ne la itre atr, uti hë la ijine tro la nöjei atr, angatr isa ala caasi, a “ixejëkeune la ite ime i angatr.” (Zaka. 14:13) Haawe, drei la enyipiewekëne la tro sa thipetrije la nöjei ewekë asë, tune la itre film me itre itus me itre elo ngöne video, me itre xaa ewekë ju kö, ka troa akökötrene e kuhu hni së la itre thiina hna sisine hnei Akötresie, tune la troa pi draië me pi iangazo! (2 Sam. 22:28; Sal. 11:5) Ngo loi e tro sa eëne la wene ne la uati hmitrötre i Akötresie, ke, itre thiina lai ka troa thupë së ngöne la kola troa traqa elany la idreuth ngöne la götrane la ua.—Gal. 5:22, 23.

Ketre “Hnengödrai Ka Hnyipixe Memine La Fene Hnengödrai Ka Hnyipixe”

10, 11. Nemene la “hnengödrai ka hnyipixe” me “fene hnengödrai ka hnyipixe”?

¹⁰ E jë la 2 Peteru 3:13. Ame la “hnengödrai ka hnyipixe,” tre, kola qaja la Baselaia i Akötresie e koho hnengödrai, lo hna acile ngöne lo macatre 1914 ngöne lo kola pexej “la ite ijine i angete ethen.” (Luka 21:24) Hna hnëkëne la musi cili thatraqai Iesu Keriso memine lo ala 144 000 ka troa ce musi me nyidrë; hetrenyi thene la itre atr cili ka kapa ha la thupe i angatr e koho hnengödrai. Ame ngöne la tusi Hna Amaman, kola nyihatrene la itre atr hna iën hnene la “lapa ka hmitöt, Ierusalema ka hnyipixe, kola uti qa hnengödrai thei Akötesie, hna hnëkë kösë jajinyi kola troa faipoipo hna thaipine thatraqane la fö’ i angeic.” (Hna ama. 21:1, 2, 22-24) Tune lo Ierusalema e celë fen, laka, eje hi lo hnen la musi me hna nyi joxu ekö e Isaraela; tro mina fe la Ierusalema Ka Hnyipixe me föi angeic a nyi lapa ne mus me hnanyijoxu thatraqane la fene ka hnyipixe elany. Tro la lapa cili a ‘uti qa hnengödrai’ hnene la hna wanga atrune me musinëne la ihnadro.

¹¹ Ame la “fene hnengödrai ka hnyipixe,” tre, kola qaja la fene ka hnyipixe hna lapaane hnene la itre atr ka amamane hë la aja i angatr troa drengethenge la musi ne la Baselaia i Akötresie. Calemi hë troa acile hnyawa ngöne “la nöje ka troa traqa” la paradraiso ngöne la ua hna melëne hë enehila hnene la nöje i Akötresie. (Heb. 2:5) Tro së a hane mele tune kaa ngöne la fene ka hnyipixe cili?

Hnëkë Jë Kowe La Drai Atraqatre i Iehova

12. Pine nemene matre troa sesëkötre la fene celë hnene la drai Iehova?

¹² Hnei Paulo me Peteru hna thingehnaean, ka hape, tro la drai Iehova a traqa ceitu me ketre “ate kë ’nö,” laka thatre kö së la ijine troa traqa la atrekënö, kösë ju hi lo samek. (E jë la 1 Thesalonika 5:1, 2.) Ketre tune mina fe la itre nyipi Keresiano ka lapa treqene me hmekëne la drai cili, laka, tro fe a asesëkötrë angatr hnene la aqane traqan ej elany. (Mat. 24:44) Ngo atraqatre kö la aqane tro la fene celë a sesëkötr. Hnei Paulo hna cinyihan, ka hape: “E qaja hnei angat, ka hape, Tingetinge hë, me lapa xetietë, ene pe canga traqapi koi angate la hnëjin, tune la aköte sile kowe la föe upune; nge tha tro kö angat’ a utet.”—1 Thes. 5:3.

13. Nemene la nyine tro sa kuca matre thaa tro kö a amenu së hnene la hna qaja, ka hape, “Tingetinge hë, me lapa xetietë?

¹³ Ame la ka qaja, ka hape, “Tingetinge hë, me lapa xetietë,” tre, celë hi ketre trenga thoi lai ka xulu qaathene la itre dremoni; ngo thaa tro jë kö la trenge ewekë cili a amenune la itre hlue i Iehova. Hnei Paulo hna cinyihan, ka hape: “Tha nyipunieti kö ngöne la jid, mate tro ha traqa koi nyipunie la drai cili tune la ate kë ’nö; nyipunie asëjëihë la ite nekö ne la lai me ite nekö ne la drai.” (1 Thes. 5:4, 5) Qa ngöne lai, loi e tro pala hi sa lapa ngöne la lai, me ananyine la fene i Satana ka lapa ngöne la jid. Hnei Peteru hna cinyihan, ka hape: “Ange hnimina fe, wai nyipunieti kö, ke ate hë nyipunie ekö, wanga kei nyipunie ngöne la cile huti nyipunie e hna e nyipunie hnene la menu ne la nöjei ka ngazo.”—2 Pet. 3:17.

14, 15. (a) Kola wanga atrunyi së tune kaa hnei Iehova? (b) Nemene la itre hnëewekë nyine tro sa lapa mekune hnyawa?

¹⁴ Hanawange thaa hnei Iehova hmekuje kö hna qaja koi së troa ‘wai së kö.’ Ngo hnei Nyidrëti fe hna hane wanga atrunyi së hnene la hna aijijë së troa “ate” la itre ewekë ka troa traqa ngöne la itre drai elany.

¹⁵ Ngo ngazo pe, hetrenyi la itre xaa atr ka wange sixan maine ka thipetrije pena la itre nyine amekunë së göne la enyipiewekëne la troa hmek. Maine jë angatr a qaja, ka hape, ‘Itre macatre hë enehila, nge caasi pala hi la itre nyine amekunën hne huni hna dreng.’ Ngo loi e troa mekune hnyawa hnene la itre atr cili laka, ame hi lai angatr a ithanata tune lai, tre, kösë kolo hi lai a hape, pëkö mejiune i angatr kowe la lapa ne la hlue ka nyipici, nge koi Iehova fe me Hupuna i Nyidrë. Öni Iehova, ka hape: “Teqene kö.” (Hab. 2:3) Ketre tune mina fe, öni Iesu ka hape: “Hmekënejë; ke tha’ te kö nyipunie la ijine traqa la Joxu i nyipunie.” (Mat. 24:42) Hnei Peteru hna cinyihane fe, ka hape: “Ijije tro nyipunie a nöjei ate ka nyipici ngöne la thina ka hmitöte me thina ka ijiji Akötesie kola teqene me ajane troa traqa la drai Iehova!” (2 Pet. 3:11, 12) Thaa tro jë kö la lapa ne la hlue ka nyipici memine la Lapa ne ej Ne Xomi Meköt, a wanga acone la itre trenge ewekë ka lolo cili!

16. Nemene la aqane ujë nyine tro sa thipetrij, nge pine nemen?

¹⁶ Eje hi laka, kolo “hlue ka ngazo” la ka qaja, ka hape, hmitre petre kö la Joxu. (Mat. 24:48) Kolo fe a hane qaja la hlue ka ngazo cili ngöne 2 Peteru 3:3, 4. Hnei Peteru hna cinyihan, ka hape: “Ngöne la drai hnapine troa xulu la nöjei ate iamakökö kola xöte thenge la ite aja i angate kö,” me hnyima fë la itre atr ka drengethenge Iehova pala hi me ka lapa treqene hnyawa la drai Nyidrë. Eje hi, ame lai itre atr ka ihnyima sai, tre, thaa angatre kö a thele troa sajuëne la itre aja ne la Baselaia, ngo angatre pe a ketre sipu meku angatre kö me kuca la itre sipu aja i angatr. Loi e thaa tro pi kö sa akökötrene e kuhu hni së la aja ka ngazo cili, ene la thaa idrei! Ngo epi tro sa “mekune . . . laka ame la xomi hni ahoeanyi i Joxu së, te, mele lai”; troa traqa kowe lai, e hne së hna catre cainöjëne la Baselaia me inine la itre atr, nge thaa tro kö sa hnehengazone menu pala ha la ijine troa eatre la itre ewekë ka troa traqa, ke, itre ewekë i Iehova Akötresieti lai.—2 Pet. 3:15; e jë la Ite huliwa 1:6, 7.

Mejiune Ju Kowe La Akötresie Ne Iamele

17. Tune kaa la aqane ujë la itre Keresiano ka mele nyipici kowe lo ithuemacanyi i Iesu, ene la troa kötre qaa Ierusalema, nge pine nemen?

¹⁷ Thupene la hna thapa la nöje Iudra hnene la trongene isi i angetre Roma ngöne lo macatre 66 M.K., hnene lo itre Keresiano ka mele nyipici hna trongëne lo ithuemacanyi Iesu, ene la troa kötre qaa Ierusalema, ke, pane ijine lai ka ijije koi angatr. (Luka 21:20-23) Pine nemene matre hnei angatre hna ujë nyimenyim? Eje hi laka, hnei angatre hna hnehene lo ithuemacanyi hna hamëne hnei Iesu nyine hmekë angatr. Ketre, thaa thëthëhmine kö angatre lo hnei Iesu hna qaja, ka hape, tro ha hetre ejolene la mekune hnei angatre hna troa axeciën. Ngo atre fe hi angatr, laka, thaa tro pi kö Iehova a nue la itre atr ka mele nyipici koi Nyidrë.—Sal. 55:22.

18. Nemene la thangane la trenge ewekë i Iesu ngöne Luka 21:25-28 kowe la aqane goeëne nyipunie la akötr atraqatr elany?

¹⁸ Nyipi ewekë mina fe troa pexeje la mejiune së koi Iehova, ke, Nyidrëti hmekuje hi la ka ijij troa amele së, ngöne la ijine kola troa traqa kowe la fene celë la akötr atraqatr, pëkö ka tune lai ekö ngöne la mele ne la atr. Thupene la kola nyiqaane la akötr atraqatr nge qëmekene tro Iehova a lep apaatrene la thelene la fen, tre, “tro ha coköte la nöjei ate hnei qou, me hnëkë teqene la nöjei ewekë cili troa traqa kowe la fen.” Maine nyipici laka tro la itre ithupëjia me Iehova a hmengöhmengön me xou, ngo ame koi itre hlue i Iehova ka mele nyipici, tre, thaa tro kö angatr a xou. Tro pe a eje thei angatre la madrin, ke, atre hnyawa hi angatr, laka, calemi hë la troa amele angatr.—E jë la Luka 21:25-28.

19. Nemene la nyine tro sa ce wange ngöne la hna cinyihane ka troa xulu?

¹⁹ Nyipici, drei la ketre mele ka lolo elany kowe la itre atr ka lapa iananyi memine la fene celë memine la “nöjei ewekë” ne ej! Ngo tune la hna troa qaja ngöne la hna cinyihane ka troa xulu, maine easa ajane troa mel, thaa tro hmekuje kö sa thipetrije la ngazo, hetrenyi fe la itre xaa ewekë nyine tro sa kuca. Nyipi ewekë tro sa eëne la itre thiina ka amadrinë Iehova, me kuca la itre huliwa hnei Nyidrëti hna kapa.—2 Pet. 3:11.

[Ithueamacany]

Ijije Kö Tro Nyipunieti a Qeje Pengön?

• Nemene la hna nyihatrene hnene . . .

la itre ‘hnengödrai me fene hnengödrai’ ne la hneijine së enehila?

“la nöjei ewekë asëjëihë”?

la ‘hnengödrai me fene hnengödrai ka hnyipixe’?

• Pine nemene matre loi e tro pala hi a pexeje la aqane mejiune së koi Akötresie?