Itre Hnyinge ne la Itre ka e

Hapeu ame ngöne la itre ijine icasikeu i Keresiano, ijije kö tro la itre keme me thine a lapa ezine la nekö i angatre hna upe qa ngöne la ekalesia?

▪ Tha nyipi ewekë kö troa hnehengazone menune la göhnë hna troa lapa hnene la hna upetröne eë ngöne la Uma Ne Baselaia. Kola ithuecatrene la itre keme me thine Keresiano hnene la zonale celë tro angatre a hamë ixatua ngöne la u kowe la itre nekö i angatre hna upetröne eë, nge ka lapa pala kö thei angatr, qanyi angatre hi lai wange maine ijij. Tune la hna qaja ngöne la götrane 19 me 20 ne la Ita Ne Thup ne 15 Nofeba 1988, ijije tro la itre keme me thin a ini Tusi Hmitrötre kowe la nekönatre ka lapa pala kö fene la musi nyidro, e angeice pala kö thei nyidro. Maine jë, jëne la ixatua hna hamën, tro hmaca la nekönatre elanyi a xome amekötine la jë i angeic.

Ame ngöne la Uma Ne Baselaia, ka loi hi e tro la nekönatre a lapa metrötre ezi keme me thin. Pëkö göhnë hna amekötine thatraqane la atre hna upetröne eë ngöne la Uma Ne Baselaia, celë hi matre pëkö nyine qaja e tro la nekönatre hna upetröne eë a lapa ezine la keme me thine i angeic, ngöne la götrane hnei angatre hna ajan. Pine laka qa ne la keme me thin troa thupëne la nekönatre ngöne la götrane u, nyipi ewekë tro nyidroti a goëene ka hape, nekönatre kö a drenge ngöne la itre ijine icasikeu. Hetre thangane catre e tro la nekönatre a lapa ezi nyidro hune la troa nue nyëne pe troa lapa ezine la itre xa thöthi ka pëkö atre thupën.

Ngo tune kaa fe la nekönatre hna upetröne eë, ngo tha ka lapa hmaca kö thei keme me thin? Tro kö a xome ketre pengönë angeic? Ame ekö hnene la itre itusi së hna qaja hnyawa la aqane tro la Keresiano a ce mele memine la ketre atrene la hnalapa i angeice hna upetröne eë, nge ka tha lapa hmaca kö thei keme me thin.a Ngo, ame la troa nue la atr hna upetröne eë troa lapa ezine la itre atrene la hnepe lapa i angeice ngöne la ijine icasikeu, tre, tha kolo kö lai a hape, angatre a thele troa imelekeu me angeic. Maine ka loi hi la aqane ujë ne la itre atrene la hnepe lapa kowe la hna upetröne eën, nge angatre a catre troa trongëne hnyawa la hna amekötine hnei Tusi Hmitrötr göi angeic, haawe, tha tro kö sa mekune menune koilo.—1 Kor. 5:11, 13; 2 Ioane 11.

Maine tro la atr hna upetröne eë a lapa ezine la ketre atrene la hnepe lapa i angeic, maine ketre atrene la ekalesia, tha nyine tro kö së lai a thixötre hnen, e pëkö ejolene la pengöi angeic. Tro lai a traqa la itre jole e troa isa thewe göhnene la itre atr, ngo ame itre xa ijin, hetre itre atr kö nyine troa ami göhnen. Maine hna trongëne la hna amekötine hnei Tusi Hmitrötre göi itre hna upetröne eë hnene la itre ka sine la icasikeu, me hnene fe la itre atr ka mele nyipici ngöne la hnepe lapa, nge maine pëkö atr hna athixötrëne hnene la göhnë hna lapa ngön hnene la atr hna upetröne eë, haawe, ame la itre göhnë ngöne la itre icasikeu, tre tha nyine tro kö a ithanata pin.

[Ithueamacany]