Kola Sa Hnei Tusi Hmitrötr
Pine nemen matre kola cinyihane la itre hna perofetan e hnine la Tusi Hmitrötr?
Pine nemen matre Tusi Hmitrötr a qaja la itre ewekë ka traqa enehila?—Luka 21:10, 11.
Nyimutre la itre hna perofetan e hnine la Tusi Hmitrötr. Pëkö atr ka atreine troa qaja la ka troa traqa elany. Ngo ame la kola eatr la itre hna perofetan hnei Tusi Hmitrötr, kolo hi lai a anyipicine laka, Wesi Ula i Akötresieti hnyawa hi la Tusi Hmitrötr.—E jë la Iosua 23:14; 2 Peteru 1:20, 21.
Hna nyitrepene fe la lapaune së koi Akötresie hnene la aqane eatr ekö la itre hna perofetan. (Heberu 11:1) Itre eje mina fe a acatrene la lapaune së kowe la itre hna thingehnaeane hnei Akötresie, laka, tro kö a eje elanyi la ketre mele ka sisitria catr. Celë hi mejiune lai hna hamëne koi së hnene la itre hna perofetan.—E jë la Salamo 37:29; Roma 15:4.
Kola xatua së tune ka hnene la itre hna perofetan hnei Tusi Hmitrötr?
Ame la itre xa hna thingehnaean, tre, kola hmekën la itre hlue i Akötresie matre tro angatr a catre huliwa. Ame ngöne lo hneijine i Iesu, hnene la itre pane Keresiano hna öhne la kola eatr la itre xa hna perofetan, ene pe angatr a canga kötre lö pi qa Ierusalema. Ame hë la kola apatrene la traon, pine laka hna thipetriji Iesu hnene la itre atren, nanyi hë lo itre ka kötr, angatre hë ngöne la ketre götran ga xeut.—E jë la Luka 21:20-22.
Ame enehila, kola eatr la itre hna perofetan, nge kola mama hnyawa laka, easenyi hë tro la Baselaia i Akötresie a lep apatrene la itre musi ne la itre atr. (Daniela 2:44; Luka 21:31) Celë hi matre, nyipiewekë tro asë hi së a isa catre huliwa i Akötresie matre troa hane kepe së hnene la Joxu, Iesu Keriso, lo hna acile hnei Akötresie.—E jë la Luka 21:34-36.