KA QA NGÖNE ICETRÖN | KA NYIPIEWEKË KÖ TROA THITH?
Nemene La Kepin Matre Kola Thithi La Itre Atr?
“Ame eni ekö, tre, ka catre elo mani. Hnenge hna thithi matre troa kapa la itre trenge manie ka tru. Ngo, gufa kö la sipong.”—Samuela,a Qa Kenya.
“Ame ngöne la eahuni a ini, hna ini eahuni troa e gufan lo itre thith.”—Teresa, Qa Philippines.
“Ame ni, ke, eni hi a thith lo eni a ixelë me itre jol. Eni a thith matre troa köletrije la itre ngazong, nge matre tro ni a ketre Keresiano ka macaj.”—Magdalene, Qa Ghana.
Kola mama ngöne la itre hna qaja hnei Samuela, Teresa me Magdalene, laka nyimutre la itre kepine matre kola thithi hnene la itre atr. Kola mama laka nyipi ewekë kö la itre xaa thith hune la itre xan. Ka jui hnin la itre xaa thith, ngo ame itre xan, ka pëkö aliene itre ej. Nyimutre la itre atr ka thith, itre ka ini a thith qëmekene troa itupath, maine pena, tro la ekip i angatr a ngaan la ketre ekip. Ketre, angatr a sipo Akötresie troa xatuane la hnepe lapa i angatr, nge hetre itre xa kepine ju kö matre angatr a thith. Kola mama laka, nyimutre la itre atr ka tha hane kö hmi, ngo ame pe ka thithi pala hi angatr.
Hane fe kö epuni thith? Maine ka hane fe epuni thith, epuni a thithi koi nemen? Maine ka majemine epuni thith, maine tha ka thithi pena kö, ngo ijije fe hi tro epuni a thele ka hape: ‘Ka nyipi ewekë kö tro ni a thith? Hetre ka drei ni kö?’ Hnene la ketre atr ka cinyany hna qaja ka hape, ame la thith, tre, celë hi “ketre aqane inyië lai . . . tune la easa pane tro matre uqa pi së.” Nyimutre la itre droketre ka hane mekune tun. Angatr a qaja ka hape, ame la thith, tre, ketre “aqane inyiëne la itre mec.” Tune ka, ame la itre atr ke, angatr a thithi pine laka hnei angatr hna majemin, maine pena, angatr a thith ke, angatr a mekun ka hape, hetre eloin kowe la mele i angatr?
Tusi Hmitrötr a amamane ka hape ame la thith, tre, ka sisitria kö hune la aqane inyiëne la itre mec. Ej a qaja koi së laka hetre ka drenge la itre thithi hna kuca hnyawan, me itre ewekë ka loi hna sipon thenge la aja i Iehova. Ka nyipici kö lai? Tro sa ce wange la itre mekune ka anyipicine lai.
a Hna saze la itre ëj.