Loi e Tro Palahi Së a Kuca La Huliwa i Akötresie Ngöne La Macatre Ne Huliwa Celë

¹ Ame la itre treu ka troa xulu, ke, itre ijine lai ka ijije tro së a aelëne la huliwa së. Pine laka, itre drai ka loi, ke, kolo hë lo itre drai hnötr, matre traeme ne tro së lai a aelëne la itre huliwa së koi Akötresie. Loi e tha tro kö la itre ejolene la mel, maine pena itre jole ka traqa kowe la itre thöthe ka ini mus, a ajolëne me xome la götrane la huliwa i Akötresie. — Fil. 3:16.

² Atraqatre la madrine së troa treqene la icasikeu ne distrik e ogas. Hapeu, hnëkë kö epuni göi gojenyi me göi hnalapa? Hetre trejine kö me easë hnei epuni hna mekune ka ijije troa xatuan? Nyipici, tro së isa kepe thangane qangöne la ewekë ka loi hne së hna ikucakeun.

³ Ame lo itre ijine pëkö ka ajolë së, tune lo mano i uma ne ini, ase kö së mekune ka hape kolo hi lo itre ijine lai ka ijije tro së a aelëne la itre hawa ne cainöje trootro së? Alanyimu la ka wangatrehmekune ka hape kolo hi lo itre ijine ka sisitria lai troa saene koi pionie ka ixatua. Aqane tro lai a fe gojenyine la itre hnëqa ka tru. Ijije tro la itre fami ka tupathe la aqane huliwa celë a kapa la manathith, qa ngöne laka hnei angatre hna ce lueimëne la huliwa ne cainöje trootro. Nyipici, tha ceitu kö la aqane mele së, ngo ame pe, hapeu, ijije kö tro së a sipu wange troa aelëne la hawa së ne cainöje trootro? Ame ngöne la ijine hnötr, ke, ijije tro së a wange göi cainöje trootro e itre hej, ke, ijine ka loi troa amamane trongëne la itre zonale së ngöne itre xötre gojeny.

⁴ Hapeu, matre tha hane pe së amë ngöne la idrai ne ameköti huliwa së, la ketre ijine matre tro së a hamëne la ixatua kowe la ketre ka xötrei cainöje ngöne la ekalesia së ka thatreine hnyawa petrekö nyiqaane inine la ketre atr la Tusi Hmitrötr? Maine pena tro la itre xaa trejine me easë, trahmanyi me föe, a hetre aja troa ce hnëkëne me easë la itre icasikeu ne la wiik. Nge loi e tro së a hetre nyipi mekune hna hnëkën, ene la tro së a hane qeje mekune hmekune la itre hna ithahnataane ngöne la itre ijine icasikeu. Ketre mina, Hapeu matre tha hane pe së hnëkëne troa hane huliwa ngöne la itre hna xupi uma ne Baselaia ngöne la ketre ijine hne së hna mekun?

⁵ Hapeu, ame ngöne la itre mano i uma ne ini, hne së kö hna hnëkëne matre tro la itre nekö së a hetre ijine troa kuca la huliwa i Akötresie? Nge maine easë a tro kowe la ketre nöj, maine Mëëk, ase fe kö së mekune ka hape ijiji së kö troa sine la itre icasikeu ngöne la götrane hne së hna tro kow? Nge, nemene la ka troa ajolë së troa ce cainöje trootro me itre trejine me easë e cili? Hawe, nyine ixatua atraqatre koi së me itre xane fe, la tro së a kuca la itre huliwa celë ngöne la ijine easë a mano. (Rom. 1:11, 12) Nge ame la easë a traqa ngöne la itre hunahmi ka lapa cas, lo hna hape mi ne nöj, hapeu, matre tha thupëne pe së la nöjei ijine troa cainöje trootro kowe la itre atren? Loi e tro palahi a hetrenyi the së la Tusi Hmitrötre me itre sine itus. Nge thupëne ju la itre traeme ne pë nyipi jole së, ke, itre ijine ka ijije lai tro së a eatrëne la porogarame ne e tusi së me göi tro së a sipu ini Tusi Hmitrötr. Tha tro pi kö së a thëthëhmine laka, ngacama, ngöne la itre xaa ijin, easë a ajane troa manone la hne së hna huliwa ne thele mani, ngo ame pe, tro palahi a ka tru la huliwa i Akötresie koi së.

⁶ Tro la itre qatre thup a hmekëëne me thupëne matre tro palahi a tro loi la itre huliwa ne la ekalesia. Maine tro la itre qatre thupe me itre drikona a cilëëne la itre xaa götrane qa ne la huliwa i Akötresie, ke, ame pë hë lo itre hnëqa i angatre ngöne la ekalesia, ke, pane eatrëne ju hi hnene la itre xaa trejin. Ame la huliwa ne la seketere, ke, tha nyine tro kö a xome ahmalohmaloëën, maine tro pena nue kowe la ketre drikona ka thatreine petrekö cilëëne la götrane qa cili. Pine nemene matre tha hnëkëne pe thatraqai angatr, la ketre porogarame nyine ini angatre troa cilëëne la itre götrane qa, tune la troa cilëëne la hna salemë zonal, maine hna salemë itus, maine troa cilëëne la götrane qa ne thupëne la itre hna ithingë mani. Loi fe e troa hetre porogarame ne la itre qatre thupe ne la ekalesia troa iwai ange thupe koi itre fami matre atrepengöi angatre hnyawa, nge ijije troa hamëne la ixatua thatraqane la isa alacas. Melene la keresiano, la tro palahi a sisedrëne la huliwa i angeic. Tro la itre qatre thup’a wejemekene la huliwa ne cainöje trootro, maine tro pena a ca xome la huliwa ne pionie ka ixatua ngöne la macatre. Qanyine la tulu hna amamane hnene la itre qatre thup troa ithuecatre kowe la nöjei angetre cainöje trootro.

⁷ Nyipici laka ame la itre nyipi keresiano asë, ke, tru catre palahi la itre hnëqa i angatr. Ngo eje mina fe laka ame la itre huliwa së thatraqane la Baselaia, ke, hna ajolëne e itre xaa ijine hnene la itre ewekë ne fen, memine la sipu kuci mekun. Celëhi matre nyipiewekë tro palahi së a mekune hnyawane la itre ewekë ne la ua, me catre troa hni kowe itr’ej. — Fil. 1:10.