Hnëkëne Jë La Itre Ka Ini Tusi Hmitrötre Göi Troa Cainöje Trootro
1 Ame la aliene la ini Tusi Hmitrötr, ke, nyine fe jëne la atr tro angeic’a atre drei Iesu, matre nyixanyi së troa inine la itre xan. (Mata. 28:19, 20) Celëhi matre, ame la aliene la ini, ke, tha eje hmekuje kö la troa hamëne la atrehmekun; ngo tro fe ej’a xatuane la itre ka ini Tusi Hmitrötre troa kapa la lapaun, me hnëkë angatre matre troa hane cainöjëne la mejiune i angatre kowe la itre xan. (2 Kor. 4:13) Nemene la aqane tro së a xatua angatre matre atreine angatre troa inine la itre xan? — 2 Tim. 2:2.
2 Loi e tro së a xome la huliwa ne cainöje trootro ceitune me ketre mekune nyine tro së a aeatrën: Loi e tro së a pane qejepengöne hnyawa ngöne la kola nyiqaane ithahnata laka ame ngöne la nyipi hmi, ke, eje fe la hna qaja ka hape: “ukeineqë la ate qaja uti hë la mel.” (Rom. 10:10) Ame la sipu aliene la ëje së, angetre anyipici Iehova, ke, ene la tro së a ithahnata koi itre xan. Xatua angatre jë troa trotrohnine laka ame la ini celë, ke, tha eje hmekuje kö kowe la mele i angatr. Ngo, ngöne fe la angatr’a inine la itre xan, ke, angatre lai a amelene la itre ka hane dreng. — 1 Tim. 4:16.
3 Wange hmaca ju la itre hna inin: Ame la ketre aqane inine ka ixatua, ke, troa wange hmaca la itre hna inine hë. Tro la aqane kuca celë, a xatuane la ka ini Tusi Hmitrötre troa kökötre ngöne la ua, nge tro fe la itre hna pane ini ka nyipici a lapa huti ngöne la mekun, me ngöne la hni angeic. Ase hë së öhne lai ngöne lo easë a sa la itre hnyinge hna wange hmaca ngöne la kola inine la La Tour de Garde. Hnëkëne hnyawane jë la itre hnyinge ka tha jole kö troa trotrohnin, nge ka tro meköt, thatraqane la itre ka ini Tusi Hmitrötre me easë, matre troa sa ngöne la sipu aqane ithahnata i angatre kö.
4 Loi e troa kuca la revisio tune lo epuni a cainöje trootro. Hamëne jë la ketre hnying, maine pena qejepengöne jë la ketre hna melëne hna majemine ixelë memin, ngöne la huliwa ne cainöje trootro. Tro epuni a xome la göhnene la atr hna öhne ngöne la hna cainöje trootro, nge nue pi lai ka ini tusi troa ithahnata me epun. Qaja aloine jë la aqane kuca i angeice ka loi, nge hamëne jë la itre xaa mekune ka hetre thangan, matre xatua angeice troa maca trootro. Jëne tro lai a ini angeice la aqane troa huliwaane la hnei angeice hna inin, matre atreine angeice troa huliwaane hnyawane la Tusi Hmitrötr.
5 Itus Comment raisonner: Loi e troa atre hnyawa ka hape hetrenyi thene la ka ini tusi me easë la itus Comment raisonner, nge ce huliwaane lapane jë me angeic. Amamane jë la itre ixatua hna hamëne nyine troa nyiqaane ithahnata, me aqane troa sa la itre hnyinge göi Tusi Hmitrötr, maine pena aqane troa sa la itre hnyinge ka ajolëne la maca ka loi. Huliwaane jë lai itus ngöne la kola etid, matre amamane la itre xaa aqane troa ithahnata kowe la itre atr matre iele angatr. Ijije tro la itusi celë a akökötrene e kuhu hni së la mejiun, me atrune trootro la aja së troa qaja la la ithuemacanyi ne Baselaia.
6 Amamane jë la enyipiewekëne la itre icasikeu: Ame la itre icasikeu ne la ekalesia, ene la icasikeu ne cainöje trootro, me ini ne cainöje trootro qa thei Akötresie, ke, nyine troa xatua së kowe la huliwa ne cainöje trootro. Am’asë hi la itre trepene mekune thatraqane la huliwane cainöje trootro, ke, hna ce wange hmaca me amacaane hnene la itretre cainöje ka atreine me ka maca. Amamane hnyawane jë la enyipiewekëne la itre icasikeu, nge mekune ju la aqane troa xatua angeice matre troa hane sin’itr’ej. E sine palahi angeice la itre icasikeu, ke, troa kapa la ixatua ka ijije göi troa ketre atre drei Iesu ka nyipici.
7 Tro palahi së a wange la tulu hne së hna amaman. Tro la aja së me majemine së ngöne la huliwa ne cainöje trootro, a amamane la ejuine la madrine së kowe la nyipici. Tro la tulu së a xatuane la itre ka ini tusi troa huliwa atrunyi matre amamane la lapaune i angatr. (Luka 6:40) Tro la aqane kuca celë a xatuane la ka ini tus, troa goeëne la huliwa ne cainöje trootro kösë ketre hnëqa me olene laka angeice fe a hane cainöjëne la maca ka loi. — 1 Tim. 1:12.