Kola Aja Tulu Ka Loi Hnene La Itre Thöth
1 Easë a madrine laka alanyimu la itre thöthe the së ka ‘atrune la atesiwa i Iehova.’ (Sal. 148:12, 13) Alanyimu la ka co petrekö la itre macatre. Ngo, angatr’a kökötre ngöne la ua, hnene la hna ce huliwa thenge la tulu hna hamëne hnene la itre keme me thin, me itre xaa qatre thupe ne la ekalesia. Tha tro kö a xome ahmalohmaloeëne la tulu ne la itre thöthi ka nango tru hë, me itre thupëtresij. Maine ce macatre i epuni hi, ke, troa hetre thangane koi epuni la itre ixatua celë.
2 Hna majemine nyitipune la itre ka tru hë hnene la itre ka co petrekö. Hetre aja i angatre troa nyitipune la itre sine celo hnei angatre hna haiin. Angatr’a wang’atrune la itre ka nango tru, pine la emaman, kösë itre atr ka hetre atrehmekune me ka atrein. Celëhi matre, tru catre la thangane qa ngöne la hnei epuni hna kapa madrine la itre ewekë ne ua memine la itre huliwa hnei epuni hna kuca ngöne la ekalesia, ke, angatr’a nyitipune la itre aqane cainöje me aqane ujë i epun.
3 Celëhi matre, e ka tru hë epun, ke, maine tro jë hë lai a hetre hnëqa i epun. Hawe, tro la aqane ujë i epuni a nyi tulu kowe la itre ka co. Pane isa hnyinge ju ka hape ‘Nemene la tulu hnenge hna hamëne kowe la itre ka co?’ Hapeu, nyipi atr kö ni, nuetrije kö ni la qene hmo memine la “itre aja i thupëtesij”? Amamane kö ni laka eni a drengethenge me metrötrëne la keme me thineng, me itre qatre thup, memine la itre xaa qatre trahmanyi me qatre föe.’ (2 Tim. 2:22; Kol. 3:20) Ijije troa kökötre hnyawa ngöne la ua, la itre nekönatre ka co, hnene la aqane ujë i epun, ene la aqane huliwa me aqane ithahnata, ke, angatr’a goeëtiline la itre ewekë cili.
4 Ame la sipu huliwa ne la ekalesia, ke, ene la troa cainöjëne la maca ne la Baselaia. Tro epuni a xatuane la itre sine i epuni troa catr, e hetre aja i epuni troa cainöje lapa. Maine aja i epuni catre la troa xome la huliwa ne pionie, ke, troa ketr la hni ne la itre sine i epun, nge tro angatr’a hane inyitipu. E hne së hna majemine troa qejemekune ngöne la itre icasikeu, me ixatua ngöne la itre jole ne la uma ne Baselaia, ke, easë lai a amamai tulu ka loi.
5 Ngacama tha ketre thöthe hmaca kö Timoteo, ngöne la Paulo a eamo angeic, ngo loi e tro nyipunie, itre thöthi a xome thatraqai epuni la ihaji celë, kola hape: “Loi tro eö a nyi tulu kowe la nöjei ate lapaun, ngöne la tenge ewekë, me thina, me ihnim, me lapaun, me thina ka wië.” (1 Tim. 4:12) E maine epuni a nyihluei Iehova cememine la madrine me hni ka pexej, ke, troa hetre thangane ka loi kowe la itre sine i epuni thöthe ka goeë epun, nge tro epuni a xatua angatre utihë la traqa kowe la inamacan. (Efe. 4:13) Ame la itre thöthe e hnine la itre fami ka xötrei etid, ke, troa hetre aja i angatre kowe la nyipici, e hnei epuni hna hamë tulu ka loi.
6 Hune la nöjei ewekë asë ka nyipiewekë, ame la treng’aja i epuni troa xetrëne la itre thina i Akötresie, ke, kola atrunyi Iehova memine la organizasio i nyidrë. (Ite Edomë. 27:11) Hnene la itre ka hetre wangatrehmekune hna öhne laka ketre pengöne kö epuni hune la itre thöthe ne la fen. Hawe, ijine ka ijije hi la, matre troa xatuane la itre sine i epuni thöth, me huliwa catre palahi troa atrunyi Iehova. — Sal. 71:17.