Tupathe Jë Troa Atre Hnyawa La Itre Trejine Me Epun
1 Ame la aqane tro së a imelekeu memine la itre trejine me easë, ke, tha hna nyi ifegone kö e hnine la uma ne Baselaia. Easë asë hi a nyihluëne la aja i Akötresie, nge jëne la ua, caasi fe së me Iesu. (Mareko 3:34, 35) Kola ieakeu së memine la itre xane ngöne la ekalesia, ene la itre trejine me easë ngöne la ua hne së fe hna troa hane hnim. (Ioane 13:35) Celëhi matre, ame la itre ka sine la “lapa i Akötresie,” ke, loi e tro angatr’a atre hnyawa la nöjei atrene la ekalesia.—Efe. 2:19.
2 Nyipiewekë Tro Së a Atre La Eje Ne La Itre Trejin: Hapeu, atre asë kö epuni la itre ejene la itre trejine trahmanyi me föe ngöne la hna ini tusi ne la ekalesia i epun? Qa ngöne laka ala xalaithe palahi la itre atren, ijiji epuni troa atre la itre ejene la nöjei atr asë ka sin. Maine thatre palakö epuni la itre eje i angatr, ke, hapeu, meköti kö tro epuni a qaja ka hape atre angatre hnyawa hi hnei epun?
3 Tune ka fe la aqane tro së a atre la itre xan, tune la itre nekönatre ka hane sine la itre icasikeu ngöne la uma ne Baselaia? Maine jë hne së hna majemine troa ce lapa palahi memine la itre xaa sine së hi. Pëkö engazone e tro së a easenyi kowe la itre hne së hna majemi kow, ame pe, tha tro kö së a nyi ifegone la ihnimi së memine la ithuecatre së kowe hmekuje hi la ala xalaith. Loi e tro së a “atrun,” kola hape thelejëne jë troa atre hnyawa la nöjei trejine me epuni, trahmanyi me föe. (2 Kor. 6:11-13) Ene la tro së a atre hnyawa la itre eje i angatr.
4 Tro la itre trejine ka cilefë la itre icasikeu ne la ekalesia a tupathe troa atre la eje ne la nöjei ka sin. Ame la kola hëne la eje ne la ketre atr qa ngöne la ita ne cainöj, ke, tro angeic’a drenge e kuhu hni angeice laka, troa hane kapa madrine la mekune hnei angeice hna qaja, nge jëne tro fe la itre xan’a atre la eje i angeic. Ejehi laka, jole troa atre asë la nöjei atr pine laka hetre itre ka xötrei traqa troa sine la itre icasikeu. Ngo, e tro së a thelejëne troa atre la nöjei atr, ke, drei hi lai ithuecatre ka sisitria, nge easë fe hi lai a amamane laka easë a nyipiin’asë la nöjei atrene la icasikeu.—Rom. 1:11, 12.
5 Isa Thele Jë Troa Atre La Itre Xan: Ame la itre atr thup ka wange trongëne la itre ekalesia, ke, atre hnyawa hi angatre la itre trejin. Nemene la aqane kuca i angatr? Köni pengöne ka nyipiewekë: (1) Nyidrëti a ce cainöje lapa me angatr; (2) maine ijij, ke, nyidrëti a kapa la kola könë nyidrë matre troa wai angatre ngöne la itre hnalapa i angatr; nge (3) nyidrëti a sipu tro troa ibozu memine la nöjei atr, trahmanyi me föe, me itre nekönatre ngöne la hna icasikeu.
6 Hapeu, hane fe kö epuni öhne la itre aqane ka loi, matre troa atre hnyawa la itre trejine me epun? Loi e tro së a könëne la itre xane troa ce cainöje trootro me easë. Troa ce cainöje ngöne itre hnalapa trootro, maine troa ce kuca la itre iwaihmaca, maine troa ce inine la Tusi Hmitrötre kowe la ketre atr, maine troa ce hamëne trongëne pena la itre zonale së e cahu gojeny, nöjei aqane kuca lai ka sisitria matre tro së a atre hnyawa la itre trejine me easë. Ka loi fe la troa könëne la itre xane troa ihamë ngöne la hnalapa i epun, göi troa ce xen, me ce iji pena. Ka loi mina fe troa sipu tro troa easenyine la itre ka xötrei traqa, maine troa easenyine lo itre ka lapa thaup, tha kolo hmekuje kö matre tro angatr’a kökötre ngöne la ua, ngo matre tro fe së a öhnyi thangane ka loi.—Ite Huliwa 20:35; 1 Thes. 5:11.
7 Atre hnyawa hi Paulo la itre trejine me nyidrë. Hnei nyidrëti hna qaja la eje i angatre ngöne la tusi nyidrë, nge kola amamane laka nyidrëti a isa nyipiewekë angatr’asë, memine la ihnimi nyidrë ka sisitria koi angatr. (1 Thes. 2:17; 2 Tim. 4:19, 20) Celëhi matre tro la itre aqane catre së troa atre la itre trejine a amanathithi së asë.