Kola Sa La Itre Hnyinge i Nyipunie

◼ Nemene la aqane tro së a qaja amacaane la itre mekune hne së hna troa qaja ngöne la itre ijine icasikeu?

Hne së palahi hna treqene madrine la ijine tro së a itronyi ngöne la itre icasikeu ne la wiik. Itre ijine ka ijije lai, troa amamane la lapaun, me ithuecatre së koi itre xan, ngöne la easë a qejemekun. (Ite Edom. 20:15; Heb. 10:​23, 24) Loi e tro së a xome la itre mekune cili hna ce wang, ceitu memine la ketre götrane hnëqa, nge tro fe a majemine troa sa la itre hnying. Nemene la nyine tro së a kuca matre maca la itre mekune e tro së a qaja?

Ame la pane ewekë nyine troa kuca, ke, ene la troa hnëkë. Nyipiewekë catre troa pane e me thele la aliene la itre mekune hna troa wang. Tupathe ju troa xölehuje la sipu aliene la hna cinyihan. Ngacama, taane mekune hna qejepengöne hë ekö, ngo loi e troa thele la itre mekune ka hnyipixe, maine pena itre mekune hnei epuni hna ajane troa qaja atrun. Lapa mekun’asë ju lai taane mekun. Ame ngöne la kola hnëkëne la itre hnyinge nyine sa qa hnine la ketre itusi ka qejepengöne hnyawaane la ketre tusi ne la Tusi Hmitrötr, tune la itus Révélation: dénouement, ke, loi e troa tupathe troa thele la ewekë ka ihmeku ngöne la xötre hna fejane memine la hna qaja xötreithi ej. E tro së a trongëne la itre mekune celë, ke, tro lai a xatua së troa atreine waihmekun. Tro lai a xatua epuni troa hnëkëne la itre nyine sa ka loi, me öhnyi madrine ngöne la epuni a qejemekun.

Ame la itre mekune ka maca e troa dreng, ke, ene la itre ka tha jole e troa trotrohnin, nge ka maca la aqane qaja, nge itre mekune hna xome qa ngöne la itusi hna inin. Hawe, loi e troa pane nyiqaane sa hmekune la hnying, nge e thupene hë lai, ijije troa nue kowe la itre xane troa hamëne la itre xaa mekune nyine sine trongen. Tha loi kö troa aqeane la itre mekun, wanga menumenu jë, nge pë pi ijine koi itre xane troa hane hamë mekun. Isa qejemekune ju thenge la aqane ithahnata i epun, ngo tha ene kö la troa e la itre hna cinyihane hnine la itus. Ithahnatane jë fe la itre xötre hna fejan. Drenge hnyawaane ju la hna qaja hnei itre xan, matre tha tro kö a qaja hmaca la itre mekune hna ithahnatane hë.

Ka loi e troa anyimua liim, tha hape kö ngöne la nöjei paragaraf. Loi fe e tro së a hane xatuane la itre thöthi troa hane qejemekun. E maine luelue epuni e troa sa, ke, ijije tro epuni a canga qaja kowe lai taan, la paragarafe hnei epuni hna ajane troa hane sa ngön, celë hi matre tro hë nyidrë a nue koi epuni troa hane sa ngöne la paragarafe hnei epuni kö hna ketre iën.

Tro asë hi së a catre troa hetre nyine qaja ngöne la itre icasikeu ne la ekalesia, pine laka kola ajane tro la itre atren’a hane qejemekun. Pane mekune ju, tro la aja së, memine la eloine la itre mekune hne së hna qaja a kuca matre hetre thangane ka loi la itre icasikeu celë.​—⁠Sal. 26:⁠12.