Xatuane Jë La Itre Xaa Atr Troa Kapa Madrine La Etrune La Tusi Hmitrötr
1 Hnei Iesu hna hamëne kowe la itretre drei nyidrë, la ewekë hnei angatre hna ajan. Hnei Luka 24:45 hna qaja ka hape: “Ame hnei nyidëti hna fepi la ite hni angat, mate tro angate a trotrohnine la hna cinyihan.” Atre hi nyidrë laka e maine angatr’a ajane troa kepe angatre hnene la Tretretro, ke, sisitria koi angatre troa inin, me trotrohnine la Wesiula i Akötresie, ene la Tusi Hmitrötr. (Sal. 1:1, 2) Ceitune hi lai memine la easë a cainöje trootro. Ame la aja së, ke, ene la troa nyiqaane inine la Tusi Hmitrötre kowe la itre atr, ngöne la nöjei götrane ka ijije koi së troa ‘inine la nöjei atr troa trongëne la nöjei ewekë asëjëihë lo hnei Iesu hna ahnith.’ (Mata. 28:20) Maine hne së hna lapa mekune palahi la itre ewekë celë, ke, tro itr’ej’a thue ixatua koi së ngöne la easë a kuca la itre iwaihmaca.
2 E maine hnei epuni hna pane ithahnataane la itus “La Bible: Parole de Dieu ou des hommes?” epuni pëhë a sisedrëne ju la porotrike tune la:
◼ “Eni a ajane troa amamai epuni la ketre ewekë ka qejepengöne la enyipiewekëne la troa trongëne la itre eamo ne la Tusi Hmitrötr. Alanyimu la itre atr ka öhne laka jole catre troa itrotrohni me ce mele memine la itre xan. Tro së a thele jëne tuneka matre atreine tro së a imelekeu memine la itre ka lapa easenyi së? [Thuepene la hna sa hnene lai atr, fe jë kowe la götrane 167-8, paragarafe 15, nge e jë la Mataio 7:12. Qaja ju la itre xaa mekune hna cinyihane hnine la paragarafe 16.] Celëhi ketre tulu ne inamacane hna öhne hnine la eamo ne la Tusi Hmitrötr. Ame hmaca la ketre traqa ni, ke, eni a ajane troa amamai nyipë la eamo hna hamëne hnene la Tusi Hmitrötre thatraqane la itre trefëne matre hetrenyi angatre la manathith, nge atreine angatre troa ce mele madrin.” Ce wange ju matre troa bëeke hmaca troa ithahnataane la itre götrane 170-2, ka amamane la hna qaja hnene la Tusi Hmitrötre matre mele manathithi la fami.
3 E maine hnei epuni hna ithahnata kowe la ketre atr ka hetre ajane kowe la Tusi Hmitrötr, tupathe ju la aqane trofë celë, maine jë troa nyiqaane la ketre ini Tusi Hmitrötre tune la:
◼ “Maine tro epuni a ithahnata memine la itre atr, ke, angatr’asë hi a qaja ka hape aja i angatre troa mele e celë fene hnengödrai gaa tingeting, me loinöj. Ngacama celëhi la ajane la itre atr, pine nemene matre kola tiqa la fene hnengödrai hnei gomegom, me iakötrë? [Nue pi troa sa.] Jëne la itusi hnenge hna amë pe, tro epuni a öhne la hnei Tusi Hmitrötre hna qaja thatraqane la hnyinge celë?” Fe jë kowe la götrane 12, nge amamane hnyawaane ju la itre paragarafe 7 me 8. E jë la Ieremia 10:23. Qejepengöne ju la aqane tro Akötresieti a apatrene la itre musi ne la atr, me troa axulune la ketre fene hnengödrai ka tingeting, me manathithi epine palua. E jë la Hna Amamane 21:3, 4. Nge thupene lai, qaja ju ka hape: “Ame hmaca la ketre traqa ni, ke, eni a ajane troa amamai epuni la itre xaa xötre ka qejepengöne la kepine matre loi e tro së a lapa goeëne la ketre fene hnengödrai gaa pë akötr.”
4 E maine hnei epuni hna trongëne la aqane trofë ka tro meköti göi troa nyiqaane inine la Tusi Hmitrötre kowe la ketre atr, nge ka ajane hi lai atr, epuni pëhë a qaja ju ngöne la epuni a iwaihmaca ka hape:
◼ “Ame ngöne lo ketre traqa ni, ke, hne so hna ithahnataane la itre xaa kepine matre hetre thangane ka loi qa ngöne la hna inine la Tusi Hmitrötr. E troa catre kuca la itre xaa ewekë ju kö, ke, tro lai a xatua së troa kapa madrine la hnei Akötresie hna hnëkëne koi së. [E jë la Ioane 17:3.] Hne së hna acile la ketre porogarame ne ini Tusi Hmitrötre ka xatuane la itre thauzane lao atr troa atrepengöne hnyawa la hnei Akötresie hna thingehnaean, memine la aqane tro së a amadrinë Nyidrë.” Loi e troa amamane la itus Connaissance, me ce wange la itre taane mekune ngöne la itre meken, me amacaane la aqane tro së a inine la Tusi Hmitrötre kowe la ketre atr.
5 E maine epuni a xatuane la itre atr ka hni ka meköti troa kapa madrine la etrune la Wesiula i Akötresie, ke, ixatua ka tru lai hnei epuni hna hamën. Ame la inamacane hnei angatre hna inine jëne la ini ne lai itusi celë, ke, kösë ketre “sinöe ne mele,” ka troa hamë manathithi koi angatr.—Ite Edo. 3:18.