Loi e Tro Palahi a Lapa Mekune La Itre Ewekë Qa Koho
1 Ngöne la kola qejepengöne la xötr’atr ka mele enehila, memine la aqane mekun’eje kowe la itre drai hnapin, hna cinyihane hnene la ketre zonal, ene The New York Times ne 31 diseba, 1994, ka hape: “Kola xouene la itre drai ka troa xulu hnene la itre atr. Angatr’a xou, pine laka pëhë huliwa, nge tru la nöjei pengöne meci ka fetra, nge kola elë la thupene xen, ketre tune fe la itre jole enehila.” Ngöne la nöjei götrane hne së hna goeëne laka tha lapaune hë la atr kowe la mel. Hnene laka itre temoë i Iehova së, kola upi së hnene la huliwa ne cainöje trootro troa ithahnata. Ejehi laka, caasi hi la itre jole hna cile kow hnene la nöjei atr’asë, ngo jëne la lapaune së memine la mejiune së kowe la itre hna thingehnaeane hnene la Wesiula i Akötresie lo hne së hna hni kow, tha ceitune kö la aqane mekune së kowe la mel, me aqane goeëne së la itre drai ka troa xulu, memine la itre atr’e trön.—Isa. 65:13, 14, 17.
2 Nyipici laka, alanyimu la itre atr ka hni ka menyike ka drenge la ithuemacanyi hne së hna trofë koi angatr, hnene laka, lolo la aqane goeëne së la itre drai hnapin, nge mamacile hnyawa koi së la ecatrene la hna mejiune kow. Nyimutre la itre atr ka hleuhleu me akötr, ngo ame pe angatr’a madrin’atraqatre ngöne la angatr’a ithahnata me easë. Pine laka, angatr’a kapa madrine la itre ewekë hnei angatre hna dreng, ene pe mekune ju angatre troa inine la Tusi Hmitrötre me easë. Ngo ame itre xaa ijin, ke, kola pi ithahnata hnene la itre xaa atr, matre pane uqa pi angatre qangöne la ehacene la itre jole ka ej’e thei angatr. Maine nyipici laka, nyipi ewekë tro së a drenge me wangatrune la hace ne la ketre atr, tha tro kö së a thëthëhmine la aja the së lo mekune hne së hna ajane troa traqa kow, ene la troa inine la itre atr la itre nyipici qangöne la Wesiula i Akötresie.
3 Easë a ajane troa hetrenyi la thina ka menyik ngöne la easë a ithahnata memine la itre atr ka hace. Hnei Iesu hna hamëne la tulu ngöne la nyidrëti a qaja ngöne Mataio 11:28 ka hape: “Trohemi koi ni, nyipunieti asë ange ka huliwa me hace.” Easë a ajane troa xatuane la itre atr tune la aqane kuca i Iesu. Ngo, pane goeëne hmaca ju la pune la xötre 28, hnei Iesu hna qaja ka hape: “Tro ni a amanonyi nyipunie.” Loi e troa eje the së la aja celë. Easë lai a trongëne ngöne la easë a cainöjëne la itre hna thingehnaeane hnene la Wesiula i Akötresie. Ejehi laka, tro së a atreine dreng, e hne së hna wangatrune la atr hne së hna ithahnata memin, me amamane laka easë a hane kapa la hace i angeic; ketre, nyipiewekë catre nge jëne iamele la troa atreine qatixenyëne ngöne la easë a cainöjëne trongëne la maca ka loi ne la Baselaia, ke jëne tro lai a xatuane la itre jole ne la nöjei atr.—Mata. 24:14.
4 Tha ceitune kö la huliwa së memine la itre droketre, ngöne laka, angatr’a thele nyine la itre mec. Hnei Paulo aposetolo hna qejepengöne hnyawa ngöne 1 Timoteo 4:6, la aliene la huliwa së ngöne laka hna nyitrepen’ej hnene la “ini ka loi,” ene lo itre ini hna amë hnine la Wesiula i Akötresie. Ame la itre ka hetre jol, maine itre ka hacehni, ke, nyipiewekë troa xatua angatre troa atre Iehova. Ini angatre jë troa “hnine la nöjei ewekë e koho”—ene la itre ewekë ka ihmeku memine la mejiune ne la Baselaia. (Kol. 3:2) Maine tro la itre atr a thele catrëne me mekune kowe la Wesiula i Akötresie, ke, ijije tro angatr’a öhnyi loi ngöne la mele i angatr.—Heb. 4:12.
5 Hawe, ame la aja së, ke, ene la troa xatuane la itre atr troa catre mekune kowe la itre ewekë ka ‘meköt, me nöjei ewekë ka wië, me nöjei ewekë ka lolo, me kete nyine atrun.’ (Fil. 4:8) Nge maine tro angatr’a wangatrune la mejiune ne la Baselaia, ke, tro angatr’a hane öhnyi manathithi tuu së. Tro fe angatr’a hane melëne la madrine ka xulu qa ngöne la atrehmekune i Iehova ngöne laka tro Nyidrëti a apatrene la nöjei jole jëne la Baselaia i Nyidrë.—Sal. 145:16.