Nyitipune Jë La Lapaune i Angatr
1 Hnei Paulo aposetolo hna qejepengöne la lapaune tune “la nöjei ewekë hna mejiune kow, me nyine anyipicine la nöjei ewekë ka thaa hna goeëne kö.” Hnei nyidrëti mina fe hna qaja ka hape, “thateine kö troa amadi [Akötresie] e pëkö lapaun.” (Heb. 11:1, 6) Hnei Paulo hna xatua së troa lapaun, me aciaciane ej, nge loi e tro pala hi së a akökötrene ej.—2 Kor. 4:13; Kol. 2:7; 2 Tim. 2:22.
2 Nyimutre catre la itre atr ka lapaun, hna qaja hnei Tusi Hmitrötr. Ngöne la mekene 11 ne la itusi Heberu, Paulo a hamëne la ketre lisi hna fejane la ëjene la itre temoë ka nyimutre, angetre amamane hnyawa la etrune la lapaune i angatr. Abela fe e hnine la lisi cili, angeice la pane atr hna humuthe pine la lapaune i angeic. Kolo fe a hane e Noa, pine laka jëne la lapaune i nyidrë, hnei nyidrë hna amamane la xoue ka ijiji Akötresie, celë hi matre mele ju pë hë nyidrë memine la fami i nyidrë. Hna wange aloi Aberahama fe hnene la lapaune i nyidrë memine la idrengethenge. Hna wangatrunyi Mose pine laka jëne la lapaune i nyidrë, hnei nyidrë hna cile huti kösë nyidrë a goeëne la Atre ka thaa mama kö. Qeadridri catre la lis, celë hi matre hnei Paulo hna qaja ka hape thaa ijiji nyidrëti kö troa e asë angatre itre ka lapaun. Drei la ole së pine laka ijije tro së a acatrene la lapaune së qa ngöne la hne së hna ce wange me mekune hmaca la “thina ka hmitöte me thina ka ijiji Akötesie” ka eje thei angatr!—2 Pet. 3:11.
3 Ngöne lo ijine Iesu e celë fen, ke, hnei nyidrëti hna hnyinge ka hape: “E traqa ha la Nekö i ate, hape u, tro angeic a öhne la lapaun e celë fen?” (Luka 18:8) Haawe, hetre trejine kö ka mele ngöne la götrane i epun, tulu nyine xötrethenge la lapaune i angeic? Hapeu, hane kö së öhne la itre trahmanyi me föe, me itre thöth, me itre qatr, ka melëne la lapaune i angatre ka catre koi Iehova, tune lo itre nyipi hlue i Akötresieti ekö ngöne lo hneijine kola cinyihane la Tusi Hmitrötr?
4 Itre Tulu Ne Lapaune Ngöne La Hnedrai Së: Alanyimu catre the së la itre atr ka amamai tulu hnene laka catre nge tru la lapaun! Maine kolo tulu nyine tro së a xötrethenge hna hamëne hnene la itretre thupe ka cilëmekene la tronge së. (Heb. 13:7) Ngo, thaa angatre hmekuje kö la itre tulu ne lapaun. Hetrenyi fe hnine la itre ekalesia la itre atr ka hekö catre hë angatre nyihlue i Iehova, nge angatre pala hi a catre ngacama kola traqa koi angatre la itre jole ka nyimutre.
5 Easë a haine la itre trejine me easë föe ka lapaun, a nyimu macatre ne cile huti angatr, qëmekene la icilekeu ne la itre fö i angatr. Ketre tune fe la itre itupathi ka eje thene la itre keme maine thine ka hetrune caasine la itre nekö i angatr. Hetrenyi fe the së la itre sine föe, itre qatre föe hë ngo thaa hnei angatre hna paatre ngöne la itre huliwa ne la ekalesia, ngacama pëkö ixatua hna hamëne hnene la itre sinee i angatr. (Wange ju la Luka 2:37.) Easë mina fe a haine la lapaune ne la itre sine wezipo. Alanyimu catre la itre ka mele nyipici koi Iehova ngacama thaa tru kö la hnei angatre hna atrein, ke, celë hi ewekë ka ajolë angatre troa hane xome la itre xaa hnëqa ka tru. Hetrenyi fe la itre thöthi Temoë ka amamane ngöne uma ne ini, la lapaune i angatre qëmekene la icilekeu. Kola kökötre trootro the së la xoue Akötresie ngöne la easë a goeëne la aqane mele nyipici ne la itre pionie ngöne la angatre a cile catre qëmekene la itre jole ka tru, ngöne la nöjei macatre. Tui Paulo, thaa ijiji së kö troa tupathe troa qaja asë la itre ewekë hna melëne hnene la itre trejine trahmanyi me föe ngöne la huliwa ne Baselaia, memine fe la itre aqane catre lapaune i angatr!
6 Eje hi laka, nyine iakeukawanyi nge nyine ixatua la kola hamëne me amamane koi së la itre tulu ne la itre atr ka hetrenyi la lapaune celë. (1 Thes. 3:7, 8) Easë a troa thele troa xomi tulu hnyawa qa ngöne la lapaune i angatr, pine laka, “aja i [Iehova] la itete kuca la nyipici.”—Ite Edo. 12:22.