Drei La Ka Ijije Troa Cainöje Trootro?
1 Ngöne la epuni a troa nyiqaane cainöje trootro, hapeu, hane fe kö epuni mekune tui Mose? Hnei nyidrë hna qaja ka hape: “Ekölö i hi ni Joxung, tha ate ne cainöje kö ni ekö, me enehila thupene la hnei cilieti hna ulati kowe la hluewa i cilie.” (Eso. 4:10) Maine epuni a mekune tune lai, ke, ma epuni jë fe a cile hnö troa cainöje trootro. Ngo, hnei Iesu hna “ahnithe koi së troa cainöje kowe la nöj, me anyipicine.” (Ite Huliwa 10:42) Haawe, nemene la nyine tro së a kuca, matre itretre cainöje trootro së ange ka atreine troa qaja trongëne la maca ka loi?
2 Thaa tro jë kö së atreine cainöje trootro, e hne së hna mejiune kowe la inamacane hne së hna kapa qa la fen. Hnei Paulo hna qaja ka hape, “tha alanyimu kö la ite ka inamacanëne la ngönetei,” me hape “hmo xajawa i Akötesie la inamacane ne fen.” (1 Kor. 1:26; 3:19) Hnei Iesu hna iëne la itre aposetolo i nyidrë, qa thene la itre aminatr—a foa qa thei angatr, itre ka nyi i. Hna goeë amenyi angatre hnene la itre hene ne hmi ka pi draië, kösë itre ka “tha’te tus, me tha hna inin.” Pine laka, kola goeëne la itre aposetolo thenge la aqane mekune i fen, haawe, ame kowe la itre xane ke, thaa ijije angatre kö troa cainöj. Ngo, jëne la ketre cainöje ka lolo, me ka hetre thangane hna cile fë hnei Peteru ngöne la ijine Penetekos, nyimutre pi hë la itre atr hna ketr hnene lai cainöj, matre ala 3 000 lao ka xome la Bapataiso!—Ite Huliwa 2:14, 37-41; 4:13.
3 Iehova a Ini Së Troa Atreine Cainöj: Hnei Paulo hna qaja ka hape: “Ijiji huni qa thei Akötesie.” (2 Kor. 3:5) Hnei Iehova, ene la qeqene inamacan, hna inine la itre milio lao atr troa cainöjëne la nyipici ne la Baselaia kowe la itre xan. (Is. 54:13) Kola mama la thangane ka loi memine la wene ne la huliwa celë, ngöne la etrune la ka xomi bapataiso lo macatre hnapan, traqa koi ala 338 491 la etrun, kösë itre “itusi nyine qaja aloin.” (2 Kor. 3:1-3) Nyimutre catre la itre kepin, matre tro së a catre cainöjëne me mejiune kow la itre ewekë hne së hna inine qa thei Iehova.
4 Hnene la organizasio i Akötresie hna acile la ketre porogarame nyine ini thatraqane la huliwa ne cainöj e cailo fene hnengödrai. Jëne la itre xötre qa hnine la Tusi Hmitrötr, memine la itre itusi nyine xatuane troa trotrohnine la Tusi Hmitrötr, easë a ini nge easë fe a atreine troa “nyipi meköti mate hnëkë” troa cainöj. (2 Tim. 3:16, 17) Alanyimu catre la itre atr ka haine la atrehmekun, hna öhne hnine la itre itusi Sasaiatri. Ketre ceitun, Hnene la ketre zonale ne Sued hna qaja ka hape: “Kola mama ngöne la lapaune hna cainöjëne fë hnene la itretre Temoë i Iehova, hetrenyi la ketre inamacane ka sisitria qa hnine la Tusi Hmitrötr, nge kolo fe a amamane la esisitriane la atrehmekune ne eje e cailo fene hnengödrai.
5 Jëne la ixatua hna hamëne e hnine la faifi lao icasikeu së ngöne la wiik, memine la porogarame së göi troa e me inine la Tusi Hmitrötr, memine la eamo hne së hna kapa ngöne la Ini ne Cainöje Trootro Qa Thei Akötresie, memine la ixatua hna hamëne koi së hnene la itre trejine ka hetre atreine ngöne la huliwa ne cainöje trootro, memine fe la ixatua qa thene la uati hmitrötre i Iehova, ke, thaa luelue kö së laka, Iehova a goeë së ceitu me itre ka ijije fe hë troa cainöj. “Loi pe eëhuni a ewekë thei Keriso xajawa i Akötesie thenge la nyipici, nge qa thei Akötresie.”—2 Kor. 2:17.
6 Maine easë a thupëne la nöjei ijine matre troa ini së hnei Akötresie jëne la organizasio i Nyidrë, ke, pëkö kepine matre tro së a cile hnö ngöne la huliwa i Nyidrë, maine xou pena. Atreine tro së a cainöje koi itre xane ngöne la madrin, nge xecie koi së laka, tro Iehova a amanathithine la trenge catre hne së hna kuca thatraqane la huliwa i Nyidrë.—1 Kor. 3:6.