Itre Keme Me Thin—Inine Jë La Itre Nekö i Epuni Troa Cainöj
1 Manathithi la itre ekalesia së, qangöne laka, nyimutre la itre nekönatre ka hetre nyipi ajane tro nyihlue i Akötresie. (Ate cai. 12:1) Angatre fe la ange hna hane hëne hnei Iehova, troa atrunyi Nyidrë. (Sal. 148:12-14) Qa ngöne lai, loi e tro fe la itre keme me thine a hane majemine troa inine fe la itre nekö i angatre la aqane troa qaja amamane la lapaune i angatre kowe la itre xan, jëne la huliwa ne cainöjëne la Baselaia.—Deut. 6:6, 7.
2 Inine Jë La Itre Nekönatre Troa Kökötre Ngöne La Ua: Nyipi ewekë troa inine la itre nekönatre ngöne la co catre petre kö angatr, troa ce tro memine la itre keme me thine troa cainöje trootro. Qëmekene troa cainöj, hnëkëne jë la itre nekö i epuni troa hane eköthe hnyawa la huliwa cili. Pane canga amacane jë la nyine tro angatre a kuca ngöne la itre hnalapa trootro. Ijije fe tro la itre nekönatre ka co a hane hamëne la itre tarak, me itre pepa nyine hëne la itre atr kowe la Uma ne Baselaia. Ijije fe troa hane upe la itre xane ka atreine e tus, troa e la itre xötre ne la Tusi Hmitrötre ngöne la hna cainöje trootro. Ketre, atreine fe hi tro angatre a xome la itre aqane nyiqaane ithahnata ka xoxopatr, matre troa hamëne la itre zonal. Nge maine kola öhne trootro laka angatre pala hi a kökötre ngöne la huliwa, haawe, ini angatre jë troa hane jelenyipicine la hnei angatre hna qaja jëne la Tusi Hmitrötr. Nyimutre la itre nekönatre ka cainöje hë, hetrenyi fe hë angatre la itre jëne tro fë zonal, nge angatre pala hi a iwai hmaca. Sisitria kö e tro la nekönatre a ce huliwa memine la ketre ka tru, ngo thaa me ketre nekönatre kö. Ijije tro la ka tru a qejepengöne kowe la itre atr, ka hape, kola inine hnene la nekönatre troa cainöje trootro.
3 Hna sipo ixatua hnene la ketre nekönatre jajinyi ka co kowe la itre qatre thup, matre troa hane ketre atre cainöjëne la Baselaia. Ngacama faifi hi lao macatre i nyën, nge thatreine palakö e tus, ngo hetre thangane catre la aqane trofë nyëne la maca ne Baselaia ngöne itre hnalapa trootro. Hnei nyëne hna mekune hnyawa la hnen la itre xötr, me fe la Tusi Hmitrötre hmekune itre ej; nyëne a sipone jë la atr troa e, nge thupene lai, nyëne a hamëne ju la aliene la itre mekene tusi cili.
4 Loi e tro fe la tulu hna amë pe hnene la itre keme me thin, a inine la itre nekönatre la etrune la troa hetrenyi la ketre porogarame ka lolo, matre tro pala hi a hetre ijine troa cainöj. Nyipi ewekë tro la itre keme me thine a amë la ketre ijine ngöne la wiik göi troa cainöje nge troa eatrëne ej, matre tro la itre nekönatre a atre laka, hnepe ijine lai ngöne la wiik, nyine troa amë thatraqai cainöje trootro.
5 Maine troa inine hnyawa la itre nekönatre troa cainöje trootro cememine la ihnimi me madrin, haawe, tro ha hetre hni ne ajane i angatre elanyi troa xome la itre xaa hnëqa ka tru, maine jë troa pionie. (1 Kor. 15:58) Loi e tro asë hi së a xatuane la itre nekönatre ka ce me së, troa kökötre hnyawa matre hane fe angatre nyihlue i Iehova me atrunyi Nyidrë.