Hapeu, Hetrenyi Epuni La “Ka Ithinyine Ngöne La Ngönetrei”?
1 Nyipici laka, hetre aja së asë hi troa aeatrëne la hnëqa së, ene la troa cainöjëne la maca ka loi thenge la hne së hna atrein. Ngo nyimutre fe la itre trejine me easë trahmanyi me föe, ka öhne la ejolene la troa kuca apexejene la huliwa cili, pine laka, itre xaa sine mec, maine itre sinatr angatr; celë hi matre nyipi jole e tro angatre a kuca la hnei angatre hna ajan. Ketre itupathi ka tru koi angatr, ngöne la kola traqa la itre mekune ka iananazijë, matre kola hace catre ngöne la angatre a goeëne la itre xaa trejine ezi angatr, a kola catre ngöne la huliwa ne cainöj.—1 Kor. 9:16.
2 Ketre Tulu Nyine Troa Xötrethenge: Thaa hna nue Paulo aposetolo kö hnene la “ka ithinyine ngöne la ngönetei.” Akönia xëwe fë angeice koi Iehova la ewekë cili, matre troa xome trije ej; angeice a hëne la ewekë cili, kösë “kete angela i Satana” ka lepi angeic. Ngo thaa hnei paulo kö hna hmaca, angeice pe a xomihnine lai, me catre troa cainöje trootro. Thaa hnei angeice kö hna hnime la wene la hni angeic, maine eetre pena. Ohe, hnei angeice pe hna kuca la hnei angeice hna atrein. Ame la kepine matre hune pi kö angeice qa ngöne la hace cili, ke, hnene la aqane mejiune angeice koi Akötresie, hna hape: “Ijiji’ö la ihnimi gufang; ke pexeje la menenge ngöne la kucakuca.” Trenge catre pena ha la kucakuca ka eje thei Paulo, qa ngöne laka, hnei angeice hna inine troa kapa la hace ka eje thei angeic, me mejiune koi Iehova, me kowe la uati hmitrötre Nyidrë, matre troa xomihnine ahoeane la akötr.—2 Kor. 12:7-10.
3 Nemene La Aqane Troa Xomihnine Ahoean: Hapeu, kolo kö a hane sewe epuni hnene la ketre hace ka eje thei epuni troa nyihlue i Akötresie? Maine eje hi, haawe, nyitupune jë la aqane ujë i Paulo. Nge maine pëkö nyin enehila ngöne la fene celë la meci epun, ma akötre i epun, ijije tro epuni a mejiune hnyawa koi Iehova, Atre trotrohnine la itre aja i epun, nge ka troa hamëne “la men, ngo thaa qa the huni kö.” (2 Kor. 4:7) Ajane jë la ixatua hna hamëne gufane koi epuni e hnine la ekalesia, ngo the ketre mele kö. (Ite edomë 18:1) Maine epuni a öhne ka hape, jole e troa cainöje ngöne itre hnalapa trootro, thele jë pena la itre aqane troa huliwa ka lolo, matre troa cainöje ngöne la nöjei ijin, maine jëne telefone pena.
4 Maine troa xomehnöthe la aja i epuni troa cainöj, hnene la ketre ka ithinyi ngöne la ngönetrei i epun, the mekune kö ka hape pëkö hnei epuni hna hane kuca ngöne la huliwa ne cainöj. Ijije fe tro epuni a hane tui Paulo, ene la troa “anyipicine la maca ka loi ne la ihnimi gufa i Akötesie,” me kuca thenge la egöcatre memine mele ka eje thei epun. (Ite Huliwa 20:24) Loi e tro epuni a atre hnyawa laka, atraqatre la madrine i Iehova, ngöne la Nyidrëti a öhnyi epuni e catre thele troa hane cainöjëne la maca ka loi.—Heb. 6:10.