Catre Pi Së Troa Cainöj Pine Laka Easenyi Hë La Pun
1 Atraqatre la madrine ngöne la hneijine ne menu. Ngo tru mina fe hnei jole ngöne la ijine cili. Nge pine laka, xoxopatre hi la ijine troa jele la hlapa, haawe, loi e thaa tro kö a hmitre hnene la itre ka huliwa.
2 Hnei Iesu hna aceitunëne la “pune la fen” memine la kola menuëne la hlapa. (Mat. 13:39) Easë a mele enehila ngöne la pune la fen, nge hna sa ijine pe hi la traeme ne troa anyipicine “e cailo fen, kowe la nöjei nöj.” (Mat. 24:14) Pine laka, easenyi catre hë la pun, nyipi ewekë tro së a catre hane xome la huliwa ne cainöje cili. Pine nemen? Hnei Iesu hna qaja ka hape: “Atraqate la meledrai, nge xalaithe hi la angete troa menue.”—Mat. 9:37, 38; Rom. 12:11.
3 Loi e Canga Kuca Së La Huliwa Cili: Ame la Iesu a nyiqaane xome la huliwa ne cainöj, köni macatre hi nge sin, hna nue koi nyidrëti troa eatrëne la hnëqa hna upi nyidrëti troa kuca. Atrehmekune hi nyidrëti laka, thaa tro kö a hmitre troa cainöjëne la maca ka loi; öni nyidrëti ka hape: “Qânge troa cainöjëne la maca ka loi ne la baselaia i Akötesie, ke hna upi ni thatraqane lai.”—Luka 4:43.
4 Hnei Iesu hna nyitrepene thene la itretre drei nyidrë, la mekune ka eje thei nyidrë, ene la troa sikusikune troa cainöj. (Mareko 13:32-37) Celë hi kepine matre “Tha mano kö angate o drai troa ini, me cainöjë Iesu Keriso, ngöne la ēnē me nöjei hnalapa.” (Ite Huliwa 5:42) Thaa hnei angatre kö hna amë panëne ngöne la mele i angatre la itre huliwa ka thaa nyipi ewekë kö. Nge ngacama ala xalaithe hi angatr, ngo ase asë hë angatre cainöjëne la maca ka loi “kowe la nöjei ate asëjëihë e celë fen.”—Kol. 1:23.
5 Tro kö a nyipi ewekë catre koi së la troa hetrenyi lai mekune cili, ene la troa isine troa canga hane xome la huliwa ne cainöj, pine laka, easë a melëne enehila la “pune la nöjei ewekë asë.” (1 Pet. 4:7) Hnei Iehova hna amë la ketre drai memine la traeme ne troa nyipune la nöjei ewekë asë. (Mat. 24:36) xoxopatre pe hi la hnepe ijine troa xome la huliwa ne cainöj. Celë hi kepine matre, loi e tro pala hi së a catre troa thele la itre atr ka ala nyim, me hane ce thawa me angatre la maca ka loi.
6 Easenyi hë la pune la fen, qa ngöne lai, maine tro pala hi së a hane xome la huliwa ne cainöj, tro hë së a madrine troa qaja koi Iehova tui Iesu ka hape: ‘Ase hë huni umuthe la huliwa hnei cilieti hna nunuë nie troa kuca.’—Ioane 17:4.