Cainöjëne Jë La Maca Ka Loi Cememine La Mejiune Atraqatr
1 Ame ngöne lo hneijine i Iesu, hnei nyidrë hna upe la itretre drei nyidrë troa cainöjëne la maca ka loi ne la Baselaia, me troa “inine la nöjei nöj’asëjëihë.” (Mat. 24:14; 28:19, 20) Hna wangatrune hnene la Itretre Anyipici Iehova la hnëqa cili, celë hi matre, ame hë ngöne la pune la hnaatruedre hadredre ne macatre, kola kökötre la etrune la itre trejine e cailo fen, 5 900 000 la etrun, ngöne la 234 lao hnapet. Drei la ketre iatrunyi ka tru kowe la Tretretro së e koho hnengödrai!
2 Easë hë enehila a troa xejë la hnaatruedriwaanene macatre. Kola thele hnene la ithupëjia me easë troa thungijë së troa kuca la hnëqa së ka tru, ene la troa cainöjëne la Baselaia, me inine la itre atr. Angeice a tupathi së jëne la fene hnengödrai celë, me thele troa huli së, me xome la traeme së, me ananazijë së jëne la itre huliwa me itre aja ka thaa nyipi ewekë kö kowe la mele së. Thaa loi kö tro së a nue la fene celë troa köjane koi së la ka nyipi ewekë kowe la mel, ngo tro pe së a ketre isa amamane jëne la Wesi Ula i Akötresie la huliwa ka sisitria ene la—troa kuca la aja i Iehova. (Rom. 12:2) Kola hape, troa drengethenge la hna qaja hnei Tusi Hmitrötr, ene la troa ‘cainöjëne la wesi ula ngöne la itre ijine ka ijij, me ngöne itre ijine ngazo, nge kuca asë jë la qa së.’—2 Tim. 4:2, 5.
3 Loi e Troa Hetrenyi La Mejiune Ka Catr: Nyipi ewekë tro la itre keresiano a “cile huti nge pë ethan, me kapa hnyawa la aja i Akötesie asë.” (Kol. 4:12) Ame la hnepe hnëewekë hna hape “mejiune ka catr” ke kola qaja la “aqane catre ielene maine catre lapaun; pëkö luelue thene la atr.” Nemene la nyine tro la itre Keresiano, a catre mejiune kow? Troa catre lapaune laka, troa eatre hnyawa la Wesi Ula i Akötresie, nge easë enehila ngöne la hneijine ne la pun. Ceitune hi la aqane ecatrene la mejiune së me Paulo aposetolo ka qaja ka hape, ame la maca ka loi “ke, celë hi mene i Akötesie nyine amelene la nöjei ate asëjëihë kola lapaun.”—Rom. 1:16.
4 Kola nyi jëne hnei Diabolo la itre atr ka thiina ka ngazo, me itre ka iaö, matre troa ajojezine me athixötrëne la itre xan. (2 Tim. 3:13) Thaa sihngödre kö koi së la ewekë cili, ene pe easë a thele la itre aqane troa acatrene la mejiune së, laka, easë ngöne la nyipici. Thaa tro pi kö së a kukehnine göi elany, wanga troa ananazijëne la lapaune së, ngo loi e tro pala hi së a pane amë la itre huliwa ne la Baselaia ngöne la mele së. (Mat. 6:33, 34) Ketre, maine jë tro sa nango thëthëhmine laka, easenyi catre hë la pune la fen, qa ngöne laka, nango hmitre eje troa traqa. Easenyi catre hë matre nyipune pi la fen. (1 Pet. 4:7) Ngacama tro sa mekune ka hape, co hi la thangane la maca ka loi hna tro fë hë hnene la itre Temoë ngöne la itre xaa nöj, ngo nyipi ewekë pala hi troa catre thuemacane la itre atr.—Ezek. 33:7-9.
5 Ame la itre hnyinge ka tru nyine tro së a sa enehila, ke: ‘Hapeu, eni kö a hane wangatrune hnyawa la huliwa hna upi ni troa kuca hnei Iesu, ene la troa inine la itre atr? Tune kaa la eni a cainöjëne la maca ka loi, catre kö la mejiunenge laka, hetre Baselaia? Hapeu, eni kö a hane catre thele troa hane xome la huliwa ne cainöje, jëne iamele kowe la itre atr?’ Maine tro së a atrehmekune hnyawa pala hi laka, easenyi catre hë së kowe la pune la fen, haawe, tro hë së a isa thupëne hnyawa la mele së, me aqane cainöje me aqane ini së. Jëne mele hi lai koi së me kowe la itre atr ka drei së. (1 Tim. 4:16) Nemene la aqane tro së, itre hlue i Iehova, a acatrene la mejiune së?
6 Xötrethenge Jë La Tulu i Angetre Thesalonika: Paulo aposetolo a mekune hmaca lo aqane catre huliwa ne la itre trejine ne Thesalonika; hnei nyidrë hna qaja koi angatre ka hape: “Laka ame la maca ka loi huni, te tha hna traqa kö koi nyipunie hnene la tenge ewekë hmekuje hi, ngo loi e fe ngöne la men, memine la Uati Hmitöt, me nyipi kapa hnyawa; ke ate hë nyipunie la thina huni thatraqai nyipunie lo eëhuni pete kö thei nyipunie. Nge hnei nyipunie hna nyitupu huni me Joxu, me kapa la wesi ula ngöne la aköte atraqat, memine la madine qa thene la uati Hmitöt.” (1 Thes. 1:5, 6) Hnei Paulo hna qaja aloine la ekalesia ne Thesalonika, pine laka, ngacama tru la iakötrë koi angatr, ngo hnei angatre pala hi hna catre cainöjëne la maca ka loi, nge catre catre la mejiune i angatr. Nemene la ka aijijë angatre troa kuca la huliwa cili? Kola mama laka, qa ngöne la ewekë hnei angatre hna öhne thei Paulo me itre sine ce huliwa i nyidrë, ngöne laka, ka catre cainöje angatr, nge catre la mejiune i angatr, ene pe hetre thangane ka loi lai koi angetre Thesalonika. Ngöne nemen?
7 Kola mama hnyawa ngöne la aqane mele i Paulo me itre sinecetro i nyidrë laka, Uati Hmitrötre thei angatr, nge atraqatre la mejiune i angatre kowe la ewekë hnei angatre hna cainöjëne trongën. Qëmekene tro Paulo me Sila a tro Thesalonika, hna pane akötrë nyidroti e Filipi. Hna lepi nyidro, me akalabusi nyidro, me athëxeni nyidro. Ngacama catre la itupath, ngo thaa hna ananazijëne kö la ajane i nyidro troa catre cainöjëne la maca ka loi. Qa ngöne lai, hnei Akötresie hna thepe nyidro qa hnine la kalabus, me aijijë nyidro troa ithahnata memine la atre thupë kalabusi me lapa i angeic, me aijijëne fe la lue trejine cili troa sisedrëne la huliwa ne cainöje i nyidro.—Ite Huliwa 16:19-34.
8 Jëne la mene ne la Uati Hmitrötre i Akötresie, traqa ha Paulo e Thesalonika. E cili, hnei angeice hna ketre huliwa thupene ai angeic, me catre tro fë la nyipici kowe la itretre Thesalonika. Thaa hnei nyidrëti kö hna cile troa qaja la maca ka loi ngöne la nöjei ijin. (1 Thes. 2:9) Hetre mene ne catre la aqane catre cainöje i Paulo kowe la itre atr, ene pe angatre a nuetrije pi la hmi koi idrola, me hane nyihluene la nyipi Akötresie, ene Iehova.—1 Thes. 1:8-10.
9 Thatreine kö la icilekeu, troa sawa la itre ka xötrei atre la nyipici troa cainöjëne la maca ka loi. Atraqatre la ajane la itretre Thesalonika troa qaja la nyipici hnei angatre hna kapa madrin; hna upi angatre hnene la lapaune i angatre ka hnyipixe, nge angatre a mejiune laka, troa hane kapa hnei angatre la itre manathithi ka epine palua. Hnene laka, kola kökötre lolo la ekalesia, haawe, kolo fe a hane hlemu la lapaune me aqane catre huliwa i angatr, ngöne la itre götrane e Makedonia me Akaia. Qa ngöne lai, ame la Paulo a cinyihane la pane tusi nyidrë koi angetre Thesalonika, atre hë nyidrë la itre huliwa ka lolo hnei angatre hna kuca. (1 Thes. 1:7) Drei la ketre tulu ka lolo koi së!
10 Wene Ne La Ihnimi Angatre Koi Akötresie Me Itre Atr: Nemene la aqane tro sa tui angetre Thesalonika, ene la troa hetrenyi la sipu mejiune ka catr, ngöne la easë a cainöjëne la maca ka loi enehila? Hnei Paulo hna qeje angatre me cinyihane ka hape: “Tha mano kö huni mekune la huliwa i nyipunie ngöne la lapaun, memine la huliwa ngöne la ihnim.” (1 Thes. 1:3, ith. e cahu fen) Kola mama hnyawa laka, atraqatre la ihnimi angatre koi Iehova Akötresie, me kowe la itre atr hnei angatre hna cainöje kow. Celë fe ihnimi cili lai, ka upi Paulo memine la itre sinecetro i nyidrë troa ce thawa memine la itretre Thesalonika, “tha maca ka loi Akötesie hmekuje hi, ngo ite mele [i angatre] fe.”—1 Thes. 2:8.
11 Ketre tune mina fe la ejuine la ihnimi së koi Iehova, me kowe la itre sine hmi së, laka, eje a upi së troa hane xome ngöne la hni ka ajan, la huliwa ne cainöje hna upi së troa kuca hnei Akötresie. Jëne la ihnimi cili, easë a atrehmekune hnyawa laka, sipu hnëqa së la troa tro fë la maca ka loi. Maine tro së a mekune hnyawa me wangatrune la nöjei ewekë asë hnei Iehova hna hamëne koi së, matre troa eatrongë së kowe la “nyipi mel,” haawe, tro ha hetrenyi the së la ajane troa qaja kowe la itre xaa atr la itre ini ne la nyipici ka lolo, hne së hna lapaune kow, ngöne la hni së ka pexej.—1 Tim. 6:19.
12 Maine tro pala hi së a catre cainöje trootro, haawe, tro fe ha kökötre lolo la ihnimi së koi Iehova, me kowe la itre atr. Ketre, tro fe hë a upi së troa akökötrene la aqane tro sa cainöje ngöne itre hnalapa trootro, me hane xome la nöjei jëne troa tro fë la maca ka loi, hna fe koi së. Celë hi matre, loi e tro së a xome la nöjei ijine ka ijije koi së troa cainöje kowe la itre sine së, me itre ka lapa easenyi së, me itre hne së hna atre. Ngacama ala nyimu la itre atr ka troa thipetrije la maca ka loi hne së hna tro fë, ame itre xane ke, ma tro angatre a thele troa sewe së troa cainöjëne la maca ka loi, ngo eje hi laka, tro kö a hetre madrine e kuhu hni së. Pine nemen? Pine laka, atre hi së ka hape, hne së hna kuca la huliwa ka sisitria, ene la troa anyipicine la Baselaia, me xatuane la itre atr troa hane hetrenyi la jëne iamele. Nge tro Iehova a amanathithine la trenge catre hne së hna kuca troa thele la itre atr ka hni ka menyik. Ketre, maine tro së a cile kowe la itre ejolene la mel, nge tro Satana a thele troa thapa la madrine së, ngo atreine hi tro së a cile huti ngöne la mejiune së, me ngöne la aqane tro së a cainöje kowe la itre xan. Maine tro asë hi së a isa kuca la hne së hna atrein, haawe, tro ha catre la itre ekalesia tune lo ekalesia ne Thesalonika.
13 Thaa Tro Pi Kö Sa Kei Ngöne La Itupath: Nyipi ewekë mina fe troa hetrenyi la mejiun, ngöne la easë a qëmeke kowe la nöjei pengöne itupath. (1 Pet. 1:6, 7) Hnei Iesu hna qaja hnyawa kowe la itretre drei nyidrë ka hape, troa “methinë [angatre] hnene la nöjei nöj’asë.” (Mat. 24:9) Celë hi ewekë lai ka traqa koi Paulo me Sila e Filipi. Kola qaja ngöne Ite Huliwa 16 ka hape, hna kuië nyidro hnine la kalabus, me amecijiinë nyidro. Kola mama, laka, ame la kalabusi ka tru, ke, kösë ketre hnaop, nge ezine lai hna xupe xötrëne la itre hnahage ka trene laamen, nge ga hetre jëi enyin. Ngo ame pe ngöne lai kalabusi ka he nyipin, ke pëkö laam, nge co catre la jë i eny. Celë hi matre, miti catre lai göhnë hna akalabusi nyidroti ngön, hedredrei hnin, nge pui ngazo. Hane kö së mekune la akötre ka eje thei nyidro, qa ngöne laka, hna umë nyidro itre hawa memine la lue ju ka madra hna lep?
14 Ngacama kola traqa la itre itupathi cili, ngo thaa hna kötrekötre kö la lapaune i Paulo me Sila. Hetrenyi la mejiune atraqatre e kuhu hni nyidro, ene pe kola acatrene la aja i nyidro troa nyihlue i Iehova, ngacama kola traqa la itupath. Hna amamane hnyawa la mejiune i nyidro ngöne la xötre 25 ne la mekene 16, ngöne lo Paulo me Sila a “thith me nyima koi Akötesie.” Ngacama hna umë nyidroti hnine la kalabus, ngo xecie koi nyidroti laka Akötresieti a kepe nyidro, ene pe hnei nyidroti hna nyima jë draië matre troa hane drei nyidro hnene la itre xaa hna oth! Nyipi ewekë tro sa hetrenyi la mejiune cili, ngöne la easë a qëmeke kowe la itre ewekë ka tupathe la lapaune së.
15 Nyimutre la itre itupathi hnei Diabolo hna atë koi së. Maine jë troa icilekeu memine la hnepe lapa. Nyimutre mina fe la itre trejine ka cile kowe la itre itupathi ka xulu qaa thei mus. Kola cile fe kowe la icilekeu ne la itre perofeta thoi. Hetrenyi fe la itre ejolene göi mani, me itre ewekë hna kukehnine thatraqane la mel. Kola cile hnene la itre thöthi kowe la itre itupathi ne la itre sine ce ini angatr. Tune kaa la aqane tro sa hune qa ngöne la itre itupathi cili? Nemene la nyine troa kuca matre troa hetrenyi la mejiune atraqatr?
16 Ame la ewekë hnapan, ke nyipi ewekë troa acatrene la isa aqane imelekeu së me Iehova. Ame lo Paulo me Sila e hnine la kalabus, thaa hnei nyidroti kö hna nyiulili pine la ewekë ka traqa koi nyidro, maine hleuhleu pena. Hnei nyidroti pe hna canga xëwe koi Akötresie jëne la thith, me atrunyi Nyidrë hnene la itre nyima. Pine nemen? Pine laka, lolo catre la isa aqane imelekeu i nyidroti memine la Tretretro i nyidro e hnengödrai. Nyidroti a atrehmekune hnyawa laka, meköti la hnei nyidroti hna akötre pin, nge emele i nyidro e hune la ihnatrapaime i Iehova—Sal. 3:8.
17 Ketre tu së mina fe enehila, ame la easë a qëmeke kowe la itre itupath, nyipi ewekë tro së a canga xëwe koi Iehova. Paulo a xatua së itre keresiano troa ‘cengöne amamane koi Akötesie la ite aja së; nge tro ha thupëne la ite hni së me ite mekune së, hnene la tingetinge ka sisitia qathei Akötesie hune la nöjei mekune asë.’ (Fil. 4:6, 7) Drei la ithuecatre ka tru, la troa atre laka, thaa tro kö Iehova a nue së caasi hi troa cile kowe la itre itupath! (Is. 41:10) Ce Nyidrëti pala hi me easë, ngöne la nöjei ijine easë a nyihlue i Nyidrë cememine la nyipici me mejiune atraqatr.—Sal. 46:7.
18 Ame la ketre ixatua ka sisitria ngöne la easë a amamane la mejiune së ka tru, ke, ene la troa catre kuca pala hi la huliwa i Iehova. (1 Kor. 15:58) Hna akalabusi Paulo me Sila, pine laka, hnei nyidroti hna catre cainöjëne pala hi la maca ka loi. Hapeu, hnei nyidroti hna hmaca troa cainöj, pine laka, tru la itre itupath? Ohe, hnei nyidroti pala hi hna sisedrëne la cainöje i nyidro, hnine la kalabus, nge thupene la hna sei nyidroti qaa cili, haawe, hnei nyidroti hna tro Thesalonika me lö hnine la sunago i angetre Iudra matre troa ‘ithahnatane me angatre la itre hna cinyihan.’ (Ite Huliwa 17:1-3) Maine tro së a hetrenyi la mejiune atraqatr, maine lapaune koi Iehova, nge thaa luelue kö së laka, easë ngöne la nyipici, haawe, pëkö ka troa “iananyi shë memine la ihnimi Akötesie thei Keriso Iesu Joxu shë.”—Rom. 8:35-39.
19 Itre Tulu Ne Mejiune Atraqatre Ngöne La Hneijne Së: Nyimutre la itre atr ka tui Paulo me Sila, ka amamane enehila la itre tulu ne mejiune atraqatr. Kola qaja hnene la ketre trejine föe ka mele pe qa ngöne lo iaxösisi e Auschwitz, la ecatrene la lapaun, memine la mejiune ne la itre trejine trahmanyi me föe ngöne la itre hna iaxösisi cili. Nyidroti a qaja ka hape: “Ame ngöne la ketre ijine kola hnyinge koi eahun, hnene la ketre sooce hna faitrë ni. Öni angeice ka hape, ‘Nemene la nyine tro huni a kuca koi epun? Maine tro huni a othi nyipunie, ke pëkö koi nyipunie. Maine tro huni a akalabusi nyipunie, ketre pë pala hi koi nyipunie. Maine tro huni a upi epuni kowe la itre hnë iaxösisi, ketre thaa hnengazone kö epun. Ame pena la eahuni a qaja la pune koi epun, ene la troa humuthi epun, kösë pë fe kö xou i epun. Nemene kö la nyine tro huni a kuca koi epun?’ ” Drei la ixatua ka tru koi së, ngöne la easë a öhne la lapaune ne la itre trejine ngöne la itre iakötrë ka tru! Hnei angatre pala hi hna thele ixatua thei Iehova matre troa atreine xomihni ahoeany.
20 Easë mina fe a mekune lo mejiune ka tru ne la itre trejine me easë, hna akötrëne ngöne lo itre isi pi nöj ka enijëne la itre xaa nöje ngöne lo itre macatre ka ase hë. Ngacama angatre e kuhu hnine la itre ihumuth, hna thele pala hi hnene la itre trejine ka elemekene la ekalesia, troa ithuane ngöne la götrane la ua, lo itre trejine me angatre trahmanyi me föe. Angatre asë hi a catre lapaune me mejiune atraqatr, matre ‘pë pi kö caa ewekë hna kuca nyine isi me angatr, ka troa ie.’—Is. 54:17.
21 Nyimutre la itre trejine me easë trahmanyi me föe ka hmi caas, angatre fe a catre lapaune me xomihni ahoeany. Hna icilekeu memine la ketre trejine ne Guadeloupe, hnene la föe i nyidrë ka thaa ce hmi kö me nyidrë. Hnei eahlo hna thele troa ananazijëne la lapaune i nyidrë, me sewe nyidrë troa sine la itre icasikeu i keresiano; haawe, thaa hane kö eahlo kuci xen, me waas, me aean, me cane la itre hnaheetre i nyidrë. Ketre thaa hane kö nyidroti ithahnata koi nyidrë. Ngo eloine pe, hetrenyi pala hi e kuhu hni nyidrë la mejiune troa nyihlue i Iehova, nge nyidrëti fe a catre sipo ixatua jëne la thith; celë hi ka aijijëne lai trejine cili troa xomihnine aqeane la itre ewekë cili. Ije macatre? Thupene la 20 lao macatre, kola hane saze la föe i nyidrë. Atraqatre catre la madrine ne la trahmany, pine laka, ame hë thupen, hna hane kapa hnene la föe i nyidrë la mejiune kowe la Baselaia i Akötresie.
22 Thaa tro pi kö së a thëthëhmine la mejiune atraqatre ne la itre nekö trahmanyi me nekö jajiny, ka ini ngöne la nöjei drai, me cile kowe la itre itupathi ne la itre sine ce ini angatr, me itre xaa jole ju kö. Hna qaja hnene la ketre trejine jajinyi göne la itre itupath, ka hape: “Ame ngöne la epuni e ngöne la hna ini, kolo pala hi a uku epuni hnene la itre xane troa pi icilekeu. Nge tro la itre thöthi a metrötrë epun, e hnei epuni hna kuca tune lai.” Drei la itre itupathi hna cile kow hnene la itre thöth! Ame itre xane e angatr, ase hë angazone la aqane imelekeu i angatre me Iehova, pine laka, hnei angatre hna ixomi thiina. Loi e thaa tro pi kö a traqa tune lai koi epun! Loi e troa eje hnyawa ngöne la mekune me ngöne la itre hni së, la ajane troa thipetrije la itupath.
23 Nyimutre la itre thöthi ka ajane troa mele nyipici, ngacama tru la itre itupath. Hanawange la ketre ceitune ne la ketre jajinyi ne Faras. Ame ngöne la ketre ijin, thupene la hna iji tri, hnene la itre nekö trahmanyi hna iele angeice troa idremi me angatr, ngo hnei angeice hna thithi me kötrene lai, ene pe hna nue angeice ju hnene lai hanekö trahmany. Thupene lai, hna bëeke hmaca hnene la ketre, me qaja aloine la trenge catre ne la jajiny. Haawe, hnene la jajinyi hna hane cainöjëne koi angeice la Baselaia, me qeje pengöne la itre trepene meköti ka draië hna hamëne hnei Iehova kowe la nöjei ka ajane troa kapa la itre manathithi qaathei Nyidrë. Ame ngöne la macatre ne angeice a ini, hnei angeice hna qeje pengöne kowe la nöjei sine ce ini angeic, la itre ini hnei angeice hna lapaune kow.
24 Drei la ketre madrine ka tru koi së, ene la troa hane e së fe ngöne la itre atr hna kapa hnei Iehova, ngöne aka, easë a cainöjëne cememine la mejiune ka pexej, la aja i Nyidrë. (Kol. 4:12) Ketre, ewekë ka mingöminge la easë a amamane la lapaune së, ngöne la kola tupathi së hnene la ithupëjia me easë, ene Satana Diabolo. (1 Pet. 5:8, 9) Thaa tro pi kö së a thëthëhmine laka, Iehova a hamëne la maca ne Baselaia matre troa amele së itre ka tro fë, me angatre fe itre ka drei së. Epi tro pala hi a mama ngöne la itre mekune hne së hna axeciën, memine la itre aqane ujë së, laka, easë a amë panëne pala hi la Baselaia. Loi e tro pala hi së a catre cainöjëne la maca ka loi, cememine la mejiune atraqatr!