“Hmekënejë”

¹ Thupene la hnei Iesu hna qejepengöne la itre ewekë ka tru ka troa nyihatrene la itre drai hnapine ne la fene hnengödrai celë, nyidrëti a ithuecatre jë kowe la itretre drei nyidrë, ka hape, “hmekënejë.” (Mareko 13:33) Pine nemene matre nyipi ewekë troa hmeke hnene la itre Keresiano? Pine laka, easë a melëne la ketre hneijine ne mele ne la atr, ka jole catr. Thatreine kö tro së a nango fefenedreme ngöne la götrane la ua. Ngo troa traqa koi së la ewekë cili, e thaa hne së kö hna wangatrune la huliwa hnei Iehova hna hamëne koi së ngöne la hneijine la pune celë. Nemene pengöne la huliwa cili?

² Hetrenyi la nöje i Iehova, angatre a tro fë la maca ka loi ne la Baselaia i Nyidrë, e cailo fen—Celë hi sipu mejiune kowe la itre atr asë. Kola amamane hnene la aqane ce huliwa së memine la organizasio i Iehova, laka, easë la itre nyipi Keresiano; easë a wangatrune la ijine me enyipiewekëne troa xatuane la itre xaa atr, matre tro angatre a hane drenge la “nöjei wesi ula ne shewengönie ka tha ase palua kö.” (Ioane 6:68) Maine tro së a catre kuca pala hi la huliwa ka sisitria celë, easë hi lai a amamane ka hape, ka hmeke hnyawa së ngöne la götrane la ua.

³ Tro Jë Troa Cainöj: Loi e troa goeëne aloine pala hi hne së Itretre Anyipici Iehova, la huliwa ne cainöje së. Troa hane hetre ajane së troa xome la huliwa ne cainöj, e hetre ihnimi së koi Iehova me kowe la itre atr. (1 Kor. 9:16, 17) Maine tro së a kuca tune lai, haawe, tro hë së a hetrenyi la mel, a tune mina fe la itre atr ka drei së. (1 Tim. 4:16) Loi e eje the së la ajane troa catre tro fë pala hi, e ijije koi së, lo maca ka loi ne lo Baselaia ka sisitria, nge thaa ceitune kö memine lo itre xan—ene la Baselaia i Akötresie!

⁴ Easë a trotrohnine hnyawa la enyipi ewekëne la huliwa ne cainöj, ngöne laka,—troa nyiqaane la akötre atraqatr, nge easë pala hi a xome la huliwa cili. Qa ngöne laka, thatre kö së la drai memine la hawa, haawe nyipi ewekë tro pala hi së a hmeke ngöne la nöjei drai, me mejiune koi Iehova ngöne la thith. (Efe. 6:18) Kola haöthe pala hi la fene hnengödrai hnene la huliwa ne cainöj. Ngo easenyi hë troa afenesine la huliwa ka sisitria celë ka pëkö sane ngöne la mele ne la atr.

⁵ Catre pi së troa xötrethenge pala hi la ithuecatre hna hamëne hnei Iesu, kola hape, “hmekënejë.” Kola nyipi ewekë catre la mekune cili kowe la hneijine së enehila. Epi kapa së la mekune cili, nge the hmitre kö së troa trongëne ej. Qaane enehila, nge ngöne la nöjei drai ne mele së, catre pi së troa huliwa hnyawa ngöne la götrane la ua, loi e tro sa hlë hmek, me catre xome pala hi la huliwa i Iehova. Haawe, epi tro asë hi së a “hmekëne me inamacanepi.”—1 Thes. 5:6.