Mejiune Jë Kowe La Trenge Catr Qaathei Iehova
1 Nyimu kepin matre nyipi ewekë tro së a mejiun koi Iehova. Nyipici laka, ame la troa cainöjën la maca ka loi “e cailo fen,” ke, ketre hnëqa ka thaa hmaloi kö. (Mat. 24:14) Easë pala hi a troa cile kowe la ngazo ka jilapa the së. (Rom. 7:21-23) Ketre, “easë a ikuë me . . . itre [angela] tane la jid.” (Efe. 6:11, 12) Haawe, kola mama hnyawa laka, easë a aja ixatua. Tune kaa la aqane tro sa kapa la trenge catr qaathei Iehova?
2 Jën La Thith: Iehova a hamën gufan la uati hmitrötre i Nyidrë kowe la itre hlue Nyidrë ka sipon ej. (Luka 11:13) Hapeu, epuni kö a luelue me mekun ka hape thatrein hnyawa kö epun troa cainöj ngöne itre hnalapa trootro, e cahu gojeny, maine jëne telefon pena? Hapeu, nango hetreny thei epun la xou troa cainöj ngöne la nöjei ijin? Hapeu ma epuni pena a nanazij, qa ngöne laka, pëkö hni ne ajan ne la itre atr troa drei epun? Nge tune kaa kö e upe iele epuni jë troa nuetrij la lapaune i epun, maine aqane mele nyipici i epun? Mejiune ju koi Iehova. Sipo ixatua jë koi Nyidrë jën la thith.—Fil. 4:13.
3 Troa Ketre Inin La Tusi Hmitrötr: Tune mina fe la easë a hetreny la trenge catr qa ngön la hne së hna xen ngöne la götran la ngönetrei, haawe, tro mina fe a acatren la mele së ngöne la götran la ua, qa ngön laka hne së hna catre xeni ngöne la ua, ene la tro sa e pala hi la Wesi Ula i Akötresie, memin lo itre itus qaathen la “hlue ka nyipici me ka inamacan.” (Mat. 4:4; 24:45) Hna hnyingë Stanley Jones la ka thue trenge catr koi nyidrë troa xomihnin la itre macatre ne lapa caas nyidrë e Caina, a pëkö Tusi Hmitrötr, öni nyidrë ka hape: “Eahuni a atreine cile catr ngöne la lapaun. Eje hi laka, etid la pane nyine tro huni a kuca. Pëkö trenge catr e kuhu hni hun, e paatre kö la hne huni hna majemin, ene la ini.”
4 Troa Sin La Itre Icasikeu: Ame ngöne la ketre ijine icasikeu ne la itre Keresiano ngöne la hneijine i Iesu, hnei Iudra me Sila hna “haji ange tejin me thue cate hnene la trenge ewekë ka kösaue.” (Ite Huliwa 15:32) Ketre tune mina fe enehila, laka, kola tro la itre hne së hna dreng hnine la itre icasikeu a akökötren la ole së koi Iehova, nge troa eköth la lapaune së, me upi së troa cainöj. Kola aijiji së mina fe hnene la itre icasikeu troa iöhny memin la itretre “ce huliwa ngöne la baselaia i Akötesie, nge angatr a “amadi” së.—Kol. 4:11.
5 Aje së asë la troa hetre ixatua ngöne la itre “ijine ka aköte” celë. (2 Tim. 3:1) Ame koi angetre thele trenge catr thei Iehova, kola xecie hnyawa koi së laka: “Tro angat’ a sheshë draië hnei iape tune la aeto; tro angat’ a nyenyape, nge tha tro kö a sixetë; tro angat’ a tro, nge tha tro kö a kucakuca.”—Is. 40:31.