“Itre Atr Nyine Ahnahna” Angetre Thupën Hnyawa La Hna Axö Mamoe i Akötresie
1 Drei la ixatua hna hamën hnei Iehova cememin la ihnim, jën la Hupuna i Nyidrë, ene laka, hnei Nyidrëti hna hamën la “itre atr nyine ahnahna”! (Efe. 4:8, 11, 12, MN ) Nyimutre la itre hnëqa i angatr, tune mina fe la troa catre thupëne hnyawa la hna axö mamoe i Akötresie. (1 Pet. 5:2, 3) Tro asë hi së a kepe thangan ka loi qa ngöne lai ewekë cili ka nyipi ewekë catr koi së. Ngacama troa qëmek hne së kowe la itre jol ka tru, maine ame itre xan, tre kolo petre hi a xötrei traqa kowe la ekalesia, itre xan, tre, kola nango kucakuca hnene la ngazo, maine kolo ha jea qa ngöne la gojenyi ka meköt, haawe, eje hi lai laka, troa nyipi ewekën la mele i angatr isa ala caas ngöne la götrane la ua hnene lo lai itre atr hna hamën.—Fil. 2:4; 1 Thes. 5:12-14.
2 Ame ngöne la kola axouenyi së hnene la itre ewekë ka traqa ngöne la fen, haawe, kola amaman hnene la itretre thup hna acil laka, kola xomi angatr “tune la nyine zaene la eny, me hnapo ene la wene.” Ngöne la easë a nango kucakuca, maine easë pena a wenini fë la itre ehnefe së, nge easë a ajan troa akeukawan la hni së, Angatre a akeukawanyi së, “tune la ite di ngöne la ga qaqacile” maine “tune la ga xapo ne la giti atraqatre ngöne la nöje ka kucakuca.”—Is. 32:2.
3 Ithuecatr Kowe La Itre Ka Nanazij: Kola pane troa thele hnene la itre qatre thup troa catre thuecatr kowe la itre ka nanazij, me itre ka thaa cainöje hmaca kö, me xatua angatr troa hane xome hmaca la nöjei huliwa asë ne la ekalesia. Ala nyimu la itre atr hna xatuan hnene la itre qatre thup, troa hane sin pala hi la itre icasikeu ne la ekalesia, me hane eköth hmaca la mele i angatr ngöne la ua, uti hë la hane xome hmaca angatr la huliwa ne cainöje trootro. Ame asë hi la itre ewekë hna catre kuca hnene la itre qatre thup, itre eje hi lai a amaman la aqane hnimi së me thupë së hnei Iehova, memin la aqane eatrongë së hnene la joxu së Iesu Keriso. Hnei Iehova hna hamën la tulu ngöne la aqane hnime Nyidrë la itre xaa mamoe i Nyidrë ka tro menu hë, maine ka paatr.—Mat. 18:12-14; Ioane 10:16, 27-29.
4 Kola thel hnene la itre qatre thup la itre hatren ka amaman ka hape, maine jë kola nanazij ngöne la götrane la ua hnene la itre xan. Kola aja ixatua mina fe hnene la itre ka kucakuca, me ka thaa traqa nyimenyime hmaca kö kowe la itre icasikeu, maine ka hunyinyi ngöne la huliwa ne cainöj. Kola canga tro troa wang me xatuan hnene la itre qatre thup la itre ka nango nyiqan troa heetr me kuci ihe tun la itre atr ne fen, maine ka xötretrij pena la ekalesia. Hnene la ihnimi ne la itre qatre thup memin la hni ne ajane i angatr troa ixatua, haawe angatr a ketre sipu tro me ‘nue la mele i angatr’ matre troa hane xatuan la itre atr cili troa akökötren la ihnimi angatr koi Iehova.—1 Thes. 2:8.
5 Ame ekö hetrenyi la itre Keresiano ka iananyi memine la ekalesia, matre thaa hane hë xom la itre huliwa ngöne la ua pine laka, hna lapa tranyi angatr hnene la itre jol, tun la itre sine mec, maine itre ejolen göi mani, maine itre jol pena ngöne la hnepe lapa. Loi e troa hetre hni ne ixatua pala hi la itre qatre thup, tro angatr a amaman hnyawa laka, Iehova a thupën la nöjei mamoe asë, nge tro Nyidrëti a xatua angatr ngöne la itre ijine akötr. (Sal. 55:22; 1 Pet. 5:7) Loi e troa hmekën hnene la itretre thup la hna axö mamoe, matre tro angatr a atrehmekun ka hape, maine tro angatr a ‘easenyi Iehova, tro hë Nyidrëti a easenyi koi angatr,’ me hamën la keukawa memin la ithuecatr.—Iako. 4:8; Sal. 23:3, 4.
6 Troa Waipengön La Itre Sine Atr: Kola mama la ihnimi ne la itretre thupë mamoe ka co, ngöne mina fe la angatr a hane tro troa wang la itre ka wezipo. Hetrenyi la itre xaa atren la ekalesia, itre sine atr, angatr a hna inyiën pë hë ngöne la hnalapa, maine sine atre pë hë. Easë a trotrohnin laka thaa tru fe kö la hnei angatr hna hane cainöj, pine laka, kola kuca thenge la hna atrein. Maine jë ame hi la hnei angatr hna atrein troa cainöje kow, tre, ene hmekuje hi la itre ka traqa troa iwai, maine itre xaa ka wezipo pena, maine itre ka inyië. Nge ngacama co hi la hna atrein troa kuca, ngo ketre ixatua ka tru lai kowe la huliwa ne cainöj e cailo fene hnengödrai. (Mat. 25:15) Maine 15 menetr ne cainöje hi, ngo loi e troa hane hamën jën la rapor ne hna cainöj, ketre matre troa hane e angatre fe thene la itretre cainöje lapaa.
7 Kola wangatrun hnyawa la itre trejin, ngöne la götran ne la ua hnene la “itre atr nyine ahnahna” ngöne la hneijine celë ne la macatre, ene la hneijin ne la Drai Ne Amekunën. Drei la ketre ijin ka lolo kowe la itre qatre thup troa pane catre thel troa xatuan la itre ka nanazij asë, matre troa hetrenyi hmaca hnei angatr la madrin memin la tingeting ka xulu qa ngöne la hna ce tro hmaca me ithuecatrekeu e hnine la ekalesia! Easë a madrin ngöne la easë a öhne la itre atr cili, “lapa së angete lapaun,” kola hane sin la itre icasikeu ne la ekalesia, me hane cainöj, angatr a amaman hmaca fe la lapaune i angatr kowe la thupene mel.—Gal. 6:10, MN; Luka 15:4-7; Ioane 10:11, 14.