Loi e Tro Sa Hnim La “Neköeng”
1 Iehova la “Tetetroti ne la nöjei neköeng.” (Sal. 68:5) Kola mama hnyawa la aqane hnehengazon Nyidrë la itre neköeng, ngöne la wathebo hnei Nyidrëti hna hamën kowe la nöje Isaraela ekö, kola hape: “The tro kö a angazone la sine föe, me neköeng. E tro eö a angazo angat, nge angat’ a teije koi ni, tro ni a denge la teije i angat.” (Eso. 22:22, 23) Hetrenyi fe la itre hna amekötin hnene la Trenge Wathebo i Akötresie, göi aqane troa xatuan la itre atr cili ngöne la götrane la ngönetrei. (Deu. 24:19- 21) Hna eamon la itre nyipi hlue troa kuca la ketre ewekë hna hnëkën thatraqan la itre Keresiano, ene la “troa wange la itre neköeng, me itre sine föe ngöne la akötre i angatr.” (Iako. 1:27) Nemen la aqane tro sa xötrethenge la tulu i Iehova, ene la troa hnime me hane hnehengazon la itre ka mele e hnine la itre fami laka, keme caasi pe hi maine thin, maine ka isa hmi pena?
2 Inine Jë Ngöne La Götrane La Ua: Maine itre keme nyipunie maine thin ka lapa caasi pe, maine thaa ka ce hmi pena me epun, maine jë troa ketre jole ka tru la troa inin la Tusi Hmitrötr memine la itre nekö i epun. Ngo maine epuni a ajan tro la itre nekö i nyipunie a tru trootro me atreine wai ewekë, uti hë la itre atr ka macaj nyudren, eje hi lai laka, nyipi ewekë catr troa ini tusi pala hi, me qejepengöne hnyawa koi angatr la Tusi Hmitrötr. (Ite edomë 22:6) Nyipi ewekë catr troa ce ithanatan o drai me angatr la itre mekun ngöne la götrane la ua. (Deu. 6:6-9) Ame ngöne la itre xaa ijin, maine jë tro epuni a nango kucakuca, ngo thaa tro pi kö a cil troa ithanata koi angatr. Sipo Iehova jë troa hamën la trenge catr, me troa eatrongë epun, ngöne la kola “hia angatr ngöne la ini me ihaji i [Iehova].” —Efe. 6:4.
3 Maine nyipunie a aja ixatua ngöne la aqane troa xome la itre hnëqa hna amekötin koi epun hnei Tusi Hmitrötr, loi e troa atre hnene la itre qatre thup la itre hnei nyipunieti hna ajan. Maine jë atreine hi tro angatr a hane hamën la itre xaa mekun ka lolo, maine troa xatua epuni pena troa eköth la ketre porogaram ka loi ngöne la götrane la ua, thatraqane la hnepe lapa i epun.
4 Troa Ixatua Tune Kaa Hnei Itre Xan: Ame ngöne la hneijine i Iesu, Timoteo la ketre atr ka catre nyihlue i Iehova, ngacama angeic a mel e hnine la ketre hnepe lapa ka thaa ce hmi kö la kem memine la thine i angeic. Eje hi laka, hetre thangane catr la hnëqa hna catre xome hnyawa hnene la thin me qaaqa i angeic, ene laka, hna ini angeic la itre hna cinyihan ka hmitrötr nge co petre kö. (Ite Huliwa 16:1, 2; 2 Tim. 1:5; 3:15) Ngo hnei angeice mina fe hna hane kepe thangan la hna ce mele pala hi memine la itre xaa Keresiano, ka tui Paulo, ene hane jë hi hane qeje Timoteo hnei nyidrë ka hape, “nekönge hniminang, nge atre nyipici koi Joxu.” —1 Kor. 4:17.
5 Tune fe enehila, drei la itre thangane ka lolo e hna hane hnime hnyawa la itre neköeng jajiny me trahmany e hnin la ekalesia, hnene la itre trejin föe me trahmany ka macaj ngöne la götrane la ua! Hapeu, atre angatr asë hi hnei epun? Hane kö epuni ithanata me angatr ngöne la itre ijine icasikeu i Keresiano, me ngöne la itre xaa ijine pena? Sipone jë koi angatr troa hane ce cainöje trootro me epun. Maine jë atreine fe troa hane wang ngöne la itre xaa ijin, matre tro angatr a hane ce sin me kem maine thine i angatr, la epuni a inin la Tusi Hmitrötr memine la fami, maine ngöne la epuni a pane mano me kuci madrin. Maine troa kepe epuni hnene la itre thöthi cili ceitun me ketre sinee, tro ha canga thele hnei angatr troa xötrethenge la tulu i epun, nge canga hmala hi angatr troa kapa la itre ithuecatr qaathei epun. —Fil. 2:4.
6 Sisitria la ihnimi Iehova kowe la itre neköeng jajiny me trahmany, nge Nyidrëti a nyithupen koi së la aqane catre hnime së me xatua angatr troa hane melën la nyipici. Nyimutre la itre nekönatr ekö ka mele caasi pe me kem maine thin, maine hna ce hian hnei keme me thin ngo ka isa hmi kö, hnei angatr hna kapa la itre ithuecatre celë, matre ame hë enehila, angatre hë a hane pionie, me drikona, me qatre thup, me atre thup ka iwai trootro, me mesinare, maine itre atrene pena la Bethela. Epi tro asë hi së a thel la nöjei aqane troa “atrun” la ihnimi trejine së kowe la la itre neköeng, tune la aqane hnimi angatr hnene la Tretretro së e hnengödrai. —2 Kor. 6:11-13.