“Kapa Ju”

¹ Ame ngöne la ketre ijin Iesu a ithanata memine la itretre drei nyidrë göi ikötresae, hnei nyidrë hna qaja ka hape ame la troa thaa faipoipo tre celë hi ‘ketre ahnahna.’ Hnei nyidrëti fe hna qaja ka hape: “Ame la ateine troa kapa lai, kapa ju.” (Mat. 19:10-12) Hna cinyihane pë hë itre macatre thupen hnei Paulo aposetolo göne la itre eloin la troa thaa faipoipo, nge hnei nyidrë hna xatuan la itre xan troa xötrethenge la tulu i nyidrë, ene la troa thaa faipoipo. (1 Kor. 7:7, 38) Nyimutre la itre atr enehila ka ‘kapa’ la mele ne nekö trahmany maine nekö jajiny, me hane kepe thangane la itre eloine ej. Nemen la itre xaa eloin la troa thaa faipoipo?

² “Pëkö Ejolen” Troa Nyihlue i Akötresie: Hna trotrohnine hnei Paulo laka pine laka thaa ka faipoipo kö nyidrë, haawe ijiji nyidrëti hi troa nyihlue i Iehova nge “pëkö jolen.” Tune mina fe enehila, atreine hi tro la ketre trejin trahmany ka thaa faipoipo kö a hane sin la Ini Thatraqane La Cainöj, nge ijije fe tro la trejine ka thaa faipoipo kö a hane xome la huliwa ne pionie, me inine pena la ketre qene hlapa, me tro kowe la ketre götran gaa aja ka cainöj, me huliwa hnine Bethela, maine tro pena a xome la itre xaa hnëqa ka ketre pengöne kö hnine la organizasio. Maine jë troa tru hnei traem me ijine i angeic troa ketre sipu inine hnyawa la Tusi Hmitrötr, me mekune hnyawa la itre hnei angeic hna inin, me ithanata koi Iehova jën la thith. Eje hi laka hetre ijine fe kowe la ka thaa faipoipo troa hane xatuan la itre xaa atr. Itre huliwa asë lai ka ijij troa kuca nge ka “loi” kowe la atr ka thaa faipoipo​—1 Kor. 7:32-35; Ite Huliwa 20:35.

³ Hetrenyi la itre manathith hna troa kapa qa ngöne la hna nyihlue i Akötresie, nge pëkö ka ajolë së. hna cinyihan hnene la ketre trejine föe thupene la 27 lao macatre i nyiidro e Kenia, ka hape: “Nyimutre catr la itre sineng e celë, nge ketre tru catre mina fe la huliwa! Hne huni hna ce kuca la itre ewekë [nge] eahuni a iwai matre troa ithuecatrekeu. . . . Pine laka tru hnei ijineng nge thaa jole kö e tro ni a tro kowe la ketre götran ke thaa ka faipoipo kö ni, haawe tru catr hnei joleng ngöne la hna cainöje trootro, ene pe eni a kapa la itre manathithi ka tru.” Hnei nyiidro fe hna qaja ka hape: “Kola tro la itre macatre nge lolo catr la aqane imelekeu i eni me Iehova.”

⁴ Koi Itre Ka Thaa Faipoipo Kö, Melëne Hnyawane Jë: Hnei Iesu hna qaja ka hape ame la ka troa uku së troa thaa faipoipo, tre ene laka “thatraqane la baselaia ne hnengödrai.” (Mat. 19:12) Tune la itre xaa ahnahna laka, maine hna melën hnyawa hnene la trejin ka thaa faipoipo kö la itre hnëqa hnei angeic hna atreine troa xom, eje hi lai laka tro ha hetrenyi thei angeic la madrin memine la itre manathithi ka tru. Hna trotrohnine hnene la itre trejine ka ala nyimu ka thaa faipoipo kö la etrun la ahnahna cili, qa ngöne laka hnei angatr hna kepe thangan la itre huliwa hnei angatr hna atrein troa kuca ngöne la ijine angatr a mele caas, me mejiune tro Iehova a hamën koi angatr la inamacan memine la trengecatr.