Xötrethenge Jë Së La Thiina Ka Loi i Iehova
1 Hapeu thaa madrine kö së me thele troa olene koi Iehova, Qeqene la thiina ka loi, thupene la hne së hna pane madrin la kola lö la jö, maine hna pane xeni la ketre hnepe göxeni ka lolo catr? Kola upi së hnene la thiina ka lolo i Nyidrë troa hane xötrethenge la tulu i Nyidrë. (Sal. 119:66, 68; Efe. 5:1) Tune kaa la aqane tro sa eën la thiina ka lolo cili?
2 Thiina Ka Loi Kowe La Itre Ka Thaa Ce Hmi Kö Me Easë: Ame la ketre aqane tro sa xötrethenge la thiina ka loi i Iehova, tre ene la troa thele troa hane wangatrun la itre atr ka thaa ce hmi kö me easë. (Gal. 6:10) Maine tro sa thiina ka loi ngöne la itre aqane ujë së, eje hi lai laka tro ha hetre thangane ka lolo ngöne la aqane tro la itre atr a goeë së Itretre Anyipici Iehova memine la maca hne së hna tro fë.
3 Hanawang la ketre ceitun, ame ngöne la kola itreqe hnene la ketre trejine thöth ka pionie ngöne la ketre pital, hnei angeic hna lapa ezine la ketre qatre föe, kösë ka tru catre kö la meci eahlo hune la itre xan. Ame la kola hë angeic hnei droketre, hnei angeic hna pane nue panën la föe. Hnei angeice hna iöhnyi hmaca me eahlo ngöne la hna maketr, tru catre pi hë la madrine i eahlo. Ngacama thaa hnei eahlo kö hna hane kapa ekö la maca ka loi, ngo hnei eahlo hna qaja ka hape, enehila eahlo a öhne hnyawa laka ame la Itretre Anyipici Iehova, tre ka hnime hnyawa angatr la itre atr ka lapa ezi angatr. Ene pe hnei eahlo hna kapa troa hane nyiqaane inine lapaane la Tusi Hmitrötr.
4 Thiina Ka Loi Kowe La Itre Trejine Me Easë: Easë mina fe a xötrethenge la thiina ka lolo i Iehova, ngöne la easë a hamë ixatua kowe la itre trejine me easë. Ame ngöne la itre ijine kola traqa la itre xaa ewekë ka ngazo kowe la itre trejine me easë, easë hi la itre ka pane canga nyinyape troa xatua angatr. Easë mina fe a amamane la thiina cili ngöne la easë a thele troa xatuan la itre trejin ka pëkö gojenyi ne tro kowe la itre icasikeu, me hane wange la itre ka wezipo, me akökötrene la ihnimi së kowe la itre atr hne së hna thatre hnyawa kö hnine la ekalesia.—2 Kor. 6:11-13; Heb. 13:16.
5 Ame la ketre aqane amamane Iehova la thiina ka lolo i Nyidrë, tre ene la troa “sheng” la itre ngazo së. (Sal. 86:5) Ame la aqane tro sa xome la tulu cili thei Nyidrëti, tre ene la troa hane hnim la loi, nge troa hane canga he la ngazo ne la itre xan. (Efe. 4:32) Aqane tro hi lai a xatua së troa ce mele hnyawa memine la itre trejine me easë, ene pe troa ‘lolo me sheminge’ la aqane imelekeu së.—Sal. 133:1-3.
6 Epi tro la etrune la thiina ka lolo i Iehova a aijijë së troa elitrauje la aqane tro sa atrunyi Nyidrë, nge troa atraqatre la madrine së. Nge loi e tro la thiina cili a upi së troa thele troa xötrethenge la thiina ka lolo i Nyidrë ngöne la nöjei hne së hna troa kuca.—Sal. 145:7; Iere. 31:12.